“Nofo Ofi Ai Pē kia Sihova!”

Fakataha-Lahi Fakavahe ʻa e Kau Fakamoʻoni ʻa Sihová

● Ko e laui afe ʻo e ngaahi fakataha-lahi ʻaho tolu ko ení, kuo fakataimitēpileʻi ia ke kamata ʻi ʻAmelika ʻi he fakaʻosinga uike ʻo Mē 21-23, ʻe toe fai foki ia ʻi he kotoa ʻo e māmaní ʻi he ngaahi māhina hoko atu aí. ʻI ʻAmelika, ʻe kamata ʻa e ngaahi kongá ʻi he ʻaho taki taha ʻaki ha polokalama tā fasi ʻi he 9:20 pongipongi. Ko e kaveinga eni ʻo e Falaité, makatuʻunga ʻi he Sāme 73:28, “ʻOku Lelei Kiate Au ke Fakaofiofi ki he ʻOtua.” Ko e malanga ʻa e seá ʻe hoko atu ai ʻa e ongo malanga “Ko e Ngaahi Fakataha-Lahí ʻOku Tokoniʻi Ai Kitautolu ke Nofo Ofi kia Sihova” mo e “ʻOku Loto-Lelei ʻa e ʻAló ke Fakaeʻa Ia.” Pea ko e malanga fakakongokonga “Faʻifaʻitaki ki he Faʻahinga Naʻa Nau Tauhi Maʻu ʻa e Fekoekoeʻi mo Sihová” ʻe lāulea ai ki he founga naʻe fai pehē ai ʻa ʻĒpalahame, Lute, Hesekaia pea mo Melé. Ko e polokalama pongipongí ʻe fakaʻosiʻaki ia ʻa e malanga he tefitoʻi fakakaukau, “Founga ʻOku ʻUnuʻunu Ofi Mai Ai ʻa Sihova kia Kitautolú.”

Ko e konga ʻuluaki ʻi he efiafi Falaité ko e “Tali ki he Ngaahi Fehuʻi Fekauʻaki mo Sihová,” pea hoko atu ai ʻa e ongo malanga “Tuku ke Hanga ʻe he Akonaki ʻa Sihová ʻo Fakafuo Koe” mo e “ʻOua ʻAupito ʻe Hoko ʻo ‘Hanu kia Sihova.’” ʻE hoko atu ai ʻa e malanga fakakongokonga konga nima “Ko e Fetuʻutakí ʻOkú Ne Tokoniʻi ʻa e Ngaahi Fāmilí ke Nofo Ofi kia Sihova.” Ko e ngaahi konga ko ení ʻoku fakakaveinga: “Sihova, ko e Fai Fetuʻutaki Lahí,” “Ngaahi Husepāniti Fetuʻutaki mo Homou Uaifí!,” “Ngaahi Uaifi Fetuʻutaki mo Homou Husepānití!,” “Ngaahi Mātuʻa, Fetuʻutaki mo Hoʻomou Fānaú!,” mo e “Fānau, Fetuʻutaki mo Hoʻomou Mātuʻá!” Ko e konga efiafí ʻe fakaʻosiʻaki ia ʻa e malanga “Fakaeʻa ʻe he Fakatupú ʻa e ‘ʻOtua Moʻui’”!

Ko e kaveinga eni ʻo e Tokonakí “Ko e Kau Angatonu ʻOku Nau Talanoa Fafale mo Ia,” makatuʻunga ʻi he Palovepi 3:32. Ko e malanga fakakongokonga konga nima “Tokoniʻi ʻa e Kakaí Ke Nau ‘Fakalelei mo e ʻOtua’” ʻe kau ki ai ʻa e “Mavahe pea ʻIkai ha ʻAmanaki,” “Naʻa Ne Fehuʻi Kiate Kinautolu,” “Fakahoko Ho Ngafa ko ha Tokoni Fakaʻevangeliō,” “Ikunaʻi Mai Kinautolu ʻAki e ʻUlungaanga Lelei,” mo e “Kītaki Faivelenga ʻi Hoʻo Ngaahi Feingá.” Hili ʻa e ongo malanga “Ko e Ngāue Taimi-Kakató ʻOkú Ne ʻAi ke Mālohi Ange Ho Vahaʻangatae mo Sihová” mo e “Ki he Faʻahinga ʻOku Nau ʻOfa kia Sihová, ʻOku ʻIkai ha Tukiaʻanga,” ʻe fakaʻosiʻaki ʻa e kongá ha malanga papitaiso, ʻa ia ʻi he hili iá ʻe ʻomai ai ʻa e faingamālie ki he faʻahinga ʻoku nau taau ke papitaisó.

Ko e polokalama ʻi he efiafi Tokonakí ʻe fakahoko ai ha malanga fakakongokonga konga valu, “ʻOua Naʻa Fakaʻatā ha Meʻa Ke Ne ʻAi Koe Ke Ke Mamaʻo Meia Sihova”—“Ko e Ngaahi Feinga Olopoto ʻa Sētané,” “Pōlepolé,” “Paʻangá,” “Moʻui Leleí,” “Ngāué” “Fakafiefiá,” “Fāmilí,” mo e “Tekinolosiá.” ʻE hoko atu ai ha tulama leʻo makehe ʻoku fakakaveinga “ʻOua ʻe Foʻi ʻi Hono Fakatonutonuʻi ʻe Sihová!” Ko e konga ʻo e ʻahó ʻe fakaʻosiʻaki ia ʻa e malanga “Nofo Ofi kia Sihova, ʻo Hangē ko Selemaiá.”

Ko e kaveinga eni ʻi he Sāpaté, makatuʻunga ʻi he Siosiua 23:8, “Mou Pikitai kia Sihova.” Hili ʻa e hiva mo e lotu pongipongí, ko e malanga fakakongokonga “Houngaʻia he ʻUlungaanga Fakatupu ʻOfeina ʻo Sihová” ʻe vakaiʻi ai ʻa e ʻulungaanga ʻe valu ko ení—“Fotungofua,” “Kaungāongoʻi,” “Houngaʻia,” “Nima-Homo,” “Taʻefilifilimānako,” “Fakamolemole,” “Fakaʻatuʻi,” mo e “Mateaki.” ʻE hoko atu ai ʻa e malanga maʻá e kakaí “ʻE Lava Fēfē Ke Ke ʻUnuʻunu Ofi ki he ʻOtuá?” Ko e konga pongipongí ʻe fakaʻosiʻaki ia ha fakamatalaʻi fakanounou ʻo e Ako Taua Leʻo fakauiké.

Ko ha konga makehe ʻi he efiafi Sāpaté ko ha tulama teunga-kakato ʻi he fokotuʻutuʻu he ʻuluaki senitulí. ʻOku fekauʻaki ia mo e hola ʻa e kau Kalisitiané mei Selusalemá pea ʻoku fakakaveinga ko e ‘Aeva i he Tui kae Ikai i he Mamata.’ Hili ʻa e tulamá, ʻe fakaʻosiʻaki ʻa e fakataha-lahí ʻa e malanga “Nofo Ai Pē ‘i he Botu Lilo i he Fugani Maoluga.’”

Palani leva he taimí ni ke maʻu ia. Ke ʻiloʻi ʻa e feituʻu ofi taha atu kiate koé, fetuʻutaki ki he Fale Fakatahaʻanga fakalotofonua ʻo e Kau Fakamoʻoni ʻa Sihová pe tohi ki he kau faipulusi ʻo e makasini ko ení. Ko e ʻīsiu ʻo Siulai-Sepitema ʻo e Taua Leʻo, ʻa e hoa ʻo ʻemau makasini ko ení, mo e Uepisaiti www.pr418.com ʻoku fakahokohoko atu ai ʻa e ngaahi feituʻu faiʻanga fakataha-lahi ʻi he Pasifiki Sauté.