KI HE ONGO MEʻA MALÍ
2: Ngāue Fakatimi
KO HONO ʻUHINGÁ
ʻI he ngāue fakatimi ʻa e ongo meʻa malí, ʻokú na hangē ai ha pailate mo hano tokoni pea ʻokú na maʻu ha palani folau tatau. Naʻa mo e taimi ʻoku malanga hake ai ʻa e ngaahi polé, ko e hoa taki taha ʻokú ne fakakaukau “kitaua” kae ʻikai ko e “ko au.”
TEFITOʻI MOʻONI FAKATOHITAPU: “ʻOku ʻikai te na kei toko ua, ka ko e kakano pē taha.”—Mātiu 19:6.
“Ko e nofo malí ʻoku ʻikai ko e meʻa pē ʻa ha toko taha. Ko e husepānití mo e uaifí kuo pau ke na ngāue fakataha ke ʻai ia ke lavameʻa.”—Christopher.
ʻUHINGA ʻOKU MAHUʻINGA AÍ
ʻI he malanga hake ha fekīhiaki, ko ha husepāniti mo ha uaifi ʻoku ʻikai ke na ngāue fakatimi, te na hehema ke kē kae ʻikai fakaleleiʻi ʻa e palopalemá. Ko e fanga kiʻi meʻa īkí ʻe faai atu pē ʻo hoko ko e ngaahi ʻīsiu lalahi.
“Ko e ngāue fakatimí ʻoku mahuʻinga ʻi he nofo malí. Kapau naʻe ʻikai ke u timi mo hoku husepānití, te ma loki fakataha pē kae ʻikai ko ha ongo meʻa mali—ko ha ongo meʻa ʻokú na nofo fakataha kae ʻikai loto-tatau ʻi heʻene haʻu ki he ngaahi fili mahuʻingá.”—Alexandra.
MEʻA ʻE LAVA KE KE FAÍ
SIVISIVIʻI KOE
-
ʻOku ou vakai ki he paʻanga ʻoku ou ngāueʻí ko e “meʻa kotoa pē ia ʻaʻaku”?
-
Ke maʻu ha mālōlō kakato, ʻoku ou fiemaʻu ke mavahe mei hoku hoá?
-
ʻOku ou fakamamaʻo mei he fāmili hoku hoá, neongo ʻene vāofi mo kinautolú?
TALANOA MO HO HOÁ
-
Ko e hā ʻa e (ngaahi) tafaʻaki ʻi heʻeta nofo malí ʻokú ta ngāue lelei ai ko ha timi?
-
Ko e hā ʻa e (ngaahi) tafaʻaki ʻe lava ke ta fakaleleiʻí?
-
Ko e hā ʻa e ngaahi sitepu ʻe lava ke ta fou ai ke fakaleleiʻi ʻa e laumālie ʻo ʻeta ngāue fakatimí?
FOKOTUʻU
-
Sioloto atu ki ha vaʻinga tenisi pea ʻokú mo taki taha he faʻahi. ʻI hono kehé, ko e hā ʻa e ngaahi sitepu ʻaonga ʻe lava ke ke fou ai kae lava ke ke kau fakataha mo ho hoá ʻi he timi tatau?
-
ʻI he ʻikai fakakaukau, ‘ʻE lava fēfē ke u ikuná?’ fakakaukau ‘ʻE lava fēfē ke ma ikuná?’
“Tukunoaʻi pe ko hai ʻoku tonú pe halá. Ko e meʻa ʻoku mahuʻinga ange aí ko hono maʻu ʻa e melino mo e fāʻūtaha ʻi hoʻomo nofo malí.”—Ethan.
TEFITOʻI MOʻONI FAKATOHITAPU: “ʻOua ʻe kumi pē ki he lelei ʻa kimoutolú, kae kumi foki ki he lelei ʻa e niʻihi kehé.—Filipai 2:3, 4.
