Vakai ʻa e Tohi Tapú

ʻOku Totonu Ke Ke Totongi ʻa e Ngaahi Ouau Fakalotú?

ʻI HE ngaahi fonua lahi, ko e kau taki ʻo e ngaahi lotu ʻoku taku ko e lotu faka-Kalisitiané mo e ngaahi lotu ʻoku ʻikai faka-Kalisitiané ʻoku nau fiemaʻu ha totongi ki he ngaahi ouau fakalotú. Ko e ngaahi ouaú ni ʻoku kau nai ai ʻa e papitaisó, malí pe putú. Ko e totongí ʻoku lava ke aʻu ia ʻo paʻanga ʻe lauingeau, pea laui afe ʻi he taimi ʻe niʻihi.

Ko e kau faifekau ʻe niʻihi ʻoku totongi kinautolu ʻe he puleʻangá ki hono fakahoko ʻo e ngaahi ouau mo e fatongia fakafaifekaú pea ki hono fakaava fakaʻaho ʻa e fale aleá ʻaki ha lotu. Ko e ngaahi ngāue ko iá ʻoku fakahoungaʻi nai, pea ʻoku ʻi ai ʻa e fakamole ʻa e ngaahi siasí ke totongi. Ka ʻoku poupouʻi ʻe he Tohi Tapú ʻa e ngaahi tōʻonga ko ia ʻo hono fiemaʻu ha totongi ki he ngaahi ouau fakalotú pe naʻa mo hono ʻai ke ongoʻi ʻe he kakaí ʻoku fakafatongiaʻi kinautolu ke nau totongí?

“Koe Fale Fakatau”?

ʻI he taimi naʻe ʻi māmani ai ʻa Sīsū Kalaisí, naʻe ngāueʻaki ʻe he kau ʻōfisa fakalotu Siú mo e niʻihi kehe ʻa e ngaahi meʻa fakalotú ko e faingamālie ia ke maʻu ai ha tupu, tautefito ʻi he lolotonga ʻa e Pāsová. Naʻe lelei ʻa e vakai ʻa Sīsū ki he tōʻonga ko ení? ʻIkai! Ko hono moʻoní, ʻoku tala mai ʻe he Tohi Tapú naʻá ne “huaʻi ae paʻanga ʻa e kau fetongi paʻanga, mo ne fulihi ʻenau ngaahi tepile.” Naʻá ne pehē: “ʻOua ʻe ngaohi ʻa e fale o ʻeku Tamai koe fale fakatau”!—Sione 2:14-16.

Naʻe hoko ha tuʻunga meimei tatau ʻi he taimi ʻo e palōfita ko Maiká, ʻa ia naʻá ne moʻui lolotonga ʻa e senituli hono valu K.M. Ko e kau taki lotu ʻo ʻIsilelí, ko e fakamatala ia ʻa e Tohi Tapú naʻa nau “fehia ki he fakamāu” totonú, pea ko e kau taulaʻeikí naʻa nau ‘faiako ke maʻu totogi.’ Neongo ia, ʻi he taimi tatau, naʻa nau taku ʻoku poupouʻi fakaʻotua kinautolu, ʻi heʻenau pehē: “Ikai oku iate kitautolu a Jihova?” (Maika 3:9, 11, PM) Ka ko e ʻOtua ko Sihová naʻe ʻikai te ne ʻi honau lotolotongá ko ha poupou. ʻI hono kehé, naʻá ne fehiʻa ʻi heʻenau tōʻongá pea toutou ʻai ke hā mahino ia fakafou heʻene palōfitá.

ʻI he ʻahó ni ʻoku hanga ʻa e kau taki lotu tokolahi ki he ngaahi founga mānumanu tatau, ʻo ʻai ai honau ngaahi feituʻu faiʻanga lotú ko e ‘ngaahi fale fakatau.’ Ko hono moʻoní, ko e ngaahi kautaha lotú fakalūkufua ʻoku nau kau ʻi he meʻa fakakomēsialé, ʻo faʻa fai ha pisinisi tupu lahi ʻi hono fakatau atu ʻa e ngaahi fakatātā fakalotú mo e ngaahi naunau fakalotu lahi kehe. *—1 Sione 5:21.

“Kuo Mou Maʻu Taʻetotongi pea Mou ʻAtu Taʻetotongi”

ʻI hono fekauʻi ʻa ʻene kau ʻapositoló ke malangaʻi ʻa e ongoongo leleí, fakamoʻui ʻa e mahakí, pea aʻu ʻo fokotuʻu hake ʻa e maté, naʻe pehē ʻe Sīsū: “Kuo mou maʻu taʻetotongi pea mou ʻatu taʻetotongi.” (Mātiu 10:7, 8) ʻIo, ko hono kau muimui moʻoní naʻe ʻikai te  nau fiemaʻu ha totongi ki heʻenau ngaahi ngāué. ʻIkai ngata aí, ko Sīsū tonu naʻá ne fokotuʻu ʻa e faʻifaʻitakiʻangá ʻaki ʻene tauhi ki he niʻihi kehé ʻo ʻikai fiemaʻu ha totongi.

ʻI he muimui he sīpinga naʻe fokotuʻu ʻe Sīsuú, ko e ʻapositolo ko Paulá naʻá ne fakahoko ʻene ngāue fakafaifekaú “taʻe totongi.” (1 Kolinito 9:18) ʻI he taimi naʻá ne fiemaʻu ai ha paʻangá, naʻá ne ngāue ko ha tokotaha tuitui tēniti. (Ngāue 18:1-3) Ko ia ai, naʻe lava ke ne pehē fekauʻaki mo ia mo hono kaungā misinalé: “ʻOku malangaʻi ʻe he tokolahi ʻa e Folofola ʻa e ʻOtuá ko e fie maʻu ha meʻa,” ka ʻoku ʻikai ke mau pehē. (2 Kolinito 2:17, Ko e Taulua) Kae fēfē ʻa e feinga ke maʻu ha paʻanga ke ngāueʻaki ʻe he fakatahaʻangá, ki hono fakatau nai pe haea ha feituʻu faiʻanga lotu?

“ʻOku ʻOfa ʻa e ʻOtua ki ha Taha ʻOku Vekeveke Foaki”

ʻOku maʻu ʻe he Kau Fakamoʻoni ʻa Sihová ʻa e paʻanga ʻoku fiemaʻú fakafou he tokoni loto-fiefoaki. ʻOku nau ngāueʻaki ʻa e tefitoʻi moʻoni: “Ke taki taha fai ki he meʻa kuo ne tuʻutuʻuni ʻi hono loto; pea ʻoua ʻe fai ʻi he mamahi, pe ko e puʻia; he ʻoku ʻofa ʻa e ʻOtua ki ha taha ʻoku vekeveke foaki.” (2 Kolinito 9:7) ʻI he ʻuhinga ko iá, ʻoku ʻikai fiemaʻu ai ʻe he Kau Fakamoʻoní ha totongi ki heʻenau ʻū tohí pe ngaahi ngāue fakalotú, hangē ko hono fai ʻo e papitaisó, malí, pe putú. ʻOku ʻikai foki te nau vahe hongofulu pe ʻave holo ha peleti tānaki paʻanga ʻi heʻenau ngaahi fakatahá. Ko ha taha pē ʻoku loto ke tokoni ki heʻenau ngāue fakamalanga fakavahaʻapuleʻangá ʻe lava ke ne fai pehē fakafou ʻi hono tuku fakapotopoto ia ʻi he ngaahi puha tokoni ʻi honau ngaahi feituʻu faiʻanga lotú.

ʻI māmani lahi, ʻoku fakapaʻanga ai ʻe he Kau Fakamoʻoni ʻa Sihová ʻa honau ngaahi Fale Fakatahaʻangá, Holo ʻAsemipilií, ʻōfisi vaʻá, mo e ngaahi fale pulusí, pea pehē ki heʻenau ngaahi tokoni ki he fakatamakí, fakafou ʻi he ngaahi tokoni loto-fiefoaki. Ko e niʻihi, hangē ko e uitou masiva ʻa ia naʻe fakaongoongoleleiʻi ʻe Sīsuú, ʻoku lava ke nau foaki pē ha meʻa siʻisiʻi. (Luke 21:2) Ko e niʻihi kehé ʻoku lava ke nau foaki ha meʻa lahi. Ko e hā pē ʻa e tuʻungá, ko e faʻahinga ʻoku nau pipiki ki he ngaahi tefitoʻi moʻoni ʻoku ʻomai ʻi he Tohi Tapú pea foaki ʻo fakatatau ki he meʻa ʻoku nau maʻú ʻoku nau maʻu ha nonga ʻi loto, tāpuaki lahi ʻa e ʻOtuá, mo e fiefia moʻoni.—Ngāue 20:35; 2 Kolinito 8:12.

[Fakamatala ʻi lalo]

KUÓ KE FIFILI?

● Ko e hā naʻe leaʻaki ʻe Sīsū ki he faʻahinga naʻa nau fai ʻa e pisinisi ʻi he temipalé?—Sione 2:14-16.

● Naʻe tali ʻe he ʻapositolo Kalisitiane ko Paulá ha totongi ki heʻene ngāue fakalotú?—2 Kolinito 2:17.

● Ko e hā ʻa e faʻahinga foaki ʻoku fakahōifua kia Sihová?—2 Kolinito 9:7.

[Fakamatala ʻi he peesi 25]

“ʻOua ʻe ngaohi ʻa e fale o ʻeku Tamai koe fale fakatau”!—Sione 2:14-16