Feitu‘u ‘Oku Lue Ve‘e Fā Ai ‘a e Pa‘angá

“‘I HOMAU feitu‘ú ko e koloa mātu‘aki mahu‘inga ia ‘a e fāmilí ha puaka, ko ia ko hono tauhi ha puaká ko ha fatongia lahi ia,” ko e lau ia ‘a Enmarie Kani, ko ha ta‘ahine ta‘u 17 ‘oku nofo ‘i he ngaahi feitu‘u mā‘olunga ‘o Pāpua Niu Kiní. “ ‘I he taimi na‘e kole mai ai ‘e he‘eku tamaí ke u tauhi ha ki‘i puaká, na‘á ku fiefia ka na‘á ku toe hoha‘a foki. Na‘e fu‘u valevale ‘aupito ‘o u fakakaukau ai ‘e mate nai ia.”

Na‘e anga-fēfē hono tauhi ‘e Enmarie ‘a ‘ene ki‘i puaká? Pea ko e hā ‘oku mahu‘inga ai ‘a e fanga puaká ‘o hangē ko e pa‘angá ki he kakai ko ia ‘oku nofo ‘i he kolo ‘uta ‘o Pāpua Niu Kiní? Ko e me‘a eni na‘á ne tala ki he ‘Ā Hake!

Kātaki mu‘a ‘o fakamatala ki he feitu‘u ‘okú ke nofo aí.

‘Oku ou nofo fakataha mo ‘eku ongo mātu‘á mo e fānau iiki ange ‘e toko fā—ko e ongo tamaiki fefine mo e ongo tamaiki tangata—‘i ha ki‘i fale he vaó ‘oku ‘ato saafa ‘i ha ki‘i kolo mama‘o ‘i he mo‘ungá ‘i he Feitu‘u Mā‘olunga Fakahihifó. Ko e ki‘i koló na‘e ‘i ai nai ‘a e kakai ‘e toko 50, ko kinautolu kotoa ko hoku kāinga, pea ‘oku mau nofo ‘i ha ki‘i ve‘e vaitafe ‘a ia ‘oku lele takai ‘i he ngaahi fo‘i mā‘olunga vaotā fihi.

Ko e tokolahi taha ‘o e kakai ‘i homau ki‘i koló ‘oku nau ngāue ‘i ha faama ke ma‘u mei ai ‘enau mo‘uí. ‘Oku ‘i ai ha fu‘u ngoue vesitapolo ‘a hoku fāmilí, ‘a ia ‘oku mau tō ai ‘a e kumala, hina, kiukamipā, kofi,  mo e ngaahi ‘akau kehe. ‘Oku ou manako ‘i he tō vesitapoló pea sai‘ia ‘i he ngāue fakaesinó. ‘Oku ou toe tokanga‘i foki ‘a e ngaahi ngāue kehe, hangē ko e fakama‘a ‘a e falé, fō e valá pea mo hono tauhi foki ‘a e puaka ‘a e fāmilí.

‘Oku anga-fēfē ho‘o tauhi ‘a ho‘o puaká?

‘I he taimi na‘e fakatau mai ai ‘e he Tangata‘eikí ‘a ‘emau puaká ‘i he ta‘u nai ‘e taha kuo maliu atú, na‘e fu‘u valevale ‘aupito ‘o lava ke u pukepuke ia. ‘I he ‘aho taki taha, na‘á ku fafanga ia ‘aki ha fafanga ko e efuefu‘i ika na‘e fio fakataha mo e kumala kuo o‘i, vai, māsima, mo e huhua‘i tō. ‘I he po‘ulí, ‘i he hoko ‘o mātu‘aki momoko ‘a e feitu‘u mā‘olungá, na‘e mohe ia ‘i ha nge‘esi tangai laise na‘e tautau mei he ‘aofí ‘o ofi ki he tofunanga ‘i homau falé. Na‘á ku mohe ‘i he falikí ‘o ofi ki ai. Ko hono olá, na‘e ‘ikai ngata pē ‘i he mo‘ui ‘a e puaká ka na‘e toe tupu ‘āfa‘afa foki!

Na‘e ‘ikai ‘aupito ke u ‘ai ha hingoa fakafo‘ituitui ki he‘emau puaká. Na‘á ku ui pē ia ko Puaka, pea na‘e hoko ia ko hono hingoá. Na‘á ku tauhi ‘a Puaka ‘o hangē pē ko ha‘aku ki‘i pēpeé—‘o fafanga ia, kaukau‘i ia, pea va‘inga mo ia ‘i ha ngaahi houa. Na‘e hoko ‘o pipiki ‘a Puaka kiate au pea muimui ‘iate au ki he feitu‘u kotoa pē.

‘I he taimi na‘e tupu ai ‘a Puaka ‘o lahilahi haké, na‘á ku kamata‘i ki ai ha founga-tu‘uma‘u fo‘ou ‘a ia ‘okú ma kei muimui pē ki ai. ‘I hono ngāue‘aki ha maea, na‘á ku taki ‘a e monumanú ki he‘emau ngoue vesitapoló—ko ha luelue miniti ‘e 15 mei homau falé. Na‘á ku ha‘i ai ‘a e maeá ki ha fu‘u ‘akau pea tuku ke hua takai holo ‘a Puaka ‘i he konga kelekele kuo ‘osi teuteu ke tō ai ‘a e ngoué he ‘ahó kotoa. ‘I hono ngāue‘aki ‘a hono kia mālohi mo e mu‘a ngutu fefeká, ‘okú ne hua ke ma‘u ‘a e ngaahi aka‘i ‘akaú mo e fanga kelemutú, ‘i he taimi tatau ‘okú ne keli ai mo fakalelei ‘a e kelekelé. ‘I he ngata‘anga ‘o e ‘ahó, ‘oku ou taki ia ki ‘api, ‘a ia ‘oku ou fafanga‘aki ai ‘a e kumala mata mo moho ki mu‘a ke fakahū ia ke nofo ‘i he po‘ulí ‘i hono ‘ā papá.

 Ko e hā ‘oku mātu‘aki mahu‘inga ai ‘a e fanga puaká ki he kau nofo he feitu‘u mā‘olungá?

Ko kimautolu ‘a e kau nofo ‘i he feitu‘u mā‘olungá ‘oku ‘i ai ‘emau lea ‘oku pehē, Ko e pa‘angá ko e puaka pea ko e puaká ko e pa‘anga. Ki mu‘a fuoloa ke a‘u mai ‘a e pa‘anga anga-mahení ki he ngaahi feitu‘u mā‘olungá, na‘e ngāue‘aki ‘e he kakaí ‘a e fanga puaká ko e pa‘anga—ko ha tō‘onga ‘oku hokohoko pē ‘o a‘u mai ki he ‘ahó ni. Ko e fakatātaá, ko ha tokotaha pisinisi fakatau kā ‘i he ngaahi feitu‘u mā‘olungá na‘á ne ‘oatu ‘i he taimi ‘e taha ha puaka mo‘ui fakataha mo e me‘alele fo‘ou kotoa pē na‘e fakatau atu. Ko e ngaahi matakalí ‘oku nau fa‘a fakalelei‘i ‘enau ngaahi vākoví ‘aki ‘a e fe‘ave‘aki pa‘anga mo e fanga puaka. Pea ko e kau tangata mali tokolahi ‘oku nau ‘ave ‘a e fanga puaka ki he ongo mātu‘a ‘a e ta‘ahine malí pe ko e ha‘á ko e konga ia ‘o e totongi ‘o e ta‘ahine malí.

‘Oku hangē hono kai ‘o ha puaká ko hono kai ‘o ha pa‘angá!

‘Okú ke mo‘oni! Koe‘uhí ‘oku mātu‘aki mahu‘inga ‘a e fanga puaká, ‘oku mau toki fa‘a kai pē ‘a e ka­kano‘i puaká ‘i ha ngaahi taimi makehe, hangē ko e ngaahi putú mo e ngaahi kātoanga mahu‘inga kehe. Ko e pehē ko ia, ‘oku kai ‘e he ngaahi matakali ‘e ni‘ihi ‘i he feitu‘u mā‘olungá ‘a e fanga puaka ‘e lauingeau ‘i he ngaahi kātoanga lalahí na‘e fokotu‘utu‘u iá ke faka‘ali‘ali ai ‘a e koloa‘ia ‘a e matakalí pe ke totongi fakafoki ki ha ‘ofa na‘e fai mai ‘i he kuohilí.

Ko e hā ‘e fai‘aki ‘e ho fāmilí ‘a ho‘omou fanga puaká?

‘Oku tonu ‘a e pehē “fanga puaká,” he ko Puaká kuo ‘i ai hono ngaahi ‘uhiki, ko e taha ai na‘a mau toki fakatau atu ki he kina ‘e 100 (meimei $40 ‘Amelika). Na‘a mau ngāue‘aki ‘a e pa‘angá ke fononga pasi ai ki he fakataha-lahi fakavahe fakata‘u ‘a e Kau Fakamo‘oni ‘a Sihová ‘i he kolo ofi mai ko Banz. ‘Oku ngalingali ‘e fakatau atu ‘e he Tangata‘eikí ‘a e ‘uhiki ‘e taha ‘o Puaka ke feau‘aki ‘emau ngaahi fiema‘u faka‘aho fakafāmilí.

Ko e hā ‘oku ‘ikai ke ke tauhi ai ha fanga puaka lahi ange koe‘uhí ke ma‘u ai ha‘o pa‘anga lahi ange?

Ko ‘emau taumu‘á ‘oku ‘ikai ko e ‘ai ke mau koloa‘ia, ka ke ma‘u ‘a e me‘a ‘oku mau fiema‘ú hangē ko e me‘akaí, valá, mo e nofo‘angá. Ko homau fāmilí ‘oku tokangataha ia ki he ngaahi me‘a fakalaumālié. ‘Oku kau heni ‘a e tauhi ki homau ‘Otuá, ko Sihova; ko hono ma‘u ‘a e ngaahi fakataha faka-Kalisitiané; ko hono tokoni‘i ‘a e kakai kehé ‘o fakatatau ki he‘emau malavá—fakamatelie pe fakalaumālie—mo hono fai fakataha ‘o e ngaahi me‘á ‘i he tu‘unga ko ha fāmili. ‘Oku mau mo‘ui ‘i ha tu‘unga mo‘ui faingofua, ka ‘oku mau vāofi mo fiefia.

Ko hono mo‘oní, ‘i he ngaahi ‘ahó ni, ‘oku ou fai ai ‘a e ngāue fakamāmani—ko e ngoue mo e tauhi ‘o e fanga puaká—ka ‘oku konga taimi pē. Ko ‘eku ngāue tefitó ko e ngāue ‘i he tu‘unga ko ha ‘evangeliō Kalisitiane, ‘i hono vahevahe atu ‘a e ngaahi mo‘oni Fakatohitapú ki hoku ngaahi kaungā‘apí. Ko e ngāué ni, ‘a ia na‘e fekau‘i ‘e Sīsū ki hono kau muimuí ke nau faí, ‘okú ne ‘ai au ke u femo‘uekina ‘i ha ngaahi ‘aho ‘e ni‘ihi he uike. (Mātiu 28:​19, 20) ‘Oku ou ‘amanaki pē ke ngāue ‘i ha ‘aho ‘i he ‘ōfisi va‘a ‘o e Kau Fakamo‘oni ‘a Sihová ‘i Taulanga Molesipī, ‘a ia ‘oku liliu ai ‘a e ‘ū tohi Fakatohitapú ki he ngaahi lea fakalotofonuá. Ka neongo kapau he‘ikai te u a‘usia ‘a e taumu‘a ko iá, ‘oku ou ‘ilo‘i te u ma‘u ma‘u pē ‘a e fiefia lahi tahá ‘i he ngāue kia Sihova mo hanganaki fakamu‘omu‘a ‘a e ngaahi me‘a fakalaumālié. Pea ‘oku ou fakamālō‘ia ‘a e tokoni fakamatelie kuó u ma‘u mei he pa‘anga ‘a ia ‘oku lue ve‘e faá.

[Puha/Fakatātā ‘i he peesi 18]

MO‘ONI‘I ME‘A FEKAU‘AKI MO E PUAKÁ

● Ko e motu ko Niu Kiní ko e nofo‘anga ia ‘o e fanga puaka lalata ‘ikai si‘i hifo he ua milioná, ko e puaka nai ‘e 1 ki he kakai ‘e toko 3 kotoa pē.

● Laka hake he vaeua ‘o e kakai ‘i he kolo ‘utá ‘oku ‘i ai ‘enau fanga puaka.

[Mape ‘i he peesi 16]

(Ki he fakamatala kakato, sio ki he tohí)

‘INITONĒSIA

PĀPUA NIU KINI

‘AOSITELĒLIA

‘INITONĒSIA

PĀPUA NIU KINI

TAULANGA MOLESIPĪ

FEITU‘U MĀ‘OLUNGA FAKAHIHIFO

‘AOSITELĒLIA

[Fakatātā ‘i he peesi 16 mo e 17]

Lue ki he ngoué

[Fakatātā ‘i he peesi 17]

Taimi kaukau

[Fakatātā ‘i he peesi 17]

Taimi va‘inga