Na‘e Fa‘u Ia Ke Pehē?

Ko e Pōto‘i Fa‘u Fakanatula ‘a e Pī Fa‘u Taunga Pī Pepá

● Kuo fakamatala‘i ‘a e fanga pī fa‘u taunga pī pepá ko e kau mataotao ‘i he fa‘ú. Ko e hā ‘oku fe‘ungamālie ai ‘a e fakamatala ko ení?

Fakakaukau: Hangē ko ia ‘oku fokotu‘u mai ‘i hono hingoá, ‘oku fa‘u mo tauhi ‘e he pī fa‘u taunga pī pepá honau taungá ‘a ia ‘oku kongokonga mo fakataha‘í mei ha fa‘ahinga makehe ‘o e pepá, ‘a ia ‘okú ne fa‘u pē ‘e ia. * ‘Oku tātānaki mai ‘e he ‘inisēkité ni ‘a e ngaahi me‘a hangē ha filó mei he ‘akaú mo e popo‘i ‘akaú ‘a ia ‘oku ma‘u mei he ngaahi feitu‘u kehekehe—ngaahi kupu‘i ‘akau, pou ‘ā, pou telefoni, mo e ngaahi naunau langa. ‘Okú ne lamu leva ‘a e ngaahi me‘a ko iá ‘a ia ‘oku mohu ai ‘a e selulousí, ‘o tānaki atu ki ai ha fāvai pikipiki mo lahi ai ‘a e polotiní. ‘I he‘ene fakapipiki ‘a e fo‘i fio ko ení ki ha me‘á, ‘oku mōmoa ia ‘o ma‘u ai ha pepa ‘oku ma‘ama‘a, mālohi kae fefeka. ‘Ikai ko ia pē, ko e fāvaí ‘oku ‘i ai hono ngaahi tafa‘aki makehe ‘oku lava ke ne ‘ai ‘a e pepá ke ne fakatupu mo mimisi ‘a e māfaná, ‘o tauhi ma‘u ai ‘a e māfana totonú ‘i he taunga ‘oku ‘i ai hono ‘uhikí ‘i he ngaahi ‘aho mokomokó.

‘Oku fa‘u ‘e he pií ‘a honau taungá ‘o fai “fakafo‘ima‘anga” ia. Ko e me‘a kuo ‘osi hono fa‘ú ko ha ngaahi fo‘i pupunga loki tapa-ono ‘oku kofu‘i hifo ‘aki ha pepa ‘oku hangē hono fuó ha fakamalú mo ‘ikai lava ke hū ki ai ‘a e vaí—ko e tapa-onó ko ha fuo ‘oku mālohi pea ‘ikai fakamole sipeisi. Ko e fanga pī ‘oku nofo ‘i he ngaahi feitu‘u ‘uho‘uhá ‘oku nau tānaki pē ki ai ‘a e fāvai lahi ange koe‘uhí ko hono ngaahi tafa‘aki ‘okú ne taliteke‘i ‘a e vaí. Neongo ‘a e me‘a ko iá, ‘oku fili ‘e he fanga ‘inisēkité ni ‘a e ngaahi feitu‘u ‘oku malu ke tautau aí. ‘Oku nau tautau fakafo‘ohifo leva mei ai honau ngaahi taungá ‘aki ‘a hono ki‘i kaú. ‘Ikai ko ia pē, ko e fanga pī fa‘u taunga pī pepá ‘oku ‘ikai te nau fai ha maumau ki he ‘ātakaí—‘o ‘ikai hangē ko ‘etau ngaahi founga ngaohi pepá, ‘a ia ‘oku ‘uli‘i ai ‘a e ‘eá, vaí, mo e fonuá!

‘Oku malava ke mahino‘i, ‘oku ako ‘e he kau tā-mapé mo e kau fakatotoló ‘a e me‘a kuo ngaohi ‘e he pií fakataha mo ha fakakaukau atu ke fa‘u ha ngaahi naunau langa lelei ange ‘a ia ‘oku ma‘ama‘a, mālohi, ngaofengofua ange, pea malava ke popo fakanatulá.

Ko e hā ho‘o fakakaukaú? Na‘e lava ‘e ha ‘inisēkite ko hono fo‘i ‘utó ‘oku hangē nai hono lahí ko ha ongo fo‘i ‘one‘oné ‘o fika‘i ‘a e ngaohi pepá mo tā-mape‘i honau taungá ‘iate ia pē? Pe ko ‘ene pōto‘i fa‘u fakakemikale mo fakaefa‘ú ko ha fakamo‘oni ia ‘o hano fa‘u ia?

[Fakamatala ‘i lalo]