Fakamaau Totonu Mo‘oní ‘i he Malumalu ‘o e Founga-Pule ‘a e ‘Otuá

‘OKU fakahaa‘i ‘e he kikite ‘a e Tohi Tapú ko e māmani lolotongá ‘oku te u fetongi ia ‘e ha māmani fo‘ou ‘e fokotu‘u ‘e he ‘Otuá. ‘Ikai ngata aí, ko e māmani fo‘ou ko iá te ne ma‘u ha founga-pule pē taha—ko e Pule‘anga ‘o e ‘Otuá, ‘a ia ‘oku Tu‘i ai ‘a Sīsū Kalaisi. (Fakahā 11:15) ‘E anga-fēfē hono fakangata ‘e he Pule‘anga ‘o e ‘Otuá ‘a e fakamaau ta‘etotonú? Te ne fakahoko ia ‘i he founga ‘e ua.

1. Ko e Pule‘anga ‘o e ‘Otuá te ne fakangata ‘a e pule ta‘efaitotonu, mo ta‘etaau fakaetangatá. ‘Oku fakahaa‘i ‘i he Taniela 2:44: “‘I he taimi ‘o e ngaahi tu‘i ko ia, [ngaahi founga-pulé] ko e ‘Otua ‘o Langi te ne fokotu‘u ha pule‘anga . . . te ne laiki mo faka‘auha ‘a e ngaahi pule‘anga ko ia [‘oku fa‘u ‘e he tangatá], kae tu‘u pe ia ‘o ta‘engata.”

2. Ko e Pule‘anga ‘o e ‘Otuá te ne faka‘auha ‘a e fulikivanú pea fakahaofi ‘a e faitotonú. ‘Oku pehē ‘i he Saame 37:10 (PM): “Oku toetoe jii be, bea e ikai ae agakovi.” ‘Oku fakalea ‘i he veesi 28: “He oku ofa a Jihova ki he fakamāu [totonú], bea oku ikai te ne liaki hono kakai maonioni; kuo fakamoui mau ai be akinautolu.”

Ko e “kakai maonioni” ko iá te nau hokosia ‘a e fakahoko ‘o ha lea na‘e fai ‘e Sīsū ‘i he‘ene sīpinga lotú. Na‘á ne pehē: “Tuku ke hoko mai ho Pule‘angá. Tuku ke fai ho finangaló, ‘o hangē ko ia ‘i hēvaní, ke pehē foki ‘i māmani.” (Mātiu 6:10) Ko e hā ‘a e finangalo ‘o e ‘Otuá ki he māmaní?

‘I he Taimi ‘e Pule Ai ‘a e Pule‘anga ‘o e ‘Otuá ‘i he Māmaní . . .

Ko e kākaá mo e fakafe‘ātungiá ‘e ngata. ‘I he fekau‘aki mo Sīsū Kalaisí, ‘oku pehē ‘i he Hepelū 1:9: “Ne ke ‘ofa ‘i he mā‘oni‘oní, pea ne ke fehi‘a ‘i he maumau-laó.” ‘I hono tu‘unga ko ha Pule faitotonu mo‘oní, ko Sīsuú te ne hanga ‘o “fakahaofi ‘a e masiva ‘o ka tangi; ko e vaivai foki mo ia ‘oku ‘ikai hano tokoni. . . . ‘Oku ne huhu‘i honau laumalie mei he maumau mo e fakamalohi, pea ‘oku mahu‘inga honau toto ‘i he‘ene vakai.”—Saame 72:12-14.

‘E ma‘u ‘e he tokotaha kotoa ‘a e me‘akai lahi fau. “Kuo foaki ‘e he kelekele hono fua: ‘E tapuaki‘i [kitautolu] ‘e Elohimi ko hotau ‘Otua.” (Saame 67:6) “E i ai ae falukuga oe uite i he fonua i he tumutumu oe gaahi mouga, e gau‘eu‘e hono fua.” (Saame 72:16, PM) Na‘e fafanga‘i fakaemana ‘e Sīsū he taimi ‘e taha ‘a e laui afe—ko ha tomu‘a faka‘ali ia ‘o e me‘a te ne fakahoko fakafou ‘i he Pule‘anga ‘o e ‘Otuá.—Mātiu 14:15-21; 15:32-38.

‘E ‘ikai ta‘ofi ‘a e fakamaau totonú ‘e he ngaahi fakangatangata fakaetangatá. “‘Oku ‘ikai ‘i ai ha me‘a fakatupu ‘e puli mei he‘ene vakaí [‘a e ‘Otuá], ka ko e ngaahi me‘a kotoa pē ‘oku telefua mo tokaima‘ananga ia ki he ongo fo‘i fofonga ‘o ia ko ē kuo pau ke tau fai ki ai ha‘atau fakamatalá.” (Hepelū 4:13) ‘I he fekau‘aki mo Kalaisí, ‘oku tau lau: “Ko ‘ene fai fakamaau ‘oku ‘ikai fai ki he me‘a ‘oku ha ki he mata, pea ko ‘ene faka‘osi ‘e ‘ikai fai ki he ongo ‘o e telinga. Ka ‘e fou ‘i he totonu ‘ene fakamaau ‘a e kau masiva, pea ‘e fai ki he tuha ‘ene tu‘utu‘uni me‘a ki he fa‘ahinga ma‘ulalo ‘o mamani.”—‘Aisea 11:3, 4.

 ‘Oku Ofi e Pule ‘a e Pule‘angá!

Ko e tu‘unga ololalo ‘o e māmaní ‘oku fakamo‘oni‘i ai ‘a e tu‘unuku mai ‘o hono ngata‘angá. “Ka faliki mai ‘a e angahala hange ha musie, pea fisi ‘a e kau faikovi fuape; ko hono ‘uhinga ke nau ‘auhia ai pe,” ko e lau ia ‘a e Saame 92:7. ‘E lava fēfē ke ke faka‘ehi‘ehi mei he tuha mo e ta‘efakahōifua ‘a e ‘Otuá pea kau ‘i he lotolotonga ‘o e fa‘ahinga ko ia ‘okú ne fakahaofí? Na‘e pehē ‘e Sīsū Kalaisi: “Ko ‘eni ia ‘e ma‘u ai ‘a e mo‘ui ta‘engatá, ko ‘enau hoko ‘o ‘ilo‘i koe, ko e ‘Otua mo‘oni pē taha, pea mo e tokotaha ko ia na‘á ke fekau maí, ‘a Sīsū Kalaisi.”—Sione 17:3.

‘Okú ke holi ki he ‘ilo mahu‘inga ko iá? Kapau ko ia, ‘i he hangē ko Heide, Dorothy, mo Firuddin, na‘e lave ki ai ki mu‘á, ko e hā ‘oku ‘ikai te ke talanoa ai ki he me‘á ni mo e Kau Fakamo‘oni ‘a Sihová? Te nau fiefia ke tali ho‘o ngaahi fehu‘í ‘o ‘ikai ha totongi pe ‘ikai fakafatongia‘i ai koe ki ha me‘a.

[Puha/Fakatātā ‘i he peesi 9]

‘I HE TAIMI ‘OKU HĀ NGALI ‘IKAI AI HA FAKAMAAU TOTONU ‘I HE MO‘UÍ

Ko Emily, ‘a ia ‘oku nofo ‘i ‘Amelika, na‘e ‘ilo‘i ‘oku kanisā toto ‘i he taimi na‘á ne ta‘u fitu aí. Lolotonga na‘e pau ke feangainga hono ngaahi kaume‘á mo e momokó pe fuluú ‘i he taimi ki he taimi, kuo kātekina ‘e Emily ‘a e ngaahi ta‘u ‘o e tokanga‘i fakafaito‘o lahi, ‘o kau ai ‘a e faito‘o fakakemikalé. “‘Oku fakailifia ‘a e kanisā totó!” ko ‘ene leá ia.

Neongo ‘a e tā ne o‘o kuo hoko ki ai ‘i he mo‘uí, kuo ‘ikai ke siva e ‘amanaki ‘a Emily. ‘I hono kehé, ‘okú ne tatali ki he taimi, ‘a ia ‘i he malumalu ‘o e Pule‘anga ‘o e ‘Otuá, “‘oku ‘ikai ha nofo ai te ne pehe, ‘Oku ou mahaki.” (‘Aisea 33:24) “Ko e konga Tohi Tapu ‘oku ou manako taha aí,” ko e lau ia ‘a Emily, “ko e Ma‘ake 12:30: ‘Kuo pau ke ke ‘ofa kia Sihova ko ho ‘Otuá ‘aki ho lotó kotoa, ‘aki ho‘o mo‘uí kotoa, ‘aki ho ‘atamaí kotoa, pea ‘aki ho mālohí kotoa.’ ‘I he taimi ‘oku ou lotu ai kia Sihová, ‘okú ne ‘ai au ke u mālohi. ‘Oku ou fakamālō kia Sihova ‘i he‘ene ‘omai kiate au hoku fāmilí, ko ‘eku fakataha‘angá, mo e ‘amanaki ‘o e mo‘ui ta‘engata ‘i he māmani fo‘ou Palataisí. Ko e ‘amanakí ni kuó ne tokoni‘i lahi au.”

[Fakatātā ‘i he peesi 8, 9]

‘I he malumalu ‘o e Pule‘anga ‘o e ‘Otuá, ‘e ma‘u ai ‘e he fa‘ahinga kotoa ‘o e tangatá ha me‘akai hulu fau, pea pehē ki he fakamaau totonu mo‘oni mo e mo‘ui ‘o ‘ikai ha tomu‘a fehi‘a