1-2. (a) ʻOku anga-fēfē vakai ʻa Sihova ki he faiangahala loto-leleí? (e) Ko e hā ʻoku ʻamanekina ʻe Sihova mei he kau faihalá?

 KO Sihová ʻoku ʻikai ko ha ʻOtua ʻoku fakangofua tavale; ʻoku ʻikai ke ne makātakiʻi ʻa e faiangahalá. (Saame 5:​4-6) ʻOkú ne fiemaʻu ke tau fakaʻapaʻapaʻi ʻene ngaahi tuʻunga māʻoniʻoní, ʻa ia kuó ne ʻomai kiate kitautolu ʻi heʻene Folofolá. Ko e moʻoni, ʻoku ʻikai ke ʻamanekina ʻe Sihova ʻa e haohaoá mei ha kakai taʻehaohaoa. (Saame 130:​3, 4) ʻI he taimi tatau, ʻoku ʻikai ke ne makātakiʻi ʻa e ‘kau tangata anga-taʻefakaʻotua ʻa ia ʻoku nau liliu ʻene ʻofa maʻataʻataá ko ha kalofanga ia ki he faikovi taʻemīngaó.’ (Sute 4) Ko e moʻoni, ʻoku lave ʻa e Tohi Tapú fekauʻaki mo e “fakaʻauha ʻa e kakai anga-taʻefakaʻotuá” ʻi he tau ʻa e ʻOtuá ʻo ʻĀmaketoné.—2 Pita 3:7; Fkh. 16:16.

² Kae kehe, ʻoku ʻikai ke loto ʻa Sihova ke fakaʻauha ha taha. Hangē ko ia naʻa tau lāulea ki ai ʻi he kamataʻanga ʻo e ngaahi kupu hokohoko ko ʻení, ʻoku fakahaaʻi māʻalaʻala ʻe he Tohi Tapú ʻokú ne “finangalo ke aʻusia ʻe he tokotaha kotoa ʻa e fakatomalá.” (2 Pita 3:9) ʻOku faʻifaʻitaki ʻa e kau mātuʻa Kalisitiané kia Sihova ʻi heʻenau feinga anga-kātaki ke tokoniʻi ʻa e kau faihalá ke liliu honau ngaahi ʻalungá pea toe maʻu ʻa e hōifua ʻa Sihová. Kae kehe, ʻoku ʻikai ke tali lelei ia ʻe he kau faihalá kotoa. (ʻAi. 6:9) Ko e niʻihi ʻoku nau hokohoko atu ʻi ha ʻalunga hala neongo ʻa e toutou feinga ʻa e kau mātuʻá ke taki atu kinautolu ki he fakatomalá. Ko e hā kuo pau ke fai ʻi ha tuʻunga pehē?

 “FAKAMAVAHEʻI ʻA E TOKOTAHA FULIKIVANÚ”

3. (a) Ko e hā ʻoku tala mai ʻe he Tohi Tapú ʻoku totonu ke fai ki he kau faiangahala taʻefakatomalá? (e) Ko e hā ʻoku lava ai ke tau pehē, ʻi ha ʻuhinga, ko e tokotaha faihalá kuó ne fili ke fakamavaheʻi ia mei he fakatahaʻangá?

³ Kapau ʻoku ʻikai ke fakatomala ha tokotaha faihala, ʻoku ʻikai ha toe fili ʻa e kau mātuʻá ka ke muimui ki he tataki ʻi he 1 Kolinitō 5:13: “Fakamavaheʻi ʻa e tokotaha fulikivanú mei homou haʻohaʻongá.” ʻI ha ʻuhinga, ko e tokotaha faihalá kuó ne fili ʻa e nunuʻa ko iá; ʻokú ne utu ʻa e meʻa kuó ne toó. (Kal. 6:7) Ko e hā ʻoku lava ai ke tau leaʻaki iá? Koeʻuhí kuó ne fakafisi ke tali ʻa e toutou feinga ʻa e kau mātuʻá ke taki atu ia ki he fakatomalá. (2 Tuʻi 17:​12-15) Ko ʻene ngaahi tōʻongá ʻoku fakahaaʻi ai kuó ne fili ke ʻoua ʻe moʻuiʻaki ʻa e ngaahi tuʻunga ʻa Sihová.—Teu. 30:​19, 20.

4. Ko e hā ʻoku fai ai ha fanongonongo ʻi he taimi ʻoku fakamavaheʻi ai ha tokotaha faihala taʻefakatomala mei he fakatahaʻangá?

⁴ ʻI hono fakamavaheʻi ha tokotaha faihala taʻefakatomala mei he fakatahaʻangá, ʻoku fai ha fanongonongo ke fakahā ki he fakatahaʻangá ʻoku ʻikai ke ne kei hoko ko ha taha ʻo e Kau Fakamoʻoni ʻa Sihová. a ʻOku ʻikai ko e taumuʻa ʻo e fanongonongo ko iá ke fakamaaʻi ʻa e tokotaha faihalá. ʻI hono kehé, ʻoku fai ia koeʻuhí ke lava ʻa e fakatahaʻangá ʻo muimui ʻi he enginaki Fakatohitapu ke “tuku [ʻa e] kei feohi” mo e tokotaha ko iá, “ʻo aʻu ʻo ʻoua ʻe kai” mo ia. (1 Kol. 5:​9-11) ʻOku ʻuhinga lelei ʻa hono ʻomai ʻo e tataki ko iá. Naʻe tohi ʻe he ʻapositolo ko Paulá: “Ko ha kiʻi meʻi lēvani siʻisiʻi ʻokú ne fakatupu ʻa e takaonga mahoaʻá kotoa.” (1 Kol. 5:6) Ko e kau faihala taʻefakatomalá ʻe lava ke nau fakavaivaiʻi ʻa e fakapapau ʻa e faʻahinga ʻoku nau feinga ke moʻui ʻo fakatatau ki he ngaahi tuʻunga māʻoniʻoni ʻa Sihová.—Pal. 13:20; 1 Kol. 15:33.

5. ʻOku totonu ke fēfē ʻetau vakai ki ha tokotaha kuo fakamavaheʻi mei he fakatahaʻangá, pea ko e hā hono ʻuhingá?

⁵ ʻOku totonu leva ke fēfē ʻetau vakai ki ha kaungātui ʻoku fakamavaheʻi mei he fakatahaʻangá? Neongo ʻoku ʻikai ke tau feohi mo ia, ʻoku totonu ke tau vakai kiate ia ko ha sipi kuo mole, kae ʻikai ko ha tokotaha heʻikai ha toe fakapopoto ki ai. Ko ha sipi kuo hē mei he tākangá ʻe lava nai ke ne toe foki mai. Manatuʻi, ko e sipi mole ko iá naʻá ne fakatapui kia Sihova. Ko e meʻa fakamamahí, ʻoku ʻikai ke ne moʻui he taimí ni ʻo fakatatau ki he fakatapui ko iá, pea ʻoku ʻai ai ia ke ne ʻi ha tuʻunga fakatuʻutāmaki. (ʻIsi. 18:31) Neongo ia, ʻi he kei ala maʻu ʻa e meesi ʻa Sihová, ʻoku ʻi ai ʻa e ʻamanaki ʻe toe foki mai ʻa e tokotahá. ʻOku anga-fēfē hono tapua atu ʻe he kau mātuʻá ʻa e ʻamanaki ko iá naʻa mo hono fakaaʻu atu ki ha tokotaha faihala kuo fakamavaheʻi mei he fakatahaʻangá?

FOUNGA ʻOKU TOKONIʻI AI ʻE HE KAU MĀTUʻÁ ʻA E FAʻAHINGA ʻOKU FAKAMAVAHEʻÍ

6. Ko e hā ʻa e ngaahi sitepu ʻe fou ai ʻa e kau mātuʻá ke tokoniʻi ha tokotaha kuo fakamavaheʻi mei he fakatahaʻangá?

⁶ Ko e tokotaha kuo fakamavaheʻi mei he fakatahaʻangá ʻoku liʻaki—ʻo tuku pē kiate ia toko taha ke ne toki kumi hono hala ke foki ai kia Sihová? ʻIkai ʻaupito! ʻI hono fakahā ki ha tokotaha faihala taʻefakatomala ʻe fakamavaheʻi ia mei he fakatahaʻangá, ko e kōmiti ʻo e kau mātuʻá te nau fakamatalaʻi kiate ia ʻa e ngaahi sitepu ʻe lava ke ne fou ai ke toe foki mai ki he fakatahaʻangá. Ka ʻe toe fai ʻe he kau mātuʻa ha meʻa lahi ange. ʻI he ngaahi tuʻunga lahi tahá, te nau tala ange ki he tokotaha faihalá te nau saiʻia ke toe fakataha mo ia hili ha ngaahi māhina siʻi ke sio pe kuo liliu hono lotó. Kapau ʻoku loto-lelei ʻa e tokotaha faihalá ke toe fakataha mo kinautolu, ko e kau mātuʻá ʻi he fakataha ko iá te nau fai ha kōlenga loto-māfana ke ne fakatomala pea toe foki mai. Neongo kapau kuo ʻikai ke liliu ʻa hono lotó ʻi he taimi ko iá, ʻe toe feinga ʻa e kau mātuʻá ke fetuʻutaki kiate ia ʻi he kahaʻú.

7. ʻOku anga-fēfē hono tapua atu ʻe he kau mātuʻá ʻa e manavaʻofa ʻa Sihová ʻi he feangainga mo ha tokotaha kuo fakamavaheʻi mei he fakatahaʻangá? (Selemaia 3:12)

 ⁷ ʻOku feinga ʻa e kau mātuʻá ke tapua atu ʻa e manavaʻofa ʻa Sihová ʻi heʻenau feangainga mo ha tokotaha kuo fakamavaheʻi mei he fakatahaʻangá. Ko e fakatātaá, naʻe ʻikai ke tatali ʻa Sihova ki heʻene kakai talangataʻa ʻi ʻIsileli ʻo e kuonga muʻá ke nau fou ʻi he ʻuluaki sitepú. ʻI hono kehé, naʻá ne tamuʻomuʻa ke kakapa atu kiate kinautolu naʻa mo e ki muʻa ke nau fakahāhā ha faʻahinga fakaʻilonga ʻo e fakatomalá. Hangē ko ia naʻe fakamatalaʻi ʻi he kupu hono ua ʻi he ngaahi kupu hokohoko ko ení, naʻe fakatātaaʻi ʻe Sihova ʻene manavaʻofá ʻaki hono tala ki he palōfita ko Hōseá ke fakalelei mo hono uaifí, ʻa ia naʻá ne kei faiangahala pē. (Hōs. 3:1; Mal. 3:7) ʻI he faʻifaʻitaki kia Sihová, ko e kau mātuʻa Kalisitiané ʻoku nau loto moʻoni ke toe foki mai ʻa e tokotaha faihalá, pea ʻoku ʻikai ke nau fakafaingataʻaʻiaʻi ʻene feinga ke fai peheé.—Lau ʻa e Selemaia 3:12.

8. ʻOku anga-fēfē hono ʻomai ʻe he talanoa fakatātā ʻa Sīsū ki he foha molé ʻa e vavanga lahi ange ki he manavaʻofa mo e meesi ʻa Sihová? (Luke 15:7)

⁸ Manatuʻi ʻa e talanoa fakatātā ʻa Sīsū ki he foha molé, ʻa ia naʻe lāulea ki ai ʻi he kupu hono ua ʻi he kupu hokohoko ko ení. ʻI he fakatokangaʻi atu ʻe he tamaí ʻa hono fohá ʻokú ne foki mai ki ʻapí, naʻá ne “lele ʻo fāʻofua ʻiate ia mo ʻuma lolomi kiate ia.” (Luke 15:20) Fakatokangaʻi naʻe ʻikai ke tatali ʻa e tamaí ki hono fohá ke ne kōlenga ki ha fakamolemole. ʻI hono kehé, naʻá ne fakahāhā ʻa e tamuʻomuʻa, ʻo hangē pē ko ha meʻa ʻe fai ʻe ha tamai anga-ʻofa. Ko e kau mātuʻá ʻoku nau feinga ke fakahāhā ha tōʻonga meimei tatau ki he faʻahinga kuo nau heé. ʻOku nau fiemaʻu ʻa e fanga sipi mole ko ení ke nau “foki mai ki ʻapi.” (Luke 15:​22-24, 32) ʻOku ʻi ai ʻa e fiefia ʻi hēvani ʻi he foki mai ha tokotaha faiangahala, pea ʻoku ʻi ai foki mo ha fiefia ʻi māmani!—Lau ʻa e Luke 15:7.

9. ʻOku anga-fēfē ʻa e kōlenga loto-māfana ʻa Sihova ki he kau faiangahalá?

⁹ Mei he meʻa kuo tau lāulea ki aí, ʻoku hā mahino ʻoku ʻikai ke makātakiʻi ʻe Sihova ʻa e faihala taʻefakatomalá. Kae kehe, ʻoku ʻikai ke ne sītuʻa mei he kau faiangahalá. ʻOkú ne fiemaʻu ke nau toe foki mai. Ko e ngaahi ongoʻi ʻa Sihova ki he kau faihala fakatomalá ʻoku fakamatalaʻi ia ʻi he Hōsea 14:4: “Te u fakamoʻui kinautolu pea heʻikai te nau toe taʻefaitōnunga. Te u ʻofa kiate kinautolu ʻi heʻeku loto-lelei pē ki ai, koeʻuhí he kuo foki ʻa ʻeku ʻitá meiate ia.” Ko ha fakaueʻiloto mālohi ia ki he kau mātuʻá ke nau fai ha tali ki ha fakaʻilonga pē ʻo e fakatomalá. Pea ko ha fakaueʻiloto mālohi ia ki he faʻahinga kuo nau mavahe meia Sihová ke nau foki ʻo ʻikai toe toloi.

10-11. ʻE anga-fēfē ʻa e feinga ʻa e kau mātuʻá ke tokoniʻi ʻa e faʻahinga ʻa ia naʻe fakamavaheʻi mei he fakatahaʻangá ʻi he kuohilí?

¹⁰ Fēfē ʻa e faʻahinga tāutaha ʻa ia naʻe fakamavaheʻi mei he fakatahaʻangá ʻi he kuohilí, mahalo ʻi he ngaahi taʻu lahi kuo maliu atú? Ko e faʻahinga ko iá ʻoku ʻikai nai ke nau toe tōʻongaʻaki ʻa e angahala naʻe fakamavaheʻi ai kinautolú. ʻI he ngaahi tuʻunga ʻe niʻihi, ʻoku aʻu nai ʻo ʻikai ke nau toe manatuʻi ʻa e ʻuhinga naʻe fakamavaheʻi ai kinautolú. Pe ko e hā pē ʻa e tuʻungá, ʻe feinga ʻa e kau mātuʻá ke ʻilo ʻa e feituʻu ʻoku nau nofo aí pea ʻaʻahi kiate kinautolu. Lolotonga ʻa e ngaahi ʻaʻahi peheé, ko e kau mātuʻá ʻe aʻu nai ʻo nau lotu fakataha mo kinautolu pea kōlenga loto-māfana ange ke nau toe foki mai ki he fakatahaʻangá. Ko e moʻoni, kapau kuo mavahe ha tokotaha mei he fakatahaʻangá ʻi ha ngaahi taʻu lahi, ʻoku ʻikai ha veiveiua te ne ʻi ha tuʻunga mātuʻaki vaivai fakalaumālie. Ko ia ai, kapau ʻokú ne fakahaaʻi ʻokú ne loto ke toe foki ki he fakatahaʻangá, ʻe fokotuʻutuʻu nai ʻe he kau mātuʻá ha tokotaha ke ako Tohi Tapu mo ia, neongo ʻoku teʻeki ai ke fakafoki mai. ʻI he ngaahi tuʻungá kotoa, ko e kau mātuʻá pē te nau fokotuʻutuʻu ke fai ʻa e ako Tohi Tapú.

 ¹¹ ʻI he faʻifaʻitaki ki he manavaʻofa ʻa Sihová, ʻoku loto ʻa e kau mātuʻá ke kakapa atu pea tokoniʻi ʻa e tokolahi taha ʻe ala lavá ke nau ʻiloʻi ʻoku kei fakaava pē ʻa e matapaá kiate kinautolu ke nau foki mai. ʻI hono fakahāhā ʻe ha tokotaha faiangahala ʻa e fakatomalá pea siʻaki ʻa hono ʻalunga halá, ʻe lava ke toe fakafoki mai ia ʻo ʻikai toe toloi.—2 Kol. 2:​6-8.

12. (a) Ko e hā ʻa e ngaahi tuʻunga ʻoku tautefito ʻa e fiemaʻu ke tokanga ki ai ʻa e kau mātuʻá? (e) Ko e hā ʻoku ʻikai totonu ai ke tau ongoʻi ʻoku taʻemalava ki he kau faiangahala ʻe niʻihi ke nau maʻu ʻa e meesi ʻa Sihová? (Sio foki ki he fakamatala ʻi laló.)

¹² ʻOku ʻi ai ʻa e ngaahi tuʻunga pau ʻa ia ʻoku tautefito ʻa e fiemaʻu ki he kau mātuʻá ke nau tokanga ki ai ki muʻa ke fakafoki mai ha tokotaha.  Ko e fakatātaá, kapau ko e tokotahá naʻe halaia ʻi he pāʻusiʻi ʻo e fānaú pe ko e tafoki ʻo fakafepaki ki he moʻoní pe kapau naʻá ne faʻufaʻu kākā ke fakangata ha nofo mali. (Mal. 2:14; 2 Tīm. 3:6) Kuo pau ke nau maluʻi ʻa e tākangá. ʻI he taimi tatau, ʻoku fiemaʻu ke tau ʻiloʻi ʻe tali ʻe Sihova ke foki mai ha tokotaha faihala ʻokú ne fakahāhā ʻa e fakatomala moʻoni pea tuku ʻene kau ʻi he tōʻonga halá. Ko ia neongo ʻoku mātuʻaki tokanga ʻa e kau mātuʻá ki he faʻahinga kuo nau faikākā ki he niʻihi kehé, ʻoku ʻikai totonu ke nau toe fakalaka atu ai ʻo pehē ʻoku ʻi ai ʻa e kau faiangahala ʻe niʻihi heʻikai ʻaupito ke nau maʻu ʻa e meesi ʻa Sihová. b—1 Pita 2:10.

KO E MEʻA ʻE LAVA KE FAI ʻE HE FAKATAHAʻANGÁ

13. Ko e hā ʻa e faikehekehe ʻi he anga ʻetau fakafeangai ki ha tokotaha kuo valokiʻi ʻe he kau mātuʻá pea mo ha tokotaha kuo fakamavaheʻi mei he fakatahaʻangá?

¹³ Hangē ko ia naʻe lāulea ki ai ʻi he kupu ki muʻá, ʻi he taimi ʻe niʻihi ʻoku fai ha fanongonongo kuo valokiʻi ha tokotaha. ʻI ha tuʻunga pehē, ʻe lava ke hokohoko atu ʻetau feohi mo iá, ʻo ʻiloʻi naʻá ne fakatomala pea siʻaki ʻa hono ʻalunga halá. (1 Tīm. 5:20) ʻOkú ne kei hoko pē ko ha konga ʻo e fakatahaʻangá pea ʻokú ne fiemaʻu ʻa e fakalototoʻa ʻoku haʻu mei he feohi mo e kaungātuí. (Hep. 10:​24, 25) Kae kehe, ʻoku kehekehe ʻa e tuʻungá ia kapau ko ha tokotaha kuo fakamavaheʻi mei he fakatahaʻangá. ʻOku “tuku [ʻetau] kei feohi” mo e tokotaha ko iá, “ʻo aʻu ʻo ʻoua ʻe kai mo ha tangata pehē.”—1 Kol. 5:11.

14. ʻE lava fēfē ke ngāueʻaki ʻe he kau Kalisitiané honau konisēnisi kuo akoʻi ʻe he Tohi Tapú ʻi he fakafeangai ki he faʻahinga kuo fakamavaheʻi mei he fakatahaʻangá? (Sio foki ki he fakatātaá.)

¹⁴ ʻOku ʻuhinga ʻa e meʻa kuo tau lāulea ki aí te tau tukunoaʻi fakaʻaufuli ha tokotaha kuo fakamavaheʻi mei he fakatahaʻangá? ʻIkai. Ko e moʻoni, heʻikai ke tau feohi mo ia. Ka ʻe lava ke ngāueʻaki ʻe he kau Kalisitiané honau konisēnisi kuo akoʻi ʻe he Tohi Tapú ke fili pe te nau fakaafeʻi nai ha tokotaha naʻe fakamavaheʻi mei he fakatahaʻangá—mahalo ko ha kāinga pe ko ha tokotaha naʻa nau vāofi mo ia ki muʻa—ke ne maʻu ha fakataha ʻa e fakatahaʻangá. Fēfē kapau ʻokú ne maʻu ʻa e fakatahá? ʻI he kuohilí, naʻe ʻikai ke tau lea fakafeʻiloaki ki ha tokotaha pehē. ʻI hení, ko e Kalisitiane taki taha ʻoku toe fiemaʻu ke ne  ngāueʻaki hono konisēnisi kuo akoʻi ʻe he Tohi Tapú ʻi he fekauʻaki mo e meʻá ni. Ko e niʻihi te nau ongoʻi fiemālie nai ke lea fakafeʻiloaki pe talitali lelei ʻa e tokotahá ki he fakatahá. Kae kehe, heʻikai ke tau talanoa fuoloa pe feohi mo e tokotahá.

15. Ko e hā ʻa e faʻahinga faiangahala ʻoku fakamatalaʻi ʻi he 2 Sione 9-11? (Sio foki ki he puha “ Naʻe Fakamatala ʻa Sione mo Paula ki he Faʻahinga Angahala Tatau?”)

¹⁵ ʻE fifili nai ʻa e niʻihi, ‘ʻIkai ʻoku pehē ʻe he Tohi Tapú ko ha Kalisitiane ʻoku lea fakafeʻiloaki ki ha tokotaha pehē ʻokú ne poupou ai ki heʻene ngaahi ngāue fulikivanú?’ (Lau ʻa e 2 Sione 9-11.) Ko e puipuituʻa ʻo e konga tohi ko ení ʻokú ne fakahaaʻi mai ko e fakahinohino ko ení ʻoku ʻuhinga ia ki he kau tafoki ʻo fakafepaki ki he moʻoní pea mo e niʻihi kehe ʻoku nau pouaki longomoʻui ʻa e tōʻonga halá. (Fkh. 2:20) Ko ia ai, kapau ʻoku pouaki longomoʻui ʻe ha tokotaha ʻa e ngaahi akonaki ʻa e kau tafoki ʻo fakafepaki ki he moʻoní pe ko e ngaahi faihala kehé, heʻikai ke fokotuʻutuʻu ʻa e kau mātuʻá ke ʻaʻahi kiate ia. Ko e moʻoni, ʻoku ʻi ai pē ʻa e ʻamanaki ʻe toe foki mai ʻene fakakaukau leleí. Ka ki muʻa ke hoko iá, heʻikai ke tau lea fakafeʻiloaki ki ha tokotaha pehē pe fakaafeʻi ia ke ne maʻu ha fakataha ʻa e fakatahaʻangá.

FAʻIFAʻITAKI KI HE MANAVAʻOFA MO E MEESI ʻA SIHOVÁ

16-17. (a) Ko e hā ʻoku loto ʻa Sihova ke fai ʻe he kau faiangahalá? (ʻIsikeli 18:32) (e) ʻE lava fēfē ke fakahaaʻi ʻe he kau mātuʻá ko e ngaahi kaungāngāue kinautolu ʻo Sihova ʻi heʻenau feinga ke tokoniʻi ʻa e kau faihalá?

¹⁶ Ko e hā kuo tau ako mei he kupu hokohoko konga ʻe nima ko ʻení? ʻOku ʻikai ke finangalo ʻa Sihova ke fakaʻauha ha taha! (Lau ʻa e ʻIsikeli 18:32.) ʻOkú ne loto ke fakalelei ʻa e kau faiangahalá mo ia. (2 Kol. 5:20) Ko e ʻuhinga ia ʻi he faai mai ʻa e hisitōliá, kuo toutou enginaki ʻa Sihova ki heʻene kakai talangataʻá—pea pehē ki he faʻahinga talangataʻa tāutahá—ke nau fakatomala pea foki kiate ia. Ko e kau mātuʻa ʻi he fakatahaʻangá ʻoku nau maʻu ʻa e monū ke hoko ko e ngaahi kaungāngāue ʻo Sihova ʻi heʻenau feinga ke taki atu ʻa e kau faihalá ki he fakatomalá.—Loma 2:4; 1 Kol. 3:9.

¹⁷ Fakaʻuta atu ki he fiefia ʻi hēvani ʻi he fakatomala ʻa e kau faiangahalá! Ko ʻetau Tamai fakahēvaní, ʻa Sihova, ʻokú ne hokosia tonu ʻa e fiefia ko iá ʻi he taimi kotoa ʻoku foki mai ai ha taha ʻo ʻene fanga sipi molé ki he fakatahaʻangá. ʻOku toe loloto ange ʻetau ʻofa kia Sihová ʻi heʻetau fakalaulauloto ki heʻene manavaʻofá, mēsí, pea mo ʻene ʻofa maʻataʻatā.—Luke 1:78.