‘I HE ta‘u kuo ‘osí, na‘e fakanofo ai ‘a e kau tangata ‘e laui afe ke nau hoko ko e kau mātu‘a mo e kau sevāniti fakafaifekau ‘a e Kau Fakamo‘oni ‘a Sihová ‘i māmani lahi. Kapau ko e taha koe ‘o si‘i fanga tokoua ko iá, tā ko e mo‘oni ‘okú ke fiefia ‘i ho monū fo‘ou ‘o e ngāué.

Ka, ‘oku hā mahino te ke ki‘i ongo‘i loto-mo‘ua foki. Ko Jason, ko ha mātu‘a kei si‘i, ‘okú ne pehē, “‘I hono ‘uluaki fakanofo aú, na‘á ku ongo‘i mātu‘aki lōmekina ‘i hoku ngaahi fatongia fo‘oú.” Na‘e ongo‘i ta‘efe‘unga ‘a Mōsese mo Selemaia ‘i he‘ena ma‘u ‘a ‘ena vāhenga-ngāue fo‘ou meia Sihová. (‘Eki. 4:10; Sel. 1:6) Kapau ‘okú ke ongo‘i pehē, ‘e lava fēfē ke ke iku‘i ia pea hanganaki fakalakalaka? Fakakaukau angé ki he fa‘ifa‘itaki‘anga ‘a e ākonga Kalisitiane ko Tīmoté.​—Ngā. 16:1-3.

‘I he ta‘u hongofulu tupu lahi nai pe ta‘u 20 tupu si‘i ‘a Tīmoté na‘e fakaafe‘i ia ‘e he ‘apositolo ko Paulá ke ne hoko ko hono kaungāfononga. ‘Uluakí, koe‘uhi ko ‘ene kei si‘í, na‘e ‘ikai nai falala ‘a Tīmote kiate ia tonu pea na‘á ne toumoua nai ke ngāue ‘i hono ngafa na‘e vahe‘i fo‘ou angé. (1 Tīm. 4:11, 12; 2 Tīm. 1:1, 2, 7) Ka, ‘i ha hongofulu‘i ta‘u ki mui ai, na‘e lava ke tala ‘e Paula ki he fakataha‘anga ‘i Filipaí: “‘Oku ou ‘amanaki ‘i he ‘Eiki ko Sīsuú ke fekau atu ‘a Tīmote kiate kimoutolu ‘i ha taimi nounou mei heni . . . He ‘oku ‘ikai te u ma‘u ha toe taha mo ha hehema fakaefakakaukau hangē ko ia ‘okú ne ma‘ú.”​—Fil. 2:19, 20.

Ko e hā na‘á ne ‘ai ‘a Tīmote ke ne hoko ko ha mātu‘a tu‘u-ki-mu‘a peheé? Fakakaukau ki he lēsoni ‘e ono ‘e lava ke ke ma‘u mei he‘ene fa‘ifa‘itaki‘angá.

1. Na‘á ne tokanga mo‘oni ki he kakaí. Na‘e tala ‘e Paula ki he fanga tokoua ‘i Filipaí: “[Ko Tīmote] te ne tokanga mo‘oni kiate kimoutolu.” (Fil. 2:20) ‘Io, na‘e tokanga ‘a Tīmote ki he kakaí. Na‘á ne mahu‘inga‘ia mo‘oni ‘i he‘enau lelei fakalaumālié, pea na‘á ne ngāue loto-lelei ma‘anautolu.

Faka‘ehi‘ehi mei he hangē ko ha faka‘uli pasi fakaefakatātā ‘a ia ‘okú ne tokanga lahi ange ke a‘u ki he tau‘anga pasí kae ‘ikai tokanga ke fakaheka ‘ene kau pāsesé. Ko William, ko ha mātu‘a ‘oku faka‘apa‘apa‘i ‘i he ta‘u ‘e 20 tupu, ‘okú ne fale‘i ki he kau tangata ne toki fakanofo fo‘oú: “‘Ofa he fanga tokouá. Tokangataha ki he‘enau fiema‘ú kae ‘ikai ko e fokotu‘utu‘u maau fakaekautahá.”

2. Na‘á ne fakamu‘omu‘a ‘a e ngaahi me‘a fakalaumālié. ‘I hono fakafaikehekehe‘i ‘a e fa‘ifa‘itaki‘anga ‘a Tīmoté mei he ni‘ihi kehé, na‘e pehē ‘e Paula: “Ko e kotoa ‘o e ni‘ihi kehé ‘oku nau kumi ki he lelei pē ‘a kinautolú, ‘o ‘ikai ki he me‘a ‘oku fiema‘u ‘e Sīsū Kalaisí.” (Fil. 2:21) Na‘e faitohi mei Loma. Na‘á ne vakai ki he fanga tokoua ‘i aí na‘a nau tokanga tōtu‘a pē ki he‘enau ngaahi me‘a fakafo‘ituituí. ‘I ha tu‘unga, na‘e ‘ikai te nau ngāue mālohi fakalaumālie. Ka na‘e ‘ikai ke pehē ‘a Tīmote! ‘I he malanga hake ‘a e faingamālie ke ‘ai ke laka ki mu‘a ‘a e ongoongo leleí, na‘e hangē ‘a ‘ene fakakaukaú ko e fakakaukau ‘a ‘Aiseá, ‘a ia na‘á ne pehē: “Ko au eni! Fekau‘i au!”​—‘Ai. 6:8.

‘E lava fēfē ke ke ‘ai ke mafamafatatau ho fatongia fakafo‘ituituí mo ho fatongia fakalaumālié? ‘Uluakí, ‘ai ke mu‘omu‘a ‘a e me‘a ‘oku mu‘omu‘á. “Fakapapau‘i ‘a e ngaahi me‘a ‘oku mahu‘inga angé,” ko e enginaki ia ‘a Paulá. (Fil. 1:10) ‘Ai ko e me‘a ‘okú ke fakamu‘omu‘á ‘a e ngaahi me‘a ‘a e ‘Otuá. Uá, ‘ai ke faingofua. Ta‘ofi ‘a e ngaahi me‘a ‘okú ne kaiha‘asi ‘a e taimí mo e iví. Na‘e akonaki ‘a Paula kia Tīmote: “Hola mei he ngaahi holi fakatalavoú, kae tuli  ki he mā‘oni‘oní, tuí, ‘ofá, melinó.”​—2 Tīm. 2:22.

3. Na‘á ne ngāue mālohi ‘i he ngāue toputapú. Na‘e fakamanatu ‘e Paula ki he kau Filipaí: “‘Oku mou ‘ilo‘i ‘a e fakamo‘oni na‘á ne [Tīmote] tuku mai fekau‘aki mo ia tonú, ‘a ia ‘i he hangē ha ki‘i tama mo ha‘ane tamaí na‘á ne ngāue fakatamaio‘eiki fakataha mo au ke laka ki mu‘a ai ‘a e ongoongo leleí.” (Fil. 2:22) Na‘e ‘ikai ke fakapikopiko ‘a Tīmote. Na‘á ne ngāue mālohi fakataha mo Paula, pea na‘e ‘ai ‘e he me‘á ni ke mālohi ‘a e ha‘i ‘o ‘ena fe‘ofa‘akí.

‘Oku ‘ikai ke si‘isi‘i ‘a e ngāue ‘i he kautaha ‘a e ‘Otuá ‘i he ‘ahó ni. Ko e ngāue ko iá ‘oku fakafiemālie mo‘oni pea ‘e lava ke ne tohoaki‘i koe ke ke vāofi ange mo ho fanga tokouá mo e fanga tuofāfiné. Ko ia ‘ai ma‘u pē ko ho‘o taumu‘á ia ke “femo‘uekina ai pē ‘i he ngāue ‘a e ‘Eikí.”​—1 Kol. 15:58.

4. Na‘á ne ngāue‘aki ‘a e ngaahi lēsoni na‘á ne akó. Na‘e tohi ‘a Paula kia Tīmote: “Kuó ke muimui ofi ‘i he‘eku akonakí, ‘i he‘eku ‘alunga mo‘uí, ‘i he‘eku taumu‘á, ‘i he‘eku tuí, ‘i he‘eku kātakí, ‘i he‘eku ‘ofá, ‘i he‘eku ‘ūkumá.” (2 Tīm. 3:10) Koe‘uhi na‘e ngāue‘aki ‘e Tīmote ‘a e me‘a na‘á ne akó, na‘á ne taau ai ki ha fatongia lahi ange.​—1 Kol. 4:17.

‘Oku ‘i ai hao kaume‘a matu‘otu‘a fakalaumālie? Kapau ‘oku ‘ikai, ko e hā ‘oku ‘ikai te ke kumi ai ha tahá? Ko Tom, ko ha mātu‘a ia ‘i he ngaahi ta‘u lahi, ‘okú ne manatu‘i: “Na‘e mahu‘inga‘ia ‘iate au ha mātu‘a taukei peá ne ako‘i lelei ‘aupito au. Na‘á ku kole ma‘u pē ‘a ‘ene fale‘í peá u ngāue‘aki ia. Na‘e vave hono ‘ai ‘e he me‘á ni ke u loto-ma‘ú.”

5. Na‘á ne hanganaki ako‘i ‘a ia tonu. Na‘e enginaki ‘a Paula kia Tīmote: “Teu‘i ‘a koe tonu fakataha mo e taumu‘a ke ma‘u ‘a e anga-lī‘oa faka‘otuá.” (1 Tīm. 4:7) ‘Oku ‘i ai nai ha faiako ‘a ha tokotaha sipoti, ka ‘oku toe fiema‘u foki ke ne ako‘i ‘a ia tonu. Na‘e ekinaki ‘a Paula kia Tīmote: “Hokohoko atu ho‘o kīvoi ‘i he lautohi ‘i he ‘ao ‘o e kakaí, ‘i he ekinakí, ‘i he faiakó. . . . Fakakaukauloto ki he ngaahi me‘á ni; nōfo‘i ‘iate kinautolu, koe‘uhi ke hoko ai ho‘o laka ki mu‘á ‘o hā mahino atu ki he kakai kotoa.”​—1 Tīm. 4:13-15.

Ko koe foki ‘oku fiema‘u ke ke hanganaki fakalelei‘i ho‘o pōto‘í. ‘Oua ‘e tuku ho tu‘unga fakalaumālié ke ‘ikai laka ki mu‘a pe ‘ikai ‘alu mo e taimí ‘a ho‘o mahino‘i ‘a e founga ngāue ‘a e fakataha‘angá. Faka‘ehi‘ehi foki mei he falala-tōtu‘á​—‘i he fakakaukau nai ‘oku lahi ‘aupito ho‘o taukeí ‘a ia ‘e malava ke ke fakalelei‘i ha tu‘unga pē ‘o ‘ikai fekumi fakalelei ki ai. ‘I he fa‘ifa‘itaki kia Tīmoté, “tokanga ma‘u ai pē kiate koe tonu pea ki ho‘o faiako ‘oku faí.”​—1 Tīm. 4:16.

6. Na‘á ne falala ki he laumālie ‘o Sihová. ‘I he fakakaukauloto ki he ngāue fakafaifekau ‘a Tīmoté, na‘e fakamanatu ‘e Paula kiate ia: “Malu‘i ‘a e me‘a mahu‘inga ko ‘eni na‘e tuku atú fakafou ‘i he tokoni ‘a e laumālie mā‘oni‘oní ‘a ia ‘okú ne nofo‘ia kitautolú.” (2 Tīm. 1:14) Ke malu‘i ‘a ‘ene ngāue fakafaifekaú, na‘e fiema‘u ke falala ‘a Tīmote ki he laumālie ‘o e ‘Otuá.

Ko Donald, ko ha mātu‘a ‘i he ta‘u lahi, ‘okú ne pehē: “Ko e kau tangata kuo fakanofó kuo pau ke nau koloa‘aki honau vaha‘angatae mo e ‘Otuá. Ko e fa‘ahinga ‘oku peheé te nau ‘alu atu ‘‘i he mālohi ki he mālohi.’ Kapau te nau lotu ‘o kole ‘a e laumālie ‘o e ‘Otuá pea fakatupulekina ‘a hono fuá, te nau hoko ko ha tāpuaki mo‘oni ki honau fanga tokouá.”​—Saame 84:7; 1 Pita 4:11.

‘Oku fakalototo‘a ‘aupito ‘a e sio ki he tokolahi fau ‘a e fanga tokoua kuo fakanofo fo‘ou, hangē ko koé, ‘oku nau fakalakalaka fakalaumālie. Ko Jason, na‘e lave ki ai ‘i he kamatá, ‘okú ne pehē: “Lolotonga ‘a e taimi kuó u hoko ai ko ha mātu‘á, kuó u ako ‘a e me‘a lahi pea kuo tupulekina ‘a ‘eku loto-ma‘ú. ‘Oku ou fiefia mo‘oni he taimí ni ‘i hoku vāhenga-ngāué pea vakai ki ai ko ha monū fisifisimu‘a!”

Te ke hanganaki fakalakalaka fakalaumālie? ‘Ai ko ho‘o taumu‘á ia ke ako meia Tīmote. Te ke hoko ai mo koe foki ko ha tāpuaki ki he kakai ‘a e ‘Otuá.