ʻE Lava Ke Ke Ikuna!

KUO hoko mai ʻa e taimi “ke ke lototoʻa pe, ʻo fai.” (1 Kalonikali 28:10) Ko e hā ʻa e ngaahi founga ʻe lava ke ke fai ke fakalahi ai ho faingamālie ke lavameʻá?

Fokotuʻu ha ʻaho. Ko e Potungāue ʻo e Ngaahi Sēvesi ki he Moʻuí mo e Faʻahinga ʻo e Tangatá ʻi ʻAmeliká ʻoku fakahaaʻi mai ai ko hoʻo fakapapauʻi pē ke tukú, ko e ʻuluaki ʻaho ʻi hoʻo moʻuí ʻo e tauʻatāina mei he sikaletí ʻoku totonu ke ʻi loto ia ʻi he uike ʻe ua. ʻI he founga ko iá ʻe ʻāsili ai pē ʻa hoʻo fakaueʻilotó. Fakaʻilongaʻi ʻa e ʻahó ʻi hoʻo tohimāhiná, tala ki ho ngaahi kaumeʻá, pea ʻoua ʻe liliu ʻa e ʻaho ko iá tatau ai pē kapau ʻe liliu ho ngaahi tuʻungá.

ʻAi ha “kaati tuku ifi.” ʻE ʻi ai nai ʻa e fakamatala ko ení, ʻo tānaki atu ki ai ha meʻa kehe pē ʻe ʻai nai ai ke mālohi ʻa hoʻo fakaueʻilotó:

● Ko hoʻo ngaahi ʻuhinga ki he tuku ifí

● Fika telefoni ʻo e kakai ke tā ki ai ʻi hoʻo ongoʻi te ke toe ifí

● Ngaahi fakakaukau—fakakau nai ai ʻa e ngaahi konga Tohi Tapu hangē ko e Kaletia 5:22, 23—ʻa ia te ne tokoniʻi koe ke aʻusia hoʻo taumuʻá

ʻAlu holo he taimi kotoa pē mo hoʻo kaati tuku ifí, pea lau tuʻo lahi ia ʻi he ʻaho. Naʻa mo e hili hoʻo tuku ifí, hokohoko atu ʻa e vakaiʻi ʻo e kātí ʻi ha taimi pē ʻokú ke ongoʻi ai ʻokú ke fie ifí.

Fai ki muʻa ha meʻa ke fakavaivaiʻi ʻaki ʻa e fehokotakí. Ki muʻa ʻi ho ʻaho tuku ifí, kamata hono liʻaki ha tōʻonga pē ʻoku fehokotaki mo hoʻo ifí. Ko e fakatātaá, kapau ʻokú ke ifi ʻi hoʻo ʻā hake pē he pongipongi taki taha, toloiʻi ʻa e ifí ʻi ha houa ʻe taha pe ofi ki ai. Kapau ʻokú ke ifi lolotonga ha kai pe ʻi he ʻosi pē ʻa e kaí, taʻofi ʻa e founga-tuʻumaʻu ko iá. Fakamamaʻo mei he ngaahi feituʻu ʻoku ifi ai ʻa e niʻihi kehé. Pea ʻahiʻahiʻi lea leʻo-lahi ʻiate koe pē ʻo pehē: “ʻIkai mālō. Kuó u tuku ifi.” Ko e founga ko iá te ne fai ʻa e meʻa lahi ange ʻi hono teuʻi pē koe ki he ʻaho ʻe tuku ai hoʻo ifí. ʻE toe fakamanatu atu ai kiate koe ʻe vavé ni ke ke hoko ko ha tokotaha tuku ifi.

Teuteu. ʻI he ofi mai ʻa e ʻaho ki hoʻo tuku ifí, teuteu ʻa e meʻa ke kai ko e fetongi: kāloti, pululole, nati mo e hā fua. Fakamanatuʻi ki ho kaungāmeʻá mo e fāmilí ʻa ho ʻaho tuku ifí mo e founga ʻe lava ke nau poupouʻi ai koé. Ki muʻa pē ʻi he ʻaho ko iá, fakaʻauha ʻa e tūtūʻanga efuefú, masí mo e meʻa pē ʻe hoko ko ha fakatauele—hangē ko e tuku noaʻia holo ʻa e sikaletí ʻi ho ʻapí, kaá, pe kato ho valá, pe ʻi ho feituʻu ngāueʻangá. Ko e moʻoni, ʻe faingataʻa ange ke kole ki ha kaumeʻa ha foʻi sikaleti pe fakatau mai ha puha ʻi he ala ki he toloá ʻo toʻo haké! Pehē foki, hanganaki lotu ʻo kole ʻa e poupou ʻa e ʻOtuá, ʻo fai fakamātoato ange ia hili hoʻo ifi fakaʻosí.—Luke 11:13.

Kuo “motu” ha kakai tokolahi mo honau kaumeʻa loi, mo fulikivanu ki muʻá, ʻa e sikaletí. ʻE lava foki ke ke fai pehē. ʻOku tatali mai kiate koe ha moʻui lelei ange mo ha ongoʻi ʻo e tauʻatāina lahi.

[Fakatātā ʻi he peesi 9]

ʻAlu holo he taimi kotoa pē mo hoʻo kaati tuku ifí, pea lau tuʻo lahi ia ʻi he ʻaho