1. Ko e hā ʻa e moʻoni fekauʻaki mo e niʻihi ʻoku nau fai ha angahala mamafa?

 ʻI HE kupu ki muʻá, naʻa tau sio ai ki he founga naʻe fakaleleiʻi ai ʻe he ʻapositolo ko Paulá ha keisi ʻo e faihala mamafa ʻi Kolinitō. Ko e tokotaha faiangahalá naʻe ʻikai ke ne fakatomala pea naʻe pau ke fakamavaheʻi ia mei he fakatahaʻangá. Kae kehe, hangē ko ia ʻoku fakahaaʻi ʻi heʻetau konga tohi ʻo e kaveingá, ko e niʻihi naʻa nau fai ha angahala mamafa ʻe lava ke fai hano tokoniʻi. ʻE lava ke taki atu kinautolu ki he fakatomalá. (Loma 2:4) ʻE lava fēfē ke tokoniʻi kinautolu ʻe he kau mātuʻá ke nau fakatomala?

2-3. Ko e hā ʻoku totonu ke tau fai kapau ʻoku tau ʻiloʻi naʻe fai ʻe ha kaungātui ha angahala mamafa, pea ko e hā hono ʻuhingá?

² Ki muʻa ke lava ʻa e kau mātuʻá ʻo tokoní, ʻoku fiemaʻu ke nau ʻiloʻi ʻa e meʻá. Ko ia, ko e hā ʻoku totonu ke tau fai kapau ʻoku tau ʻiloʻi kuo fai ʻe ha kaungātui ha angahala mamafa—ko ha meʻa ʻe lava ke iku atu ki hano fakamavaheʻi ia mei he fakatahaʻangá? ʻOku totonu ke tau fakalototoʻaʻi ʻa e tokotaha faihalá ke ʻalu ʻo kumi tokoni ki he kau mātuʻá.—ʻAi. 1:18; Ngā. 20:28; 1 Pita 5:2.

³ Kae fēfē kapau ʻoku fakafisi ʻa e tokotaha faihalá ke lea ki he kau mātuʻá? Te tau ʻalu leva kitautolu ʻo lea ki he kau mātuʻá ke fakapapauʻi ʻe maʻu ʻe he tokotahá ʻa e tokoni ʻoku fiemaʻú. Ko e meʻa anga-ʻofa ia ke faí koeʻuhí ʻoku ʻikai ke tau loto ke mole hotau tokouá pe tuofefiné. Kapau ʻoku kei hokohoko atu pē ʻa e tokotaha faihalá ʻi hono ʻalungá, te ne toe maumauʻi lahi ange ai hono vahaʻangatae mo Sihová. Te ne toe maumauʻi nai ʻa e ongoongo ʻo e fakatahaʻangá. Ko ia ʻoku tau fai ai ha ngāue loto-toʻa ʻo makatuʻunga ʻi he ʻofa kia Sihova pea ki he tokotaha faihalá.—Saame 27:14.

 FOUNGA ʻOKU TOKONIʻI AI ʻE HE KAU MĀTUʻÁ ʻA E FAʻAHINGA NAʻA NAU KAU ʻI HA FAIANGAHALA MAMAFA

4. Ko e hā ʻa e taumuʻa ʻa e kau mātuʻá ʻi heʻenau fakataha mo ha tokotaha naʻá ne fai ha angahala mamafa?

⁴ ʻI hono fai ʻe ha taha ʻi he fakatahaʻangá ha angahala mamafa, ko e kulupu ʻo e kau mātuʻá ʻoku nau fili ha fanga tokoua taau ʻe toko tolu mei honau lotolotongá ke nau ngāue ko ha kōmiti. a Ko e kau tangata ko ení ʻoku fiemaʻu ke nau anga-fakanānā mo anga-fakatōkilalo. Neongo te nau feinga ke tokoniʻi ʻa e tokotaha faihalá ke fakatomala, ʻoku nau lāuʻilo heʻikai lava ke nau fakamālohiʻi ha taha ke liliu. (Teu. 30:19) ʻOku ʻiloʻi ʻe he kau mātuʻá heʻikai ke fakafeangai ʻa e kotoa ʻo e kau faihalá ʻi ha founga lelei, ʻo hangē ko ia naʻe fai ʻe Tuʻi Tēvitá. (2 Sām. 12:13) Ko e niʻihi ʻo e kau faihalá te nau fili nai ke tukunoaʻi ʻa e enginaki ʻa Sihová. (Sēn. 4:​6-8) Neongo ia, ko e taumuʻa ʻa e kau mātuʻá ke taki atu ʻa e tokotaha faihalá ki he fakatomala ʻo ka malava. Ko e hā ʻa e ngaahi tefitoʻi moʻoni ʻokú ne tataki kinautolu ʻi heʻenau fakataha mo e tokotaha faihalá?

5. Ko e hā ʻa e faleʻi ʻe fiemaʻu ke manatuʻi ʻe he kau mātuʻá ʻi heʻenau fakataha mo e tokotaha faihalá? (2 Tīmote 2:​24-26) (Sio foki ki he fakatātaá.)

⁵ ʻOku vakai ʻa e kau mātuʻá ki he tokotaha faihalá ko ha sipi mole kae kei mahuʻinga. (Luke 15:​4, 6) Ko ia ai, ʻi heʻenau fakataha mo e tokotahá, ʻoku ʻikai ke nau anga-fefeka ʻi heʻenau leá, tōʻongá mo e anga ʻenau ngāué; pea ʻoku ʻikai ke nau vakai ki he fakatahá ko ha fatongia pē ke fai ʻa ia ʻoku nau muimui ai ʻi ha founga kuo fokotuʻu. ʻI hono kehé, te nau fakahāhā ʻa e ngaahi ʻulungaanga ʻoku maʻu ʻi he 2 Tīmote 2:​24-26. (Lau.) ʻOku hanganaki anga-malū, anga-fakaalaala, mo anga-lelei ʻa e kau mātuʻá ʻi heʻenau feinga ke aʻu ki he loto ʻo e tokotaha faihalá.

6. ʻE anga-fēfē hono teuʻi ʻe he kau mātuʻá ʻa honau lotó ki muʻa ke fakataha mo ha tokotaha faihala? (Loma 2:4)

⁶ ʻOku teuʻi ʻe he kau mātuʻá ʻa honau lotó. ʻOku nau feinga ke faʻifaʻitaki kia Sihova ʻi he kotoa ʻenau ngaahi feangainga mo ha tokotaha faiangahala, ʻo manatuʻi ʻa e ngaahi lea ʻa Paulá: “Ko e ʻOtuá ʻi heʻene anga-leleí ʻokú ne feinga ke taki atu koe ki he fakatomalá.” (Lau ʻa e Loma 2:4.) Kuo pau ke manatuʻi ʻe he kau mātuʻá ko ʻenau ngāue tefitó ko e kau tauhi-sipi ʻi he malumalu ʻo e tataki ʻa Kalaisí. (ʻAi. 11:​3, 4; Māt. 18:​18-20) Ki muʻa ke fakataha mo e tokotaha faihalá, ʻe fakakaukau ʻa e kōmití ʻi he faʻa lotu ki heʻenau taumuʻá: Ke taki atu ʻa e tokotaha faihalá ki he fakatomala. Te nau fai ʻa e fekumi ʻi he Folofolá pea ʻi heʻetau ʻū tohí pea te nau lotu ki ha ʻiloʻilo. Te nau fakakaukau ki he meʻa ʻoku fiemaʻu ke nau ʻilo fekauʻaki mo e puipuituʻa ʻo e tokotahá ʻa ia naʻe kaunga nai ia ki heʻene fakakaukaú, vakaí mo e tōʻongá.—Pal. 20:5.

7-8. ʻE lava fēfē ke faʻifaʻitaki ʻa e kau mātuʻá ki he kātaki ʻa Sihová ʻi heʻenau fakataha mo ha tokotaha faihala?

⁷ ʻOku faʻifaʻitaki ʻa e kau mātuʻá ki he kātaki ʻa  Sihová. ʻOku nau tauhi maʻu ʻi heʻenau fakakaukaú ʻa e anga ʻo e feangainga ʻa Sihova mo e kau faihala ʻi he kuohilí. Ko e fakatātaá, naʻe fakaʻuhinga anga-kātaki ʻa Sihova mo Keini, ʻo fakatokanga kiate ia fekauʻaki mo e ngaahi nunuʻa ʻo e faiangahalá pea ʻoange kiate ia ha ʻamanaki ki hano toe maʻu ʻa e hōifuá. (Sēn. 4:​6, 7) Naʻe enginaki ʻa Sihova kia Tēvita fakafou ʻi he palōfita ko Nētané, ʻa ia naʻá ne ngāueʻaki ha talanoa fakatātā naʻe aʻu ki he loto ʻo e tuʻí. (2 Sām. 12:​1-7) Pea naʻe “toutou fekauʻi atu” ʻe Sihova ʻene kau palōfitá ki he puleʻanga talangataʻa ʻo ʻIsilelí. (Sel. 7:​24, 25) Naʻe ʻikai ke ne tatali ki hono kakaí ke nau fakatomala peá ne toki tokoniʻi kinautolu. ʻI hono kehé, naʻá ne fakahāhā ʻa e tamuʻomuʻa ʻaki hono fakaʻaiʻai kinautolu ke nau fakatomala.

⁸ ʻOku muimui ʻa e kau mātuʻá ʻi he faʻifaʻitakiʻanga ʻa Sihová ʻi heʻenau feinga ke tokoniʻi ʻa e faʻahinga kuo nau kau ʻi ha faiangahala mamafa. Hangē ko e tataki ʻi he 2 Tīmote 4:​2, ʻoku nau fakaʻuhinga “ʻaki ʻa e anga-kātaki fakaʻaufuli” ʻi he feangainga mo ha kaungātui ʻoku ʻi ha tuʻunga faingataʻa. Ko ha nouti ako ʻi he veesi ko iá ʻoku lave ai fekauʻaki mo ha mātuʻa pehē: “ʻE fiemaʻu maʻu pē ke ne fakahāhā ʻa e faʻamataʻofi, pea tokoniʻi anga-kātaki [ʻa e tokotaha faiangahalá] ke ne maʻu ʻa e holi ke fai ʻa e meʻa [ʻoku] tonú. Kapau ʻe ʻulutukua [ʻa e mātuʻá] ki he ʻitá pe ongoʻi feifeitamakí, te ne fakamavaheʻi nai ai pe aʻu ʻo fakatūkiaʻi [ʻa e tokotaha faiangahalá].”

9-10. ʻE lava fēfē ke tokoniʻi ʻe he kau mātuʻá ha tokotaha faiangahala ke fakaʻuhinga ʻi hono ʻalungá?

⁹ ʻOku feinga ʻa e kau mātuʻá ke fakapapauʻi ʻa e ngaahi tuʻunga naʻe taki atu ki he faiangahalá. Ko e fakatātaá, naʻe hoko māmālie ʻa e Kalisitiané ʻo vaivai koeʻuhí naʻá ne fakaliʻeliʻaki ʻa e ako fakafoʻituituí pe ko e ngāue fakafaifekaú? Naʻe hoko ʻene ngaahi lotu kia Sihová ʻo tōmokosi pe fakatamulu? Kuó ne fakaʻatā ʻa e ngaahi holi fehālaakí ke ne tataki ia? Naʻá ne fai ha ngaahi fili taʻefakapotopoto ʻi heʻene feohí pe fakafiefiá? Kuo anga-fēfē nai ʻa e uesia hono lotó ʻe he ngaahi fili ko iá? ʻOkú ne ʻiloʻi ʻa e anga ʻo e kaunga ʻene ngaahi fili mo e tōʻonga ki muí ni maí ki heʻene Tamaí, ʻa Sihova?

¹⁰ ʻI hono ʻeke ha ngaahi fehuʻi mohu ʻuhinga kae ʻikai ke hoko ʻo kaunoá, ʻoku fusi hake ai ʻe he kau mātuʻá ʻa e fakakaukau ʻa e tokotaha faihalá ʻi he anga-lelei pea tokoniʻi ia ke fakaʻuhinga ʻi hono ʻalungá. (Pal. 20:5) Tānaki atu ki aí, te nau ngāueʻaki nai ha ngaahi talanoa fakatātā ke tokoniʻi ʻa e tokotahá ke ne fakaʻuhinga pea ke ne sio ʻoku hala ʻa e meʻa naʻá ne faí, hangē ko ia naʻe fai ʻe Nētane kia Tēvitá. Mahalo ʻi he lolotonga ʻa e fuofua fakatahá, ko e tokotahá ʻe kamata ke ne ongoʻi mamahi moʻoni ʻi he ʻalunga kuó ne fou aí. ʻE aʻu nai ʻo ne fakatomala.

11. Naʻe anga-fēfē fakafeangai ʻa Sīsū ki he kau faiangahalá?

¹¹ ʻOku feinga ʻa e kau mātuʻá ke faʻifaʻitaki kia Sīsū. ʻI he feangainga mo Saula ʻo Tāsusí, naʻe ʻeke ʻe Sīsū kuo toetuʻú ha fehuʻi fakatupu fakakaukau: “ʻE Saula, ʻe Saula, ko e hā ʻokú ke fakatangaʻi ai aú?” Naʻe tokoniʻi ai ia ʻe Sīsū ke ne fakaʻuhinga ʻi hono ʻalunga fehālaakí. (Ngā. 9:​3-6) Pea ʻi he tuʻunga ʻo e “fefine ko ia ko Sisipeli,” naʻe pehē ʻe Sīsū: “Naʻá ku tuku kiate ia ha taimi ke ne fakatomala ai.”—Fkh. 2:​20, 21.

12-13. ʻE anga-fēfē nai hano ʻoange ʻe he kau mātuʻá ha taimi ki he tokotaha faihalá ke ne fakatomalá? (Sio foki ki he fakatātaá.)

¹² ʻI he faʻifaʻitaki kia Sīsuú, ko e kau mātuʻá ʻoku ʻikai ke nau fakavave ke fakamulituku ko ha tokotaha faihala heʻikai pē ke ne fakatomala. Neongo ko e niʻihi te nau fakatomala nai lolotonga ʻenau fuofua fakataha mo e kōmití, ko e niʻihi kehe te nau fiemaʻu nai ha taimi lahi ange. Ko ia ʻe fokotuʻutuʻu nai ʻa e kau mātuʻá ke fakataha mo e tokotaha faiangahalá ʻo laka hake ʻi he tuʻo tahá. Mahalo ʻi he hili ʻa e fuofua fakatahá, ko e Kalisitiane faihalá ʻe kamata ke ne fakakaukau  fakamātoato ki he meʻa kuo tala ange kiate iá. Te ne fakaofiofi nai kia Sihova ʻi he lotu anga-fakatōkilalo. (Saame 32:5; 38:18) Ko ia ai, ʻi he fakataha hono hokó, ʻe fakahāhā nai ʻe he tokotaha faiangahalá ha laumālie kehe mei he taimi naʻa nau fuofua fakataha aí.

¹³ Ke tokoni ke taki atu ʻa e tokotaha faiangahalá ki he fakatomalá, ʻoku fakahāhā ʻe he kau mātuʻá ʻa e kaungāongoʻi mo e anga-lelei. ʻOku nau ʻamanaki pea lotu ke hanga ʻe Sihova ʻo tāpuakiʻi ʻenau ngaahi feingá pea ke foki mai ʻa e fakakaukau lelei ʻa e Kalisitiane talangataʻá pea fakatomala.—2 Tīm. 2:​25, 26.

14. Ko hai ʻoku ʻave ki ai ʻa e lāngilangi ʻi he taimi ʻoku fakatomala ai ha tokotaha faiangahala, pea ko e hā hono ʻuhingá?

¹⁴ Kapau ʻoku fakatomala ʻa e tokotaha faiangahalá, ko ha ʻuhinga ia ke fiefia lahi ai! (Luke 15:​7, 10) Ko hai ʻoku ʻave ki ai ʻa e lāngilangí? Ki he kau mātuʻá? Manatuʻi ʻa e meʻa naʻe tohi ʻe Paula fekauʻaki mo e kau faiangahalá: “Heiʻilo naʻa tuku ʻe he ʻOtuá ke nau fakatomala.” (2 Tīm. 2:25) Ko ha nouti ako ʻi he veesi ko iá ʻoku pehē ai: “Ko e lāngilangi ki ha liliu pehē ʻi he fakakaukaú mo e tōʻongá ʻoku ʻave ia, ʻo ʻikai ki ha tangata, ka kia Sihova, ʻa ia ʻokú ne tokoniʻi ʻa e Kalisitiane talangataʻá ke ne fai ʻa e liliu mātuʻaki mahuʻinga ko ení. ʻOku hoko atu ʻa Paula ke lave ki he niʻihi ʻo e ngaahi ola fakaʻofoʻofa ʻo ha fakatomala pehē—ʻokú ne taki atu ʻa e tokotaha faiangahalá ki ha ʻilo totonu ange ʻo e moʻoní, ʻoku tokoniʻi ai ia ke toe foki mai ʻene fakakaukau leleí, pea ʻoku ʻai ai ia ke ne malava ʻo hao mei he ngaahi tauhele ʻa Sētané.—2Tī 2:26.”

15. ʻE anga-fēfē nai ʻa e hokohoko atu ʻa e kau mātuʻá ke tokoniʻi ha tokotaha faihala fakatomala?

¹⁵ ʻI he fakatomala ha tokotaha faihala, ʻe fokotuʻutuʻu ʻa e kōmití ke fai ha ngaahi ʻaʻahi fakatauhisipi koeʻuhí ke hokohoko atu hono maʻu ʻe he tokotahá ʻa e tokoni ʻokú ne fiemaʻu ke faitau mo e ngaahi tauhele ʻa Sētané pea ʻai ke hangatonu ʻa e ngaahi hala ki hono vaʻé. (Hep. 12:​12, 13) Ko e moʻoni, ʻoku ʻikai ke fakahaaʻi ʻe he kau mātuʻá ki ha taha ʻa e fakaikiiki fekauʻaki mo e ʻalunga ʻo e tokotaha faiangahalá. Ka ko e hā ʻa e meʻa ʻe fiemaʻu nai ke fakahā ki he fakatahaʻangá?

 “VALOKIʻI ʻI HE ʻAO ʻO E KAU MAMATÁ KOTOA”

16. Fakatatau ki he 1 Tīmote 5:​20, ko hai ʻa e “kau mamatá” ʻa ia naʻe ʻuhinga ki ai ʻa Paulá?

¹⁶ Lau ʻa e 1 Tīmote 5:20. Naʻe tohi ʻe Paula ʻa e ngaahi lea ko iá ki hono kaungā-mātuʻa ko Tīmoté ʻi he felāveʻi mo e founga ke ngāue ai ki he “faʻahinga ʻoku nau tōʻongaʻaki ʻa e angahalá.” Ko e hā naʻá ne ʻuhinga ki aí? Naʻe ʻikai ke ne ʻuhinga pē hení ko e fakatahaʻangá fakalūkufua ʻa e “kau mamatá.” ʻI hono kehé, naʻá ne ʻuhinga ki he faʻahinga tokosiʻi ʻa ia kuo nau ʻosi ʻilo nai fekauʻaki mo e faiangahalá. ʻE lava pē ko e faʻahinga naʻe sio tonu, pe ko ha faʻahinga naʻe talanoa ki ai ʻa e tokotaha faihalá. Ko e kau mātuʻá te nau fakahaaʻi fakapotopoto ange kiate kinautolu ko e meʻá kuo fai ʻa e ngāue ki ai pea kuo fakatonutonu ʻa e tokotaha faiangahalá.

17. Kapau ʻoku ʻi ai ha faiangahala mamafa ʻoku ʻilolahia ʻi he fakatahaʻangá pe ʻoku ngalingali ʻe hoko ʻo ʻiloʻi, ko e hā ʻa e fanongonongo ʻe faí, pea ko e hā hono ʻuhingá?

¹⁷ ʻI he ngaahi tuʻunga ʻe niʻihi, ko e faihalá ʻe hoko nai ʻo ʻilolahia ʻi he fakatahaʻangá pe ʻoku ngalingali ʻe hoko ʻo ʻiloʻi. ʻI ha tuʻunga pehē, ko e “kau mamatá” ʻe kau ki ai ʻa e fakatahaʻangá fakakātoa. Ko ia ʻe fai ʻe ha mātuʻa ha fanongonongo ki he fakatahaʻangá ko e tokouá pe tuofefiné kuo fai hono valokiʻi. Ko e hā hono ʻuhingá? ʻOku ʻomai ʻe Paula ʻa e talí: “Ko ha fakatokanga ia ki he toengá” ke ʻoua te nau tō ki he angahalá.

18. ʻE anga-fēfē ngāue ʻa e kau mātuʻá ki he ngaahi tuʻunga ʻoku kaunga ki ai ha fānau ʻosi papitaiso? (Sio foki ki he fakatātaá.)

¹⁸ Fēfē ʻa e fānau ʻosi papitaiso—ʻa e faʻahinga siʻi hifo ʻi he taʻu 18—ʻa ia ʻoku nau kau ʻi ha faihala mamafa? Ko e kulupu ʻo e kau mātuʻá te nau fokotuʻutuʻu ki ha mātuʻa ʻe toko ua ke fakataha mo e kiʻi tamá mo ʻene ongo mātuʻa Kalisitiané. b ʻE feinga ʻa e mātuʻa ʻe toko uá ke ʻiloʻi pe ko e hā  ʻa e ngaahi sitepu kuo ʻosi fou ai ʻa e ongo mātuʻá ke tokoniʻi ʻena kiʻi tamá ke ne fakatomala. Kapau ʻoku maʻu ʻe he kiʻi tamá ha fakakaukau lelei pea ʻoku aʻu ʻa e ongo mātuʻá ki hono lotó, ko e mātuʻa ʻe toko uá te na fili nai ʻoku ʻikai toe fiemaʻu ke fai ha ngāue lahi ange ki he meʻá. He ko ē, ko e fatongia ia ʻo e ongo mātuʻá mei he ʻOtuá ke tokonaki ʻa e fakatonutonu anga-ʻofa ki heʻena fānaú. (Teu. 6:​6, 7; Pal. 6:20; 22:6; ʻEf. 6:​2-4) Hili iá, ko e mātuʻa ʻe toko uá te na talanoa ki he ongo mātuʻá ʻi he taimi ki he taimi ke fakapapauʻi ʻoku maʻu ʻe he kiʻi tamá ʻa e tokoni ʻokú ne fiemaʻú. Kae kehe, fēfē kapau ʻoku ʻikai ke fakatomala ʻa e kiʻi tama ʻosi papitaisó pea kīvoi pē ʻi ha ʻalunga hala? ʻI he tuʻunga ko iá, ko ha kōmiti ʻo e kau mātuʻá te nau fakataha mo e kiʻi tamá fakataha mo ʻene ongo mātuʻa Kalisitiané.

“KO SIHOVÁ ʻOKU MANAVAʻOFA LOLOTO ʻAUPITO MO MOHU MEESI”

19. ʻOku anga-fēfē feinga ʻa e kau mātuʻá ke faʻifaʻitaki kia Sihova ʻi he feangainga mo e kau faihalá?

¹⁹ Ko e kau mātuʻa ʻoku nau ngāue ʻi ha kōmiti ʻoku nau maʻu ha fatongia ʻi he ʻao ʻo Sihová ke tauhi ʻa e fakatahaʻangá ke maʻa. (1 Kol. 5:7) ʻOku nau loto foki ke ueʻi ʻa e kau faihalá ke nau fakatomala ʻo ka malava. Ke aʻusia iá, ko e kau mātuʻá ʻoku nau tauhi maʻu ha vakai pau mo fakatuʻamelie. Ko e hā hono ʻuhingá? Koeʻuhí ʻoku nau loto ke faʻifaʻitaki kia Sihova, ʻa ia ʻokú ne “manavaʻofa loloto ʻaupito mo mohu meesi.” (Sēm. 5:11) Fakatokangaʻi ʻa e anga hono fakahāhā ʻe he ʻapositolo taʻumotuʻa ko Sioné ha laumālie pehē. Naʻá ne tohi: “Siʻeku fānau, ʻoku ou tohi atu kiate kimoutolu ʻa e ngaahi meʻá ni ke ʻoua naʻa mou fai ha angahala. Ka neongo ia, kapau ʻoku fai ʻe ha taha ha angahala, ʻoku ʻi ai hotau tokotaha tokoni ʻi he ʻao ʻo e Tamaí, ko Sīsū Kalaisi, ko ha tokotaha māʻoniʻoni.”—1 Sio. 2:1.

20. Ko e hā tau lāulea ki ai ʻi he kupu fakaʻosi ʻo e kupu hokohoko ko ení?

²⁰ Ko e meʻa fakamamahí, ko e taimi ʻe niʻihi ʻoku fakafisi ha Kalisitiane ke fakatomala. Kapau ko ia, kuo pau ke fakamavaheʻi ia mei he fakatahaʻangá. ʻOku anga-fēfē ngāue ʻa e kau mātuʻá ki he ngaahi keisi mafatukituki peheé? Te tau lāulea ki ai ʻi he kupu fakaʻosi ʻo e kupu hokohoko ko ení.