‘OKÚ KE faka‘amua ha vāhenga-ngāue ‘i he fakataha‘angá ‘a ia ‘oku ‘ikai lava ke ke ma‘u he taimí ni? Mahalo ko ha fatongia ‘oku ma‘u ia ‘e ha tokotaha kehe. Pe mahalo ko ha vāhenga-ngāue pe monū na‘á ke ma‘u ki mu‘a. Kae kehe, ko e ta‘umotu‘á, mahamahakí, faingata‘a faka‘ekonōmiká, pe fatongia fakafāmilí ‘okú ne fakangatangata he taimí ni ‘a e me‘a ‘oku lava ke ke faí. Pe ko e fiema‘u ke ke tuku ange ha fatongia fuoloa koe‘uhi ko e ngaahi liliu ‘i he kautahá. Tatau ai pē pe ko e hā ‘a e ‘uhingá, ‘okú ke ongo‘i nai ‘oku ‘ikai ke ke fai ‘a e kotoa ‘okú ke sai‘ia ke fai ‘i he ngāue ‘a e ‘Otuá. ‘I he ngaahi tu‘unga peheé, ‘oku hā mahino ‘i he taimi ‘e ni‘ihi ‘okú ke ongo‘i ‘oku siva ho‘o ‘amanakí. Neongo ia, ‘e lava fēfē ke ke tauhi ‘a e ngaahi ongo‘i ‘ikai leleí—hangē ko e loto-si‘i, loto-kona pe ‘ita—mei ha‘ane faiaka? ‘E lava fēfē ke ke tauhi ma‘u ho‘o fiefiá?

‘E lava ke tau ako ha lēsoni ki hono tauhi ma‘u ‘a e fiefiá mei he lāulea ki he fa‘ifa‘itaki‘anga ‘a Sione Papitaisó. Na‘e ma‘u ‘e Sione ‘a e ngaahi monū tu‘u-ki-mu‘a, ka ‘oku ngalingali na‘e kehe ‘a e me‘a ia na‘á ne ‘amanekina ki he‘ene mo‘uí ‘i he ngāue ‘a Sihová. Na‘e ‘ikai nai ke ne sioloto atu te ne fakamoleki ‘a e taimi lahi ange ‘i he pilīsoné ‘i he‘ene kau ‘i he ngāue fakafaifekaú. Ka, na‘e hokohoko atu ‘a e fiefia ‘a Sioné, pea tauhi ma‘u ‘a e fakakaukau ko iá ‘i he toenga ‘ene mo‘uí. Ko e hā na‘e tokoni kiate iá? Pea ‘e lava fēfē ke tau tauhi ma‘u ‘etau fiefiá neongo ‘a e fehangahangai mo e siva ‘a e ‘amanakí?

‘I he fa‘ahita‘u failau ‘o e 29 T.S., na‘e kamata ‘a Sione ‘i hono vāhenga-ngāue ko ha fakamelomelo ‘o e Mīsaiá, ‘o ne pehē: “Mou fakatomala, he kuo ofi ‘a e Pule‘anga ‘o hēvaní.” (Māt. 3:2; Luke 1:12-17) Na‘e tali ‘e he tokolahi. Ko hono mo‘oní, na‘e ha‘u ‘a e fu‘u kakai mei he feitu‘u mama‘ó ke fanongo ki he‘ene pōpoakí, pea na‘e ue‘i ‘a e tokolahi ke fakatomala pea papitaiso. Na‘e fakatokanga loto-to‘a ‘a Sione ki he kau taki lotu fiemā‘oni‘oní fekau‘aki mo e fakamaau ‘oku fakatatali mai kiate kinautolu tuku kehe kapau te nau liliu. (Māt. 3:5-12) Na‘á ne a‘usia ‘a e tumutumu ‘ene ngāue fakafaifekaú ‘i he fakatōlau ‘o e 29 T.S. ‘i he papitaiso ‘a Sīsuú. Mei ai ‘o faai atu, na‘e tataki ‘e Sione ‘a e ni‘ihi kehé ke nau muimui kia Sīsū, ‘a e Mīsaia na‘e tala‘ofá.—Sione 1:32-37.

‘I he vakai ki he fatongia makehe ‘o Sioné, na‘e lava ke pehē ‘e Sīsū: “‘I he fa‘ahinga kuo fanau‘i ‘e he fefiné, kuo te‘eki ai hoko mai ha taha ‘oku lahi hake ‘ia Sione Papitaiso.” (Māt. 11:11) ‘Oku ‘ikai  ha veiveiua na‘e fiefia ‘a Sione ‘i he ngaahi tāpuaki na‘á ne ma‘ú. Hangē ko Sioné, ko e tokolahi ‘i he ‘ahó ni kuo nau hokosia ‘a e ngaahi tāpuaki fakakoloa. Ko e fakatātā fakakaukau atu ki ha tokoua ko Terry. Ko ia mo hono uaifí, ‘a Sandra, kuó na fakamoleki ‘a e ta‘u ‘e 50 tupu ‘i he ngāue taimi-kakató. ‘Oku pehē ‘e Terry: “Kuó u ma‘u ‘a e ngaahi monū fakaofo lahi. Kuó u ngāue ko ha tāimu‘a, Pēteli, tāimu‘a makehe, ‘ovasia sēketi, ‘ovasia fakavahe, pea ngāue ko ha tāimu‘a makehe ‘i he taimí ni.” ‘Oku fakafiefia ke ma‘u ‘a e ngaahi monū fakateokalatí, ka ‘i he‘etau ako mei he fa‘ifa‘itaki‘anga ‘a Sioné, ko e tauhi ma‘u ‘a e fiefiá ‘oku fiema‘u ki ai ‘a e feinga ‘i he taimi ‘oku liliu ai hotau tu‘ungá.

Ko e kī ki he kātaki fiefia ‘a Sione Papitaisó ko e ‘ikai ‘aupito mole ‘ene hounga‘ia ‘i he ngaahi monū na‘á ne ma‘ú. Fakakaukau ki ha fakatātā. Hili ‘a e papitaiso ‘a Sīsuú, na‘e kamata ke holo hifo ‘a e ngāue fakafaifekau ‘a Sioné kae tupulaki ‘a e ngāue fakafaifekau ‘a Sīsuú. ‘I he hoha‘á, na‘e fakaofiofi atu ‘a e kau ākonga ‘a Sioné kiate ia ‘o pehē: “Vakai ange, ko e tokotahá ni ‘oku faipapitaiso pea ‘oku ō kiate ia ‘a e fa‘ahinga kotoa.” (Sione 3:26) Na‘e tali ange ‘a Sione: “‘Ilonga ‘a ia ‘okú ne ma‘u ‘a e ta‘ahine malí ko e tangata malí. Ka ko e kaungāme‘a ‘o e tangata malí, ‘i he‘ene tu‘u ‘o fanongo kiate iá, ‘okú ne ma‘u ha fiefia lahi ‘i he‘ene fanongo ki he le‘o ‘o e tangata malí. Ko ia kuo hoko ‘o kakato ‘a ‘eku fiefiá.” (Sione 3:29) Na‘e ‘ikai ke fe‘auhi ‘a Sione mo Sīsū, pe fakakaukau ‘a Sione ko e monū na‘á ne ma‘ú kuo hōloa koe‘uhi ko e ngafa lahi ange ‘o Sīsuú. ‘I hono kehé, na‘e nofo‘aki fiefia ‘a Sione koe‘uhi na‘á ne koloa‘aki hono ngafa ko e “kaungāme‘a ‘o e tangata malí.”

Ko e fakakaukau ‘a Sioné na‘á ne tokoni‘i ia ke nofo‘aki nonga neongo ‘a e me‘a kotoa na‘e fiema‘u ‘e hono vāhenga-ngāué meiate iá. Ko e fakatātaá, ko Sioné ko ha Nāsili mei hono fanau‘í, pea ko ia ai na‘e tapu ke ne inu ha uaine. (Luke 1:15) “Na‘e ha‘u ‘a Sione ‘o ‘ikai te ne kai pe inu,” ko e lau ia ‘a Sīsuú, ‘o ‘uhinga ki he tō‘onga mo‘ui faingofua ‘a Sioné. ‘I he tafa‘aki ‘e tahá, ko Sīsū mo ‘ene kau ākongá na‘e ‘ikai ke nau ‘i he malumalu ‘o e ngaahi fakataputapui peheé pea mo‘ui anga-maheni pē. (Māt. 11:18, 19) Pehē foki, neongo na‘e ‘ikai fai ‘e Sione ha ngaahi mana, na‘á ne ‘ilo‘i ko e kau ākonga ‘a Sīsuú, ‘o kau ai ‘a e ni‘ihi na‘a nau muimui ki mu‘a ‘ia Sioné, na‘e ‘oange kiate kinautolu ‘a e mālohi ko iá. (Māt. 10:1; Sione 10:41) ‘I he ‘ikai faka‘atā ‘a e faikehekehe peheé ke ne fakahoha‘asi iá, na‘e pipiki faivelenga ‘a Sione ki hono vāhenga-ngāue meia Sihová.

Kapau ‘oku tau koloa‘aki foki hotau vāhenga-ngāue lolotonga ‘i he ngāue ‘a Sihová, ‘e lava ke tau malu‘i ‘etau fiefiá. Ko Terry, na‘e lave ki ai ki mu‘á, ‘okú ne pehē, “‘Oku ou tokangataha ki he vāhenga-ngāue taki taha ‘oku ‘omai kiate aú.” ‘I he‘ene sio atu ki mui ki he‘ene mo‘ui ‘i he ngāue taimi-kakató, ‘okú ne pehē: “‘Oku ‘ikai ha‘aku faka‘ise‘isa ko e ngaahi manatu melie pē.”

‘E lava ke tau fakaloloto‘i ‘etau fiefia ‘i he ngāue ‘a e ‘Otuá ‘aki ‘a e fakalaulauloto ki he me‘a ‘okú ne ‘ai ke mahu‘inga mo‘oni ha fa‘ahinga vāhenga-ngāue pe fatongia fakateokalati. Ko e monū ‘o e hoko ko e “kaungāngāue . . . ‘o e ‘Otuá.” (1 Kol. 3:9) Hangē ko hano fakangingila ha koloa tukufakaholo ‘e lava ke fakatolonga ai ia, ko e fakalaulauloto ki he lāngilangi makehe ‘o e ngāue mo e ‘Otuá ‘e lava ke ta‘ofi ai ‘a e ngaahi vakai halá mei he‘ene maumau‘i ‘etau fiefiá. Te tau taliteke‘i ‘a hono fakahoa ‘etau ngaahi feilaulaú mo e feilaulau ‘a e kakai kehé. He‘ikai ke tau fakakaukau ai ‘oku si‘isi‘i ‘a e mahu‘inga hotau ngaahi monuú koe‘uhi ko e ngaahi monū ‘oku ‘oange ki he ni‘ihi kehé.—Kal. 6:4.

Na‘e ‘ilo‘i nai ‘e Sione ‘e fakangatangata ‘ene ngāue fakafaifekaú, ka na‘e ‘ikai nai ke ne ‘ilo‘i ‘e fakafokifā pē ‘ene ngatá. (Sione 3:30) ‘I he 30 T.S., ko e māhina ia ‘e ono mei he papitaiso ‘a Sīsuú, na‘e tuku pilīsone ‘e Tu‘i Hēlota ‘a Sione. Ka, na‘e fai ‘e Sione ‘a e me‘a na‘e lava ke ne faí ke hokohoko atu ‘ene faifakamo‘oní. (Mk. 6:17-20) Ko e hā na‘e tokoni kiate ia ke nofo‘aki fiefia ‘i he ngaahi liliu ko ení? Na‘á ne hanganaki tokangataha ki he ngaahi me‘a fakalaumālié.

Lolotonga ‘a e ‘i pilīsone ‘a Sioné, na‘á ne ma‘u ‘a e ngaahi līpooti fekau‘aki mo e ngāue fakafaifekau lahi ‘a Sīsuú. (Māt. 11:2; Luke 7:18) Na‘e tuipau ‘a Sione ko Sīsū ‘a e Mīsaiá ka na‘á ne fifili nai pe ‘e anga-fēfē hono fakahoko kotoa ‘e Sīsū ‘a e me‘a na‘e lea‘aki ‘i he  Folofolá ‘e fakahoko ‘e he Mīsaiá. Koe‘uhi na‘e ‘ilo‘i ‘e Sione ‘e hoko ‘a e Mīsaiá ko e tu‘i, na‘á ne fifili nai pe ‘e vave ‘a e hoko ‘a Sīsū ko e tu‘í. Na‘á ne toe fifili nai pē ‘e fakatau‘atāina‘i ia ‘e Sīsū mei he pilīsoné. ‘I he vēkeveke ke mahino‘i mā‘ala‘ala ange ‘a e ngafa ‘o Sīsuú, na‘e fekau‘i atu ‘e Sione ‘ene ongo ākonga ke ‘eke kia Sīsū ha fehu‘i: “Ko koe ‘a e Tokotaha na‘e pehē ‘e ha‘ú, pe te mau ‘amanekina ha taha kehe?” (Luke 7:19) ‘I he‘ena foki atú, kuo pau pē na‘e fanongo tokanga ‘a Sione ki he‘ena fakamatala ki he ngaahi fakamo‘ui fakaemana ‘a Sīsuú pea fekau‘i leva ke na foki ‘o tala kia Sione: “Ko eni ‘oku sio ‘a e kuí, ‘oku lue ‘a e heké, ‘oku ma‘a ‘a e kiliá, ‘oku fanongo ‘a e tulí, kuo fokotu‘u hake ‘a e maté, pea kuo talaki ‘a e ongoongo leleí ki he masivá.”—Luke 7:20-22.

‘Oku ‘ikai ha veiveiua na‘e fakaivimālohi‘i ‘a Sione ‘e he‘ena līpōtí. Na‘e fakapapau‘i ai na‘e fakahoko ‘e Sīsū ‘a e ngaahi kikite fekau‘aki mo e Mīsaiá. Neongo ko e hā mai ko eni ‘a Sīsuú na‘e ‘ikai ke taki atu ia ki hono tuku ange ‘o Sione mei he pilīsoné, na‘e ‘ilo‘i ‘e Sione ko ‘ene ngāué na‘e ‘ikai ko ha koto laufānō. Neongo hono ngaahi tu‘ungá, na‘á ne ma‘u ‘a e ‘uhinga ke fiefia.

Hangē ko Sioné, kapau ‘oku tau tokangataha ki he ngaahi me‘a fakalaumālié, ‘e malava ke tau kītaki ‘i he fiefia mo e kātaki. (Kol. 1:9-11) ‘E lava ke tau fai eni fakafou ‘i hono lau ‘a e Tohi Tapú pea fakalaulauloto ki ai, ‘o fakamanatu mai ai ko ‘etau ngāue ki he ‘Otuá ‘oku ‘ikai ‘aupito ko ha koto laufānō. (1 Kol. 15:58) ‘Oku pehē ‘e Sandra: “Ko hono lau ha vahe mei he Tohi Tapú ‘i he ‘aho taki taha kuo tokoni ia ke u ‘unu‘unu ofi ange ai kia Sihova. ‘Oku tokoni ia ke u tokangataha kiate ia kae ‘ikai kiate au.” ‘Oku lava ke tau toe tokangataha ki he ngaahi līpooti ‘o e ngāue ‘o e Pule‘angá, ‘a ia ‘e lava ke ne tokoni‘i kitautolu ke sio fakalaka atu ‘i hotau tu‘ungá tonu pea tokangataha ki he me‘a ‘oku fakahoko ‘e Sihová. “Ko e polokalama fakamāhina ‘o e JW Broadcasting^® ‘oku tokoni ia kiate kitautolu ke ongo‘i ofi ange ki he kautahá,” ko e lau ia ‘a Sandra, “pea ‘oku tokoni ia ke tau tauhi ma‘u ‘a e fiefia ‘i hotau vāhenga-ngāué.”

Na‘e fakahoko ‘e Sione Papitaiso ‘ene ngāue taimi nounou fakataha mo e “laumālie mo e mālohi ‘o ‘Ilaisiaá,” pea hangē ko ‘Ilaisiaá, “ko ha tangata ia na‘á ne ma‘u ‘a e ngaahi ongo ‘o hangē pē ko kitautolú.” (Luke 1:17; Sēm. 5:17) Kapau ‘oku tau fa‘ifa‘itaki ki he‘ene fa‘ifa‘itaki‘anga ‘o e hounga‘iá mo e tokangataha fakalaumālié, ko kitautolu foki ‘e lava ke tau nofo‘aki fiefia ‘i he‘etau ngāue ‘o e Pule‘angá, ‘o tatau ai pē pe ko e hā ‘e hokó.