NA‘E fakamānava‘i ‘e Sihova ‘a e ‘apositolo ko Paulá ke ne tohi ‘o fekau‘aki mo e tafa‘aki ‘e hiva ko e fua ia ‘o e ngāue ‘a e laumālie mā‘oni‘oní. (Kal. 5:22, 23) Ko e ngaahi ‘ulungaanga faka‘ofo‘ofa kotoa ko ení ‘oku ui ia ko e “fua ‘o e laumālié.” * (Sio ki he fakamatala ‘i lalo.) Ko e fua ko ení ko e taha ia ‘o e ngaahi “anga‘itangata fo‘oú” ‘a ia kuo pau ke kofu‘aki ‘e he kau Kalisitiané. (Kol. 3:10) Hangē pē ko e fua ‘a ha fu‘u ‘akau ‘i he taimi ‘oku fu‘ifu‘i taimi totonu aí, ‘e ma‘u ‘e ha taha ‘a e ngaahi ‘ulungaanga faka‘ofo‘ofa ko ení ‘i he taimi ‘oku tafe tau‘atāina ai ‘a e laumālie mā‘oni‘oní ‘i he‘ene mo‘uí.​—Saame 1:1-3.

Ko e ‘uluaki ‘ulungaanga na‘e hiki ‘e Paulá ko e ‘ofa. Ko e hā ‘oku mahu‘inga ai ‘a e ‘ulungaanga ko ení? Na‘e pehē ‘e Paula ‘i he ‘ikai ha ‘ofá, na‘á ne hoko ko ha “me‘a noa pē.” (1 Kol. 13:2) Ka ko e hā ‘a e ‘ofa, pea ‘e lava fēfē ke tau fakatupulekina mo fakahāhā ia ‘i he ‘aho kotoa pē?

Neongo ‘oku mātu‘aki faingata‘a ke fakamatala‘i totonu pe ko e hā ‘a e ‘ofá, ‘oku fakamatala‘i ‘e he Tohi Tapú ‘a e anga ‘o e fakakaukau mo e ngāue ‘a e tokotaha ‘oku ‘ofá. Ko e fakatātaá, ko e tokotaha ‘oku ‘ofá ‘oku “kātaki mo anga-lelei” pea ‘okú ne “fiefia ‘i he mo‘oní.” ‘I he taimi ‘oku ma‘u ai ‘e ha taha ‘a e ‘ofá, ‘okú ne “‘ūkuma ‘a e me‘a kotoa pē, tui ‘i he me‘a kotoa pē, ‘amanaki ‘i he me‘a kotoa pē, kātekina ‘a e me‘a kotoa pē.” ‘Okú ne ‘ofa lahi ki he ni‘ihi kehé, ‘okú ne tokanga mo‘oni kiate kinautolu pea ‘okú ne hoko ko ha kaume‘a mateaki. Ka ‘i he taimi ‘oku ‘ikai ke ma‘u ai ‘e ha taha ‘a e ‘ofá, ‘okú ne meheka, pōlepole, anga ta‘etaau, siokita mo ta‘efakamolemole. ‘I he ‘ikai ke tau fakahāhā ‘a e ngaahi ‘ulungaanga ‘ikai lelei hangē ko ení, ‘oku tau loto ke fakahāhā ‘a e ‘ofa mo‘oní ki he ni‘ihi kehé, ko e fa‘ahinga ‘ofa ia ‘oku “‘ikai te ne kumi ki he‘ene lelei pē ‘a‘ana.”​—1 Kol. 13:4-8.

“Ko e ‘Otuá ko e ‘ofa.” (1 Sio. 4:8) ‘Oku fakamo‘oni‘i ia ‘i he kotoa ‘o ‘ene ngaahi ngāué mo ‘ene ngaahi tō‘ongá. Ko e fakahāhā lahi taha ‘o ‘ene ‘ofa ki he fa‘ahinga ‘o e tangatá, ko ‘ene fekau mai ‘a Sīsū ki he māmaní ke ne faingata‘a‘ia pea pekia ma‘atautolu. Na‘e pehē ‘e he ‘apositolo ko Sioné: “Ko e me‘a ‘eni na‘e fakahaa‘i ai ‘a e ‘ofa ‘a e ‘Otuá ‘i he fekau‘aki mo hotau tu‘ungá, na‘e fekau‘i mai ‘e he ‘Otuá hono ‘Alo tofu-pē-taha-ne-fakatupú ki he māmaní koe‘uhi ke tau ma‘u ai ‘a e mo‘uí fakafou ‘iate ia. Ko e anga ‘eni ‘o e ‘ofá, ‘oku ‘ikai ko e pehē ne tau ‘ofa ki he ‘Otuá, ka na‘á ne ‘ofa ‘iate kitautolu peá ne fekau‘i mai hono ‘Aló ko ha feilaulau fakatupuhōifua‘anga ma‘a ‘etau ngaahi angahalá.” (1 Sio. 4:9, 10) Koe‘uhí ko e ‘ofa ‘a e ‘Otuá, ‘e lava ke fakamolemole‘i ai ‘etau ngaahi angahalá pea ‘e lava ke tau ma‘u ai ‘a e ‘amanaki mo e mo‘ui.

Na‘e fakahāhā ‘e Sīsū ‘ene ‘ofa ‘i he fa‘ahinga ‘o e tangatá ‘aki ‘ene feilaulau‘i ‘ene mo‘uí ke fai ‘a e finangalo ‘o e ‘Otuá. ‘Oku tala mai ‘e he ‘apositolo ko Paulá: “Fakatatau ki he ‘finangalo’ ko eni ‘o e ‘Otuá kuo fakamā‘oni‘oni‘i ai kitautolu fakafou ‘i hono ‘oatu tā-tu‘o-taha ‘a e sino ‘o Sīsū Kalaisí.” (Hep. 10:9, 10) ‘Oku ‘ikai ha taha ‘e lava ke ne fakahāhā ha ‘ofa lahi ange. Na‘e pehē ‘e Sīsū: “‘Oku ‘ikai ha taha kuó ne ma‘u ha ‘ofa ‘oku lahi ange ‘i he me‘á ni, ke tuku atu ‘e ha taha ‘ene mo‘uí ma‘a hono  ngaahi kaume‘á.” (Sione 15:13) ‘E lava ke fa‘ifa‘itaki ‘a e fa‘ahinga ta‘ehaohaoa ‘o e tangatá ki he ‘ofa kuo fakahāhā ‘e Sihova mo Sīsuú? ‘Io! Tau vakai angé ki he founga ‘e lava ke tau fai ai ení.

‘Oku fakalototo‘a‘i kitautolu ‘e Paula: “Mou hoko ko e kau fa‘ifa‘itaki ki he ‘Otuá, ‘i he tu‘unga ko ‘ene fānau ‘ofeina, pea hokohoko atu ‘a e ‘a‘eva ‘i he ‘ofá, ‘o hangē tofu pē ko e Kalaisí na‘á ne ‘ofa‘i foki kitautolu peá ne foaki ‘a ia tonu ma‘atautolu.” (‘Ef. 5:1, 2) Ko e hā ‘a e ‘uhinga ‘o e pehē ke “hokohoko atu ‘a e ‘a‘eva ‘i he ‘ofá”? ‘Oku ‘uhinga iá ke fakahāhā ‘a e ‘ofá ‘i he taimi kotoa pē. ‘Oku ‘ikai ke tau lea pē ‘o pehē ‘oku tau ‘ofa ki he ni‘ihi kehé. ‘Oku tau fakahāhā ia ‘i he me‘a ‘oku tau faí. Na‘e tohi ‘e Sione: “Si‘i fānau, ‘oku totonu ke tau ‘ofa ‘o ‘ikai ‘i he lea pē, pe ‘aki ‘a e ‘eleló pē, ka ‘i he ngāue mo e mo‘oni.” (1 Sio. 3:18) Ko e fakatātaá, ‘oku tau malanga‘i ‘a e ‘ongoongo lelei ‘o e Pule‘angá’ koe‘uhi ‘oku tau ‘ofa kia Sihova mo hotau kaungā‘apí. (Māt. 24:14; Luke 10:27) ‘Oku tau toe “hokohoko atu ‘a e ‘a‘eva ‘i he ‘ofá” ‘i he taimi ‘oku tau kātaki, anga-lelei mo fakamolemole aí. ‘Oku tau ngāue‘aki ‘a e akonaki ‘a e Tohi Tapú: “Hangē tofu pē ko ia ne fakamolemole‘i loto-lelei kimoutolu ‘e Sihová, kuo pau foki ke mou fai ‘a e me‘a tatau.”​—Kol. 3:13.

Kae kehe, kapau ‘oku tau ‘oatu ha akonaki pe fakatonutonu ki he ni‘ihi kehé, ‘oku ‘ikai ke ‘uhinga iá ‘oku tau ta‘e‘ofa. Ko e fakatātaá, ke ta‘ofi ‘a e tangi ‘enau ki‘i tamá, ko e ngaahi mātu‘a ‘e ni‘ihi ‘oku nau fai pē ‘a e me‘a ‘oku loto ki ai ‘a e ki‘i tamá. Ka ko e mātu‘a ‘oku ‘ofa mo‘oni ‘i he‘ene ki‘i tamá te ne tu‘uma‘u ‘i he taimi ‘oku fiema‘u aí. ‘I he founga meimei tatau, neongo koe ‘Otuá ko e ‘ofa, “ko kinautolu ‘oku ‘ofa aí ‘a Sihová ‘okú ne akonaki‘i.” (Hep. 12:6) Ko ia ko e ‘ofá ia ‘a hono ‘oatu ha akonaki totonu ‘i he taimi ‘oku fiema‘u aí. (Pal. 3:11, 12) Kae manatu‘i, ‘oku tau angahala‘ia kotoa pea ‘oku ‘ikai ke tau fa‘a fakahāhā ‘a e ‘ofá. Neongo ia ‘e lava ke fakalahi ‘etau fakahāhā ‘a e ‘ofá. ‘E lava fēfē ke tau fai eni? Tau vakai angé ki he founga ‘e tolu.

‘Uluakí, kole ki he ‘Otuá ke ne ‘oatu kiate koe hono laumālie mā‘oni‘oní, he ‘oku tupu mei ai ‘a e ‘ofá. Na‘e pehē ‘e Sīsū ‘oku foaki ‘e Sihova ‘a e “laumālie mā‘oni‘oní ki he fa‘ahinga ‘oku kole kiate iá.” (Luke 11:13) Ko ia ‘oku lava ke tau fakapapau‘i kapau te tau lotu ‘o kole ‘a e laumālie mā‘oni‘oní pea faka‘atā ia ke ne tokoni‘i kitautolu, ‘e toe lahi ange ai ‘etau ‘ofá. (Kal. 5:16) Ko e fakatātaá, kapau ko ha tokotaha mātu‘a koe, ‘e lava ke ke kole ‘a e laumālie mā‘oni‘oní ke ne tokoni‘i koe ke ke hoko ‘o anga-‘ofa ‘i he taimi ‘oku fiema‘u ai ke ke akonaki‘i ‘a e ni‘ihi kehé mei he Tohi Tapú. Pe kapau ko ha mātu‘a tauhi fānau koe, ‘e lava ke ke kole ‘a e laumālie ‘o e ‘Otuá ke ne tokoni‘i koe ke akonekina ho‘o fānaú ‘o ‘ikai fai ‘i he ‘ita ka ‘i he ‘ofa.

Uá, fakakaukau fakamātoato fekau‘aki mo e founga na‘e fakahaa‘i ai ‘e Sīsū ‘a e ‘ofá neongo hono ngaohikovia ia ‘e he ni‘ihi kehé. (1 Pita 2:21, 23) Kapau ‘e fakalotomamahi‘i koe ‘e ha taha pe te ke hokosia ha fakamaau ta‘etotonu, ‘eke hifo kiate koe, ‘Ko e hā na‘e mei fai ‘e Sīsuú?’ Ko ha tuofefine ko Leigh na‘á ne ‘ilo‘i na‘e tokoni‘i ia ‘i he‘ene ‘eke ‘a e fehu‘i ko ‘ení ke ne fakakaukau ki mu‘a ke ne fai ha me‘a. ‘Okú ne pehē: “‘I he taimi ‘e taha, na‘e ‘ave ai ‘e ha kaungāngāue ha ‘īmeili laukovi ki he fa‘ahinga ‘oku mau ngāué ‘o fekau‘aki mo au mo e ngāue ‘oku ou faí. Na‘e fakalotomamahi‘i lahi ai au. Ka na‘á ku ‘eke hifo pē kiate au, ‘‘E lava fēfē ke u fa‘ifa‘itaki kia Sīsū ‘i he‘eku fakafeangai ki he tokotaha ko eni?’ Hili ‘eku fakakaukauloto atu ki he me‘a na‘e mei fai ‘e Sīsuú, na‘á ku fili leva ke tukunoa‘i ia pea ‘oua ‘e tokanga ki ai. Ki mui aí, na‘a ku ‘ilo‘i ai ko hoku kaungāngāué na‘e fekuki mo ha mahamahaki mafatukituki pea na‘á ne loto-mafasia lahi. Na‘á ku fakamulituku‘aki mahalo pē na‘e ‘ikai ke ne ‘uhinga‘i mo‘oni ‘a e me‘a na‘á ne tohí. ‘I he fakakaukauloto atu ki he fa‘ifa‘itaki‘anga ‘a Sīsū ‘i hono fakahāhā ‘a e ‘ofá na‘a mo e taimi na‘e faka‘ita‘i aí na‘e tokoni‘i ai au ke u fakahāhā ‘a e ‘ofa meimei tatau ki hoku kaungāngāué.” Kapau ‘oku tau fa‘ifa‘itaki kia Sīsū, te tau fakahāhā ma‘u pē ‘a e ‘ofa ki he ni‘ihi kehé.

Tolú, ako ke fakahāhā ‘a e ‘ofa feilaulau‘i-kita. Ko e fa‘ahinga ‘ofa eni ‘okú ne faka‘ilonga‘i ‘a e kau muimui mo‘oni ‘a Sīsuú. (Sione 13:34, 35) Na‘e ma‘u ‘e Sīsū ‘a e fa‘ahinga ‘ofa ko ení, pea na‘á ne fokotu‘u ‘a e fa‘ifa‘itaki‘anga haohaoa ma‘atautolu. Anga-fēfē? ‘I he‘ene mavahe mai mei hēvaní, “na‘á ne fakamasivesiva‘i ‘a ia tonu” koe‘uhi ko kitautolu, “‘o a‘u ki he tu‘unga ‘o e maté.” (Fil. 2:5-8) ‘I he taimi ‘oku  tau fa‘ifa‘itaki ai ki he ‘ofa feilaulau‘i-kita ‘a Sīsuú, ‘e hoko ai ‘etau ngaahi fakakaukaú mo ‘etau ongo‘í ‘o hangē ko iá, pea te tau fakamu‘omu‘a ai ‘a e fiema‘u ‘a e ni‘ihi kehé ‘iate kitautolu.

‘Oku lahi ‘a e ngaahi ‘aonga ‘o hono fakahāhā ‘a e ‘ofá. Tau lāulea ki ha fakatātā ‘e ua:

• FETOKOUA‘AKI FAKAVAHA‘APULE‘ANGA: Koe‘uhi ko ‘etau fe‘ofa‘akí, ‘oku tau ‘ilo‘i ai ko fē pē ha fakataha‘anga te tau ‘a‘ahi ki ai ‘i he māmaní ‘e talitali māfana kitautolu ‘e hotau fanga tokouá mo e fanga tuofāfiné. Ko ha tāpuaki mo‘oni ia ‘a hono ‘ilo‘i ‘oku ‘ofa‘i koe “‘e he ha‘oha‘onga kotoa ‘o homou fanga tokouá ‘i māmaní”! (1 Pita 5:9) ‘Oku lava ke tau toki ma‘u pē ‘a e ‘ofa ko iá ‘i he ha‘oha‘onga ‘o e kakai ‘a e ‘Otuá.

• MELINO: ‘I he‘etau “fekātaki‘aki ‘i he ‘ofa” ‘oku faka‘atā ai kitautolu ke tau fiefia “‘i he ha‘i fā‘ūtaha ko e melinó.” (‘Ef. 4:2, 3) ‘Oku tau hokosia ‘a e melino ko ení ‘i he‘etau ngaahi fakatahá, ‘asemipilií mo e ngaahi fakataha-lahí. ‘Ikai ‘okú ke loto-tatau ko e laumālie fakamelino peheé ‘oku makehe mo‘oni ia ‘i he māmani māvahevahe ‘o e ‘aho ní? (Saame 119:165; ‘Ai. 54:13) ‘I he taimi ‘oku tau feinga ai ke melino mo e ni‘ihi kehé, ‘oku fakahaa‘i ai ‘oku tau ‘ofa mo‘oni ‘iate kinautolu, pea ‘oku tau fakahōifua‘i ai ‘etau Tamai fakahēvaní.​—Saame 133:1-3; Māt. 5:9.

Na‘e tohi ‘e Paula: “Ko e ‘ofá ‘oku langa hake.” (1 Kol. 8:1) Ko e hā ‘oku ‘uhinga ki aí? ‘I he 1 Kolinitō vahe 13, ‘a ia ‘oku ‘e he ni‘ihi ko e “Saame ‘o e ‘Ofá,” ‘okú ne fakamatala‘i ai ‘a e langa hake ‘a e ‘ofá. Ko ‘ofa ‘okú ne kumi ki he lelei ‘a e tokotaha kehé. Ko ‘ofa ‘oku tokanga ki he ngaahi fiema‘u ‘a e ni‘ihi kehé. (1 Kol. 10:24; 13:5) Pea koe‘uhí ko e ‘ofá ‘oku fa‘a fakakaukau, anga-faka‘atu‘i, kātaki mo anga-lelei, ‘okú ne fa‘u ai ha ngaahi fāmili ‘ofa pea mo e ngaahi fakataha‘anga fā‘ūtaha.​—Kol. 3:14.

‘Oku lahi ‘a e ngaahi founga ke fakahāhā ai ‘a e ‘ofá ki he ni‘ihi kehé, ka ko ‘etau ‘ofa ki he ‘Otuá ko e ‘ofa ia ‘oku mahu‘inga taha mo fakatupu langa haké. Ko e hā hono ‘uhingá? Koe‘uhí ko ‘etau ‘ofa kiate iá ‘oku fakafā‘ūtaha‘i ai kitautolu! Ko e kakai mei he puipuitu‘a, matakali mo e lea kotoa pē ‘oku nau lotu fakataha kia Sihova pea tauhi kiate ia “uma ki he uma.” (Sēf. 3:9) ‘Ofa ke tau fakapapau‘i ke fakahāhā ‘i he ‘aho kotoa pē ‘a e tafa‘aki mahu‘inga ko ‘eni ‘o e fua ‘o e laumālie mā‘oni‘oni ‘o e ‘Otuá.