Ko ha Fakahāhā Tu‘uloa ‘o e ‘Ofa ‘a e ‘Otuá

NA‘E ‘i ai ‘a e ngaahi me‘a na‘e ui ko e ngaahi me‘a fakaofo ‘e fitu ‘o e māmani motu‘á, koe‘uhi ko e ofoofo ‘a e ‘atamai ‘o e tangatá ‘i he vakai ki aí. Neongo ia, ‘i he ‘ikai kau ai ‘a e ngaahi pilamitá, ko e ngaahi fu‘u langa ko ení ‘oku ‘ikai ke kei tu‘u. ‘I he tafa‘aki ‘e tahá, ko e Tohi Tapú, neongo na‘e hiki ia ‘e ha kau tangata anga-fakatōkilalo ‘i he ngaahi naunau ‘auhangofua, ‘oku kei tolonga pē pea kuo fakaa‘u totonu mai ia ki hotau ‘ahó ni tonu. ‘Oku lava ke tau ma‘u ‘a e falala pau faka‘aufuli ki he tohi laulōtaha ko ení.—Aisea 40:8; 2 Timote 3:16, 17.

‘I hono fokotu‘utu‘u ke hiki ‘ene ngaahi fakakaukaú, na‘e fakapapau‘i ‘e Sihova ko e ‘Otuá ko hono ‘omaí he‘ikai tuku pē ia ki he ngaahi manatu ta‘ehaohaoa ‘a e tangatá. Tānaki atu ki ai, ko e lea faingofua na‘e ngāue‘aki ‘e he kau tangata tohi ‘a e ‘Otuá ‘oku a‘u ‘o ‘ai ai ke malava ‘e he tokolahi ‘oku fakangatangata ‘a honau tu‘unga fakaakó ke nau lau ‘o mahino‘i ‘a e Tohi Tapú. (Ngāue 4:13) ‘Ikai ko e me‘a ia na‘á ke mei ‘amanekina mei he Tokotaha-Fakatupú mo ‘ene kau sekelitali fakamānava‘í? ‘Ikai ko ia pē, ko e tufaki lahi ‘o e Tohi Tapú ‘oku ‘omai ai ‘a e fakamo‘oni ‘o e ‘ofa lahi ‘a e ‘Otuá ki he‘ene fakatupu fakaetangatá, ‘o tatau ai pē pe ‘oku nofo ‘a e kakaí ‘i fē pe ko e hā ‘a e lea ‘oku nau lea‘akí. (1 Sione 4:19) Ko e mo‘oni, ko e ala ma‘u lahi ‘o e Tohi Tapú ‘oku ‘ikai ke tuku hifo ai hono mahu‘ingá ka ‘i hono kehé, ‘okú ne hakeaki‘i ia!

Ko e ngaahi me‘a ‘oku ‘i he Tohi Tapú ‘oku fakahaa‘i ai ‘a e fakamo‘oni lahi ange fekau‘aki mo e ‘ofa ‘a e ‘Otuá. Hangē ko ia kuo tau sio ki ai ‘i he ngaahi kupu ki mu‘á, ko e Folofola ‘a e ‘Otuá ‘oku fakamatala‘i ai ‘a e feitu‘u na‘a tau ha‘u mei aí, ‘uhinga ‘oku fuonounou ai ‘a e mo‘uí pea fonu ‘i he faingata‘á, mo e founga ‘e fakalelei‘i ai ‘e he ‘Otuá ‘a e tu‘ungá ni fakafou ‘i hono Pule‘angá. Kuo tau toe lāulea foki ki he ngaahi fale‘i Fakatohitapu lelei ‘aupito ‘e ni‘ihi ki he founga ke ma‘u ai ha mo‘ui fiefia mo fakafiemālie ‘i he taimí ni. (Sāme 19:7-11; Aisea 48:17, 18) Hiliō he me‘a kotoa, kuo tau ako ki he founga ‘e faka‘ata‘atā ai ‘e hotau Tokotaha-Fakatupú ‘a hono huafá mei he luma kotoa pē kuo fai ki ai ‘e he ngaahi loi ‘a Sētané.—Mātiu 6:9.

Ko e hā ha toe tohi kehe ‘e mātu‘aki mahu‘inga, mātu‘aki kaungatonu, mātu‘aki ‘aonga pea mātu‘aki fonu ‘i he ‘amanaki ki he fa‘ahinga faingata‘a‘ia ‘o e tangatá? ‘Io, ‘i he ‘ikai hangē ko e ngaahi me‘a fakaofo ‘e fitu ‘o e māmani motu‘á, ‘a ia ko e lahi taha aí na‘e fa‘u ia ke fakalāngilangi‘i ai ‘a e ngaahi ‘otua loi pe kau tangata ma‘u mafaí, ko e mo‘oni ko e Tohi Tapú ko ha fakahāhā tu‘uloa ia ‘o e ‘ofa ta‘esiokita ‘a Sihova ki he‘ene fakatupu fakaetangatá.

Kapau kuo te‘eki te ke fai ‘eni, fēfē ke ke sivisivi‘i ‘iate koe pē ‘a e Tohi Tapú. ‘I he lolotonga ní, ‘oku fai ta‘etotongi ai ‘e he Kau Fakamo‘oni ‘a Sihová ‘a e ngaahi ako Tohi tapu mo e kakai laka hake he toko ono milioná ‘i māmani lahi. ‘Oku nau lau ko ha monū ia ke tokoni‘i ‘a e fa‘ahinga loto-mo‘oní ke nau ‘ilo‘i ‘iate kinautolu pē ko e Tohi Tapú ‘oku alafalala‘anga mo‘oni, ko e Folofola fakamānava‘i ia ‘a e ‘Otuá.—1 Tesalonaika 2:13.