Kumi Tokoni

“Kapau ʻe ʻohofia toko taha ʻa Meʻa, ʻo lava, kuo ne mătuʻu nai, ʻoka ne toko ua.”—Koheleti 4:12.

ʻI HE taimi ʻoku tau maʻu ai ʻa e poupou ʻa e niʻihi kehé, ʻoku tau maʻu ai ha faingamālie lahi ange ʻo e lavameʻa ʻi ha fili—tatau ai pē pe ko hai pe ko e hā nai ʻa e fili ko iá. Ko ia kapau ʻokú ke loto ke ikuʻi ʻa e tōʻongaʻaki ʻo e ifí, ʻe fakapotopoto nai ke ke kumi tokoni ki ho fāmilí mo e kaungāmeʻá—pe ki ha taha pē ʻa ia ʻe poupou moʻoni atu mo anga-kātaki.

Fakakaukau ke kumi ki he faʻahinga kuo nau tuku ʻa e tōʻonga ko iá, koeʻuhí heʻikai ngata pē ʻi heʻenau kaungāongoʻí ka te nau tokoni lahi foki. “Ko e poupou ʻa e niʻihi kehé naʻe mahuʻinga taʻehanotatau ia kiate au,” ko e lau ia ʻa Torben, ko ha Kalisitiane ʻi Tenimaʻake. Ko Abraham, ʻa ia ʻoku nofo ʻi ʻInitia, ʻokú ne tohi: “Ko e ʻofa moʻoni kuo fakahaaʻi ʻe hoku fāmilí mo e kaungā Kalisitiané kuo tokoniʻi ai au ke tuku ʻeku ifí.” Ka ʻi he taimi ʻe niʻihi ʻoku ʻikai ke feʻunga naʻa mo e poupou ʻa e fāmilí mo e kaungāmeʻá.

“Naʻá ku ifi ʻi he taʻu ʻe 27,” ko e lau ia ʻa ha tangata ko Bhagwandas, “ka koeʻuhi ko hono ʻiloʻi ʻa e meʻa ʻoku leaʻaki ʻe he Tohi Tapú fekauʻaki mo e ngaahi tōʻonga taʻemaʻá, naʻá ku fakapapauʻi ai ke tuku. Naʻá ku ʻahiʻahi holoki. Naʻe tuku ʻeku feohi mo e faʻahinga naʻa mau feohi ki muʻá. Pea naʻá ku ʻalu ʻo kumi faleʻi. Naʻe ʻikai ola lelei ha meʻa ʻe taha. Faifai atu pē, ʻi he pō ʻe taha naʻá ku lilingi ai ʻa hoku lotó kia Sihova ko e ʻOtuá ʻi he lotu ʻo kōlenga kiate ia ke ne tokoniʻi au ke tuku ʻeku ifí. Pea naʻe iku ai ʻou lavameʻa!”

Ko e toe meʻa mahuʻinga ʻe taha ke faí ke teuteu ki he ngaahi palopalema ʻoku ngalingali te ke fehangahangai mo ia. Ko e hā eni? Ko e kupu hokó ʻoku fakamatalaʻi ai.

[Puha ʻi he peesi 5]

ʻOKU TOTONU KE KE NGĀUEʻAKI HA FAITOʻO?

Ko e ngaahi faitoʻo ke tokoniʻi ʻa e kau tuku ifí, hangē ko e palasitā nikotiní, kuo hoko ia ko ha pisinisi maʻuʻanga paʻanga ʻe laui piliona. Ki muʻa ke ngāueʻaki iá, fakakaukau ki he ngaahi fehuʻi hokó:

Ko e hā ʻa e ngaahi ʻaongá? Ko e ngaahi faitoʻo lahi ʻoku pehē ʻoku fakalahi ai ʻa ho faingamālie ke tuku ifí ʻaki hono fakasiʻisiʻi ʻa e fakaʻilonga ʻo e puke ʻi hono tukú. Neongo ia, ʻoku ʻi ai ha fakakikihi fekauʻaki mo ʻene fuoloa pea toki ʻaongá.

Ko e hā ʻa e ngaahi fakatuʻutāmakí? Ko e ngaahi faitoʻo ʻe niʻihi ʻoku malava ke ʻi ai hono ngaahi tafaʻaki kovi, hangē ko e tokotokakovi, loto-mafasia mo e fakakaukau taonakita. Manatuʻi foki ko e ngaahi faitoʻo fetongi ʻo e nikotiní ʻoku toe ʻomai pē ai ha faʻahinga ʻe taha ʻo e faitoʻo kona tapú, fakataha mo ʻene fakatuʻutāmaki ki he moʻuí. Ko ia ai, ko hono moʻoní, ko e tokotaha ʻokú ne ngāueʻakí ʻoku kei ʻi ha tuʻunga pē ʻo hono maʻunimā.

Ko e hā ʻa e ngaahi fili kehé? ʻI ha savea ʻe taha naʻe pehē ai ʻe he peseti ʻe 88 ʻo e kau tuku ifi lavameʻá naʻa nau taʻofi fakafokifā pē ʻe kinautolu ʻenau ifí taʻekau ai ha tokoni ʻa e faitoʻo kona tapú.