1. Ko e hā ʻoku loto ʻa Sihova ke maʻu ʻe he kakai kotoa?

 NAʻE fakatupu ʻe Sihova ʻa e faʻahinga ʻo e tangatá fakataha mo e tauʻatāina ke filí. ʻOkú ke ngāueʻaki maʻu pē ʻa e meʻaʻofa ko iá ʻi hoʻo fai ʻa e ngaahi filí. Ko e fili mahuʻinga taha ʻe lava ke fai ʻe ha taha ko e fili ke fakatapui kia Sihova pea hoko ko e konga Hono fāmili ʻo e kau lotú. Ko e finangalo ia ʻo Sihová ke fai pehē ʻa e tokotaha kotoa. Ko e hā hono ʻuhingá? Koeʻuhí ʻokú ne ʻofa ʻi he kakaí pea ʻokú ne fiemaʻu ʻa e lelei tahá maʻa kinautolu. ʻOkú ne loto ke nau kaumeʻa mo ia pea moʻui taʻengata.—Teu. 30:​19, 20; Kal. 6:​7, 8.

2. ʻOku anga-fēfē ongoʻi ʻa Sihova fekauʻaki mo e kau faihala taʻefakatomalá? (1 Sione 2:1)

² Kae kehe, ʻoku ʻikai ke fakamālohiʻi ʻe Sihova ha taha ke tauhi kiate ia. ʻOkú ne fakaʻatā ʻa e tokotaha taki taha ke fili ʻa e meʻa te ne faí. Kae fēfē kapau ʻoku maumauʻi ʻe ha Kalisitiane ʻosi papitaiso ʻa e lao ʻa e ʻOtuá, ʻo fai ha angahala mamafa? Kapau ʻoku ʻikai ke ne fakatomala, kuo pau ke fakamavaheʻi ia mei he fakatahaʻangá. (1 Kol. 5:13) Neongo ia, ʻoku ʻamanaki loto-moʻoni ʻa Sihova ʻe toe foki kiate Ia ʻa e tokotaha faihalá. Ko hono moʻoní, ko e taha ia ʻo e ʻuhinga mahuʻinga naʻá ne tokonaki mai ai ʻa e huhuʻí—ke malava ʻo fakamolemoleʻi ʻa e kau faiangahala fakatomalá. (Lau ʻa e  1 Sione 2:1.) Ko hotau ʻOtua anga-ʻofá ʻokú ne kōlenga loto-māfana ki he kau faihalá, ʻo fakalototoʻaʻi ke nau fakatomala.—Sāk. 1:3; Loma 2:4; Sēm. 4:8.

3. Ko e hā te tau lāulea ki ai ʻi he kupu ko ení?

³ ʻOku fiemaʻu ʻe Sihova ke tau ohi ʻa e anga ʻo ʻene vakai ki he faihalá mo e kau faihalá. ʻI he kupu ko ení ʻe lāulea ai ki he founga ʻe lava ke tau fai ai iá. ʻI hoʻo lau ʻa e kupú, fakatokangaʻi ʻa e (1) founga naʻe fakaleleiʻi ai ha keisi ʻo e faihala mamafa ʻi he fakatahaʻanga ʻi Kolinitō ʻi he ʻuluaki senitulí, (2) ko e fakahinohino naʻe ʻoange ʻe he ʻapositolo ko Paulá ʻi he fakatomala ʻa ha tokotaha faihala, pea (3) ko e meʻa ʻoku fakaeʻa mai ʻe he fakamatala Fakatohitapu ko ení fekauʻaki mo e vakai ʻa Sihova ki he kau Kalisitiane ʻoku nau fai ha angahala mamafa.

FOUNGA NAʻE FAKALELEIʻI AI HA FAIHALA MAMAFA ʻI HE ʻULUAKI SENITULÍ

4. Ko e hā ʻa e meʻa naʻe hoko ʻi he fakatahaʻanga ʻi Kolinitō ʻi he ʻuluaki senitulí? (1 Kolinitō 5:​1, 2)

⁴ Lau ʻa e 1 Kolinitō 5:​1, 2. Lolotonga ʻa e fononga fakamisinale hono tolu ʻa Paulá, naʻá ne fanongo ʻi ha ongoongo fakatupu hohaʻa fekauʻaki mo e fakatahaʻanga foʻou naʻe toki fokotuʻu ʻi Kolinitoó. Ko ha tokoua ʻi he fakatahaʻanga ko iá naʻá ne nonofo mo e uaifi ʻo ʻene tamaí. Ko ha tōʻonga pehē naʻe fakalilifu pea naʻe “ʻikai maʻu [ia] naʻa mo e ʻi he lotolotonga ʻo e ngaahi puleʻangá”! Naʻe ʻikai ngata pē hono tukutukuʻi ʻe he fakatahaʻangá ʻene tōʻongá ka ʻoku ngalingali naʻa nau toe pōlepoleʻaki ia. Mahalo naʻe fakakaukau ʻa e niʻihi ko hono fakahaaʻi ia ʻa e faimeesi mo hono mahinoʻi ʻe he ʻOtuá ʻa e faʻahinga taʻehaohaoa ʻo e tangatá. Ka ʻoku ʻikai ke makātakiʻi ʻe Sihova ʻa e faihala ʻi he lotolotonga hono kakaí. ʻI ha ʻalunga taʻemīngao pehē, naʻe maumauʻi moʻoni ai ʻe he tangatá ʻa e ongoongo lelei ʻo e fakatahaʻangá. Naʻe mei lava foki ke ne tākiekina mo e kau Kalisitiane kehe naʻe feohi mo iá. Ko ia ko e hā naʻe fakahinohino ʻe Paula ki he fakatahaʻangá ke nau faí?

5. Ko e hā naʻe tala ʻe Paula ki he fakatahaʻangá ke nau faí, pea ko e hā naʻá ne ʻuhinga ki aí? (1 Kolinitō 5:13) (Sio foki ki he fakatātaá.)

⁵ Lau ʻa e 1 Kolinitō 5:13. ʻI hono fakamānavaʻi ʻa Paulá, naʻá ne fai ha tohi ʻo fakahinohino ke fakamavaheʻi ʻa e tokotaha faiangahala taʻefakatomalá mei he fakatahaʻangá. ʻE anga-fēfē fakafeangai ʻa e kau Kalisitiane faitōnungá kiate iá? Naʻe tala ʻe Paula kiate kinautolu “ke tuku [ʻenau] kei feohi” mo iá. Naʻe ʻuhinga ia ki he hā? Naʻe fakamatalaʻi ʻe Paula ko e fekau ko ení naʻe kau ai ʻa e “aʻu ʻo ʻoua ʻe kai mo ha tangata pehē.” (1 Kol. 5:11) Ko e kai fakataha mo ha taha ʻe lavangofua ke taki atu ai ke fakamoleki ʻa e taimi lahi ange mo e tokotaha ko iá. ʻOku hā mahino leva, naʻe ʻuhinga ʻa Paulá ʻoku ʻikai totonu ki he fakatahaʻangá ke feohi mo e tangata ko iá. ʻE maluʻi heni ʻa e fakatahaʻangá mei heʻene tākiekina fakameleʻí. (1 Kol. 5:​5-7) ʻIkai  ko ia pē, ko ʻenau fakaʻehiʻehi mei he feohi vāofi mo e tangatá ʻe fakatupunga nai ai ke ne ʻiloʻi ʻa ʻene hē mamaʻo mei he ngaahi founga ʻa Sihová, pea te ne ongoʻi mā nai pea ueʻi ai ia ke fakatomala.

6. Naʻe anga-fēfē hono tākiekina ʻe he tohi ʻa Paulá ʻa e fakatahaʻangá pea mo e tokotaha faihalá?

⁶ Hili hono ʻave ʻe Paula ʻene tohí ki he kau Kalisitiane ʻi Kolinitoó, naʻe kamata ke ne fifili pe ʻe fēfē ʻa e fakafeangai ki ai ʻa e fakatahaʻangá. Faai atu pē, naʻe haʻu ʻa Taitusi mo ha ongoongo naʻá ne fiefia ai. Naʻe tali lelei ʻe he fakatahaʻangá ʻa e tohi ʻa Paulá. (2 Kol. 7:​6, 7) Naʻa nau muimui ki heʻene ngaahi fakahinohinó. ʻIkai ko ia pē, hili ha ngaahi māhina mei hono ʻave ʻe Paula ʻa e tohí, naʻe fakatomala ʻa e tokotaha faihalá mei hono ʻalunga angahalaʻiá! Naʻá ne liliu ʻene tōʻongá mo e fakakaukaú pea kamata ke muimui ki he ngaahi tuʻunga māʻoniʻoni ʻa Sihová. (2 Kol. 7:​8-11) Ko e hā naʻe fakahinohino ʻe Paula ki he fakatahaʻangá ke nau fai he taimi ní?

 FOUNGA KE FAKAFEANGAI AI ʻA E FAKATAHAʻANGÁ KI HE TOKOTAHA FAIANGAHALA FAKATOMALÁ

7. Ko e hā ʻa e ola lelei naʻe maʻu mei hono fakamavaheʻi ʻa e tokotaha faihalá mei he fakatahaʻangá? (2 Kolinitō 2:​5-8)

⁷ Lau ʻa e 2 Kolinitō 2:​5-8. Naʻe pehē ʻe Paula ko e “tōʻonga ko eni kuo fakahāhā ʻe he tokolahí ko ha valoki feʻungaʻānoa ia ki ha tangata pehē.” ʻI hono toe fakalea ʻe tahá, naʻe fakahoko ʻe he akonakí ʻene taumuʻa ki he tangatá. Ko e hā ʻa e taumuʻá? Ke taki atu ia ki he fakatomalá.—Hep. 12:11.

8. Ko e hā ʻa e meʻa hono hoko naʻe tala ʻe Paula ki he fakatahaʻangá ke nau faí?

⁸ Ko ia ai, naʻe fakahinohino ʻe Paula ki he fakatahaʻangá: “Mou anga-lelei ʻo fakamolemoleʻi mo fakafiemālieʻi” ʻa e tokoua faihalá, pea “fakapapauʻi hoʻomou ʻofa kiate iá.” Fakatokangaʻi naʻe loto ʻa Paula ke fai ʻe he fakatahaʻangá ʻa e meʻa lahi ange ʻi hono fakaʻatā pē ʻa e tangatá ke toe kau ʻi he kakai ʻa Sihová. Naʻe loto ʻa Paula ke nau fakapapauʻi ki he tangata fakatomalá ʻaki ʻenau leá, tōʻongá mo e ngāué naʻa nau fakamolemoleʻi moʻoni ia pea ʻofa ʻiate ia. Te nau ʻai ai ke hā mahino naʻa nau talitali lelei ʻene toe foki ki he fakatahaʻangá.

9. Ko e hā nai naʻe toumoua ai ʻa e niʻihi ke fakamolemoleʻi ʻa e tokotaha faihala fakatomalá?

⁹ Naʻe ʻi ai ha niʻihi ʻi he fakatahaʻanga ko iá naʻa nau ongoʻi toumoua ke talitali lelei ʻa e tokotaha faiangahala fakatomalá ki honau lotolotongá? ʻOku ʻikai ha lave ki ai ʻa e fakamatalá, ka ʻoku malava pē ke pehē. He ko ē, ko ʻene ngaahi tōʻongá naʻá ne ʻomi ʻa e faingataʻa ki he fakatahaʻangá fakalūkufua pea mahalo naʻe fakamaaʻi foki ai mo ha niʻihi tāutaha. Naʻe ongoʻi nai ʻe he niʻihi naʻe taʻetotonu ʻa e fiemaʻu ke mātuʻaki talitali loto-māfana ʻa e tangatá ko ha tokouá he ko kinautolu ia naʻa nau faitau mālohi ke nofoʻaki maʻa fakaeʻulungāngá. (Fakafehoanaki mo e Luke 15:​28-30.) Kae kehe, ko e hā naʻe mahuʻinga ai ki he fakatahaʻangá ke nau fakahāhā ʻa e ʻofa loto-moʻoni ki honau tokoua naʻe toe foki maí?

10-11. Ko e hā ʻe lava ke hoko kapau naʻe fakafisi ʻa e kau mātuʻá ke fakamolemoleʻi ʻa e tokotaha faiangahala fakatomalá?

¹⁰ Sioloto atu ki he meʻa ʻe lava ke hoko kapau naʻe fakafisi ʻa e kau mātuʻá ke fakaʻatā ʻa e tangata naʻe fakatomala moʻoní ke foki ki he fakatahaʻangá pe kapau ʻi he hili ʻene fokí naʻe fakafisi ʻa e fakatahaʻangá ke fakahāhā kiate ia ʻa e ʻofá. ʻE lava ke keina ia ʻe he “loto-mamahi tōtuʻá.” ʻE lavangofua pē ke ne ongoʻi naʻe ʻikai ha toe ʻamanaki ki hono tuʻungá. ʻE aʻu nai ʻo tuku ʻene ngaahi feinga ke fakaleleiʻi hono vahaʻangatae mo e ʻOtuá.

¹¹ Ko e toe kovi angé, kapau naʻe fakafisi ʻa e fanga tokoua mo e fanga tuofāfine ʻi he fakatahaʻangá ke fakamolemoleʻi ʻa e tokotaha faiangahala fakatomalá, te nau ʻai ai honau vahaʻangatae tonu mo Sihová ke ʻi ha tuʻunga fakatuʻutāmaki. Ko e hā hono ʻuhingá? Koeʻuhí te nau tapua atu ai, ʻo ʻikai ko e fakakaukau faʻa fakamolemole ʻa Sihova ki he kau faihala fakatomalá, ka ko e fakakaukau anga-fefeka mo taʻefaimeesi ʻa Sētané. Te nau hoko ai, ʻi ha ʻuhinga, ko e ngaahi meʻangāue ʻe lava ke ngāueʻaki ʻe he Tēvoló ke fakaʻauhaʻaki ʻa e tuʻunga fakalaumālie ʻo e tangatá.—2 Kol. 2:​10, 11; ʻEf. 4:27.

12. ʻE lava fēfē ke faʻifaʻitaki ʻa e fakatahaʻangá kia Sihová?

¹² ʻE lava fēfē leva ke faʻifaʻitaki ʻa e fakatahaʻanga ʻi Kolinitoó kia Sihova, kae ʻikai kia Sētané? ʻAki ʻa e muimui ki he founga ʻo e fakafeangai ʻa Sihova ki he kau faiangahala fakatomalá. Fakatokangaʻi ʻa e meʻa naʻe leaʻaki ʻe he kau hiki Tohi Tapu ʻe niʻihi fekauʻaki mo Sihová. ʻOkú ne “lelei mo mateuteu ke fakamolemole,” ko e lea ia ʻa Tēvitá. (Saame 86:5) Naʻe tohi ʻe Maika: “Ko hai ha ʻOtua ʻoku tatau mo koe, ʻokú ke fakamolemoleʻi ʻa e faihalá mo tuku ke fakalaka atu ʻa e laka hala?” (Mai. 7:18) Pea naʻe pehē ʻe ʻAisea: “Tuku ke liʻaki ʻe he tangata fulikivanú ʻa ʻene foungá pea mo e tangata  koví ʻa ʻene ngaahi fakakaukaú; tuku ke ne foki kia Sihova, ʻa ia te ne meesi kiate ia, ki hotau ʻOtuá, he te ne fakamolemole ʻo lahi ʻaupito.”—ʻAi. 55:7.

13. Ko e hā naʻe feʻungamālie ai ke toe fakafoki ʻa e tokotaha faiangahala fakatomalá ki he fakatahaʻangá? (Sio ki he puha “ Ko Fē Taimi Naʻe Toe Fakafoki Mai Ai ʻa e Tangata ʻi Kolinitoó?”)

¹³ Ke faʻifaʻitaki kia Sihová, ko e fakatahaʻanga ʻi Kolinitoó naʻe pau ke nau talitali lelei ʻa e tangata fakatomalá pea fakapapauʻi kiate ia ʻenau ʻofá. ʻI he muimui ki he fakahinohino ʻa Paula ke toe talitali lelei ʻa e tokotaha faiangahala fakatomalá, ko e fakatahaʻangá naʻa nau fakahaaʻi ai ʻenau “talangofuá ʻi he meʻa kotoa pē.” (2 Kol. 2:9) Ko e moʻoni, ko e ngaahi māhina siʻi pē naʻe mahili atu mei hono fakamavaheʻi ʻa e tangatá, ka ko e akonakí naʻe lavameʻa ʻi hono taki atu ia ki he fakatomalá. Ko ia ʻoku ʻikai ha ʻuhinga ke toe toloi hono fakafoki mai ia ki he fakatahaʻangá.

TAPUA ATU ʻA E FAKAMAAU TOTONU MO E MEESI ʻA SIHOVÁ

14-15. Ko e hā kuo tau ako mei he founga naʻe fakaleleiʻi ai ʻa e keisi ʻi Kolinitō ʻo e kuonga muʻá? (2 Pita 3:9) (Sio foki ki he fakatātaá.)

¹⁴ Ko e fakamatala fekauʻaki mo e founga naʻe fakaleleiʻi ai ʻa e keisi ʻi Kolinitō ʻi he kuonga muʻá naʻe hiki ia pea fakatolonga mai “ko hotau fakahinohino.” (Loma 15:4) ʻOku tau ako mei he fakamatala ko iá, ʻoku ʻikai ke makātakiʻi ʻe Sihova ʻa e faihala mamafa ʻi he lotolotonga hono kakaí. ʻOku ʻikai ke ne maʻu ʻa e vakai ko e  kau faihala taʻefakatomalá ʻoku totonu ke fakaʻatā kinautolu ʻi he “faimeesi” ke hokohoko atu ʻenau feohi mo ʻene kau lotu faitōnungá. Ko Sihová ʻokú ne faimeesi, ka ʻoku ʻikai ke ne fakangofua tavale; pea ʻoku ʻikai ke ne fakangaloku ʻene ngaahi tuʻungá. (Sute 4) Ko e moʻoni, ʻoku ʻikai ko ha faimeesi ia ke fai pehē koeʻuhí ʻe fakatuʻutāmaki ia ki he kotoa ʻi he fakatahaʻangá.—Pal. 13:20; 1 Kol. 15:33.

¹⁵ Neongo ia, ʻoku tau ako ʻoku ʻikai ke finangalo ʻa Sihova ke fakaʻauha ha tokotaha. ʻOkú ne loto ke fakahaofi ʻa e kakaí kapau ʻoku malava. ʻOkú ne fakahāhā ʻa e mēsí ki he kakai ʻoku liliu honau lotó pea loto ke fakaleleiʻi honau vahaʻangatae mo iá. (ʻIsi. 33:11; lau ʻa e 2 Pita 3:9.) Ko ia ʻi he taimi naʻe fakatomala ai ʻa e tangata ʻi Kolinitoó pea tafoki mei hono ʻalunga angahalaʻiá, naʻe ngāueʻaki ʻe Sihova ʻa Paula ke fakamatalaʻi ki he fakatahaʻangá ko e tangatá ʻoku totonu ke fakamolemoleʻi pea toe talitali lelei ia.

16. ʻOku anga-fēfē hoʻo ongoʻi fekauʻaki mo e founga naʻe fakaleleiʻi ai ʻa e keisi ʻi Kolinitoó?

¹⁶ ʻI heʻetau vakai ki he founga naʻe fakaleleiʻi ai ʻa e keisi ʻi Kolinitoó kuó ne tokoniʻi kitautolu ke sio ki hono fakahāhā ʻa e ʻofa, māʻoniʻoni mo e fakamaau totonu ʻa Sihová. (Saame 33:5) ʻIkai ʻoku ueʻi ai koe ke fakahīkihikiʻi lahi ange ʻa hotau ʻOtuá? He ko ē, ko e kau faiangahala kitautolu—ʻa kitautolu taki taha—pea ʻoku tau fiemaʻu ʻene fakamolemolé. Ko kitautolu taki taha ʻoku tau maʻu ha ʻuhinga ke houngaʻia kia Sihova ʻi he huhuʻí, ʻa ia ʻokú ne ʻai ke malava ʻa e fakamolemolé. He fakafiemālie ē mo fakatupu tuipau ke ʻiloʻi ʻoku ʻofa moʻoni ʻa Sihova ʻi hono kakaí pea fiemaʻu ʻa e lelei tahá maʻanautolu!

17. Ko e hā te tau lāulea ki ai ʻi he kupu ʻe ua hono hokó?

¹⁷ Kae fēfē leva ʻa e ngāue ki ha ngaahi keisi ʻo e faihalá ʻi he ʻahó ni? ʻE lava fēfē ke tapua atu ʻe he kau mātuʻa ʻi he fakatahaʻangá ʻa e finangalo ʻo Sihova ke taki atu ha tokotaha faihala ki he fakatomalá? ʻOku totonu ke fēfē ʻa e fakafeangai ʻa e fakatahaʻangá ʻi he fili ʻa e kau mātuʻá ke fakamavaheʻi pe ke toe fakafoki mai ha tokotaha? Ko e ngaahi fehuʻi ko ení ʻe lāulea ki ai ʻi he kupu ʻe ua hono hokó?