Vakai ki he Māmaní

‘I he Lepupilika ‘o Siōsia ‘i he tonga-hahake ‘o ‘Iulopé, “ko e lahi ai ‘o e ngaahi vete malí kuo meimei liunga ua ia ‘i he ta‘u ‘e hongofulu fakamuimuí.” Ko e tokolahi taha ‘o e fa‘ahinga ko ia ‘oku veté ‘oku nau si‘i hifo ‘i he ta‘u 20.​—FINANCIAL, SIŌSIA.

‘I ‘Ailani, ko e pēseti ‘e 17 ‘o e ta‘u 11-16 “kuo nau ‘oange honau hingoa kakató ki ha taha ‘i he ‘Initanetí ‘a ia kuo te‘eki ai ‘aupito ke nau fetaulaki mo ia.” Ko e pēseti ‘e ­hongofulu kuo nau toe ‘oange honau “tu‘asila ‘īmeilí, fika telefoni to‘oto‘ó pe ko e la‘i tā.”​—KO E SŌSAIETI ‘I ‘AILANI KI HONO TA‘OFI ‘O E FAKAMAMAHI‘I ‘O E ­FĀNAÚ.

Ko e pēseti pē nai ‘e 4 ‘o e vela vao ‘i māmani lahí ko hono ngaahi tupu‘angá ‘oku fakanatula pē. ‘I he kotoa ‘o e ngaahi tu‘unga kehé, ko e ngaahi velá ‘oku kamata‘i pē ia ‘e he tangatá—‘i he ta‘etokanga pe ko e loto-lelei pē ki ai.​—PRESSEPORTAL, SIAMANE.

“Ko e meimei toko taha ‘i he toko 10 ‘o e kau ‘Ameliká [ta‘u 12 pe lahi ange] ‘oku līpooti ki hono ngāue‘aki ma‘u pē ‘a e ngaahi faito‘o kona tapu ta‘efakalaó, kau ai ‘a e maliuaná, kōkeiní, heloiní, ngaahi faito‘o fakatupu ongo-halá, ngaahi faito‘o kona tapu ‘oku mihi pe ma‘u mei he kēmisí ‘o ngāue‘aki ‘i he fakafiefiá.”—USA TODAY, ‘AMELIKA.

Ko e Mapule‘i-Kitá ‘a e Kī ki he Tu‘uma‘ú

“ ‘Oku pehē ‘e he fakatotoló ko e ‘ikai ha mapule‘i-kita lolotonga ‘a e kei talavoú ‘oku tomu‘a tala ai ‘a e mahamahaki, si‘i ‘a e tu‘uma‘u fakapa‘angá mo ha lēkooti ‘o e faihia ‘i he fu‘u lahí,” ko e lau ia ‘a e Time. Laka hake he kakai ‘e toko 1,000 na‘e fai e fakatotolo mei honau fanau‘í ‘o a‘u ki he‘enau ta‘u 32. ‘I he‘enau fu‘u lahí, “ko e fa‘ahinga ko ia [‘i he tu‘unga ko e fānaú] na‘a nau loto-‘oho lahi ange mo ongo‘i feifeitamaki vave ange pea faingata‘a‘ia lahi taha ‘i hono toloi‘i ‘a hono fakatōli‘a ‘o ‘enau fiema‘ú pe tatali ki honau taimí” ngalingali ‘oku liunga tolu nai ‘a e līpooti ‘oku nau mahamahaki, si‘i ‘enau pa‘anga hū maí, hoko ko e ngaahi mātu‘a ta‘ehoa, pe fakahoko ha hia. Neongo ia, “ko e mapule‘i-kitá ‘e lava ke ako,” ko e lau ia ‘a e makasiní, pea hoko atu: “Ko e kau mai ki ai ‘a e akó mo e fāmilí ‘a ia ‘oku ako‘i ai ‘a e kau leká ke nau mapule‘i kinautolu mei he kei si‘í ‘o faai mai aí ‘e iku nai ia ki he mo‘ui lelei ange pea hoko ko e kakai lalahi tu‘uma‘u ange.”

Ako‘i ha Lēsoni ki he Kau Faka‘uli Koví

Ko e kau ma‘u mafai ‘i ‘Initiá ‘oku nau ‘ahi‘ahi‘i ha ngaahi founga fo‘ou ke fakafeangai‘aki ki he kau maumau-lao kovi taha ‘i he fefononga‘akí ‘aki hono ‘ai kinautolu ke nau ngāue ko e kau polisi ki he fefononga‘akí. Ko e taumu‘á ke tokoni‘i ‘a e kau faka‘ulí ke nau mahino‘i ‘a e ‘uhinga ke ngāue ai ki he fa‘ahinga palopalema ‘oku nau fakatupungá. Pea ‘i he ‘ikai ke ta‘ofi pē ‘a e kau maumau-laó ‘o faka‘ilo kinautolú, ko e kau polisi ‘i Gurgaon ‘i he tokelau-hihifo ‘o ‘Initiá, ‘oku nau toe fiema‘u ‘a e kau faka‘ulí ke nau kau ki he kau polisí ‘i ha haafe houa pe lahi ange ke fakahinohino ‘a e fefononga‘akí. ‘Oku fakahaa‘i ‘e he kau faka‘uli ‘e ni‘ihi kuo liliu ‘e he lēsoní ‘a ‘enau fakakaukaú. “ ‘Oku mau fai ha [faka‘ilo] ‘e taha afe ki he ngaahi maumau-lao ‘i Gurgaon ‘i he ‘aho kotoa pē,” ko e lau ia ‘a Bharti Arora, ko e komisiona tokoni fakalotofonua ‘o e kau polisí. “ ‘Oku lava ke mau ma‘u ‘a e ‘⁠kau polisi’ lahi ange ‘e toko 1,000 ‘i he ‘aho kotoa pē.”