Ko e Hā ‘Oku ‘Ita Tōtu‘a Pehē Aí?

KO E ngaahi tupu‘anga ‘o e ‘itá ‘oku fihi. Na‘a mo e kau saienisí ‘oku nau pehē ko e ‘itá ‘oku ‘ikai ke fu‘u mahino‘i. Kae kehe, ko hono fakalūkufua ‘o e kau palōfesinale ‘i he mo‘ui faka‘atamaí ‘oku nau loto-tatau ko e kotoa ‘o kitautolú ‘oku tau fai ha fakafeangai ki he “ngaahi me‘a fakalanga ‘itá.”

Ko ha me‘a fakalanga ‘ita ‘e lava ke hoko ia ko ha me‘a ‘okú ne lōmekina pe faka‘ita‘i ha taha. ‘Oku fa‘a hoko ‘a e ngaahi me‘a fakalanga ‘ita ko ení mei he fakamaau ta‘etotonu pe tō‘onga filifilimānako. ‘E lava ke hoko ia ‘i he taimi ‘oku tau ongo‘i matahoa ai, ‘i hano ta‘etoka‘i pe ta‘efaka‘apa‘apa‘i. Ko ha ongo‘i ‘oku fakamanamana‘i hotau tu‘unga-mafaí pe ongoongó ‘e lava ke toe langa‘i ai ‘a e ngaahi ongo‘i ‘itá.

Ko e mo‘oni, ko e “ngaahi me‘a fakalanga ‘itá” ‘oku kehekehe mei he tokotaha ki he tokotaha. ‘Oku kehekehe ia ‘i he ta‘umotu‘á, pe ko e tangata pe fefine pea na‘a mo e anga-fakafonua ki he anga-fakafonua. ‘Ikai ko ia pē, ko e ngaahi fakafeangai ki he ngaahi me‘a fakalanga ‘ita ko ení ‘oku toe kehekehe foki. Ko e kakai ‘e ni‘ihi ‘oku tātātaha pē ke nau ‘ita pea vave ke ‘osi ‘enau ‘itá, lolotonga ia ko e ni‘ihi ‘oku nau ‘itangofua pea nau kei ‘ita ai pē ‘i ha ngaahi ‘aho, ngaahi uike, ngaahi māhina, pe fuoloa ange ai.

Ko hotau ‘ātakaí ‘oku fele ai ‘a e ngaahi me‘a ‘oku malava ke ne fakalanga ai ‘a e ‘itá. Tānaki atu ki aí, ko e mamahingofua ‘i he ngaahi me‘a fakalanga ‘ita ko ení ‘e malava ke tupulaki nai. Ko e hā hono ‘uhingá? Ko e ‘uhinga ‘e taha, ko e laumālie ta‘efakakaukau mo fakamu‘omu‘a pē kitá ‘a ia ‘oku hā ma‘u pē ‘i he ‘ahó ni. ‘Oku fakamatala ‘a e Tohi Tapú: “‘I he ngaahi ‘aho faka‘osí . . . ko e tangatá te nau hoko ko e kau ‘ofa kiate kinautolu pē, ko e kau ‘ofa ki he pa‘angá, loto-mahikihiki, hīkisia, . . . ta‘efieauna, fakafuofuolahi ‘i he hīkisia.” (2 Tīmote 3:1-5) ‘Ikai ‘oku fakamatala‘i totonu ‘e he me‘a ko iá ‘a e ngaahi tō‘onga ‘a e kakai tokolahi he ‘ahó ni?

Ko hono mo‘oní, ko e kakai siokitá, ‘i he taimi ‘oku ‘ikai ke fai ai ‘a e ngaahi me‘á ‘i he‘enau foungá, ko hono olá ‘oku fa‘a hoko ia ko e ‘ita. ‘Oku toe ‘i ai foki mo ha ngaahi ‘uhinga kehe ‘oku hoko ai ‘a e ‘itá ko ha palopalema fakautuutu. Fakakaukau ki ha ni‘ihi ‘o kinautolu.

Fa‘ifa‘itaki‘anga ‘a e Mātu‘á

‘Oku ‘i ai ‘a e tākiekina lahi ‘a e ongo mātu‘a ‘a ha taha ki he anga‘itangata ‘okú ne fakatupulekina ‘i he kotoa ‘o ‘ene kei si‘í mo ‘ene talavoú. ‘Oku fakamatala ‘a e toketā faka‘atamai ko Harry L. Mills: “Mei he kei ta‘u si‘í, ‘oku ako ai ‘a e kakaí ke fakahaa‘i ‘a e ‘itá ‘aki ‘enau fa‘ifa‘itaki ki he tō‘onga ‘ita ‘oku nau sio ‘oku hā takatakai ‘ia kinautolú.”

Kapau ‘oku ‘ohake ha ki‘i tama ‘i ha ‘ātakai ‘ikai lelei—ko ha feitu‘u ‘a ia ‘oku fai ai ‘a e ‘ita ‘i he fanga ki‘i me‘a ‘oku ‘ikai mahu‘ingá—ko hono mo‘oní, ko e ki‘i tamá, ‘oku ako‘i ai ia ke fakafeangai ki he ngaahi palopalema ‘o e mo‘uí ‘aki ‘a e ‘ita. ‘Oku lava ke ke fakahoa ‘a e tu‘unga ‘o e ki‘i tamá ki ha fu‘u ‘akau ‘oku ma‘u ‘ene me‘akaí mei ha vai kuo tamele. ‘E tupu nai ‘a e fu‘u ‘akaú, ka ko ‘ene tupú ‘e kihi pē ia, pea ‘e malava ke hoko ki ai ha maumau tu‘uloa. ‘Oku pehē pē ‘a e ‘itá ‘oku hangē ia ha vai kuo tamele, pea ko e fānau kuo e‘a atu ki aí ‘oku lahi ange ‘a e hehema ke hoko ‘a e ‘itá ko honau palopalema ‘i he‘enau fu‘u lahí.

Ngaahi Kolo Fe‘efi‘efihi

‘I he ta‘u 1800, ko e pēseti ‘e 3 nai ‘o e tokolahi ‘o e kakai ‘o e māmaní na‘a nau nofo ‘i he ngaahi feitu‘u koló. ‘I he 2008, ko e fika ko iá na‘e kaka hake ia ki he pēseti ‘e 50, pea ‘i he 2050, ‘oku ‘amanekina ‘e a‘u ia ki he pēseti ‘e 70. ‘I he toe tokolahi ange ‘a e kakai ‘oku nau nofo faka‘efihi ‘i he ngaahi kolo ‘oku fu‘u tokolahí, ko e tu‘unga ‘o e ‘itá mo e ongo‘i feifeitamakí ‘oku ngalingali ‘e tupulaki. Ke lave ki ha fakatātā ‘e taha, ko e kolo ko Mekisikoú ko e taha ia ‘o e  ngaahi kolo lalahi taha mo ‘efi‘efi taha ‘i he māmaní. Ko e fihitu‘u ‘a e ngaahi me‘alelé ko ha toe tupu‘anga lahi ia ‘o e loto-mo‘uá. ‘I he ‘i ai nai ‘i he kolo ko Mekisikoú ‘a e kakai ‘e 18 miliona mo e ngaahi kā ‘e ono milioná, “‘e malava ke hoko ia ko e kolomu‘a loto-mafasia taha ia ‘i he māmaní,” ko e lau ia ‘a e faiongoongo ‘e taha. “‘Oku lahi ‘aupito ‘a e me‘alelé, ‘o iku ai ki he fu‘u ‘ite‘itangofua.”

Ko e ngaahi kolo ‘oku fu‘u tokolahí ‘oku toe ‘omai ai ‘a e ngaahi tupu‘anga kehe ‘o e loto-mafasiá, kau ai ‘a e ‘uli‘i ‘o e ‘eá mo e longoa‘á, si‘isi‘i ‘o e nofo‘angá, fepakipaki ‘a e ngaahi anga-fakafonuá, pea mā‘olunga ‘a e tu‘unga ‘o e faihiá. ‘I he fakautuutu ‘a e ngaahi tupu‘anga ‘o e loto-mafasiá, ‘oku ma‘u ai ‘e he kakaí ha hehema ke hoko ‘o feifeitamaki, ‘ita, pea faingofua ange ke mole ‘enau kātakí.

Siva e ‘Amanakí ‘i he Tu‘unga Faka‘ekonōmiká

Ko e tōlalo faka‘ekonōmika ‘a e māmaní kuo langa‘i ai ke mafolalahia ‘a e loto-mafasiá mo e loto-mo‘uá. Ko ha līpooti ‘i he 2010 ‘a e Tokoni Fakapa‘anga Fakavaha‘apule‘angá mo e Kautaha Ngāue Fakavaha‘apule‘anga ‘a e Pule‘anga Fakatahatahá (ILO) ‘oku pehē ai: “‘Oku fakafuofua ki he kakai laka hake ‘i he toko 210 miliona takatakai ‘i he fo‘i kolopé ‘oku nau ta‘ema‘ungāue.” Ko e me‘a  fakamamahí, ko e tokolahi taha ‘o e fa‘ahinga kuo fakamālōloo‘i mei he ngāué ‘oku ‘ikai te nau ma‘u ha fa‘ahinga malu‘anga fakapa‘anga ‘e taha.

Ko e fa‘ahinga ‘oku nau ma‘u ha ngāué ‘oku ‘ikai te nau lelei ange kinautolu. Fakatatau ki he ILO, ko e loto-mafasia ‘i he felāve‘i mo e ngāué ko ha “mahaki fakaemāmani lahi.” “‘Oku manavasi‘i ‘a e kakaí koe‘uhi ko ‘enau ngāué pea ‘oku vave ke nau fakakaukau ki he me‘a ‘oku kovi tahá,” ko e lau ia ‘a Lorne Curtis, ko ha tokotaha fale‘i ki ha kautaha ‘i Ontario, Kānata, ‘o ne tānaki mai, ko hono olá, “‘oku nau feinga ke fai ha malu‘i mo hehema lahi ange ke fakafekiki mo ‘enau supavaisá pe ko e kau ngāue kehé.”

Tomu‘a Fehi‘á mo e Fakamaau Ta‘etotonú

Faka‘uta atu ki he anga ho‘o ongo‘í kapau na‘á ke kau ki ha lova lele peá ke ‘ilo‘i ko koe toko taha pē na‘e fiema‘u ke sēini‘i ho va‘é ‘i he fe‘auhí. ‘Oku ongo‘i pehē ‘a e kakai ‘e laui miliona ‘i he taimi ‘oku nau fehangahangai ai mo e laulanú pe fa‘ahinga founga kehe ‘o e tomu‘a fehi‘á. ‘Oku ‘ita ‘a e kakaí ‘i he taimi ‘oku nau fehangahangai ai mo e ngaahi fakangatangata ‘oku ta‘ota‘ofi ai ‘enau ma‘u ha ngāué, akó, nofo‘angá, mo e ngaahi fiema‘u tefito kehé.

Ko e ngaahi founga kehe ‘o e fakamaau ta‘etotonú ‘oku malava ke pehē pē ‘ene fakalotomamahi‘i lahi ha taha pea ‘omai ai ‘a e mamahi lahi fakaeongo. Ko e me‘a fakamamahí, ko e tokolahi taha ‘o kitautolú kuo tau ongo‘i ‘a e mahuhuhuhu ‘a e fakamaau  ta‘etotonú ‘i ha taimi. Laka hake ‘i he ta‘u ‘e tolu afe kuohilí, na‘e fakahaa‘i ai ‘e he poto ko Tu‘i Solomoné: “Vakai, ko e lo‘imata é ‘o si‘i fakamalohia, kae ‘ikai ha taha ke fakafiemalie.” (Koheleti 4:1) ‘I he tupu mo mafola ‘a e fakamaau ta‘etotonú pea si‘i ke ma‘u ha fakafiemālié, ‘e malavangofua ai ke ‘alu hake ‘a e ‘itá ‘i he loto ‘o ha taha.

Ko e Fakafiefiá

Kuo laka hake ‘i he taha afé ‘a e ngaahi fakatotolo kuo fai ke fakapapau‘i ‘a e tākiekina ‘oku fai ‘e he fakamālohi ‘i he televīsoné mo e mītiá ki he fānaú. Ko James P. Steyer, ‘a e tokotaha na‘á ne fokotu‘u ‘a e Kautaha Mītia ki he Fakakaukau Leleí, ‘okú ne pehē: “Ko ha to‘utangata ‘oku toutou fakae‘a atu ki he fakamālohi ‘oku lahi mo ‘ai ke hā mo‘oní, ‘oku nau tupu hake ‘o ala tali lahi ange ‘a e anga-fīta‘á, si‘i ke toe fehi‘a ‘i he anga-fakamanú, pea si‘i ke nau manava‘ofa.”

Ko e mo‘oni, ko e tokolahi taha ‘o e to‘utupu ‘oku fakae‘a atu ‘i he tu‘unga tu‘uma‘u ki he ngaahi tō‘onga fakamālohi ‘i he televīsoné ‘oku ‘ikai ke nau tupu hake ‘o hoko ko e kau faihia anga-fīta‘a. Kae kehe, ko e mītia ki he fakafiefiá ‘oku fa‘a faka‘asi mai ai ‘a e ‘ita fakamālohí ko ha founga ia ‘oku ala tali ke fekuki‘aki mo e fakafilí, pea kuo hā mai ha to‘utangata fo‘ou ‘o e kakai ‘oku nau ongonoa ki he fakamālohí.

Tākiekina ‘a e Kau Laumālie Fulikivanú

‘Oku fakahaa‘i ‘i he Tohi Tapú ko ha mālohi ta‘ehāmai ‘oku tu‘u mei mui ‘i he lahi ‘o e ‘ita fakatupu maumau he māmani ‘o e ‘aho ní. ‘O anga-fēfē? ‘I he kamata‘anga ‘o e hisitōlia ‘o e fa‘ahinga ‘o e tangatá, ko ha me‘amo‘ui laumālie angatu‘u na‘e tafoki hake ‘o fakafepaki ki he ‘Otua Māfimafi-Aoniú. Ko e me‘amo‘ui laumālie fulikivanu ko ení ‘oku ui ko Sētane, ‘a ia ‘i he lea faka-Hepeluú ‘oku ‘uhingá ko e “Tokotaha-Taliteke‘i,” pe ko e “Fili.” (Sēnesi 3:1-13) Ki mui ai, na‘e faka‘ai‘ai ‘e Sētane ‘a e kau ‘āngelo kehe ke kau ‘i he angatu‘ú.

Ko e kau ‘āngelo talangata‘a ko iá, ‘a ia ‘oku ‘iloa ko e kau tēmeniō pe kau laumālie fulikivanú, ‘oku fakangatangata pē kinautolu ki he feitu‘u pē ko ia ‘o e māmaní. (Fakahā 12:9, 10, 12) Tānaki atu ki aí, ‘oku nau “‘ita lahi,” ‘i hono ‘ilo‘i ‘oku toe si‘i pē honau taimí. Ko ia neongo ‘oku ‘ikai lava ke tau sio ki he kau laumālie fulikivanu ko ení, ‘oku tau ongo‘i ‘a e nunu‘a ‘o ‘enau ngaahi ngāué. Anga-fēfē?

‘Oku ngāuelelei‘aki ‘e Sētane mo ‘ene fu‘u kau tēmenioó ‘etau ngaahi hehema angahala‘iá ‘aki hono fakatauele‘i kitautolu ke tau kau ‘i he “fakafili, feke‘ike‘i, meheka, ‘ita tōlili, fekīhiaki, fakafa‘afa‘ahi, . . . ngaahi paati uatau, mo e ngaahi me‘a hangē ko ‘ení.”—Kalētia 5:19-21.

Taliteke‘i ‘a e Faka‘ai‘aí

Ko e mo‘oni, ‘i he taimi ‘oku tau fakakaukau ai ki he ngaahi palopalema, ngaahi tenge, mo e ngaahi loto-mo‘ua kotoa ko ení, ‘oku mahino ai kia kitautolu ‘a e ‘uhinga ‘oku hoko ai ‘a e kakaí ‘o ongo‘i feifeitamaki ‘i he‘enau feinga ke fakahoko honau ngaahi fatongia faka‘ahó.

Ko e faka‘ai‘ai ke hoko ‘o ‘ita pea puhi‘i ia ki tu‘á ‘e lava ke mālohi ‘o ‘ikai toe ala ta‘ofi! Ko e kupu hono hokó te ne tokoni‘i ai kitautolu ke tau sio ki he founga ke mapule‘i ai ‘a e ‘itá.

[Puha ‘i he peesi 5]

‘OKÚ KE HOKOSIA NAI HA PALOPALEMA MAFATUKITUKI KAPAU . . .

▶ ‘Okú ke ‘ita ‘i ho‘o tu‘u laine atu ‘o tatali ‘i he falekoloá.

▶ ‘Okú ke fa‘a fakafekiki mo e kaungāngāué.

▶ ‘Okú ke fa‘a ‘ā ‘i he po‘ulí ‘o fakakaukau ‘ita ki he ngaahi me‘a na‘á ne fakalotomamahi‘i koe he lolotonga ‘a e ‘ahó.

▶ ‘Oku faingata‘a kiate koe ke fakamolemole‘i ‘a e fa‘ahinga na‘a nau fakalotomamahi‘i koé.

▶ ‘Oku ‘ikai te ke fa‘a mapule‘i ‘a ho‘o ngaahi ongó.

▶ ‘Oku fa‘a muimui atu ‘i he ngaahi taimi ‘o e ‘itá ha ongo‘i mā pe faka‘ise‘isa. *

[Fakamatala ‘i lalo]

[Puha ‘i he peesi 6]

SITĒTISITIKA ‘O E ‘ITÁ

Ko e Kautaha Mo‘ui Fakae‘atamai ‘a Lonitoni, ‘Ingilaní, na‘á ne pulusi ha līpooti na‘e fakakaveinga ko e Boiling Point—Problem Anger and What We Can Do About It. Ko e ngaahi fakamatala tefito mei he līpōtí ‘oku kau ai ‘a e ngaahi fika ko ení:

84% ‘oku nau ongo‘i loto-mafasia ange ‘i he ngāué ‘i he ta‘u ‘e nima kuohilí.

65% ‘o e kau ngāue ‘ōfisí kuo nau hokosia ha ‘ita tōlili ‘i he ‘ōfisí.

45% ‘o e kau ngāué ‘oku fa‘a ‘ikai ke nau mapule‘i ‘enau ‘itá ‘i he ngāué.

A‘u ki he 60% ‘o e kau nofo kotoa pē ‘i he ngāué ko e tupu mei he loto-mafasiá.

33% ‘o e kakai ‘o Pilitāniá ‘oku ‘ikai ke nau felea‘aki mo honau ngaahi kaungā‘apí.

64% ‘oku nau mātu‘aki loto-tatau pe loto-tatau ko e kakaí fakalūkufua ‘oku nau ‘ite‘ita ange.

32% ‘oku nau pehē ‘oku ‘i ai hanau kaungāme‘a ofi pe taha ‘i honau fāmilí ‘oku faingata‘a ke ne mapule‘i [‘ene] ‘itá.

[Fakatātā ‘i he peesi 5]

Ko e hā ‘a e ola ‘e lava ke hoko ki ho‘o fānaú ‘i ho‘o fakahāhā ‘a e ‘itá?

[Fakatātā ‘i he peesi 6]

‘Oku fakafuo ‘e he fakafiefiá ‘a e anga ho‘o vakai ki he ‘itá mo e anga-fīta‘á?