‘I HE‘ETAU ‘ĪSIU KI MU‘Á, na‘a tau lāulea ai ki he fo‘i mo‘oni ‘e ua ‘i he mo‘uí.

● ‘I ho‘o hoko ‘o kau fakaeongo ki ai ki mu‘a ke ke mateuteu ki ha vaha‘angatae fakamātoató, te ke hoko ai ‘o loto-mamahi.​—Palōveepi 6:​27.

● ‘I ho‘o hoko ‘o kau fakaeongo ki ai ki mu‘a ke ke mateuteu ki ha vaha‘angatae fakamātoató, ‘e lava ke mole ai meiate koe ha kaume‘a lelei. *​—Palōveepi 18:⁠24.

‘I HE ‘ĪSIU KO ‘ENÍ, te tau lāulea ai

● Ki ha mo‘oni‘i me‘a hono tolu ‘i he mo‘uí fekau‘aki mo e kau fakaeongo ki aí

● Founga ‘e lava ai ke ke tala pe kuó ke fakalaka atu ‘o ‘ikai kaume‘a ‘ata‘atā pē mo ha taha ko ha fefine pe tangata

MO‘ONI‘I ME‘A ‘I HE MO‘UÍ: ‘I he taimi ‘okú ke kau fakaeongo ai ki ai ki mu‘a ke ke mateuteu ki ha vaha‘angatae fakamātoató, ‘e lava ke maumau‘i ai ho ongoongó. ‘Oku pehē ‘e Mia *: “Kuó u sio ‘i he tamaiki tangata ‘oku nau kaume‘a mo e tamaiki fefine tokolahi. Ko hono mo‘oní, ko kinautolu ‘oku nau mohe mo e tamaiki fefine tokolahi. ‘Oku fakakaukau ‘a e tamaiki fefiné ‘oku mahu‘inga‘ia ‘a e tamaiki tangatá ‘iate kinautolu, ka ‘oku nau fiefia ‘ata‘atā pē ‘i he tokanga ange ‘a e tamaiki fefiné.”

Ke fakakaukau ki ai:

● Pe ko ha tamasi‘i koe pe ko ha ta‘ahine, ‘e lava fēfē ke uesia ho ongoongó ‘i ho‘o hoko ‘o fu‘u ofi ki he fa‘ahinga ko ia ko e fefine pe tangatá?

“Ko e ‘ave pōpoaki ki he kakai ko e tangata pe fefiné ko ha fu‘u luo tō‘anga lahi ia. ‘Okú ke kamata ‘aki ‘a e ki‘i ‘ave pōpoaki pē ki he toko taha, kae ‘ikai fuoloa kuo lahi ho‘o ‘ave pōpoakí pea ‘ave ki he kakai tokolahi. ‘Okú ke toki hanga hake pē, kuó ke ‘osi faialea mo e tamaiki tangata kehekehe ‘e toko tolu, ko e tokotaha taki taha ‘oku fakakaukau ia ko ia ‘a e ‘⁠tokotaha makehe’ ‘okú ke hoko ‘o ‘ilo‘i lelei angé. ‘I he‘enau ‘ilo‘i ‘a e mo‘oní, ‘oku nau hoko ‘o loto-mamahi—pea ‘okú ke ma‘u ai ‘a e ongoongo ‘o e hoko ko ha tokotaha fakamalinga.”—Lala.

‘Oku pehē ‘e he Tohi Tapú: “Na‘a mo e tamasi‘i [pe ta‘ahine], ‘oku mahino ia mei he‘ene faianga ‘oku ma‘a koā ‘ene ngaue? ‘Oku totonu?”​—Palōveepi 20:⁠11.

Me‘a mahu‘inga ke fakakaukau ki ai: Ko e feohi mo e ngaahi mēmipa ko e tangata pe fefiné ‘oku ‘ikai hala ia. Ka ‘o kapau ‘oku ‘ikai ha‘o ngaahi fakangatangata, ‘e lava ke ke ‘ai koe ke ke mamahi, maumau‘i ha kaume‘a lelei, pea maumau‘i ho ongoongó.

‘E lava fēfē ke ke tala kuó ke fakalaka atu mei he kaume‘a ‘ata‘ataá? Ko e founga ‘e taha ke ‘eke hifo kiate koe, ‘⁠Kuo hoko ha kaume‘a ko e tangata pe fefine ko e tokotaha pē ia ‘oku tala ki ai ‘ete me‘a  fakapulipulí?’ “Kapau ‘okú ke kaume‘a ‘ata‘atā pē mo ha tamasi‘i,” ko e lau ia ‘a ha ta‘ahine ko ‘Ēlina, “ ‘oku ‘ikai totonu ke hoko ko e ‘uluaki tokotaha ia ‘okú ke loto ke talanoa ki ai ‘i he ‘aho kotoa pē pe ko e ‘uluaki tokotaha ia ‘okú ke loto ke tala ki ai ‘a e ngaahi ongoongo mahu‘ingá. ‘Oku ‘ikai ‘aupito totonu ke hoko ia ko e tokotaha ‘okú ke hanga ki ai ki ha fakafiemālie fakaeongo.”

Ke fakakaukau ki ai:

● Ko e hā nai ‘e hā ngali fakamānako ai ke ‘ai ha taha ko e tangata pe fefine ko e tokotaha pē ia ke tala ki ai ho‘o me‘a fakapulipulí? Ka ko e hā ‘a e ngaahi fakatu‘utāmakí?

“Ko e tamaiki tangata ‘oku ou ‘ilo‘í ‘oku ‘ikai ko hoku ngaahi kaume‘a ofi tahá kinautolu. ‘Oku ‘ikai te u talanoa mo kinautolu ‘i he telefoní ‘i ha laui houa ‘o hangē nai ko ha‘aku talanoa mo haku kaume‘a fefiné. Pea ‘oku ‘i ai ‘a e ngaahi tōpiki he‘ikai pē ke u talanoa ai ki ai mo kinautolu.”—Lina.

‘Oku pehē ‘e he Tohi Tapú: “Tokanga ki he me‘a ‘okú ke lea‘akí . . . Ko ha tokotaha talanoa ta‘etokanga ‘okú ne faka‘auha ‘a ia tonu.”​—Palōveepi 13:⁠3, Good News Translation.

Fakakaukau: ‘Oku ‘i ai ha fakatu‘utāmaki ‘i hono fakahaa‘i ‘a e me‘a lahi fekau‘aki mo koe ki ha tokotaha ko ha tangata pe fefine? Fēfē kapau ‘e faifai pē ‘o ‘osi ho‘omo kaume‘á? Te ke fakatomala ‘i hono fakahaa‘i ‘a e ngaahi fakaikiiki peheé ki he tokotaha ko iá?

Ko ha ta‘u hongofulu tupu ko ‘Alekisisi ‘okú ne fakanounou‘i lelei ia. ‘Okú ne pehē: “ ‘Oua ‘e faka‘ehi‘ehi mei ha taha koe‘uhí pē ko e tokotaha ko iá ko e tangata pe fefine. ‘I he tafa‘aki ‘e tahá, ‘oua te ke lohiaki‘i koe ‘o pehē ‘okú mo kaume‘a ‘ata‘atā pē lolotonga iá ‘oku ‘ikai. ‘Ai ke mapule‘i ho‘o ngaahi ongo‘í, pea te ke kalofi ai ha mamahi lahi.”

[Fakamatala ‘i laló]

 [Puha ‘i he peesi 27]

TALANOA MO‘ONI: “Na‘á ku kaume‘a mo ha tamasi‘i, pea na‘á ma fetaulaki lelei ‘aupito. Ka na‘á ku fakatokanga‘i ki mui na‘e lōloa ange mo fakafo‘ituitui ange ‘ema ngaahi fetalanoa‘akí. Na‘e lava ke u tala na‘á ma toe ki‘i vāofi ange koe‘uhí na‘á ne fa‘a tala mai kiate au ‘a e me‘a kotoa na‘á ne hoha‘a ki aí. Pea ‘i he ‘aho ‘e taha na‘á ne ‘īmeili ‘o tala mai ‘oku tokanga mai kiate au. Na‘e ‘ikai te u ‘ilo‘i pe ko e hā ha‘aku lea ‘e fai. Ne ‘i ai ‘eku ki‘i ongo lelei‘ia—‘oku lelei ‘a e taimi ‘oku fakakaukau ai ha taha ‘okú ke makehé. Ka na‘á ku hoha‘a. Na‘á ku ‘ilo‘i he‘ikai lava ke ma hokohoko atu ‘a e ‘⁠kaume‘a ‘ata‘atā peé’ koe‘uhí ‘oku hā mahino na‘e fakakaukau ia ‘okú ma fakalaka atu ai. Na‘á ku ‘ilo‘i kapau te u tala ange ‘okú ma fu‘u kei si‘i ke kaume‘a ‘i ha tu‘unga femanako‘aki, ‘e loto-mamahi. Na‘á ku talanoa ki he‘eku ongo mātu‘á fekau‘aki mo e me‘á ni kotoa, pea na‘á na fakamamafa‘i mai ‘a e mahu‘inga kiate au pea ki he tamasi‘í ke fakangatangata ‘ema fetu‘utakí. Ko e me‘a ko ia na‘e hokosiá na‘á ne ‘ai au ke u ‘ilo‘i ‘a e vave ‘o e lava ke ‘alu ha me‘a mei he‘ene sai peé ‘o mātu‘aki fakamātoato. Pea talu mei ai, kuó u tokanga ‘aupito ke fakangatangata ‘eku feohi mo e tamaiki tangatá, tautefito ‘i he taimi ‘o e ‘ave pōpoakí. ‘Oku toe tokoni ‘a e feohi ‘i he ngaahi kulupú kae ‘ikai tauhoa. ‘I he founga ko iá he‘ikai hoko ai ho‘o fetalanoa‘akí ‘o fu‘u fakafo‘ituitui pea ko ho‘o fetu‘utaki mo e tokotaha ‘e tahá ‘e ‘ikai hoko ‘o fu‘u ­mālohi.”​—‘Elenā.

[Puha ‘i he peesi 28]

KO E HĀ ‘OKU ‘IKAI ‘EKE AI KI HO‘O ONGO MĀTU‘Á?

‘Eke ki ho‘o ongo mātu‘á ‘a ‘ena fakakaukaú ‘i he ongo fehu‘i “Ke fakakaukau ki ai” ‘i he kupu ko ení. ‘Oku kehe ‘ena fakakaukaú mei ha‘aú? Kapau ko ia ‘oku anga-fēfē? Ko e hā ‘a e ‘aonga ‘oku lava ke ke sio ki ai mei he anga ‘o ‘ena fakakaukaú?​—Palōveepi 1:⁠8.

[Puha/Fakatātā ‘i he peesi 28]

ME‘A ‘OKU LEA‘AKI ‘E HO TO‘UME‘Á

‘Anitelū—Ko e lahi ange ‘a e taimi ‘okú ke feohi ai mo ha ta‘ahiné, ko e faingofua ange ia ke tupulekina ‘a e ongo‘í pea ko e lahi ange ia ‘a e fakakaukau ‘a e tokotaha ko iá ‘okú ke mahu‘inga‘ia he kaume‘a ‘i ha tu‘unga femanako‘aki. Kapau ‘oku ‘ikai faka‘atā ‘e ho‘o ngaahi taumu‘á ke ‘i ai ha vaha‘angatae he taimí ni, pe‘i ‘oua ‘e ‘ai ke hā ‘okú ke feinga ke kamata ha vaha‘angatae.

Kesaia—‘Oku ou hehema ke anga-faingofua, pea koe‘uhi na‘á ku tupu hake ‘i he ‘api ‘oku ‘i ai ‘a e tamaiki tangata, ‘oku ou fiemālie he feohi mo kinautolú⁠—‘a ia ‘oku ‘ikai ma‘u pē ko ha me‘a lelei ia. Ko e tō‘ongafai ki ha tamasi‘i ‘o hangē ko ha kaume‘a fefiné ‘oku ‘ikai lelei—‘e lava ke ne ‘oatu ‘a e fakakaukau hala. Ko e tō‘ongafai ki ha tamasi‘i ‘o hangē ko haku tuonga‘ané ‘a e founga lelei tahá!

 [Puha ‘i he peesi 29]

NOUTI KI HE ONGO MĀTU‘Á

‘I he ngaahi tu‘unga leleí, ‘oku ‘ikai hala ki he to‘utupú ke feohi mo e ngaahi mēmipa ko e tangata pe fefine. Ka ko e fa‘ahinga ko ia ‘oku ‘ikai te nau mateuteu ke tuli ki ha vaha‘angatae ‘a ia ‘e lava ke iku ki he malí ‘oku fiema‘u ke nau fokotu‘u ha ngaahi fakangatangata. * Kiate kinautolu, ko e kaume‘a mo e tangata pe fefiné ‘oku totonu ke ngata pē ai—ko e kaume‘a pē ‘o ‘ikai toe fakalaka atu ai.

Ko e hā ‘a e ngaahi olá ‘i he taimi ‘oku hoko ai ha ongo me‘a ‘e toko ua ‘o ‘i ai ‘ena fekau‘aki fakaeongo ki mu‘a ke na mateuteu ki ha vaha‘angatae fakamātoató? Ko ha mu‘aki fiefia pē ‘e vave ‘ene hoko ki he ongo‘i feifeitamakí. ‘Oku hangē ia ko e tangutu ‘i ha kā ‘oku ‘ikai hano ngaahi fo‘i va‘é. ‘Ikai fuoloa, kuo ‘ilo‘i ‘e he tamasi‘í mo e ta‘ahiné he‘ikai lava ke hoko atu ‘a e vaha‘angatae ko iá. ‘Oku kamata nai ‘a e ni‘ihi ke faialea fakapulipuli—ko ha tu‘unga ‘a ia ko e anga-kākā fakataha mo e tō ki he ‘ulungaanga ta‘etaau. ‘Oku movete ‘a e ni‘ihi—ko ha founga ‘a ia ‘e lava ke iku fakatou‘osi ai ki he ongo‘i kuo kākaa‘i, loto-mamahi, pea na‘a mo e loto-mafasia. ‘E lava fēfē ke mo tokoni‘i ho‘omo tamá ke faka‘ehi‘ehi mei ha hala ta‘efalala‘anga ‘o ha femanako‘aki te‘eki taimi?—Koheleti 12:1 (11:​10, PM ).

Ko e kií ke tauhi ke ‘atā ‘a e fetu‘utaki mo ho‘o tamá ‘i he taimi ‘oku kaunga ai ki he kaume‘a ‘a e tangata pe fefiné. ‘I he foungá ni te mo lāu‘ilo ai ki ai—pea faingamālie ke fai ha tokoni—kapau ‘oku kamata ke hoko ha kaume‘a ‘o fakalaka atu ai.

Ko e ngaahi mātu‘a ‘e ni‘ihi ‘oku nau ta‘ofi ‘i he ta‘e‘ilo ‘a e talanoa ‘enau fānaú ki he‘enau mo‘ui fakasōsialé. Vakai angé ki he me‘a kuo fakahā ‘e he to‘utupu ‘e ni‘ihi ki he ‘Ā Hake!

“ ‘Oku ou loto ma‘u pē ke talanoa ki he‘eku fa‘eé fekau‘aki mo e tokotaha ‘oku ou manako aí, ka na‘á ku ta‘ota‘ofi koe‘uhí na‘á ku fakakaukau ‘e ‘ita.”​—Kalo.

“ ‘I he taimi na‘á ku tala ai ki he‘eku fa‘eé na‘á ku manako ‘i ha tamasi‘í, na‘á ne fa‘a pehē mai, ‘ ‘Oua te ke ‘amanekina te u ‘alu atu ki ho‘o malí!’ kae ‘ikai pehē mai ‘Ko ia talanoa mai fekau‘aki mo ho kaume‘á. Ko e hā ‘okú ke sai‘ia ai ‘iate iá?’ Kapau na‘e ‘eke mai ‘e he‘eku fa‘eé ‘a e ngaahi fehu‘i hangē ko iá, na‘á ku mei ongongofua ange ai ki he‘ene fale‘í.”​—Na‘ati.

‘I hono kehé, fakatokanga‘i ‘a e kehekehé ‘i he taimi na‘e fanongo anga-kātaki ai ‘a e ongo mātu‘á pea toki fai ha tataki ‘aongá.

“Na‘e ‘ikai ke ‘ita ‘a ‘eku ongo mātu‘á ‘i he‘eku talanoa ange fekau‘aki mo ha tamasi‘i na‘á ku manako ai. Na‘á na lea‘aki ‘a e me‘a na‘e fiema‘u ke u fanongo ki aí, ka na‘á na mahino‘i ‘a ‘eku ongo‘í. Koe‘uhi ko e me‘a ko iá, na‘á ku ‘ilo‘i ‘oku faingofua ange ai ke fanongo ki he‘ena fale‘í peá u toe talanoa lahi ange ai ki he‘eku ongo‘í.”—Kōlini.

“ ‘I he taimi na‘e talanoa mai ai ‘eku ongo mātu‘á fekau‘aki mo e fa‘ahinga na‘á na sai‘ia ai ‘i he‘ena kei si‘i haké—na‘a mo e fakamatala ki he ‘ikai ola lelei ha vaha‘angatae ‘e ni‘ihi—na‘e tokoni‘i ai au ke u ‘ilo‘i na‘e sai pē ke talanoa ki he‘eku ongo mātu‘á fekau‘aki mo ‘eku ngaahi ongo‘i ki ha tahá.”—Līneti.

Fakatokanga‘i ange foki, ‘i he taimi ‘e ni‘ihi ‘oku ‘i ai ‘a e ngaahi me‘a tefito ‘oku tupu mei ai ‘a e fai kaume‘a ‘oku te‘eki ai taimí.

“ ‘I he taimi na‘á ku faialea fakapulipuli ai mo ha tamasi‘í, na‘e peheé koe‘uhi he na‘á ne ‘ai au ke u ongo‘i fiefia pea na‘á ne fanongo mai kiate au.”—‘Āneti.

“Na‘e ‘i ai ‘a e tamasi‘i ‘e taha na‘á ku fiefia ma‘u pē he feohi mo iá. Na‘á ne tokanga mai ma‘u pē kiate au, ‘a ia ko hoku vaivai‘angá ia. ‘Oku ou sai‘ia he tokanga mai kiate aú, lelei pe kovi.”—‘Eimi.

“ ‘I he taimi ‘oku tala mo‘oni mai ai ‘e he‘eku ongo mātu‘á ‘oku ou hā faka‘ofo‘ofá pe ‘oku ou hā lelei ‘i ha teunga pau, ‘oku ou ongo‘i ai ‘a e fiema‘u ke fai mai ha lea pehē ‘e ha tamasi‘i.”—Kēleni.

‘Eke hifo kiate koe:

‘E lava fēfē ke u ‘ai au ke u fotungofua ange ki hoku to‘ume‘á?—Filipai 4:⁠5.

‘Oku ou ‘⁠vave ki he fanongó, ‘o fakatuotuai ki he leá’?—Sēmisi 1:⁠19.

‘E lava fēfē ke u fakasi‘isi‘i ‘a e fakatauele ki he‘eku tamá ke kumi ki tu‘a mei he ‘apí ki he ‘ofá mo e lelei‘iá?—Kolose 3:⁠21.

Me‘a mahu‘inga ke fakakaukau ki ai: Tokoni‘i ho‘o tamá ke ne ako ki he founga ke tauhi ai ‘a e kaume‘a mo e tangata pe fefiné ke fe‘ungamālie pea ‘atā mei he palopalemá. Ko ha ­pōto‘i ‘a ia ‘e tokoni‘i lelei ai ia ‘i he‘ene fu‘u lahí.​—Kolose 3:5; 1 Tesalonaika 4:​3-6.

[Fakamatala ‘i laló]

[Saati ‘i he peesi 27]

(Ki he fakamatala kakato, sio ki he tohí)

NGAAHI FAKANGATANGATA

ME‘A KE FAI

✔ feohi ‘i he ngaahi kulupu

✔ fakamaheni

✔ fiefia ‘i he fetalanoa‘akí

ME‘A KE ‘OUA ‘E FAI

X tauhoa

X talanoa ki he ngaahi me‘a fakapulipulí

X fakamalinga

[Taiakalami ‘i he peesi 28]

(Ki he fakamatala kakato, sio ki he tohí)

FAKAFEOHI

FAKAMALINGA

ALA

FEPIKI

‘UMA