Koe‘uhi ‘oku tau ‘oatu ta‘etotongi ‘etau fakamatala makatu‘unga ‘i he Tohi Tapú, ‘oku fakakaukau ai ‘a e ni‘ihi ia ‘oku ala tali pē ‘a hono hiki mo hono pousi ia ‘i ha ngaahi uepisaiti kehe pe ‘i he mītia fakasōsialé. Kae kehe, ko e fai peheé ‘oku maumau‘i ai ‘a e Makatu‘unga Hono Ngāue‘akí * ‘i he‘etau uepisaití pea kuó ne fakatupunga ha palopalema mafatukituki. Hangē ko ia ‘oku fakahaa‘i mahino ‘i he ngaahi Makatu‘unga ko iá, ‘oku ‘ikai ngofua ki ha taha ke ne “faka‘ali‘ali ha fakatātā, tatau ‘o e ‘ū tohi faka‘ilekitulōnika, trademarks, fasi, ‘ū tā, vitiō, pe ko ha kupu mei he uepisaiti ko ení ‘i he ‘Initanetí (ko ha uepisaiti pē, saiti fakafo‘ituitui, saiti fe‘ave‘aki vitiō, pe netiueka sōsiale).” Ko e hā ‘oku fiema‘u ai ‘a e fakangatangata peheé?

Ko e fakamatala kotoa ‘i he‘etau uepisaití ‘oku malu‘i fakalao. ‘Oku feinga ‘a e kau tafoki ‘o fakafepaki ki he mo‘oní mo e kau fakafepaki kehé ke ngāue‘aki ‘etau ‘ū tohí ‘i he‘enau uepisaití ke tauhele‘i ‘aki ‘a e Kau Fakamo‘oni ‘a Sihová mo e ni‘ihi kehé. ‘Oku fakahūhū ‘i he ngaahi saiti ko iá ‘a e fakamatala kuo fa‘ufa‘u ke ne ‘ai ke veiveiua ‘a e ‘atamai ‘o e kau lautohí. (Saame 26:4; Pal. 22:5) Kuo ngāue‘aki ‘e he ni‘ihi ‘a e fakamatala mei he‘etau ‘ū tohí pe ko ‘etau faka‘ilonga jw.org ‘i he ngaahi tu‘uaki, pe fakatau atu ‘o ha koloa, pea ‘i he polokalama ‘i he me‘angāue to‘oto‘ó. ‘I hono ‘ai ke malu ‘a e malu‘i fakalaó mo e malu‘i ‘o e hingoá, ‘oku tau ma‘u ai ha makatu‘unga fakalao ke ta‘ofi ‘a e ngāuehala‘aki ko iá. (Pal. 27:12) Ka ‘o kapau ‘oku tau faka‘atā ‘ilo‘ilo pau ‘a e kakaí, na‘a mo hotau fanga tokouá, ke nau pousi ‘a e ngaahi tatau faka‘ilekitulōniká ‘i he ngaahi saiti kehé pe ngāue‘aki ‘a e faka‘ilonga jw.org ke tu‘uaki koloa atu ‘aki, he‘ikai nai ke poupou‘i ‘e he ngaahi  fakamaau‘angá ‘etau ngaahi feinga ke ta‘ofi ‘a e kau fakafepakí mo e ngaahi kautaha fakakomēsialé.

Ko hono hiki ‘etau ‘ū tohí mei ha feitu‘u kehe kae ‘ikai ko e jw.org ‘oku malava ke fakatu‘utāmaki. Kuo tuku ‘e Sihova ‘a e fatongia ‘o hono tokonaki mai ‘a e me‘akai fakalaumālié ki he “tamaio‘eiki anga-tonu mo potó” pē. (Māt. 24:45) Ko e “tamaio‘eiki” ko iá ‘okú ne ngāue‘aki pē ‘a ‘ene uepisaiti faka‘ofisialé ki hono tuku atu ‘a e me‘akai fakalaumālié​—‘a e www.pr418.com, tv.pr418.com, mo e wol.pr418.com. Pea ‘oku tolu pē ‘etau polokalama faka‘ofisiale ki he ngaahi me‘angāue faka‘ilekitulōniká​—ko e JW Language^®, JW Library^®, mo e JW Library Sign Language^®. ‘Oku lava ke tau falala ‘oku ‘atā ‘a e ngaahi me‘a ko ení mei he ngaahi tu‘uaki pe fakamele‘i ‘e he māmani ‘o Sētané. Kapau ‘oku fou atu ‘a e me‘akai fakalaumālié ‘i ha ngaahi fou‘anga kehe, ‘oku ‘ikai ha fakapapau‘i‘anga kuo ‘ikai ke liliu pe fakamele‘i ia.​—Saame 18:26; 19:8.

‘Ikai ko ia pē, ko hono pousi ‘etau ‘ū tohí ‘i he uepisaiti ‘oku faka‘atā ke fai ha fakamatala ki aí ‘oku ‘oange ai ‘a e faingamālie ki he kau tafoki mei he mo‘oní mo e kau fakaanga kehé ke nau ‘ai ke ‘ikai ha falala ki he kautaha ‘a Sihová. Kuo tohoaki‘i ‘a e fanga tokoua ‘e ni‘ihi ki ha fakakikihi ‘i he ‘initanetí, pea kuo ‘oatu ai ‘a e luma lahi ange ai ki he huafa ‘o Sihová. Ko ha fakakikihi ‘i he ‘initanetí ‘oku ‘ikai ko ha fokotu‘utu‘u fe‘ungamālie ia ki hono “ako‘i ‘i he anga-malū ‘a e fa‘ahinga ‘oku fakafepakí.” (2 Tīm. 2:23-25; 1 Tīm. 6:3-5) Kuo toe ‘ilo‘i foki kuo fa‘u ha ‘akauni loi ‘i he mītia sōsialé mo e uepisaiti loi ‘i he hingoa ‘o e kautahá, Kulupu Pulé, mo hono kau mēmipa tāutahá. Kae kehe, ‘oku ‘ikai ha mēmipa ‘o e Kulupu Pulé ‘e ‘i ai ha‘ane peesi Uepisaiti fakafo‘ituitui pe ‘asi ‘i ha saiti mītia fakasōsiale.

Ko hono tataki ‘a e kakaí ki he jw.org ‘oku tokoni ki hono fakamafola ‘a e “ongoongo lelei.” (Māt. 24:14) Ko e ngaahi tatau faka‘ilekitulōnika ‘oku tau ma‘u ke ngāue‘aki ‘i he‘etau ngāue fakafaifekau fakafo‘ituituí ‘oku fakalelei‘i hokohoko. Te tau sai‘ia ke ma‘u ‘aonga mei ai ‘a e tokotaha kotoa. Ko ia ai, hangē ko ia ‘oku fakahaa‘i ‘i he Makatu‘unga Hono Ngāue‘akí, ‘e lava ke ke ‘īmeili nai ki ha taha ha tatau faka‘ilekitulōnika ‘o ha tohi pe ‘oatu ha link ki ha me‘a ‘i he jw.org. ‘I hono tataki ‘a e kakai mahu‘inga‘iá ki he‘etau uepisaiti faka‘ofisialé, ‘oku tau fakahoko ai kinautolu ki he matavai mo‘oni pē ‘e taha ‘o e me‘akai fakalaumālié, “‘a e tamaio‘eiki anga-tonu mo potó.”