Me‘a ‘Oku Lea‘aki ‘e he Mātu‘á

‘I he tupu hake ho‘o fānaú, ‘e lava fēfē ke ke tokoni‘i kinautolu ke ako ki he mahu‘inga ‘o e talangofuá? ‘E lava fēfē ke ke ako‘i kia kinautolu ‘a e ngaahi pōto‘i ‘aonga ‘i he‘enau tupu hake ‘o fu‘u lahí? Fakatokanga‘i ‘a e me‘a kuo lea‘aki ‘e he mātu‘a ‘e ni‘ihi mei he feitu‘u kehekehe ‘i he māmaní.

NGAAHI PŌTO‘I FAKAFEOHI MO E NGĀUE FAKA‘API

“‘I he taimi ‘oku mau kai fakataha ai mo talanoa ki he me‘a na‘a mau hokosia lolotonga ‘a e ‘ahó, ‘oku ako ai ‘e he ki‘i tama taki taha ‘a e founga ke fanongó. ‘I he taimi ‘oku nau sio ai ki he fine‘eikí mo e tangata‘eikí ‘okú na fanongo anga-mokomokó, ‘oku langa hake ai ‘enau fefaka‘apa‘apa‘akí mo ‘enau faka‘apa‘apa‘i kinautolú tonu.”—Richard, Pilitānia.

“‘Oku fakalotomāfana ke sio ki he‘ema fānaú ‘oku nau fefaka‘apa‘apa‘aki pea sio ‘oku nau fakalelei‘i ‘enau fetōkehekehe‘akí ‘o ‘ikai fiema‘u ‘ema tokoní. ‘Oku nau toe fetu‘utaki lelei foki mo e kakai lalahí.”—John, ‘Afilika Tonga.

“‘Oku ‘ikai ke u haohaoa, pea ‘i he taimi ‘e ni‘ihi ‘oku ou fakalotomamahi‘i ta‘efakakaukau‘i ‘a e ngaahi ongo‘i ‘eku fānaú. ‘I he taimi ‘oku hoko ai iá, ‘oku mātu‘aki mahu‘inga ke u kole fakamolemole ‘i he‘eku fehālākí.”—Janelle, ‘Aositelēlia.

“‘Okú ma ako‘i ‘ema fānaú ke nau fai ‘a e ngaahi ngāue ‘aonga ‘i ‘api. ‘I hono ako‘i kinautolu ke fai ha ngāue ke ma‘u ‘aonga ai ‘a e ni‘ihi kehé ‘oku tokoni‘i ai ‘a e fāmilí ke lele lelei mo melino pea ‘oku ‘oange ai ki he‘ema fānaú ha ongo‘i lavame‘a.”—Clive, ‘Aositelēlia.

“‘Oku ‘ikai faingofua, ka ‘oku mātu‘aki mahu‘inga ke ako‘i kia kinautolu ‘a e founga ke nau femahino‘aki aí, fefaka‘apa‘apa‘akí, mo fefakamolemole‘akí.”—Yuko, Siapani.

HAISINÍ MO E MO‘UI LELEÍ

“‘I he kei si‘i ‘ema fānaú, na‘á ma ako‘i ke na kaukau pē ‘ia kinaua pea na‘á ma ‘ai ia ko e taimi fakaoli ‘aki hono ngāue‘aki ‘a e koa ‘oku fuo hangē ha tokotahá, ko e semipū ‘oku ‘asi ai ha taha ‘eti katuni, pea mo e ngaahi me‘a kaukau ‘oku fōtunga hangē ha fanga ki‘i manú.”—Edgar, Mekisikou.

“‘I he feitu‘u na‘a mau nofo aí na‘e ‘ikai ha paipa vai, na‘á ku fakapapau‘i ma‘u pē na‘e ‘i ai ha koa mo ha poulu vai ‘i ha feitu‘u ‘oku ‘atā koe‘uhí ke lava ‘o mau fanofano ai ‘i he‘emau hū ki falé.”—Endurance, Naisīlia.

“‘Okú ma ‘oange ki he fānaú ‘a e me‘akai fakatupu mo‘ui lelei ‘i he ‘aho kotoa pē, pea ‘okú ma fakamatala‘i ‘a e ‘uhinga ‘oku mātu‘aki mahu‘inga ai ‘a e kai palanisí. ‘Oku fie‘ilo ‘a e fānaú fekau‘aki mo e ngaahi me‘a kehekehe ‘oku ngāue‘aki ‘i he ngaahi me‘akai kehekehé, ko ia ‘oku ou ‘ai kinaua ke na tokoni mai kiate au ‘i hono teuteu ‘a e me‘akaí. Ko e taimi ‘oku mau feohi fakataha ai ‘i hono fai iá ‘oku toe faka‘ai‘ai ai ‘a e fetu‘utakí.”—Sandra, Pilitānia.

“‘Oku mahu‘inga ‘a e fakamālohisinó, pea ‘i he tu‘unga ko e ongo mātu‘á, ‘okú ma feinga ke fokotu‘u ha fa‘ifa‘itaki‘anga lelei. ‘Oku sai‘ia ‘ema fānaú ‘i he‘emau tōtō, kaukau tahi, tenisi pe pasiketipolo, pe heka pasikala fakataha ko ha fāmili. ‘Oku nau ‘ilo ‘oku ‘ikai mahu‘inga pē ‘a e fakamālohisinó ka ‘oku toe fakalata foki.”—Keren, ‘Aositelēlia.

“Ko e me‘a ‘oku fiema‘u lahi taha ‘e he fānaú ko e taimi mo ‘enau ngaahi mātu‘á. ‘Oku ‘ikai ‘aupito ha toe me‘a ‘e lava ke ne fetongi ia—‘ikai ko e pa‘anga, ngaahi me‘a‘ofa, pe ko e ‘eve‘eva. ‘Oku ou tali pē ‘a e ngāue ‘i he taimi pongipongí ‘i he taimi ‘oku ako ai ‘a e fānaú. Pea ‘i he efiafí ‘oku lava ke u vahe‘i ai hoku taimi kia kinautolu.”—Romina, ‘Ītali.

AKONEKINA

“Kuó ma ‘ilo ‘oku ‘ikai ha founga pē taha ‘o e akonekina ‘oku lelei tahá; ‘oku fakatefito ia ‘i he tu‘ungá. ‘I he taimi ‘e ni‘ihi ‘oku kau ki he akonekiná ha talanoa loto-mo‘oni pea ‘i he taimi ‘e ni‘ihi ko hono to‘o mei ha ki‘i tama ha me‘a ‘okú ne sai‘ia ke fai.”—Ogbiti, Naisīlia.

“‘Okú ma ‘ai ‘ema fānaú ke nau toe lea‘aki ‘ema ngaahi fakahinohinó ke fakapapau‘i ‘oku mahino kia kinautolu. Pea ‘okú ma muimui ki he me‘a na‘á ma tala angé. Kapau ‘okú ma loto ke hoko ‘ema fānaú ko e kau fanongo pea fai ki ai, ‘oku fiema‘u ke ma fai ‘ema tafa‘akí ‘i he‘ema fakahoko ‘a e tauteá kapau te nau talangata‘a.”—Clive, ‘Aositelēlia.

“Kuó u ‘ilo‘i ‘oku ola lelei ke tulolo hifo ‘o u sio kia kinaua he taimi ‘oku ou fakatonutonu ai ‘eku ongo tamaikí. ‘Oku tokoni eni ke na tokanga kakato mai ai. ‘Oku toe faka‘atā ai kinaua ke na sio ki he anga hoku matá, ‘a ia ‘e lava ke fakahaa‘i atu ai ‘a e me‘a lahi ‘o tatau mo ‘eku ngaahi leá.”—Jennifer, ‘Aositelēlia.

“‘Okú ma feinga ke ‘oua ‘e lea ki he‘ema ongo tamaikí, ‘‘Oku hala‘atā ha‘amo fanongo mai,’ na‘a mo e taimi ‘oku hā ngali tonu ai ‘ema tukuaki‘í. ‘Ikai ko ia pē, ‘oku ‘ikai ke ma tafulu‘i ‘ema ongo tamaikí ‘i he ‘i ai ha tahá. ‘Okú ma fanafana kia kinaua pe ‘ave ki he tafa‘akí koe‘uhi ke lava ‘o ma talanoa kia kinaua ‘i he ‘ikai ha tahá.”—Rudi, Mosemipiiki.

“‘Oku fakafuongofua ‘aupito ‘a e fānaú, pea ‘oku nau sai‘ia ke fa‘ifa‘itaki ki he ni‘ihi kehé. Koe‘uhi ko iá, ‘okú ma fiema‘u ke fakafepaki‘i ‘a e tākiekina fakamele‘i ‘a e kaungāakó, mītiá, pea mo e ‘ātakai fakafonuá pea tokoni‘i ‘ema fānaú ke nau fakatupulekina e ngaahi ‘ulungaanga lelei ‘a ia ‘oku makatu‘unga ‘i he ngaahi tefito‘i mo‘oni lelei. Ko ha makatu‘unga lelei fakae‘ulungāngá ‘oku tokoni‘i ai kinautolu ke nau ‘ikai ki ha me‘a pē ‘oku fakatupu maumau.”—Grégoire, Lepupilika Temokalati ‘o Kongó.

“‘Oku fiema‘u ‘a e akonekiná ke papau, totonu, mo hu‘ufataha. Kuo pau ke mahino ki he fānaú ‘a e nunu‘a ‘o e faihalá pea ‘ilo‘i te ke fai ki ho‘o leá.”—Owen, ‘Ingilani.

 [Fakamatala ‘i he peesi 14]

“‘Oua te mou faka‘ita‘i ho‘omou fānaú, koe‘uhi ke ‘oua te nau hoko ‘o loto-mafasia.”—Kolose 3:21

 [Puha/Fakatātā ‘i he peesi 15]

PUIPUITU‘A FAKAFĀMILÍ

Lavame‘a ‘i he Tu‘unga ko ha Mātu‘a Ta‘ehoa

Ko ha faka‘eke‘eke ‘o Lucinda Forster

Ko e hā e me‘a faingata‘a taha kiate koe ‘i he tu‘unga ko ha mātu‘a ta‘ehoá?

Ko e hoko pē ko ha mātu‘á ko ha me‘a faingata‘a, ka ‘i he tu‘unga ko ha mātu‘a ta‘ehoá, ‘oku ou ‘ilo ko e me‘a faingata‘a tahá ko e ngāue‘aki hoku taimí mo e iví. ‘Oku fiema‘u e taimi ke fakahūhū ‘a e ngaahi tefito‘i mo‘oni mo e ngaahi ‘ulungaanga leleí pea kei ma‘u ha faingamālie ke mālōlō mo kakata fakataha. Kuo pau ke u fa‘a feilaulau‘i hoku taimi mālōloó ke faka‘osi ‘a e ngaahi ngāue ‘i ‘apí.

‘Oku anga-fēfē ho‘o tauhi ma‘u ‘a e fetu‘utaki lelei mo ho ongo ‘ofefiné?

Hili ha vete, ‘oku lava ke ongo‘i veiveiua mo ‘ita ‘a e fānaú. ‘Oku ou ‘ilo ‘i he malanga hake ‘a e ngaahi palopalemá, ‘oku mātu‘aki mahu‘inga ‘a e fetu‘utaki matá mo ha fiemālie ‘a e tō ‘o e le‘ó. ‘Oku ou tatali kae ‘oua ke mau nonga hifo, peá u feinga leva ke fakahaa‘i ‘eku hoha‘á ‘o ‘ikai ‘ai ia ko ha me‘a lahi. ‘Oku ou ‘eke pe ko e hā ‘ena fakakaukaú, fanongo lelei ‘aupito, pea fakahaa‘i ‘oku ou fakamahu‘inga‘i mo‘oni ‘ena ngaahi ongo‘í. ‘Oku ou mahu‘inga‘ia he‘ena akó pea fakaongoongolelei‘i kinaua ‘i he me‘a ‘okú na faí. ‘Oku mau kai fakataha ma‘u pē ‘i he tēpilé ‘i ha ‘ātakai nonga mo fiemālie. ‘Oku ou toe tala ange ma‘u pē ‘a e lahi ‘eku ‘ofa ‘ia kinauá.

‘Okú ke fakahoko fēfē ‘a e akonekiná?

‘Oku fiema‘u ‘e he fānaú ‘a e ngaahi fakangatangata pau, pea ‘oku mātu‘aki mahu‘inga ‘a e hu‘ufatahá. ‘Oku ou feinga ke anga-‘ofa kae tu‘uma‘u. ‘Oku pau ke u faka‘uhinga mo ‘eku fānaú pea fakamatala‘i ‘a e ‘uhinga ‘oku hala ai ha tō‘onga pau. ‘Oku ou toe feinga ke faka‘eke‘eke kinaua ki mu‘a ke fai ‘a e akonekiná, ke fakapapau‘i ‘a e ‘uhinga na‘á na tō‘onga pehē aí. Kapau ‘oku ou fehālaaki—ko e fakatātaá, kapau na‘á ku ma‘uhala ki ha tu‘unga—‘oku ou kole fakamolemole.

‘Okú ke ako‘i fēfē ho‘o fānaú ke nau faka‘apa‘apa ki he ni‘ihi kehé?

‘Oku ou fakamanatu kia kinaua ‘a e me‘a na‘e ako‘i ‘e Sīsuú—ke fai ki he ni‘ihi kehé ‘a e me‘a te ke sai‘ia ke fai mai kia koé. (Luke 6:31) ‘Oku ou fakalotolahi‘i ‘a e ongo tamaikí ke na fakalelei‘i ‘ia kinaua pē ‘ena ngaahi palopalemá ki he lahi taha ‘e ala lavá, pea ‘oku ou ako‘i kia kinaua ‘a e mahu‘inga hono fai ha tali anga-mokomoko mo anga-lelei he taimi ‘okú na loto-mamahi aí.

Ko e hā ‘a e me‘a ‘okú ke fai ‘i ho‘o mālōloó?

‘Oku ‘ikai lava ke mau fa‘a ma‘u ha pa‘anga ke folau ai, ko ia ‘oku mau kumi ‘i he ngaahi nusipepá ki he ngaahi fakafiefia ma‘ama‘a. ‘Oku mau ō ‘o kaime‘akai pe luelue ‘o sio he ngaahi ‘akau ‘oku tupu ‘i he feitu‘u ‘oku tō ai ‘a e ‘akaú. ‘Oku mau tō ‘a e fanga ki‘i ‘akau ‘oku ‘aonga ki he kukí ‘i he‘emau ngoué pea ma‘u ‘a e fiefia ‘i hono fili taki taha ‘emau fanga ki‘i ‘akau kuki ki he feime‘atokoní. ‘Oku mahu‘inga ‘a e fakafiefiá, na‘a mo ‘emau ō pē ki ha pa‘ake he feitu‘ú.

Ko e hā e ngaahi fiefia mo e ngaahi pale kuó ke hokosiá?

Ko e nofo ‘i ha ‘api mātu‘a-ta‘ehoa kuo hoko ‘o faingata‘a kia kimautolu, ka kuo mau toe vāofi ange fakaekimautolu, pea kuo mau ako ke fakahounga‘i ‘a e ngaahi tāpuaki ‘oku mau ma‘ú. ‘Oku ou sai‘ia he sio ki he anga ‘o e tupulaki ‘a e anga‘itangata ‘o e ki‘i tama taki taha. ‘I he ta‘u ko ení ‘okú na loto ke feohi mo au, pea ‘oku ou koloa‘aki ‘a e feohi mo kinauá. ‘Okú na ‘ilo‘i e taimi ‘oku ou fiefia ai pe mamahí pea he taimi ‘e ni‘ihi ‘okú na fā‘ofua pē ‘iate au ke u ongo‘i fiemālie. Ko ‘ena fakahāhā ‘a e ‘ofá ‘oku ou fiefia lahi ai. Ko e me‘a mahu‘inga tahá, ko ‘emau ongo‘i e ‘ofa ‘a ha Tokotaha-Fakatupu tokanga ‘a ia kuó ne tokoni‘i kimautolu he ngaahi tu‘unga faingata‘a lahi. Kuo fakaivimālohi‘i au ‘e he Tohi Tapú ke u feinga ma‘u pē ke hoko ko ha mātu‘a lelei.—‘Aisea 41:13.

[Fakatātā]

Ko Lucinda mo ‘ene ongo tamaikí, ‘a Brie mo Shae