KO ʻETAU ngāue fakafaifekaú ʻoku mahuʻinga mo ʻaonga. Ka ʻoku ʻikai ke mahinoʻi eni ʻe he tokotaha kotoa ʻoku tau malanga ki aí. Naʻa mo e kakai ʻoku mahuʻingaʻia ʻi he meʻa ʻoku leaʻaki ʻe he Tohi Tapú, ʻoku ʻikai ke nau ongoʻi maʻu pē ʻoku fiemaʻu ke nau ako ʻa e Folofola ʻa e ʻOtuá mo kitautolu.

Ko e fakatātaá ko Gavin. Naʻá ne maʻu ʻa e ngaahi fakataha ʻi he Fale Fakatahaʻangá, ka naʻe ʻikai ke ne loto ke ako ʻa e Tohi Tapú. ʻOku fakamatala ʻa Gavin, naʻe siʻi ʻaupito ʻene ʻilo ki he Tohi Tapú pea naʻe ʻikai ke ne loto ke ʻiloʻi eni ʻe he niʻihi kehé. Naʻá ne ilifia naʻa kole ange ke ne kau ki ha lotu, pea naʻe ʻikai ke ne loto ke fakangalivaleʻi ia. Ko e hā hoʻo fakakaukaú? Naʻe malava ke tokoniʻi ʻa Gavin? Fakakaukau ki he ola lelei ʻo e ngaahi akonaki ʻa e Tohi Tapú ʻe lava ke hoko ki ha taha. Naʻe tala ʻe Sihova ki he kau ʻIsilelí : “Pea mokulu hange ko e hahau ʻeku lea; hange ko e taumosi ki he musie toki tupu.” (Teu. 31:19, 30; 32:2) Tau ako angé ha ngaahi meʻa ʻe niʻihi fekauʻaki mo e hahaú pea fakahoa ki ai ʻetau ngāue fakafaifekaú, koeʻuhi kae lava ke ola lelei ʻetau tokoniʻi ʻa e “faʻahinga kakai kotoa pē.”​—1 Tīm. 2:3, 4.

ʻOku vaivai ʻa e hahaú. ʻOku tupu māmālie ʻa e hahaú ʻi he taimi ʻoku liliu ai ʻa e hauhau ʻo e ʻeá ki ha fanga kiʻi tulutā vai. Naʻe anga-fēfē ʻa e hoko ʻa e ngaahi lea ʻa Sihová ʻo “mokulu hange ko e hahau”? Naʻá ne lea ki hono kakaí ʻi ha founga anga-ʻofa, anga-malū mo fakaalaala. ʻOku tau faʻifaʻitaki kiate ia ʻi he taimi ʻoku tau fakahāhā ai ʻa e fakaʻapaʻapa ki he meʻa ʻoku tui ki ai ʻa e niʻihi kehé. ʻOku tau fakalototoʻaʻi kinautolu ke nau fakaʻuhinga pē ʻiate kinautolu mo fai ʻenau ngaahi filí tonu. ʻI heʻetau fakahāhā ʻa e mahuʻingaʻia fakafoʻituitui peheé, ʻe loto-lelei ange ʻa e kakaí ke nau tali ʻa e meʻa ʻoku tau leaʻakí, pea ʻe hoko ʻetau ngāue fakafaifekaú ʻo toe ola lelei ange.

ʻOku fakaivifoʻou ʻa e hahaú. ʻE fakaivifoʻou ki he niʻihi kehé ʻetau ngāue fakafaifekaú ʻi he taimi ʻoku tau fakakaukau ai ki ha ngaahi founga kehekehe ke tokoniʻi kinautolu ke nau ako lahi ange fekauʻaki mo e moʻoní. Ko ha tokoua ko hono hingoá ko Chris, naʻá ne ʻuluaki tuʻuaki kia Gavin ha ako Tohi Tapu, ka naʻe ʻikai ke ne feinga ke tenge ia ke ne tali. ʻI hono kehé, naʻá ne feinga ke kumi ki ha ngaahi founga kehekehe ke ongoʻi fiemālie ange ai ʻa Gavin ʻi he fetalanoaʻaki ki he Tohi Tapú. Naʻe tala ange ʻe Chris kia Gavin ʻoku ʻi ai ha pōpoaki mahuʻinga ʻoku lāulea ki ai ʻa e Tohi Tapú kotoa, pea ko hono ako ʻa e pōpoaki ko ení ʻe tokoniʻi ia ke ne mahinoʻi lelei ange ai ʻa e ngaahi fakatahá. Naʻe fakamatalaʻi leva ʻe Chris ʻa e kikite ʻi he Tohi Tapú, naʻá ne fakatuipauʻi ʻa ia tonu ko e Tohi Tapú ʻoku moʻoni. Ko e olá, naʻá na fai ha ngaahi fetalanoaʻaki lahi ʻo fekauʻaki mo e ngaahi kikite kuo ʻosi fakahokó. Naʻe fakaivifoʻou kia Gavin ʻa e ngaahi fetalanoaʻaki ko ení pea faai atu pē ʻo ne tali ke ako ʻa e Tohi Tapú.

ʻOku mātuʻaki mahuʻinga ʻa e hahaú ki he moʻuí. ʻI he lolotonga ʻa e faʻahitaʻu vela mo pakukā ʻi ʻIsilelí, naʻe ʻikai nai ke ʻuha ʻi ha ngaahi māhina. ʻI he ʻikai ha hahau ke hauhau ai ʻa e ʻeá, ʻoku hoko ʻo mae pea mate ʻa e ʻakaú. Naʻe tomuʻa tala ʻe Sihova ʻe hoko ʻi hotau ʻahó ha pakukā, ʻa ia ʻe hoko ʻa e kakaí ʻo fieinua ʻi he “fanongo ki he folofola ʻa Sihova.” (ʻĒm. 8:11) Naʻá ne talaʻofa ko e kau paní te nau “hange ko ha hahau meia Sihova” ʻi heʻenau malangaʻi ʻa e ongoongo lelei ʻo e Puleʻangá pea poupou ki ai ʻa e “fanga sipi kehe.” (Mai. 5:7; Sione 10:16) Ko e pōpoaki ʻoku tau malangaʻí ko e konga ia ʻo e tokonaki ʻa Sihova ke ʻoatu ʻa e moʻuí ki he faʻahinga ʻoku fieinua ki he moʻoní. ʻOku tau fakamahuʻingaʻi ʻa e pōpoaki ko ení?

Ko e hahaú ko ha tāpuaki ia meia Sihova. (Teu. 33:13) ʻOku lava ke hoko ʻetau ngāue fakafaifekaú ko ha tāpuaki, pe meʻaʻofa ki he faʻahinga ʻoku nau tali iá. Naʻe hoko ʻa e ako Tohi Tapú ko ha tāpuaki kia Gavin koeʻuhí naʻe tokoniʻi ai ia ke ne maʻu ʻa e tali ki heʻene ngaahi fehuʻí kotoa. Naʻe vave ʻene fakalakalaká, hoko ʻo papitaiso pea ʻi he taimí ni ʻokú ne fiefia ʻi hono malangaʻi ʻa e ongoongo lelei ʻo e Puleʻangá fakataha mo hono uaifi ko Joyce.

ʻI hono fakahoa ʻetau ngāue fakamalangá ki he hahaú ʻoku lava ke toe tokoniʻi ai kitautolu ke mahinoʻi ko ʻetau ngaahi feinga fakafoʻituitui ʻi he ngāue fakafaifekaú ʻoku mātuʻaki mahuʻinga ia. Anga-fēfē? Ko e tulutā vai taki taha ʻoku tokoni siʻisiʻi, ka ʻi he taimi ʻoku laui miliona ai ʻa e ngaahi tulutā hahaú ʻoku hauhau kotoa ai ʻa e kelekelé. ʻI he tuʻunga meimei tatau, ko ʻetau ngāue fakafoʻituitui ʻi he ngāue fakafaifekaú ʻe hā ngali siʻisiʻi ia kiate kitautolu. Ka ʻi hono fakatahaʻi ʻa e ngaahi feinga kotoa ʻa e laui miliona ʻo e kau sevāniti ʻa Sihová, ʻoku ʻoatu ai ʻa e fakamoʻoni “ki he ngaahi puleʻanga kotoa pē.” (Māt. 24:14) ʻE hoko ʻetau ngāue fakafaifekaú ko ha tāpuaki meia Sihova ki he niʻihi kehé? ʻIo, ko ʻetau pōpoakí ʻe hoko ʻo hangē ko e hahaú, ʻa ia ʻoku vaivai, fakaivifoʻou mo mātuʻaki mahuʻinga ki he moʻuí!