1. Ko e hā naʻe leleiʻia ai ʻa e kau Pāpiloné ʻi he palōfita ko Tanielá?

 KO E palōfita ko Tanielá naʻe kei talavou ʻi he taimi naʻe ʻave ai ia ʻe he kau Pāpiloné ko ha pōpula ʻi he taú pea ʻave ia ʻo mamaʻo mei hono fonua tupuʻangá. Ka naʻe leleiʻia moʻoni ʻa e kau fakapōpula ʻo Tanielá ʻiate ia. Naʻa nau sio ki he “meʻa [naʻe] hā ki he matá”​—ko Taniela naʻe “taʻemele, mo hā matamatalelei” pea naʻá ne haʻu mei ha fāmili mahuʻinga. (1 Sām. 16:7) Koeʻuhi ko e ngaahi ʻuhinga ko iá, naʻe akoʻi ia ʻe he kau Pāpiloné ke ne hoko ko ha mēmipa māʻolunga ʻi honau sōsaietí.​—Tan. 1:3, 4, 6.

2. Naʻe anga-fēfē ʻa e ongoʻi ʻa Sihova fekauʻaki mo Tanielá? (ʻIsikeli 14:14)

² Naʻe ʻofa ʻa Sihova ʻia Taniela, ʻo ʻikai koeʻuhí ko hono fōtunga hā maí pe ko hono tuʻunga fakasōsialé, ka koeʻuhí ko e faʻahinga tokotaha naʻe fili ʻa e kiʻi talavou ko ení ke hoko ki aí. Ko hono moʻoní, naʻe taʻu hongofulu tupu lahi nai pe taʻu 20 tupu siʻi ʻa Taniela ʻi he taimi naʻe lave ai ʻa Sihova kiate ia ʻokú ne māʻoniʻoni fakataha mo Noa mo Siopé, ko e ongo tangata naʻá na fakamoleki ʻa e laui hongofuluʻi taʻu lahi ʻi hono langa hake ha ongoongo lelei mo e ʻOtuá. (Sēn. 5:32; 6:9, 10; Siope 42:16, 17; lau ʻa e ʻIsikeli 14:14.) Pea naʻe hokohoko atu ʻa e ʻofa ʻa Sihova ʻia Tanielá ʻi he kotoa ʻene moʻui fuoloa mo fakaofó.​—Tan. 10:11, 19.

3. Ko e hā te tau lāulea ki ai ʻi he kupu ko ení?

³ ʻI he kupu ko ení, te tau sivisiviʻi ai ʻa e ʻulungaanga ʻe ua ʻo Taniela naʻá ne ʻai ia ke mahuʻinga kia Sihová. ʻUluakí, te tau fakamatalaʻi ʻa e ʻulungaanga taki taha pea vakai ki he ngaahi taimi naʻá ne fakahāhā ai iá. Hokó, te tau sio ki he meʻa naʻá ne tokoniʻi ʻa Taniela ke fakatupulekina ʻa e ongo ʻulungaanga ko ení. Fakaʻosí, te tau lāulea ki he founga ʻe lava ke tau faʻifaʻitaki ai kiate iá. Neongo ko e kupu ko ení ʻoku hiki ia maʻá e kau talavoú, ko kitautolu kotoa ʻe lava ke tau ako mei he faʻifaʻitakiʻanga ʻa Tanielá.

4. Naʻe anga-fēfē hono fakahāhā ʻe Taniela ʻa e loto-toʻá? ʻOmai ha fakatātā.

⁴ Ko e kakai loto-toʻá te nau hoko nai ʻo manavahē, ka ʻoku ʻikai ke nau fakaʻatā ia ke ne taʻofi kinautolu mei hono fai ʻa e meʻa ʻoku totonú. Ko Taniela ko ha kiʻi talavou loto-toʻa ʻaupito. Fakakaukau ki ha tuʻunga ʻe ua naʻá ne fakahāhā ai ʻa e loto-toʻá. Ko e ʻuluakí ʻoku ngalingali naʻe hoko ia ʻi he taʻu nai ʻe ua hili hono fakaʻauha ʻe he kau Pāpiloné ʻa Selusalemá. Ko Tuʻi Nepukanesa ʻo Pāpiloné naʻá ne maʻu ha misi fakatupu hohaʻa fekauʻaki mo ha fuʻu ʻīmisi. Naʻá ne fakamanamana ke tāmateʻi kotoa ʻene kau tangata potó, kau ai ʻa Taniela, kapau heʻikai lava ke nau tala ange ʻa ʻene misí pea pehē ki hono ʻuhingá. (Tan. 2:3-5) Naʻe pau ke ngāue vave ʻa Taniela; he ka ʻikai, ʻe mole ʻa e ngaahi moʻuí. Naʻá ne “hū atu . . . ʻo kole ki he tuʻí ke tuku ange kiate ia ha taimi ke ne tala ange ai ʻa e ʻuhinga ʻo e misí ki he tuʻí.” (Tan. 2:16) Naʻe fiemaʻu ki ai ʻa e loto-toʻa mo e tui. ʻOku ʻikai ha lēkooti naʻe ʻosi fakaʻuhingaʻi ʻe Taniela ha ngaahi misi ki muʻa. Naʻá ne kole ki hono ngaahi kaungāmeʻá​—ʻa ia ko honau hingoa faka-Pāpiloné ko Setaleki, Mēsake mo ʻApitenikō​—“ke nau lotu ʻo kole ki ha ʻaloʻofa mei he ʻOtua ʻo langí ʻo fekauʻaki mo e meʻa fakapulipuli ko ení.” (Tan. 2:18) Naʻe tali ʻe Sihova ʻa e ngaahi lotu ko iá. ʻI he tokoni ʻa e ʻOtuá, naʻe fakaʻuhingaʻi ʻe Taniela ʻa e misi ʻa Nepukanesá. Naʻe fakahaofi ai ʻa e moʻui ʻa Taniela mo hono ngaahi kaungāmeʻá.

5. Ko e hā ha toe ʻahiʻahi ʻo e loto-toʻá naʻe fehangahangai mo Tanielá?

⁵ ʻI ha taimi hili hono fakaʻuhingaʻi ʻe Taniela ʻa e misi fekauʻaki mo e fuʻu ʻīmisí, naʻe toe ʻahiʻahiʻi ʻene loto-toʻá. Naʻe toe maʻu ʻe Nepukanesa ha misi fakatupu hohaʻa. Naʻe kau ʻi he misi ko ení ha fuʻu ʻakau. Naʻe fakamatalaʻi loto-toʻa ʻe Taniela ki he tuʻí ʻa e ʻuhinga ʻo e misí, kau ai ʻa e fanongonongo ko e tuʻí ʻe hoko ʻo vale pea fakahifo ia mei hono taloní ʻi ha vahaʻa taimi. (Tan. 4:25) Naʻe mei lavangofua ke vakai ʻa e tuʻí ki he pōpoaki ko iá ko ha fakatupu angatuʻu pea tāmateʻi ʻa Taniela. Ka naʻe fakahāhā ʻe Taniela ʻa e loto-toʻa pea fakahoko atu pē ʻa e pōpoakí.

6. Ko e hā nai naʻá ne tokoniʻi ʻa Taniela ke hoko ʻo loto-toʻá?

⁶ Ko e hā nai naʻá ne tokoniʻi ʻa Taniela ke hoko ʻo loto-toʻa ʻi he kotoa ʻene moʻuí? Lolotonga ʻa e kei siʻi ʻa Tanielá, ʻoku pau pē naʻá ne ako mei he faʻifaʻitakiʻanga ʻene faʻeé mo ʻene tamaí. ʻOku ʻikai ha veiveiua naʻá na talangofua ki he ngaahi fakahinohino naʻe ʻoange ʻe Sihova ki he ngaahi  mātuʻa ʻIsilelí, pea naʻá na akoʻi ʻa e Lao ʻa e ʻOtuá ki heʻena tamá. (Teu. 6:6-9) Naʻe ʻikai ngata pē hono ʻiloʻi ʻe Taniela ʻa e ngaahi meʻa tefito ʻo e Laó, hangē ko e Fekau ʻe Hongofulú, kae pehē foki ki he ngaahi fakaikiiki fekauʻaki mo e meʻa ʻe lava ke kai mo ʻikai lava ke kai ʻe ha ʻIsileli. b (Liv. 11:4-8; Tan. 1:8, 11-13) Naʻe toe ako foki ʻe Taniela ʻa e hisitōlia ʻo e kakai ʻa e ʻOtuá pea ʻiloʻi ʻa e meʻa naʻe hoko kiate kinautolu ʻi he ʻikai ke nau moʻuiʻaki ʻa e ngaahi tuʻunga ʻa Sihová. (Tan. 9:10, 11) Ko e ngaahi hokosia ʻi he moʻui ʻa Tanielá naʻá ne fakatuipauʻi ia ko Sihova mo ʻEne kau ʻāngelo mālohí naʻa nau poupouʻi ia.​—Tan. 2:19-24; 10:12, 18, 19.

7. Ko e hā naʻá ne toe tokoniʻi ʻa Taniela ke loto-toʻá? (Sio foki ki he fakatātaá.)

⁷ Naʻe ako ʻe Taniela ʻa e ngaahi tohi ʻa e kau palōfita ʻa e ʻOtuá, kau ai ʻa e ngaahi kikite ʻa Selemaiá. Mei he ako ko iá, naʻe ʻiloʻi ʻe Taniela ki mui ange ai ko e taki pōpula fuoloa ʻo e kau Siú ki Pāpiloné naʻe vave ke ngata. (Tan. 9:2) ʻI he sio ki hono fakahoko moʻoni ʻa e kikite ʻi he Tohi Tapú ʻoku ʻikai ha veiveiua naʻá ne fakaivimālohiʻi ʻa e falala ʻa Taniela kia Sihová, pea ko e faʻahinga ʻoku mālohi ʻenau falala ki he ʻOtuá ʻe lava ke nau mātuʻaki loto-toʻa. (Fakafehoanaki mo e Loma 8:31, 32, 37-39.) Ko e mahuʻinga tahá, naʻe lotu maʻu pē ʻa Taniela ki heʻene Tamai fakahēvaní. (Tan. 6:10) Naʻá ne vete ʻene ngaahi angahalá kia Sihova pea vahevahe ʻene ngaahi ongoʻí kiate Ia. Pea naʻe kole ʻe Taniela ʻa e tokoni. (Tan. 9:4, 5, 19) Ko ha tangata ia ʻo hangē pē ko kitautolú, ko ia naʻe ʻikai ke fanauʻi mai ia mo e loto-toʻá. ʻI hono kehé, naʻá ne fakatupulekina ʻa e ʻulungaanga ko iá fakafou ʻi he ako mo e lotu pea ʻaki ʻa e falala kia Sihova.

8. ʻE lava fēfē ke tau fakatupulekina ʻa e loto-toʻá?

⁸ Ke fakatupulekina ʻa e loto-toʻá, ko e hā ʻoku fiemaʻu ke tau faí? ʻE fakaʻaiʻai nai kitautolu ʻe heʻetau mātuʻá ke tau hoko ʻo loto-toʻa, ka heʻikai lava ke nau tuku mai ʻa e ʻulungaanga ko ení kiate kitautolu ʻo hangē pē ia ko ha koloa tukufakaholo fakafāmilí. Ko hono maʻu ʻa e loto-toʻá ʻoku hangē ia ko hano ako ha pōtoʻi foʻou. Ko e founga ʻe taha ʻe lava ke ke mataotao ʻi he pōtoʻi ko iá ko hono siofi fakalelei ʻa e ngaahi ngāue ʻa e faiakó pea faʻifaʻitaki leva ki ai. ʻI ha founga meimei tatau, ʻoku tau ako ke hoko ʻo loto-toʻa ʻaki ʻa e siofi fakalelei ʻa e founga ʻoku fakahāhā ai ʻe he niʻihi kehé ʻa e ʻulungaanga ko ení pea faʻifaʻitaki leva ki ai. Ko ia ko e hā kuo tau ako meia Tanielá? Hangē ko iá, ʻoku fiemaʻu ke tau ʻiloʻi lelei ʻa e Folofola ʻa e ʻOtuá. Kuo pau ke tau langa hake ha haʻi vāofi mo Sihova ʻaki ʻa e talanoa tauʻatāina maʻu pē kiate ia. Pea ʻoku fiemaʻu ke tau falala kia Sihova, ʻo tuipau ʻoku tau maʻu ʻene tokoní. Pea ʻi he taimi ʻoku ʻahiʻahiʻi ai ʻetau tuí, te tau hoko ʻo loto-toʻa.

9. ʻOku anga-fēfē ʻetau maʻu ʻaonga mei he hoko ʻo loto-toʻá?

⁹ ʻOku lahi ʻa e ngaahi founga ʻoku tau maʻu ʻaonga ai mei he hoko ʻo loto-toʻá. Fakakaukau ki he hokosia ʻa Ben. Naʻá ne ako ʻi ha ʻapiako ʻi Siamane ʻa ia ko e tokotaha kotoa naʻa nau tui ki he ʻevalūsiō pea nau ongoʻi ko e fakamatala ki he fakatupú ʻi he Tohi Tapú ko ha talatupuʻa. ʻI he ʻaho ʻe taha, naʻe ʻoange ʻa e faingamālie kia Ben ke ne tuʻu ʻi muʻa ʻi he kalasí pea fakamatalaʻi ʻa e ʻuhinga naʻá ne tui ai naʻe fakatupu ʻa e moʻuí. Naʻá ne fakamatalaʻi loto-toʻa ʻene tuí. Ko e hā ʻa e olá? “Naʻe fanongo tokanga ʻeku faiakó,” ko e lau ia ʻa Ben, “pea naʻá ne ʻai ha ngaahi tatau ʻo e fakamatala naʻá ku ngāueʻaki ke poupouʻi ʻeku tuí pea ʻoange ʻa e tatau ki he tokotaha taki taha ʻi he kalasí.” Naʻe anga-fēfē fakafeangai ʻa e kaungākalasi ʻo Ben? “Ko e tokolahi ʻo kinautolu naʻa nau fie fanongo,” ko e lau ia ʻa Ben, “pea naʻa nau tala mai naʻa nau fakaʻapaʻapaʻi au.” Hangē ko ia ʻoku fakahaaʻi ʻi he hokosia ʻa  Ben, ko e kakai loto-toʻá ʻoku nau faʻa maʻu ʻa e fakaʻapaʻapa ʻa e niʻihi kehé. ʻE lava foki ke nau toe tohoakiʻi ʻa e kakai loto-totonú kia Sihova. Ko e moʻoni, ʻoku tau maʻu ʻa e ngaahi ʻuhinga lelei ke fakatupulekina ai ʻa e loto-toʻá.

10. Ko e hā ʻa e mateaki?

¹⁰ ʻI he Tohi Tapú, ko e foʻi lea faka-Hepelū ki he “mateakí” pe “ʻofa mateakí,” ʻokú ne maʻu ʻa e foʻi fakakaukau ʻo e pīkitai māfana mo e anga-ʻofa ʻa ia ʻoku faʻa ngāueʻaki ke fakamatalaʻiʻaki ʻa e ʻofa ʻoku maʻu ʻe he ʻOtuá ki heʻene kau sevānití. Ko e foʻi lea tatau ʻoku toe ngāueʻaki ke fakamatalaʻi ʻa e ʻofa ʻoku fakahāhā ʻi he lotolotonga ʻo e kau sevāniti ʻa e ʻOtuá. (2 Sām. 9:6, 7) Ko ʻetau mateakí ʻoku lava ke mālohi ange ʻi he faai atu ʻa e taimí. Fakakaukau ki hono fakamoʻoniʻi eni ʻi he tuʻunga ʻo Tanielá.

11. Naʻe anga-fēfē hono ʻahiʻahiʻi ʻa e mateaki ʻa Tanielá ʻi heʻene taʻumotuʻá? (Sio ki he tā ʻi he takafí.)

¹¹ Naʻe ʻahiʻahiʻi ʻa e mateaki ʻa Taniela kia Sihová ʻi he kotoa ʻene moʻuí. Ka ko e taha ʻo e ngaahi ʻahiʻahi lahi taha naʻe hoko kiate iá ko e taimi naʻá ne taʻu 90 tupu aí. ʻI he taimi ko ení, naʻe ʻosi hamu ʻe he kau Mītiá mo e kau Pēsiá ʻa Pāpilone pea puleʻi ʻe Tuʻi Talaiasi. Naʻe fehiʻa ʻa e kau mēmipa ʻo e lotoʻā fakatuʻí ʻia Taniela pea ʻikai haʻanau fakaʻapaʻapa ki he ʻOtua naʻá ne lotu ki aí. Ko ia naʻa nau faʻufaʻu ke tāmateʻi ʻa Taniela. Naʻa nau ʻoatu ha tuʻutuʻuni ʻa ia ʻe ʻahiʻahiʻi ai ʻa Taniela pe te ne mateaki ki hono ʻOtuá pe ki he tuʻí. Ko e meʻa pē naʻe fiemaʻu ke fai ʻe Taniela ke fakamoʻoniʻi ʻene mateaki ki he tuʻí pea ke tatau mo e taha kotoa ko e taʻofi ʻene lotu kia Sihová ʻi he ʻaho ʻe 30. Naʻe fakafisi ʻa Taniela ke fakangaloku. Ko hono olá, naʻe lī ia ki he ʻana ʻo e fanga laioné. Ka naʻe fakapaleʻi ʻe Sihova ʻa e mateaki ʻa Tanielá ʻaki hono fakahaofi ia mei he ngutu ʻo e fanga laioné. (Tan. 6:12-15, 20-22) ʻE lava fēfē ke tau fakatupulekina ʻa e faʻahinga mateaki taʻemamotu kia Sihova naʻe fakahāhā ʻe Tanielá?

12. Naʻe anga-fēfē hono fakatupulekina ʻe Taniela ʻa e mateaki taʻemamotu kia Sihová?

¹² Hangē ko ia naʻe lave ki ai ki muʻá, ko e mateakí ʻoku ueʻi ʻe he ʻofa mālohi. Ko e mateaki ʻa Taniela kia Sihová naʻe taʻemamotu koeʻuhí naʻá ne ʻofa lahi ʻi heʻene Tamai fakahēvaní. ʻOku ʻikai ha veiveiua naʻe fakatupulekina ʻe Taniela ʻa e ʻofa ko iá ʻaki ʻa e fakakaukau fekauʻaki mo e ngaahi ʻulungaanga ʻo Sihová pea fakakaukauloto ki he anga ʻEne fakahāhā iá. (Tan. 9:4) Naʻe toe fakalaulauloto ʻa Taniela ʻi he houngaʻia ki he kotoa ʻo e ngaahi meʻa lelei naʻe fai ʻe Sihova maʻana mo ʻEne kakaí.​—Tan. 2:20-23; 9:15, 16.

13. (a) Ko e hā ʻa e ngaahi ʻahiʻahi ʻo e mateakí ʻoku fehangahangai mo ʻetau kau talavoú? ʻOmai ha fakatātā. (Sio foki ki he fakatātaá.) (e) Hangē ko ia ʻoku hā ʻi he vitioó, ʻe fēfē nai haʻo tali kapau ʻe ʻeke atu ʻe he niʻihi kehé pe ʻoku poupouʻi ʻe he Kau Fakamoʻoni ʻa Sihová ʻa e faʻahinga ʻoku nau tuli ki ha founga moʻui fakasōtoma?

 ¹³ Hangē ko Tanielá, ko ʻetau kau talavoú ʻoku takatakaiʻi kinautolu ʻe he kakai ʻoku ʻikai ke nau fakaʻapaʻapaʻi ʻa Sihova mo ʻene ngaahi tuʻungá. Ko e kakai ko iá te nau fehiʻa nai ʻi ha taha ʻokú ne taukaveʻi ʻokú ne ʻofa ki he ʻOtuá. ʻOku aʻu ʻo feinga ʻa e niʻihi ke fakamamahiʻi ʻetau kau talavoú ke maumauʻi ʻenau mateaki kia Sihová. Ko e fakatātaá, fakatokangaʻi ʻa e meʻa naʻe hoko ki ha kiʻi talavou ko Graeme, ʻoku nofo ʻi ʻAositelēlia. Naʻá ne fehangahangai mo ha tuʻunga faingataʻa ʻi heʻene ʻi he kolisí. Naʻe ʻeke ʻe he faiakó ki he kalasí pe ʻe fēfē ʻenau fakafeangaí kapau ʻe tala ange ʻe ha kaungāmeʻa ʻokú ne fakasōtoma. Naʻe tala ange ʻe he faiakó ko e kotoa ʻi he kalasí te nau poupou ki ha kaungāmeʻa ʻokú ne tuli ki ha founga moʻui pehē kuo pau ke nau tuʻu ʻi he tafaʻaki ʻe taha ʻo e lokí; ko e faʻahinga ʻe ʻikai ke nau poupou ki aí, ke nau tuʻu ʻi he tafaʻaki ʻe tahá. ʻOku pehē ʻe Graeme, “Ko e kotoa ʻo e kalasí naʻa nau tuʻu ʻi he tafaʻaki naʻe poupou ki he founga moʻui ko iá tuku kehe au mo ha Fakamoʻoni ʻe taha.” Ko e meʻa naʻe hoko atu aí naʻe ʻahiʻahiʻi moʻoni ai ʻa e mateaki ʻa Graeme kia Sihová. “ʻI he toenga ʻo e kalasi houa ʻe taha ko iá,” ko ʻene leá ia, “ko e fānau ako kehé pea naʻa mo e faiakó naʻa nau manukiʻi mo leakovia kimaua. Naʻá ku fai hoku lelei tahá ke taukapoʻi ʻeku tuí ʻi ha founga nonga mo ʻuhinga lelei, ka naʻe ʻikai haʻanau fanongo ki ha lea ʻe taha naʻá ku fai.” Naʻe ongoʻi fēfē ʻa Graeme ʻi hono ʻahiʻahiʻi ko eni ʻene mateakí? ʻOkú ne pehē, “Naʻe ʻikai ke u saiʻia ke hoko ko e tāketi ʻo e ngaahi ʻohofi fakaelea peheé, ka naʻá ku ongoʻi fiefia lahi ʻi he malava ke u taukapoʻi ʻeku tuí ʻo ʻikai fakangaloku.” c

14. Ko e hā ʻa e founga ʻe taha ʻe lava ke tau fakatupulekina ai ʻa e mateaki taʻemamotu kia Sihová?

¹⁴ ʻE lava ke tau fakatupulekina ʻa e mateaki taʻemamotu kia Sihova kapau ʻoku tau langa hake ha ʻofa loloto kiate Ia, ʻo hangē ko Tanielá,. ʻOku tau fakatupulekina ʻa e ʻofa ko iá ʻaki ʻa e ako fekauʻaki mo e ngaahi ʻulungaanga ʻo Sihová. Ko e fakatātaá, ʻe lava ke tau ako fekauʻaki mo e ngaahi meʻa kuó ne ngaohí. (Loma 1:20) Kapau te ke saiʻia ke fakalolotoʻi hoʻo ʻofa mo e fakaʻapaʻapa kia Sihová, ʻe lava ke ke lau ʻa e ngaahi kupu nounou ʻi he kupu hokohoko “Naʻe Faʻu Ia ke Pehē?” pe sio ʻi he ngaahi vitioó. ʻE lava foki ke ke sivisiviʻi fakalelei ʻa e fakamatala ʻi he polosiua Was Life Created? mo e The Origin of Life​—Five Questions Worth Asking. Fakatokangaʻi ʻa e meʻa ʻoku leaʻaki ʻe ha kiʻi tuofefine Tenimaʻake ko Esther fekauʻaki mo e ongo polosiua ko iá: “Ko e fakaʻuhingá ʻoku tōtōatu. ʻOku ʻikai ke tala atu ʻe he polosiuá ʻa e meʻa ke tui ki aí; ʻoku ʻomai pē ai ʻa e ngaahi moʻoniʻi meʻá pea tuku koe ke ke fai ha fili.” Ko Ben, naʻe lave ki ai ki muʻá, ʻokú ne pehē: “Ko e fakamatala ko ení naʻe mātuʻaki fakatupu tui mālohi. Naʻe fakamoʻoniʻi mai ai kiate au ko e ʻOtuá naʻá ne fakatupu ʻa e moʻuí.” Hili hono ako ʻa e fakamatala ko ení, ʻoku ngalingali te ke loto-tatau mo e Tohi Tapú ʻi heʻene pehē: “ʻOku taau mo koe ʻe Sihova ko homau ʻOtua, ke ke maʻu ʻa e ngeiá mo e lāngilangí pea mo e mālohí, koeʻuhí naʻá ke fakatupu ʻa e ngaahi meʻa kotoa pē.”​—Fkh. 4:11. d

15. Ko e hā ha toe founga ʻe lava ke tau fakatupulekina ai ha haʻi vāofi mo Sihova?

¹⁵ Ko e founga ʻe taha ke fakatupulekina ai ha ʻofa loloto kia Sihova ko hono sivisiviʻi ofi ʻa e moʻui ʻa hono ʻAló, ʻa Sīsū. Ko ha tuofefine kei siʻi ko Samira, ʻoku nofo ʻi Siamane, naʻá ne fai eni. ʻOkú ne pehē: “Naʻá ku hoko ʻo ʻiloʻi lelei ange ʻa Sihova fakafou ʻia Sīsū.” ʻI he kei siʻi ʻa  Samira, naʻá ne fāinga ke mahinoʻi pe ʻoku anga-fēfē malava ke maʻu ʻe Sihova ʻa e ngaahi ongoʻí. Ka naʻe lava ke ne mahinoʻi ʻa Sīsū. “Naʻá ku saiʻia ʻia Sīsū koeʻuhí naʻá ne anga-fakakaumeʻa mo ʻofa ʻi he fānaú,” ko ʻene leá ia. Ko e lahi ange ʻene ako fekauʻaki mo Sīsuú, ko e lahi ange ia ʻene faʻu ha haʻi vāofi mo Sihová. Ko e hā hono ʻuhingá? ʻOkú ne pehē: “Naʻe kamata māmālie ke u mahinoʻi ko Sīsuú ʻokú ne faʻifaʻitaki haohaoa ki heʻene Tamaí. ʻOkú na faitatau. Naʻá ku ʻiloʻi ko e taha eni ʻo e ngaahi ʻuhinga naʻe fekauʻi mai ai ʻe Sihova ʻa Sīsū ki he māmaní, ke ʻai ke malava ki he faʻahinga ʻo e tangatá ke nau hoko ʻo ʻiloʻi lelei ange ʻa Sihova.” (Sione 14:9) Kapau ʻokú ke loto ke fakaivimālohiʻi hoʻo haʻi mo Sihová, fēfē ke ke fakamoleki ha taimi ke ako ʻa e meʻa kotoa te ke malavá fekauʻaki mo Sīsū? Kapau te ke fai pehē, ko hoʻo ʻofa kia Sihová pea mo hoʻo mateaki kiate iá ʻe tupulaki.

16. ʻOku anga-fēfē ʻetau maʻu ʻaonga mei he hoko ʻo mateakí? (Saame 18:25; Maika 6:8)

¹⁶ Ko e faʻahinga mateakí ʻoku nau faʻa faʻu ha ngaahi kaumeʻa vāofi mo tuʻuloa. (Lute 1:14-17) Tānaki atu ki aí, ko e kakai ʻoku nau mateaki kia Sihová ʻoku nau maʻu ʻa e ʻuhinga lelei ke maʻu ha ongoʻi nonga ʻi loto. Ko e hā hono ʻuhingá? Koeʻuhí ʻoku talaʻofa ʻe Sihova te ne mateaki ki he faʻahinga ʻoku mateaki kiate iá. (Lau ʻa e Saame 18:25; Maika 6:8.) Fakakaukau atu ki ai​—ko e Tokotaha-Fakatupu māfimafi-aoniú ʻokú ne loto-lelei ke faʻu ha haʻi fakaeongo mālohi mo kitautolu! Pea ʻi heʻene fai peheé, ʻoku ʻikai malava ʻe ha ʻahiʻahi, fakafepaki, naʻa mo e maté ʻo motuhi ʻa e haʻi ko iá. (Tan. 12:13; Luke 20:37, 38; Loma 8:38, 39) He mahuʻinga ē ke tau faʻifaʻitaki kia Taniela pea nofoʻaki mateaki kia Sihova!

17-18. Ko e hā mo ha toe meʻa ʻe lava ke tau ako meia Taniela?

¹⁷ ʻI he kupu ko ení, kuo tau sivisiviʻi ai ha ʻulungaanga pē ʻe ua ʻo Taniela. Ka ʻoku toe lahi ʻa e meʻa ʻe lava ke tau ako meiate ia. Ko e fakatātaá, naʻe ʻoange ʻe Sihova kia Taniela ha ngaahi holongā vīsone mo e ngaahi misi, pea naʻá Ne ʻoange kiate ia ʻa e malava ke fakaʻuhingaʻi ʻa e ngaahi pōpoaki fakaekikité. Ko e lahi ʻo e ngaahi kikite ko iá kuo ʻosi fakahoko. Ko e niʻihi ʻo e ngaahi kikité ʻoku nau ʻomai ʻa e fakaikiiki fekauʻaki mo e ngaahi meʻa ʻe hoko ʻi he kahaʻú ʻa ia ʻe kaunga ki he tokotaha kotoa ʻi he māmaní.

¹⁸ ʻI he kupu hono hokó, te tau vakai ai ki ha kikite ʻe ua naʻe hiki ʻe Taniela. Ko hono mahinoʻi iá ʻe lava ke ne tokoniʻi kitautolu kotoa, ʻa e kei siʻi mo e taʻumotuʻa, ke fai ʻa e ngaahi fili fakapotopoto ʻi he taimí ni. Ko e ongo kikite ko iá ʻe lava foki ke na fakaivimālohiʻi ʻetau loto-toʻá mo ʻetau mateakí koeʻuhi ke tau mateuteu ai ke fehangahangai mo e ngaahi ʻahiʻahi ʻoku hanga mei muʻá.