1. Fakatatau ki he Hepelū 12:1, ko e hā ʻoku fiemaʻu ke tau fai ke aʻu ai ki he tepí ʻi heʻetau lova ki he moʻuí?

 ʻOKU fakahoa ʻe he Tohi Tapú ʻetau moʻui ko ha Kalisitiané ki ha lova. Ko e kau lele ʻoku nau ʻosiki lavameʻa ʻa e lová ʻoku fakapaleʻi kinautolu ʻaki ʻa e moʻui taʻengatá. (2 Tīm. 4:7, 8) ʻOku fiemaʻu ke tau fai hotau tūkuingatá ke hanganaki lele, tautefito koeʻuhí ʻoku tau ofi ʻaupito ki he tepí. Ko e ʻapositolo ko Paulá, naʻá ne ʻosiki lavameʻa ʻene lova ki he moʻuí, naʻá ne lave ki he meʻa te ne tokoniʻi kitautolu ke ikuna ʻi he lová. Naʻá ne tataki kitautolu ke tau “liʻaki atu foki ʻa e fakamamafa kotoa pē pea . . . lele fakataha mo e kātaki ʻi he lova ko ia kuo fokotuʻu ʻi muʻa ʻiate kitautolú.”​—Lau ʻa e Hepelū 12:1.

2. ʻOku ʻuhinga ki he hā ʻa e “liʻaki atu . . . ʻa e fakamamafa kotoa pē”?

² ʻI he taimi naʻe tohi ai ʻe Paula kuo pau ke tau “liʻaki atu . . . ʻa e fakamamafa kotoa pē,” naʻá ne ʻuhingá ʻoku ʻikai ha kavenga ia ʻoku totonu ke fua ʻe ha Kalisitiane? ʻIkai, naʻe ʻikai ko ʻene ʻuhingá ia. ʻI hono kehé, naʻá ne ʻuhingá ʻoku fiemaʻu ke tau liʻaki ʻa e fakamamafa ʻikai fiemaʻu kotoa pē. Ko e faʻahinga fakamamafa ko ení ʻe lava ke ne taʻofi kitautolu pea ʻai ke tau helaʻia. Ke kātakí, kuo pau ke tau fakatokangaʻi vave pea liʻaki ha faʻahinga fakamamafa ʻikai fiemaʻu pē ʻe lava ke ne fakamāmālieʻi kitautolu. Neongo ia, ʻi he taimi tatau, ʻoku ʻikai ke tau loto ke liʻaki ʻa e ngaahi kavenga ʻoku totonu ke tau fuá. He ka ʻikai, ʻe lava ke fakataʻeʻaongaʻi kitautolu mei he lová. (2 Tīm. 2:5) Ko e hā ʻa e ngaahi kavenga kuo pau ke tau fuá?

3. (a) Fakatatau ki he Kalētia 6:5, ko e hā kuo pau ke tau fuá? (e) Ko e hā te tau lāulea ki ai ʻi he kupu ko ení, pea ko e hā hono ʻuhingá?

 ³ Lau ʻa e Kalētia 6:5. Naʻe fakahaaʻi mai ʻe Paula ʻa e meʻa kuo pau ke tau fuá. Naʻá ne tohi “ko e tokotaha taki taha te ne fua ʻene kavenga pē ʻaʻana.” Naʻe ʻuhinga ʻa Paula heni ki hotau fatongia fakafoʻituitui ʻi he ʻao ʻo e ʻOtuá, ko ha meʻa kuo pau ke tau fua pē ʻe kitautolu tonu. ʻI he kupu ko ení, te tau lāulea ai ki he meʻa ʻoku kau ki heʻetau “kavenga pē” ʻatautolú pea mo e founga ʻe lava ke tau fua ai iá. Pehē foki, te tau lave ki he ngaahi fakamamafa ʻikai fiemaʻu ʻoku tau fua nai pea ako ki he founga ke tau liʻaki atu ai kinautolú. Ko hono fua ʻetau kavenga pē ʻatautolú pea liʻaki atu ʻa e fakamamafa ʻikai fiemaʻú ʻe tokoniʻi ai kitautolu ke ʻosiki lavameʻa ʻetau lele ʻi he lova ki he moʻuí.

4. Ko e hā ʻoku ʻikai fakamafasia ai ʻetau fuakava ʻo e fakatapuí? (Sio foki ki he fakatātaá.)

⁴ Ko ʻetau fuakava ʻo e fakatapuí. ʻI he taimi naʻa tau fakatapui ai kitautolu kia Sihová, naʻa tau fuakava ke lotu kiate ia pea fai hono finangaló. Kuo pau ke tau tauhi ʻa e fuakava ko iá. Ko e moʻui ʻo fehoanaki mo ʻetau fakatapuí ko ha fatongia mafatukituki ia, ka ʻoku ʻikai ke  fakamafasia. He ko ē, naʻe fakatupu kitautolu ʻe Sihova ke fai hono finangaló. (Fkh. 4:11) Naʻá ne fakatupu kitautolu ʻi hono ʻīmisí fakataha mo ha fiemaʻu fakalaumālie. Ko e olá, ʻoku malava ai ke tau ʻunuʻunu ofi kiate ia pea ke hoko ʻa hono fai hono finangaló ko hotau mamaná ia. (Saame 40:8) Ko e toe meʻa ʻe tahá, ʻi he taimi ʻoku tau fai ai ʻa e finangalo ʻo e ʻOtuá pea muimui ʻi hono ʻAló, ʻoku tau “maʻu ha fakaivifoʻou” kiate kitautolu.​—Māt. 11:28-30.

5. Ko e hā te ne tokoniʻi koe ke fakahoko hoʻo fakatapuí? (1 Sione 5:3)

⁵ ʻE lava fēfē ke ke fua ʻa e kavengá? ʻE lava ke tokoni ʻa e meʻa ʻe ua. ʻUluakí, hokohoko atu hono fakaivimālohiʻi hoʻo ʻofa kia Sihová. ʻE lava ke ke fai ia ʻaki ʻa e fakalaulauloto ki he lelei kotoa pē kuó ne fai maʻaú pea mo e ngaahi tāpuaki kuó ne tuku tauhi mai kiate koé. Ko e lahi ange ʻa e tupulaki hoʻo ʻofa ki he ʻOtuá, ko e faingofua ange ia kiate koe ke talangofua kiate iá. (Lau ʻa e 1 Sione 5:3.) Uá, faʻifaʻitaki kia Sīsū. Naʻá ne lavameʻa ʻi hono fai ʻa e finangalo ʻo e ʻOtuá koeʻuhí naʻá ne lotu kia Sihova ki ha tokoni pea hanganaki tokangataha ki hono palé. (Hep. 5:7; 12:2) Hangē ko Sīsuú, lotu kia Sihova ki ha mālohi pea tauhi maʻu ʻa e ʻamanaki ʻo e moʻui taʻengatá ʻi ho ʻatamaí. ʻI he tupulaki hoʻo ʻofa ki he ʻOtuá pea faʻifaʻitaki ki hono ʻAló, ʻe malava ai ke ke fakahoko hoʻo fakatapuí.

6. Ko e hā kuo pau ke tau tokanga ai ki he ngaahi fatongia fakafāmilí? (Sio foki ki he fakatātaá.)

⁶ Ko hotau ngaahi fatongia fakafāmilí. ʻI heʻetau lova ki he moʻuí, kuo pau ke lahi ange ʻetau ʻofa kia Sihova mo Sīsuú ʻi heʻetau ʻofa ki hotau kāingá. (Māt. 10:37) Kae kehe, ʻoku ʻikai ke ʻuhinga ení, ʻe lava ke tau fakaliʻeliʻaki hotau ngaahi fatongia fakafāmilí, ʻo hangē ia ko e ngaahi meʻa eni ʻokú ne taʻofi kitautolu mei hono fakahōifuaʻi ʻa e ʻOtuá mo Kalaisí. ʻI hono kehé, ke fakahōifuaʻi ʻa e ʻOtuá mo Kalaisí, ʻoku fiemaʻu ke tau fakahoko hotau ngafa ʻi he fāmilí. (1 Tīm. 5:4, 8) ʻI heʻetau fai iá, te tau hoko ʻo fiefia ange. He ko ē, naʻe faʻu ʻe Sihova ʻa e ngaahi fāmilí ke lakalakaimonū ʻi he taimi ʻoku fefakafeangaiʻaki ai ʻa e husepānití mo e uaifí ʻi he ʻofa mo e fakaʻapaʻapa, ʻi he taimi ʻoku ʻofa mo akoʻi ai ʻe he ngaahi mātuʻá ʻenau fānaú, pea ʻi he taimi ʻoku talangofua ai ʻa e fānaú ki heʻenau ngaahi mātuʻá.​—ʻEf. 5:33; 6:1, 4.

7. ʻE lava fēfē ke ke fakahoko ho ngafa ʻi he fāmilí?

⁷ ʻE lava fēfē ke ke fua ʻa e kavengá? Pe ko e hā pē ho ngafa ʻi he fāmilí, falala ki he poto ʻoku maʻu ʻi he Tohi Tapú kae ʻikai ko e falala ki hoʻo ngaahi ongoʻí, anga fakafonuá pe ko e meʻa ʻoku leaʻaki ʻe he kau mataotaó. (Pal. 24:3, 4) Ngāueleleiʻaki ʻetau ʻū tohi makatuʻunga ʻi he Tohi Tapú. ʻOku maʻu heni ʻa e ngaahi fokotuʻu ʻaonga ki he founga ke ngāueʻaki ai ʻa e ngaahi tefitoʻi moʻoni Fakatohitapú. Ko e fakatātaá, ko e kupu hokohoko “Tokoni ki he Fāmilí” ʻoku maʻu ai ʻa e fakamatala feʻungamālie mo e ngaahi pole pau ʻoku fehangahangai mo e ngaahi hoa malí, ngaahi mātuʻá mo e kau taʻu hongofulu tupú ʻi he ʻahó ni. b Fakapapauʻi ke ngāueʻaki ʻa e meʻa ʻoku leaʻaki ʻe he Tohi Tapú, neongo kapau ʻoku ʻikai ke ngāueʻaki ia ʻe he ngaahi mēmipa kehe ʻo e fāmilí. ʻI hoʻo fai iá, ʻe maʻu ʻaonga mei ai ho fāmilí pea te ke fiefia ʻi he tāpuaki ʻa Sihová.​—1 Pita 3:1, 2.

8. ʻE lava fēfē ke tākiekina kitautolu ʻe heʻetau ngaahi filí?

⁸ Fai ha fakamatala ki heʻetau ngaahi filí. Kuo ʻomai ʻe Sihova ʻa e meʻaʻofa ʻo e tauʻatāina ke filí, pea ʻokú ne fiemaʻu ke tau maʻu ʻa e ngaahi ʻaonga ʻoku haʻu mei hono fai ha ngaahi fili lelei. Ka ʻoku ʻikai foki ke ne maluʻi kitautolu mei he ngaahi ola ʻo e ngaahi fili koví. (Kal. 6:7, 8) ʻI he ʻuhinga ko iá, ʻoku tau tali ʻa e ngaahi nunuʻa  ʻetau ngaahi fili fakavalevalé, ngaahi lea taʻefakakaukauʻí mo hono fai fakavave ha meʻa. Makatuʻunga ʻi ha meʻa naʻa tau fai, ʻe fakahohaʻasi nai kitautolu ʻe ha konisēnisi halaia. Kae kehe, ʻi hono ʻiloʻi te tau fai ha fakamatala ki heʻetau ngaahi filí ʻe lava ke ueʻi ai kitautolu ke vete ʻetau ngaahi angahalá, fakatonutonu ʻetau ngaahi fehālaakí pea fakaʻehiʻehi mei hono toe fai ʻa e fehālaaki tatau. ʻI he ngāue ki he ngaahi meʻa ko iá ʻe lava ke tokoniʻi ai kitautolu ke kei kau ʻi he lova ki he moʻuí.

9. Ko e hā ʻe lava ke ne tokoniʻi koe ke fekuki mo ha fili fakavalevale? (Sio foki ki he fakatātaá.)

⁹ ʻE lava fēfē ke ke fua ʻa e kavengá? Kapau heʻikai lava ke ke toe fakafoki ha fili fakavalevale, tali ho tuʻunga lolotongá. ʻIloʻi heʻikai lava ke ke liliu ʻa e kuohilí. ʻOua ʻe fakamoleki noa ho mālohi fakaeongó mo fakaʻatamaí ʻi he feinga ke fakatonuhiaʻi koe pe tukuakiʻi koe pe ko e niʻihi kehé ki hoʻo fili koví. ʻI hono kehé, fakahaaʻi hoʻo ngaahi fehālaakí pea fai ʻa e lelei taha te ke malavá ʻi ho tuʻunga lolotongá. Kapau ʻokú ke ongoʻi halaia fekauʻaki mo ha fehālaaki naʻá ke fai, hanga anga-fakatōkilalo kia Sihova ʻi he lotu, fakahaaʻi hoʻo faihalá pea kole kiate ia ke ne fakamolemoleʻi koe. (Saame 25:11; 51:3, 4) Kole fakamolemole ki he faʻahinga naʻá ke fakalotomamahiʻí, pea kapau ʻe fiemaʻu, kumi ki he tokoni ʻa e kau mātuʻá. (Sēm. 5:14, 15) Ako mei hoʻo ngaahi fehālaakí, pea feinga ke fakaʻehiʻehi mei hono toe fai iá. ʻI hoʻo fai peheé, ʻe lava ke ke fakapapauʻi ʻe fakahaaʻi atu ʻe Sihova ʻene mēsí pea tokonaki atu ʻa e poupou ʻokú ke fiemaʻú.​—Saame 103:8-13.

10. Ko e hā ko ha kavenga mamafa ai ʻa e ʻamanaki taʻefakapotopoto? (Kalētia 6:4)

¹⁰ Ngaahi ʻamanaki taʻefakapotopoto. ʻE lava ke tau fakamafasiaʻi kitautolu ʻaki ʻa e ngaahi ʻamanaki taʻefakapotopotó ʻi he taimi ʻoku tau fakahoa ai kitautolu ki he niʻihi kehé. (Lau ʻa e Kalētia 6:4.) Kapau te tau fakahoa maʻu pē kitautolu ki he niʻihi kehé, ʻe lava ke tau hoko ai ʻo meheka mo feʻauʻauhi. (Kal. 5:26) ʻI ha feinga ke fakahoko ʻa e meʻa kuo lavaʻi ʻe he niʻihi kehé, te tau teke atu nai ai kitautolu ʻo fakalaka ia ʻi he meʻa ʻoku fakaʻatā ʻe heʻetau malavá mo hotau tuʻungá. Pea kapau “ko e ʻamanaki ʻoku tuai ʻene hokó ʻokú ne ʻai ke tutue ʻa e lotó,” huanoa hake ai ʻa e fakalotosiʻi hono fokotuʻu ha ngaahi ʻamanaki heʻikai ʻaupito lava ke tau aʻusia! (Pal. 13:12) ʻI he fai peheé ʻe lava ke siʻi ai hotau iví pea fakamāmālieʻi kitautolu ʻi heʻetau lova ki he moʻuí.​—Pal. 24:10.

11. Ko e hā ʻe lava ke ne tokoniʻi koe ke fakaʻehiʻehi mei he ngaahi ʻamanaki taʻefakapotopotó?

¹¹ ʻE lava fēfē ke ke liʻaki atu ʻa e fakamamafa ko iá? ʻOua te ke ʻamanekina ha meʻa lahi ange meiate koe ʻi he meʻa ʻoku fiemaʻu ʻe Sihová. ʻOku ʻikai ʻaupito te ne ʻamanekina mai ke ke ʻoange ʻa e meʻa ʻoku ʻikai ke ke maʻú. (2 Kol. 8:12) Fakapapauʻi ʻoku ʻikai ke fakahoa ʻe Sihova ʻa e meʻa ʻokú ke faí mo ia ʻoku fai ʻe he niʻihi kehé. (Māt. 25:20-23) ʻOkú ne koloaʻaki hoʻo ngāue loto ʻaufuatoó, ko hoʻo faitōnungá pea mo hoʻo kātakí. Tali anga-fakanānā ko ho taʻumotuʻá, moʻui leleí mo hoʻo ngaahi tuʻungá te ne fakangatangata nai ʻa e meʻa ʻe lava ke ke fai ʻi he taimi ní. Hangē ko Pāsiliaí, loto-lelei ke fakafoki ʻa e ngaahi monuú ʻi he taimi ʻoku hoko ai ko ha palopalema hoʻo ngaahi fakangatangata fakaesinó. (2 Sām. 19:35, 36) Hangē ko Mōsesé, tali ʻa e tokoní pea vahe ʻa e ngaahi fatongiá ki he niʻihi kehé ʻi heʻene feʻungamālié. (ʻEki. 18:21, 22) Ko e anga-fakanānā peheé te ne taʻofi koe mei hono fokotuʻu ʻa e ngaahi ʻamanaki taʻefakapotopoto ʻa ia ʻe lava ke ne ʻai koe ke ke ongosia ʻi hoʻo lova ki he moʻuí.

12. ʻOku ʻi ai nai haʻatau kaunga ki he ngaahi fili fakavalevale ʻoku fai ʻe he niʻihi kehé? Fakamatalaʻi.

¹² Ongoʻi ʻoku ʻi ai ʻetau kaunga ki he fili fakavalevale ʻoku fai ʻe he niʻihi kehé. Heʻikai lava ke tau fai ha fili maʻá e niʻihi kehé; pea heʻikai lava  ke tau maluʻi maʻu pē kinautolu mei he nunuʻa ʻo e ngaahi fili fakavalevale ʻoku nau faí. Ko e fakatātaá, ko ha foha pe ʻofefine ʻe faai atu pē ʻo ne fili ke tuku ʻene tauhi kia Sihová. Ko e fili ko iá ʻe lava ke ne fakalotomamahiʻi lahi ʻa e ongo mātuʻá. Neongo ia, ko e ngaahi mātuʻa ʻoku nau tukuakiʻi kinautolu ki he fili fakavalevale ʻenau tamá ʻoku nau fua ha kavenga mamafa. ʻOku ʻikai ko ha fakamamafa ia ʻoku ʻamanekina mai ʻe Sihova ke nau fua.​—Loma 14:12.

13. ʻE lava fēfē ke fekuki ha mātuʻa mo e fili fakavalevale ha kiʻi tama?

¹³ ʻE lava fēfē ke ke liʻaki atu ʻa e fakamamafa ko iá? ʻIloʻi kuo ʻomai ʻe Sihova kiate kitautolu kotoa ʻa e tauʻatāina ke filí. ʻOkú ne fakaʻatā ʻa e tokotaha taki taha ke fai ʻene fili pē ʻaʻana. ʻOku kau ki ai pe te ne tauhi kiate ia. ʻOku ʻiloʻi ʻe Sihova ʻoku ʻikai ko ha mātuʻa haohaoa koe; ʻokú ne loto pē ke ke fai ʻa e lelei taha te ke malavá. Ko e fili ʻoku fai ʻe hoʻo kiʻi tamá ko hono fatongia pē ʻoʻona, kae ʻikai ko koe. (Pal. 20:11) Neongo ia, ʻokú ke hohaʻa nai ki ha ngaahi fehālaaki naʻá ke fai ʻi he tuʻunga ko ha mātuʻa. Kapau ko ia, tuku ke ʻilo ʻe Sihova ʻa e anga hoʻo ongoʻí pea kole ki heʻene fakamolemolé. ʻOkú ne ʻiloʻi heʻikai lava ke ke toe foki ki he kuohilí pea liliu ʻa e meʻa kuo hokó. ʻI he taimi tatau, ʻoku ʻikai te ne ʻamanekina mai koe ke ke maluʻi hoʻo kiʻi tamá mei hono utu ʻa e meʻa kuó ne toó. Manatuʻi kapau ʻoku fai ʻe hoʻo kiʻi tamá ha feinga ke foki kia Sihova, te Ne talitali vēkeveke ia.​—Luke 15:18-20.

14. Ko e hā ʻoku hoko ai ʻa e halaia tōtuʻá ko ha fakamamafa ʻoku totonu ke tau liʻaki atu?

¹⁴ Halaia tōtuʻa. ʻI he taimi ʻoku tau faiangahala aí, ko e moʻoni te tau ongoʻi halaia. Kae kehe, ko e halaia tōtuʻá ko ha fakamamafa ia naʻe ʻikai ʻaupito ʻuhinga ke tau fua. Ko ha fakamamafa ia kuo pau ke tau liʻaki atu. ʻOku anga-fēfē ʻetau ʻiloʻi pe ʻoku tau halaia tōtuʻá? Kapau naʻa tau vete ʻetau angahalá, fakatomala pea fou ʻi he ngaahi sitepu ke fakaʻehiʻehi mei hono toe fai ʻa e angahala tatau, ʻoku lava ke tau falala kuo fakamolemoleʻi kitautolu ʻe Sihova. (Ngā. 3:19) Hili ʻetau fou ʻi he ngaahi sitepu ko iá, ʻoku ʻikai fiemaʻu ʻe Sihova ke tau kei ongoʻi halaia. ʻOkú ne ʻiloʻi ʻa e maumau ʻe lava ke hoko ʻi he ongoʻi halaia maʻu peé. (Saame 31:10) Kapau ʻoku lōmekina  kitautolu ʻe he loto-mamahí, te tau foʻi nai ʻi heʻetau lova ki he moʻuí.​—2 Kol. 2:7.

15. Ko e hā ʻe lava ke ne tokoniʻi koe ke fekuki mo e halaia tōtuʻá? (1 Sione 3:19, 20) (Sio foki ki he fakatātaá.)

¹⁵ ʻE lava fēfē ke ke liʻaki ʻa e fakamamafa ko iá? ʻI he taimi ʻoku lōmekina ai koe ʻe he halaia tōtuʻá, tokangataha ki he “fakamolemole moʻoní” ʻoku tokonaki mai ʻe he ʻOtuá. (Saame 130:4) ʻI he taimi ʻokú ne fakamolemoleʻi ai ʻa e faʻahinga ʻoku fakatomala loto-moʻoní, ʻokú ne talaʻofa: “ʻE ʻikai te u kei manatua ʻa ʻenau angahalá.” (Sel. 31:34) ʻOku ʻuhinga ení heʻikai ke toe fakakaukau ʻa Sihova ki hoʻo ngaahi angahala ʻi he kuohilí. Ko ia ʻoua ʻe vakai ki he ngaahi nunuʻa hoʻo faiangahalá ko ha fakamoʻoni ia kuo ʻikai ke ne fakamolemoleʻi koe. Pea ʻoua ʻe tauteaʻi koe koeʻuhí ko e fakangatangata nai ʻe hoʻo ngaahi fehālaaki ʻi he kuohilí ʻa e meʻa ʻoku lava ke ke fai ʻi heʻene ngāué ʻi he taimi ní. ʻOku ʻikai ke kei fakakaukau ai pē ʻa Sihova ki hoʻo ngaahi angahalá, pea ʻoku totonu ke ke pehē pē mo koe.​—Lau ʻa e 1 Sione 3:19, 20.

16. ʻI he tuʻunga ko e kau lele, ko e hā kuo pau ke tau ʻiloʻí?

¹⁶ ʻI heʻetau lele ʻi heʻetau lova ki he moʻuí, kuo pau ke tau “lele ʻi ha founga ʻe lava ke [tau] ikuna ai ʻa e palé.” (1 Kol. 9:24) ʻE lava ke tau fai ia kapau te tau ʻiloʻi ʻa e faikehekehe ʻi he ngaahi kavenga kuo pau ke tau fuá pea mo e ngaahi fakamamafa kuo pau ke tau liʻaki atú. ʻI he kupu ko ení, kuo tau lāulea ki ha fakatātā pē ʻe niʻihi ʻo e meʻa kuo pau ke tau fuá mo e meʻa kuo pau ke tau liʻaki atú. Ka ʻe lava ke tau lave ki ha ngaahi meʻa kehe. Naʻe pehē ʻe Sīsū ʻe lava ke hoko hotau “lotó ʻo mafatukituki ʻi he kai ʻo fuʻu hulú mo e inu ʻo fuʻu lahí pea mo e ngaahi loto-moʻua ʻo e moʻuí.” (Luke 21:34) Ko e konga Tohi Tapu ko ení mo e ngaahi konga Tohi Tapu kehe ʻe lava ke ne tokoniʻi koe ke ʻiloʻi ha ngaahi fakatonutonu ʻe fiemaʻu nai ke ke fai ʻi hoʻo lele ʻi he lova ki he moʻuí.

17. Ko e hā ʻoku lava ai ke tau fakapapauʻi te tau ikuna ʻa e lova ki he moʻuí?

¹⁷ ʻOku lava ke tau fakapapauʻi te tau ikuna ʻa e lova ki he moʻuí koeʻuhí ʻe foaki mai ʻe Sihova ʻa e mālohi ʻoku tau fiemaʻú. (ʻAi. 40:29-31) Ko ia ai, ʻoua ʻe fakatuotuaí! Faʻifaʻitaki ki he ʻapositolo ko Paulá, ʻa ia naʻá ne foaki hono kotoá ʻi he tutui atu ke maʻu ʻa e pale naʻe fokotuʻu ʻi muʻa ʻiate iá. (Fil. 3:13, 14) Heʻikai lava ha taha ʻo lele ʻi he lová maʻau, ka ʻi he tokoni ʻa Sihová ʻe lava ke ke ikuna. ʻE lava ke tokoniʻi koe ʻe Sihova ke fua hoʻo ngaahi kavengá pea liʻaki atu ʻa e ngaahi fakamamafa ʻikai fiemaʻú. (Saame 68:19) ʻI he kau ʻa Sihova mo koé, te ke malava ai ke lele ʻi he lová fakataha mo e kātaki peá ke ikuna ʻa e palé!