Ko Hono Maluʻi Ho Fāmilí mei he Fuluú

ʻI he kikite ʻa Sīsū fekauʻaki mo e ngataʻanga ʻo e fokotuʻutuʻu lolotongá, naʻá ne tomuʻa tala ai ʻe hoko fakafokifā ‘ʻi he ngaahi potu kehekehe ʻa e ngaahi mahaki.’ (Luke 21:11) Ko e fuluú * kuo fakamoʻoniʻi ko e taha ia ʻo e ngaahi mahaki ko iá.

KO E fuluú ʻoku fakatupunga ia ʻe ha vailasi, ʻa ia ko ha siemu valevale fau ia ʻoku hū ʻi he fanga kiʻi sela moʻuí ʻo puleʻi ʻenau ngāué ke faʻu ha toe ngaahi vailasi lahi ange. Ko e vailasi fuluú, ʻa ia ʻokú ne ʻohofi ʻa e halanga mānavá, ʻoku fetuku tefito ia mei he tokotaha ki he tokotaha ʻi he ʻalu ki tuʻa ʻa e huhuʻa mei he sinó ʻi he mafatuá, talé, pe naʻa mo e talanoá. ʻOku hoko ha mahaki tō ʻi he taimi ʻoku uesia ai ʻi heʻene hoko fakafokifaá ʻa e kakai tokolahi ʻi he feituʻu lahi.

ʻOku uesia ʻe he ngaahi vailasí ʻo ʻikai ngata pē ʻi he tangatá kae toe pehē foki ki he fanga manú mo e fanga manupuná. Ko e ngaahi vailasi fuluú ʻoku fakakalasi ia ki he faʻahinga A, B, pe C. Ko e kalasi A ʻa e tupuʻanga lahi taha ʻo e fuluú. Ko e faʻahinga pau ʻo e vailasí ʻoku fakakalasi tefito ia fakatatau ki he polotini ʻe ua ʻoku maʻu ʻi he fukahi vailasí: ko e hemagglutinin (H) mo e neuraminidase (N).

Ko e meʻa eni ʻoku fai ki ai ʻa e hohaʻa lahi taha fekauʻaki mo e ngaahi vailasi fuluú: ʻUluakí, ʻoku lava nai ke vave ʻaupito ʻenau tupú ʻo toutou liliu ki he tuʻunga kehekehe. Uá, ko e faʻahinga kehekehe ʻoku lava ke nau fakatahataha ʻo tupu ai ha faʻahinga foʻou. Kapau ʻoku lahi feʻunga ʻi he tuʻunga makehe ha faʻahinga pau, heʻikai nai lava ke tauʻi ia ʻe he sisitemi maluʻi ʻo e tangatá.

ʻOku faʻa hoko lahi ʻa e fuluú ʻi he lolotonga ʻa e ngaahi māhina momoko angé. ʻOku fakahaaʻi ʻi he fakatotolo ki mui ní ʻi he mokomoko ʻa e fua māfaná ʻoku hoko ai ʻa e kili tuʻa ʻo ha vailasi ko ha kilimi maluʻi ʻokú ne fakatolonga ʻa e moʻui ʻa e vailasí ʻi he ʻeá ka ʻoku toki vaia ʻi he māʻolunga ange ʻa e fua māfana ʻi he halanga mānava ʻo e tangatá, ʻo fakatupunga ai ʻa e mahakí. Ko e ʻea momokó ʻoku ʻikai te ne fakatupunga ʻa e mahaki tupu mei he vailasí, ka ʻoku lava ke ne fakatupunga ʻa e ngaahi tuʻunga ʻoku tokoni ki hono fakamafolá.

 Founga Maluʻi

ʻI hono ʻiloʻi ʻa e fiemaʻu ke mateuteú, ko e ngaahi puleʻanga lahi kuo ʻosi ʻi ai ʻa ʻenau ngaahi palani ngāue. Ka ko e hā ʻe lava ke ke faí? Tau vakai angé ki he founga maluʻi tefito ʻe tolu:

ʻAi ke mālohi ʻa e sinó: Fakapapauʻi ʻoku maʻu ʻe ho fāmilí ʻa e mohe feʻunga pea kai ʻa e meʻakai ʻa ia ʻe tokoniʻi ai ʻa e sinó ke mālohi ʻene maluʻí. ʻOku totonu ke ke kai ʻa e fuaʻiʻakau mo e vesitapolo foʻou, meʻakai uite, pea mo e polotini ʻoku ʻikai ngako, ʻa ia ʻoku ʻomai ai ʻa e ʻēsiti ʻāmino ʻoku fiemaʻu ke faʻuʻaki ʻa e sisitemi maluʻí.

Faʻu ʻa e ʻātakai ʻoku ʻikai lata ai ʻa e siemú: ʻI he lahi taha ʻe ala lavá, tauhi hoʻo funga kānitá mo e tēpilé ke maʻa fakaʻāuliliki fakaʻaho. Fufulu ʻa e meʻa ngaohi kaí mo e ʻū ipú hili hono ngāueʻaki kotoa pē, pea fō maʻu pē ʻa e tupenu kafú. Fakamaʻa ʻa e meʻa ʻoku ala ki ai ʻa e kakaí: kau ʻo e matapaá, telefoní mo e meʻa lomí. ʻO ka malava, ʻai ke hū mai ha ʻea lelei.

Tōʻongaʻaki fakafoʻituitui ʻa e fakamaʻá: Fanofano fakalelei ʻaki ʻa e koa mo e vai pe ko ha meʻa fanofano ʻoku ʻi ai ha ʻolokaholo. (Kapau ʻe lava, toʻo ha kiʻi hina fanofano tāmate siemu.) Feinga  ke ʻoua ʻe ngāueʻaki mo ha taha ʻa e ngaahi tauveli tatau ki he holo nimá pe matá, naʻa mo e ngaahi mēmipa kehe ʻo e fāmilí.

ʻOua ʻe ala ki ho matá, ihú, pe ngutú ʻaki ʻa e nima taʻefanofanó. ʻO ka ala lava, ngāueʻaki ʻa e lauʻipepa holoholó ke puke ʻaki ho ngutú mo e ihú ʻi he talé pe mafatuá pea lī leva. Fakaʻehiʻehi mei hono ngāueʻaki fakataha ʻa e ngaahi meʻangāue ʻe lava ke mafola ngofua ai ʻa e siemú, hangē ko e telefoní. ʻOku fiemaʻu ke akoʻi lelei ʻa e fānaú ki he ngaahi meʻá ni. Ko e ngaahi tōʻonga ko iá ʻoku lelei ia he taimi kotoa pē kae tautefito ʻi he lolotonga ʻa e toʻu fuluú.

Fakahāhā ʻa e Fakaʻatuʻi ki he Niʻihi Kehé

ʻOku malava ke kamata fakapipihi ki he niʻihi kehé ʻi ha ʻaho ki muʻa ke ʻasi ʻiate koe ʻa e ngaahi fakaʻilongá pea aʻu ki he ʻaho ʻe nima hili hoʻo puké. Ko e ngaahi fakaʻilongá ʻoku meimei tatau ia mo e fulū anga-mahení ka ʻoku toe lahi ange ai. ʻOku kau ai ʻa e mofi (ʻo faʻa māʻolunga), langa ʻulu, helaʻia lahi, tale pakupaku mo e felāngaaki ʻa e uouá. Ko e hafu ʻa e ihú mo e ngaahi fakaʻilonga ʻi he keté—hangē ko e tokotokakovi, lua mo e fakalele—ʻoku tō lahi ange ia ki he fānaú ʻi he kakai lalahí. Kapau ʻokú ke maʻu ʻa e ngaahi fakaʻilongá, nofo ʻi ʻapi kapau ʻe ala lava pea fakaʻehiʻehi mei hono fakapipihi ki he niʻihi kehé.

Maʻu ha mālōlō feʻunga pea inu ke lahi ʻa e vaí. Ko e ngaahi faitoʻo fakafepakiʻi ʻo e vailasí ʻoku lava ke ʻaonga ia ʻo kapau pē ʻe ngāueʻaki ʻi he ʻasi pē ʻa e fakaʻilongá. Ko e ʻesipiliní ʻoku ʻikai totonu ke ngāueʻaki ia ʻe he fānau ʻoku nau maʻu ʻa e fuluú. Kumi ki he tokoni fakafaitoʻo fakavavevavé kapau ʻoku ʻasi ʻia koe ha ngaahi fakaʻilonga hangē ha niumōniá, hangē ko e faingataʻa ʻa e mānavá, langa e fatafatá, pe langa ʻulú.

Ko hono maʻu ʻo e fuluú ʻoku lava ke hoko ko ha meʻa fakatupu manavasiʻi. Ko e mateuteú ʻe tokoniʻi nai ai koe ke ke kātekina ia. Kae mahulu hake aí, ʻe lava ke ke fakatuʻotuʻa atu ki he taimi hangē ko ia ʻoku talaʻofa ʻe he Tohi Tapú, “ʻoku ʻikai ha nofo ai te ne pehe, ʻOku ou mahaki.”—Aisea 33:24.

[Puha ʻi he peesi 13]

FAʻAHINGA FAKATUʻUTĀMAKI ʻO E FULUÚ

Ko e fulū ʻa ia naʻe ʻuluaki ʻiloʻi ʻi Mekisikou ʻi he 2009 ʻoku ʻi he kalasi H1N1, ʻo meimei tatau mo e fulū ʻi Sipeini ʻi he 1918, ʻa ia naʻe tāmateʻi ai ʻa e laui miliona. Kae kehe, ʻoku toe ʻi ai ʻa e ngaahi ʻelemēniti ʻoku maʻu ʻi he ngaahi vailasí ʻoku uesia ai ʻa e fanga puaká mo e fanga manupuná.

[Puha/Fakatātā ʻi he peesi 14]

FOUNGA ʻE ONO KE MALUʻI AI KOE MO E NIʻIHI KEHÉ

1. Puke ʻa e ngutú ʻi he talé

2. Fanofano

3. ʻAi ke hū mai ha ʻea lelei ki ho falé

4. Tauhi ia ke maʻa

5. Kapau ʻokú ke puke, feinga ke nofo ʻi ʻapi

6. Fakaʻehiʻehi mei he lulululu mo ha taha

[Puha/Fakatātā ʻi he peesi 15]

TAIMI ʻOKU HOKO AI HA MEʻA FAKAFOKIFĀ KI HE MOʻUÍ

ʻUluakí, muimui ʻi he fakahinohino ʻa e kau ʻōfisa moʻuí. ʻOua ʻe manavasiʻi pe loto-puna. ʻAi ke mālohi ʻa e tōʻonga lelei ʻoku lāulea ki ai hení. Fakaʻehiʻehi, ʻo ka ala lava, mei he feituʻu kakai tokolahí. Kapau ʻokú ke puke, ʻe tokoni lahi ke tui ha meʻa mānava feʻungamālie. Fanofano maʻu pē. ʻAi ke maʻu ha meʻakai tolonga ʻi he uike nai ʻe ua pea pehē ki he ngaahi meʻa ki he moʻui leleí mo e haisiní telia naʻa ʻikai lava ke ke ʻalu ki he falekoloá.

ʻI he ngāueʻangá, ʻi he ngaahi feituʻu faiʻanga lotú, pe ʻi ha feituʻu te ke ʻi he haʻohaʻonga ai ʻo ha kakai tokolahi, muimui ʻi he ngaahi fokotuʻu kuo ʻoatú. Feinga ke tauhi ke ʻea lelei ʻa ho ʻātakaí.

[Fakatātā ʻi he peesi 13]

Fakaʻatalahi ʻo e vailasi fulū H1N1

[Credit Line]

CDC/Cynthia Goldsmith

[Fakamatala ʻi lalo]