● Ko e kau fakatotoló ‘oku nau fa‘u ha nima lōpoti ‘a ia ‘oku lelei ange ‘i he‘ene pōto‘i he alá mo mapelungofuá. Ko e pule ‘o e ngāue‘anga tisaini ‘i he kautaha ‘oku fa‘u ai ‘a e me‘angāué ‘okú ne pehē ko e nima fo‘oú “‘oku mahulu atu ia ‘i ha me‘a pē ‘oku lolotonga ala ma‘u ‘i he me‘angāue ‘otomētiki ‘i he fale ngāué.” Ko e hā ‘a e tupu‘anga ‘o e fa‘u me‘a fo‘oú? “Ko e natula ‘o e ihu ‘o e ‘elefānité,” ko ‘ene leá ia.

Fakakaukau: ‘I hono mamafa ko e pāuni nai ‘e 300 (kilokalami ‘e 140), ko e ihu ‘o e ‘elefānité kuo ui ia “ko e konga ngaofengofua taha mo ‘aonga taha ‘i he fo‘i palanité.” Ko e me‘angāue alaisia-alaikolongá ‘oku lava ke ngāue ia ko ha ihu, ko ha ngutu, ko ha uma, pe ko ha nima. ‘Oku lava ke mānava‘aki ia ‘e he ‘elefānité, nanamu, inu, puke ha me‘a, pe a‘u ‘o puhi‘i ha fo‘i ongo fakatutuli!

Ka ‘oku ‘ikai ko ia pē. Ko e ihu ‘o e ‘elefānité ‘oku ‘i ai ‘a e faipa uoua ‘e 40,000 nai ‘okú ne faka‘atā ia ke ngaue ki ha fa‘ahinga tafa‘aki pē. ‘I hono ngāue‘aki ‘a hono mu‘a ihú, ‘oku lava ke to‘o hake ‘e he ‘elefānité ha ki‘i fo‘i koini. ‘I he taimi tatau, ‘oku lava ke ngāue‘aki ‘e he ‘elefānité ‘a hono ihú ke hiki ha uta ‘oku a‘u nai ki he pāuni ‘e 600 (kilokalami ‘e 270)!

‘Oku ‘amanaki ‘a e kau fakatotoló ko hono fa‘ifa‘itaki‘i ‘a e fa‘unga mo e malava ke ngāue ‘a e ihu ‘o e ‘elefānité ‘e tokoni‘i ai kinautolu ke nau fa‘u ha ngaahi lōpoti lelei ange fakatou‘osi ke ngāue‘aki fakae‘api mo fakaengāue. “Kuo mau fa‘u ha fa‘ahinga mīsini fo‘ou ‘aupito ke tokoni ki he tangatá,” ko e lau ia ‘a ha fakafofonga mei he kautaha na‘e lave ki ai ki mu‘á, “‘a ia ko e ‘uluaki taimi ia kuo ‘ai ai ke malava ‘a e tangatá mo e mīsiní ‘o ngāue fakataha ola lelei ‘o ‘ikai ha fakatu‘utāmaki.”

Ko e hā ho‘o fakakaukaú? Na‘e tupu ‘a e ihu ‘o e ‘elefānité fakafou ‘i he ‘evalūsioó? Pe na‘e fa‘u ia ke pehē?