Ko Fē Taimi ‘Oku Totonu Ke Ke Kamata Ako‘i Ai ‘a Ho‘o Ki‘i Tamá?

● Na‘e tohi ‘e ha tangata ‘i Summerville, South Carolina, ‘Amelika ‘o pehē, kamata ‘i he feitama māhina tolu pē ‘a hono uaifí, na‘á ne fa‘a tokoto ofi kiate ia ‘i he pō taki taha ‘o lau mei he tohi tokoni ako Tohi Tapu Ko ‘Eku Tohi ‘o e Ngaahi Talanoa Faka-Tohitapú. “Hili hono fā‘ele‘i ‘ema pēpē fefine, ko Bethiah,” ko e lau ia ‘a e tamaí, “na‘á ma hokohoko atu ‘i he founga-tu‘uma‘u tatau ko ení—ko e fo‘i talanoa ‘e taha he pō, ‘o a‘u ki he‘ema lau ‘o ‘osi tu‘o tolu ‘a e tohí.”

‘Okú ne hoko atu: “ ‘I he taimi na‘e meimei lava ai ke lea ‘a Bethiah, na‘á ne ‘osi malava ke ‘ilo‘i ‘a e fa‘ahinga tokolahi ‘i he Tohi Tapú pea lava ke ne fakatātaa‘i ‘a e ngaahi talanoa Fakatohitapu lahi na‘e lāulea ki ai ‘i he tohí. Na‘á ne toe ako ke lau ma‘uloto ‘a e ngaahi talanoa Fakatohitapu lahi.”

Ko e talanoa ‘e 116 ‘i he tohi fakatātā faka‘ofo‘ofa, pulusi mata-lalahi ko ení ‘oku hā ia ‘i he fakahokohoko ‘a ia na‘e mo‘ui ai ‘a e fa‘ahinga tokolahi ‘i he Tohi Tapú, ‘o ‘oange ai ki he tokotaha lautohí ‘a e fakamaama ki he fakahokohoko taimi ‘i he Tohi Tapú. Kapau te ke sai‘ia ke ma‘u ‘a e tohi peesi ‘e 256 ko ení, fakafonu ‘a e kūponi ‘oku ‘oatu hení pea meili‘i ia ki ha tu‘asila fe‘ungamālie ‘oku fakahokohoko ‘i he peesi 5 ‘o e makasini ko ení.

□ ‘I he ‘ikai kouna‘í, ‘oku ou kole atu ha tatau ‘o e tohi ‘oku hā hení.

□ Kātaki ‘o fetu‘utaki mai kiate au fekau‘aki mo ha ako Tohi Tapu ta‘etotongi ‘i ‘api.