Winston, talanoa mai angé ki ho‘o fekumi ki he ‘Otuá.

Na‘á ku tupu hake ‘i ha ‘api na‘e ‘ikai lotu ‘i ha faama ‘i Kuinisilani, ‘Aositelēlia. Koe‘uhi ko ‘emau tu‘u mavahé, na‘e ‘ikai ke u loko fetu‘utaki ai mo ha taha tuku kehe hoku fāmili ofí. Mei he‘eku ta‘u 12, na‘á ku kamata kumi ki he ‘Otuá. Na‘á ku lotu kiate ia, ‘o kole ke u ‘ilo ‘a e mo‘oni fekau‘aki mo iá. Na‘e faai atu pē ‘o u mavahe mei he fāmá pea ma‘u ‘eku ngāue ‘i ‘Atelaite, ‘i he faka-Tonga ‘o ‘Aositelēliá. ‘I he‘eku ta‘u 21, na‘á ku fetaulaki mo Pam ‘i he‘eku mālōlō ‘eve‘eva ki Senē, pea na‘á ne talanoa mai ki he kulupu lotu Pilitānia-‘Isilelí, ‘a ia ‘oku taku ko e kakai Pilitāniá ko ‘enau tupu mei ha matakali ‘o ‘Isileli ne molé. Ko e matakali ko iá, ko e lau ia ‘a e kulupú, ko e matakali ‘e hongofulu ‘o e pule‘anga fakatokelaú na‘e ‘ave fakamālohi ‘i he senituli hono valu K.M. Ko ia ‘i he‘eku foki ki ‘Atelaité, na‘á ku talanoa ki he kaveinga ko iá mo ha kaungāngāue na‘á ne kamata ako ‘a e Tohi Tapú mo e Kau Fakamo‘oni ‘a Sihová. Hili ‘a e talanoa mo ia ‘i ha ngaahi houa si‘i​—tautefito ki he ngaahi tui ‘a e Kau Fakamo‘oni ‘a Sihová—​na‘á ku ‘ilo‘i kuo tali ‘eku lotu ‘i he‘eku kei si‘í. Na‘á ku ako ki he mo‘oni fekau‘aki mo hoku Tokotaha-Fakatupú mo hono Pule‘angá! Na‘á ku ma‘u ‘a e “mata‘itofe mahu‘inga lahi.”​—Māt. 13:45, 46.

Pam, na‘á ke fekumi foki mo koe ki he mata‘itofe ko iá ‘i ho‘o kei si‘í. Na‘e anga-fēfē ho‘o ma‘u iá?

Na‘á ku tupu hake ‘i ha ‘api na‘e lotu ‘i Coffs Harbour, Niu Sau Uele. Na‘e tali he‘eku ongo mātu‘á mo ‘eku ongo kuí ‘a e akonaki ‘a e kulupu Pilitānia-‘Isilelí. Ko hoku tuonga‘ane si‘isi‘í, tokoua lahí mo au, mo hoku fanga kāsini tokolahi, na‘e ‘ohake kimautolu ke tui ‘oku hōifua ‘a e ‘Otuá ki he kau tupu‘i Pilitāniá. Kae kehe, na‘á ku kei veiveiua pē, peá u ongo‘i fiekaia fakalaumālie.  ‘I he‘eku ta‘u 14, na‘á ku ‘a‘ahi ki he ngaahi siasi fakalotofonua kehekehe, kau ai ‘a e Siasi ‘Ingilaní, Papitaisó mo e ‘Aho Fitú. Ka na‘á ku kei fiekaia fakalaumālie pē.

Na‘e hiki ki mui ai hoku fāmilí ki Senē, ‘a ia na‘á ku fetaulaki ai mo Winston, ‘a ia na‘á ne mālōlō ‘eve‘eva ki ai. Hangē ko ia na‘á ne lave ki aí, ko ‘ema talanoa lotú na‘e taki atu ai ia ke ne ako mo e Kau Fakamo‘oni ‘a Sihová. Hili iá, ko ‘ene ngaahi tohi mai kiate aú na‘e fonu konga Tohi Tapu! Te u tala atu, ‘i he kamatá na‘á ku hoha‘a​—‘o a‘u ki he‘eku ‘ita. Ka na‘e faai atu pē ‘o u ‘ilo‘i ko e mo‘oní eni.

‘I he 1962, na‘á ku hiki ki ‘Atelaite ke ofi ange kia Winston. Na‘á ne fokotu‘utu‘u ke u nofo mo ha ongo me‘a Fakamo‘oni​—ko Thomas mo Janice Sloman—​na‘á na ngāue ko ha ongo misinale ‘i Pāpua Niu Kini. Na‘á na anga-lelei ‘aupito kiate au; na‘á ku ta‘u 18 pē, pea na‘á na tokoni lahi fakalaumālie kiate au. Ko ia na‘á ku kamata ako ‘a e Folofola ‘a e ‘Otuá, pea na‘e vave ‘eku tui na‘á ku ma‘u ‘a e mo‘oní. Hili ‘ema mali mo Winston, na‘á ma kamata leva ‘i he mo‘ui fakakoloa taha ‘o e ngāue kia Sihová​—ko e ngāue, neongo ‘a e faingata‘á, kuó ne fakatupulekina ‘ema hounga‘ia ‘i he mata‘itofe kuó ma ma‘ú.

Winston, talanoa mai angé ki ho‘o kamata ‘i he ngāue ‘a Sihová.

‘Ikai fuoloa ‘ema mali mo Pam, na‘e kamata ke fakaava mai ‘e Sihova ‘a e ngaahi “faingamālie lahi” ke fakalahi ai ‘ema ngāué. (1 Kol. 16:9) Ko e fuofua faingamālié na‘e fakahaa‘i mai ‘e Tokoua Jack Porter, ko e ngāue ‘i he‘emau ki‘i fakataha‘angá ko ha ‘ovasia sēketi. (Ko ha kaungā-mēmipa ia he taimí ni ‘i he Kōmiti Va‘a ‘Aositalāsiá.) Ko Jack mo hono uaifí, ko Roslyn, na‘á na fakalototo‘a‘i kimaua ke ma tāimu‘a tu‘uma‘u​—ko ha monū na‘á ma fiefia ai ‘i he ta‘u ‘e nima. ‘I he‘eku ta‘u 29, na‘e kole mai kiate au mo Pam ke ma ngāue fakasēketi ‘i he ‘Otu Motu ‘o e Pasifiki Tongá, ‘a ia na‘e malumalu ‘i he va‘a Fisí he taimi ko iá. Ko e ‘otu motu ko iá ko Ha‘amoa ‘Amelika, Ha‘amoa, Kilipati, Naulu, Niuē, Tokelau, Tonga, Tuvalu mo Vanuatu.

‘I he taimi ko iá, ko e kakai ‘i he ni‘ihi ‘o e ‘otu motu tu‘u mavahe ko iá na‘a nau hu‘uhu‘u fekau‘aki mo e Kau Fakamo‘oni ‘a Sihová, ko ia na‘e fiema‘u ke mau tokanga mo fakapotopoto. (Māt. 10:16) Na‘e iiki ‘a e ngaahi fakataha‘angá, pea ko e ni‘ihi na‘e ‘ikai lava ke nau tokonaki ha‘ama nofo‘anga. Ko ia na‘á ma kumi ki ha feitu‘u ke ma nofo ai mo e kakai fakalotofonuá ‘i he ‘ū koló, pea na‘a nau anga-lelei ma‘u pē kiate kimaua.

Na‘á ke mahu‘inga‘ia vēkeveke ‘i he ngāue liliu leá, Winston. Ko e hā na‘á ke ongo‘i pehē ai?

‘I he taimi ko iá, ko e fanga tokoua ‘i Tongá na‘e si‘isi‘i pē ‘a e ngaahi tuleki mo e fanga ki‘i tohi ‘i he lea faka-Tongá. ‘I he ngāue fakafaifekaú, na‘a nau ngāue‘aki ‘a e pulusinga faka-Pilitānia ‘o e tohi Ko e Mo‘oni ‘a ia ‘oku fakatau ki he Mo‘ui Ta‘engata. Ko ia lolotonga ha ako uike ‘e fā ‘a e kau mātu‘á, ko e kau mātu‘a fakalotofonua ‘e toko tolu ‘a ia na‘e fakangatangata pē ‘enau ‘ilo ki he lea faka-Pilitāniá na‘a nau loto ke liliu ‘a e tohí ki he lea faka-Tongá. Na‘e taipe ‘e Pam ‘a e maniusikilipí, pea mau ‘ave ia ki he va‘a ‘i ‘Ameliká ke pulusi. Ko e poloseki kakató na‘e fe‘unga mo e uike ‘e valu. Neongo ko e tu‘unga ‘o e liliú na‘e ‘ikai fu‘u lelei ‘aupito, na‘e tokoni ‘a e tohí ki he kakai lea faka-Tongá ke nau ako ‘a e mo‘oní. Ko au mo Pam na‘e ‘ikai ko ha ongo liliu-lea, ka ko e hokosia ko iá na‘e ‘ai ai kimaua ke ma mahu‘inga‘ia ‘aupito ‘i he ngāué ni.

Pam, na‘e anga-fēfē mo‘ui ‘i he ‘otu motú ‘o fakahoa ki he mo‘ui ‘i ‘Aositelēlia?

Na‘e fu‘u kehe ‘aupito! Fakatu‘unga pē ‘i he feitu‘u na‘á ma ‘i aí, na‘e pau ke ma fekuki mo e fanga namu, vela ‘aupito mo e hauhau ‘a e ‘eá, fanga kumā, mahamahaki pea ‘i he taimi ‘e ni‘ihi, ko e si‘isi‘i ‘a e me‘akaí. ‘I he tafa‘aki ‘e tahá, ‘i he ngata‘anga ‘o e ‘aho taki taha, ko ha me‘a fakafiemālie ia ke sio atu ki he tahí mei homa falé​—ko e ui ia ‘o e fale faka-Ha‘amoa ‘oku ‘ato pola kae ‘ikai hano holisi. ‘I ha pō māhina, ‘oku lava ke ma sio ki he ‘ulu niú mo e tapua mai ‘a e māhiná ‘i he tahí. Ko e ngaahi mōmeniti peheé na‘e ue‘i ai kimaua ke ma fakalaulauloto mo lotu, ‘a ia  na‘e tokoni ia ke ma fakakaukau ai ki he ngaahi me‘a leleí kae ‘ikai ko e ngaahi me‘a ‘ikai leleí.

Na‘á ma hoko ‘o ‘ofa ‘i he fānaú, ‘a ia na‘a nau fakaoli mo fie‘ilo ‘aupito ‘i he‘enau sio mai kiate kimaua ongo pālangí. ‘I he‘ema ‘a‘ahi ki Niueé, na‘e milimili ‘e ha ki‘i tamasi‘i ‘a e nima fulufulua ‘o Winston peá ne pehē, “‘Oku ou sai‘ia au ho fulufulu‘i moá.” ‘Oku hā mahino, na‘e te‘eki ai ke ne sio ha nima fulufulua pehē ki mu‘a pea na‘e ‘ikai te ne ‘ilo pe te ne fakamatala‘i fēfē ia!

Na‘e mamahi homa lotó ‘i he sio ki he tu‘unga masiva na‘e ‘i ai ‘a e kakai tokolahi. Na‘e ‘i ai honau ‘ātakai faka‘ofo‘ofa ka na‘e ‘ikai fu‘u sai ‘a e tokangaekina fakaemo‘uileleí pea si‘isi‘i mo e vai inú. Neongo ia, na‘e ‘ikai hoha‘a ki ai hotau fanga tokouá. Na‘e anga-maheni pē mo‘ui ko iá kiate kinautolu. Na‘a nau fiefia ‘i he‘enau ‘i ai fakataha mo honau fāmilí, ma‘u ha feitu‘u ke fakataha ai ki he lotú, pea ma‘u mo e monū ‘o hono fakahīkihiki‘i ‘a Sihová. Ko ‘enau fa‘ifa‘itaki‘angá na‘e tokoni‘i ai kimaua ke tokangataha ki he me‘a ‘oku mahu‘inga tahá pea fakafaingofua‘i ‘ema mo‘uí.

‘I he taimi ‘e ni‘ihi, Pam, na‘e pau ke ke feinga ke ma‘u ho‘o vai pea teuteu ‘a e me‘akai ‘i ha founga fo‘ou. Na‘á ke fekuki fēfē mo ia?

‘Oku ou tomu‘a fakamālō pē ki he‘eku tamaí. Na‘á ne ako‘i au ki he ngaahi me‘a ‘aonga lahi, hangē ko hono tafu ‘a e afí pea feime‘akai ai mo e founga ke mo‘ui ‘i ha me‘a fakamatelie si‘isi‘i. ‘I ha ‘a‘ahi ‘e taha ki Kilipati, na‘á ma nofo ‘i ha ki‘i fale si‘isi‘i na‘e ‘ato pola, faliki patapata pea holisi kofe. Ke kuki ha houa kai faingofua, na‘á ku keli ha luo ‘i he kelekelé ke ‘ai ha tafu‘anga afi pea laku ki ai ‘a e pulú ke mo‘ui. Ke ma‘u ‘a e vaí, na‘á ku tu‘u laine atu mo e kau fefine fakalotofonuá ‘i ha vaitupu. Ke ohu hake ‘a e vaí, na‘a nau ngāue‘aki ha va‘akau ‘oku fute ‘e ono hono lōloá mo ha maea manifi ‘oku ha‘i ki he ngata‘anga ‘o e va‘akaú, ‘o hangē ha va‘akau taumāta‘ú. Ka ‘i he ‘ikai ha‘i ha māta‘u ki he ngata‘anga ‘e taha ‘o e maeá, na‘a nau ha‘i ki ai ha kane. Ko e fefine taki taha na‘a nau taufetongi ‘i hono lī atu ‘enau maeá pea feinga ke fulihi ‘a e kané ‘i he taimi totonu. ‘Oku mafuli leva e kane pea fonu ‘i he vaí. Na‘á ku fakakaukau na‘e faingofua​—ka na‘e kehe ‘eku a‘u atu ki aí. Na‘á ku toutou lī hifo e maeá, ka na‘e tō pē ‘a e kané ki he fukahi vaí ‘o tētē! ‘I he ‘osi ‘a e kata ‘a e tokotaha kotoa, na‘e tokoni mai ha fefine kiate au. Na‘a nau fietokoni ma‘u pē mo anga-lelei.

Na‘á mo fakatou ‘ofa ‘i ho‘omo vāhenga-ngāue ‘i he ‘otu motú. Te mo vahevahe mai ha ngaahi manatu melie?

Winston: Na‘e fiema‘u kiate kimaua ‘a e ki‘i taimi ke ma mahino‘i ‘a e ngaahi anga fakafonua pau. Ko e fakatātaá, ‘i hono tokonaki ‘e ha tokoua ha houa kai, na‘a nau fa‘a ‘omai ‘a e me‘akai kotoa na‘a nau ma‘ú. ‘I he kamatá, na‘e ‘ikai te ma ‘ilo na‘e pau ke ma tuku ha me‘akai ma‘anautolu. Ko ia na‘á ma kai ‘a e me‘a kotoa na‘e ‘omaí! Ko e mo‘oni, ‘i he‘ema ‘ilo‘i ‘a e tu‘unga mo‘oní, na‘á ma fakatoe ha me‘akai ma‘anautolu. Neongo ‘ema ngaahi tōnounoú, na‘e mahino‘i pē ia ‘e he fanga tokouá. Pea na‘a nau fiefia ke sio mai kiate kimaua ‘i he māhina ‘e ono nai ‘i he‘ema ‘a‘ahi kiate kinautolu ‘i he ngāue fakasēketí. Tuku kehe ‘a e fanga tokoua fakalotofonuá, ko kimaua pē ongo Fakamo‘oni kuo faifai ange ‘o nau fetaulaki mo iá.

Na‘e toe hoko ‘ema ngaahi ‘a‘ahí ko ha fakamo‘oni lelei ‘i he koló. Na‘e fakakaukau ‘a e kakai tokolahi ‘i he koló ko e lotu ‘a e fanga tokouá ko ha lotu pē na‘a nau toki kamata‘i. Ko ia ‘i he ‘a‘ahi atu ki he fanga tokouá ha faifekau mo hono uaifí mei muli, ko e kakai ‘i he koló na‘e ‘ikai ngata pē ‘i he‘enau fiefiá ka na‘e toe maongo kiate kinautolu.

Pam: Ko e taha ‘i he‘eku ngaahi manatu melie ‘oku ou koloa‘akí ko e me‘a na‘e hoko ‘i Kilipati, na‘e ‘i ai ha fakataha‘anga ‘o e fanga tokoua mo e fanga tuofāfine tokosi‘i. Ko e mātu‘a pē ‘e taha ai ko Itinikai Matera, na‘á ne fai hono lelei tahá ke tokanga‘i kimaua. Na‘á ne ha‘u he ‘aho ‘e taha mo ha kato na‘e ‘i ai ‘a e fo‘i fua‘imoa pē ‘e taha. “Ma‘a kimoua,” ko ‘ene leá ia. Na‘e tātaitaha ke ma ma‘u ha fo‘i fua‘imoa he taimi ko iá. Ko ha ki‘i me‘a si‘isi‘i ia ka ko e tō‘onga nima-homó na‘e maongo ki homa lotó.

 ‘I ha ngaahi ta‘u ki mui ai na‘e mole ho‘o ki‘i tamá ‘i ha tamatō, Pam. Ko e hā na‘á ne tokoni‘i koe ke ke fekuki mo iá?

Na‘a ku feitama ‘i he 1973 lolotonga ‘ema ‘i he Pasifiki Sauté mo Winston. Na‘a ma fili ke foki ki ‘Aositelēlia, ‘i he māhina ‘e fā ki mui ai na‘e mole ‘ema pēpeé. Na‘e mātu‘aki loto-mamahi foki mo Winston; ko ‘ene pēpē foki mo ia. Ko e mamahi ‘i hoku lotó na‘e mole māmālie atu pē, ka na‘e ‘ikai ‘aupito mole kakato atu ia ‘o a‘u ki he taimi na‘á ma ma‘u ai ‘a e ‘īsiu ‘o e Taua Le‘o ‘o ‘Epeleli 15, 2009. Ko e “Ngaahi Fehu‘i mei he Kau Lautohí” na‘e ‘eke ai: “‘Oku ‘i ai ha ‘amanaki ‘o ha toetu‘u ki ha pēpē ‘oku mate ‘i he manava ‘o ‘ene fa‘eé?” Na‘e fakapapau‘i mai ‘i he kupú kiate kimaua ko e me‘á ‘oku ‘i he to‘ukupu ‘o Sihová, ‘a ia ‘okú ne fai ma‘u pē ‘a e me‘a ‘oku totonú. Te ne ‘omai ‘a e fakalelei‘anga ki he ngaahi mamahi kuo hoko kia kitautolu ‘i he fokotu‘utu‘u fulikivanu ko eni ‘o e ngaahi me‘á ‘o hangē ko ‘ene tataki anga-‘ofa ‘a hono ‘Aló ke ne ‘veteki ‘a e ngaahi ngāue ‘a Sētané.’ (1 Sio. 3:8) Na‘e toe tokoni‘i kimaua ‘e he kupú ke ma fakamahu‘inga‘i lahi ange ‘a e “mata‘itofe” mahu‘inga ‘okú ma ma‘u ‘i he tu‘unga ko e kakai ‘a Sihová! Na‘á ma mei fēfē kapau na‘e ‘ikai ‘a e ‘amanaki ‘o e Pule‘angá?

Hili e mole ‘ema pēpeé, na‘e toe hoko atu ‘ema ngāue taimi-kakató. Na‘á ma ngāue ‘i he ngaahi māhina ‘i he Pēteli ‘i ‘Aositelēliá pea faai atu pē ‘o ma toe hoko atu ‘i he ngāue fakasēketí. ‘I he 1981, hili ‘a e ngāue ‘i he feitu‘u ‘uta ‘i Niu Sau Uele mo Senē, na‘e fakaafe‘i kimaua ki he va‘a ‘Aositelēliá, ko hono ui ia he taimi ko iá, pea kuó ma ‘i ai talu mei ai.

Winston, na‘e tokoni ho‘o hokosia ‘i he ‘Otu Motu Pasifiki Sauté ki ho‘o ngāue ko ha mēmipa ‘o e Kōmiti Va‘a ‘Aositalāsiá?

‘Io, ‘i he ngaahi founga lahi. ‘Uluakí, na‘e tokanga‘i ‘e ‘Aositelēlia ‘a Ha‘amoa ‘Amelika mo Ha‘amoa. Pea na‘e fakataha‘i leva ‘a e va‘a Nu‘u Silá mo ‘Aositelēlia. ‘I he taimi ní, ko e feitu‘u ‘oku tokanga‘i ‘e he va‘a ‘Aositalāsiá ‘oku kau ai ‘a ‘Aositelēlia, Ha‘amoa ‘Amelika, Ha‘amoa, ‘Otu Motu Kuki, Nu‘u Sila, Niuē, Tīmoa-Lesitā mo Tonga​—ko e lahi tahá na‘á ku ma‘u ‘a e monū ke ‘a‘ahi ki ai ko ha fakafofonga ‘o e va‘á. Ko ‘eku hokosia ‘o e ngāue fakataha mo e fanga tokoua mo e fanga tuofāfine faitōnunga ko ia ‘i he ‘otu motú kuó ne tokoni‘i lahi au ‘i he‘eku ngāue he taimí ni ma‘anautolu mei he ‘ōfisi va‘á.

‘E lava ke u pehē ‘i he‘eku fakamulitukú kuó u lāu‘ilo mo Pam, mei he‘ema hokosia fakafo‘ituituí, ‘oku ‘ikai ko e kakai lalahí pē ‘oku fekumi ki he ‘Otuá. Ko e to‘utupú foki ‘oku nau fiema‘u ‘a e “mata‘itofe mahu‘inga lahi” ko iá​—na‘a mo e ‘ikai fakahāhā ‘e he ngaahi mēmipa kehe ‘o e fāmilí ha mahu‘inga‘ia. (2 Tu‘i 5:2, 3; 2 Kal. 34:1-3) Ko hono mo‘oní, ko Sihová ko ha ‘Otua ‘ofa ‘okú ne finangalo ki he tokotaha kotoa, ‘a e iiki mo e lalahi, ke nau ma‘u ‘a e mo‘uí!

‘I he‘eku kamata fekumi mo Pam ki he ‘Otuá ‘i he ta‘u ‘e 50 kuo maliu atú, na‘e ‘ikai te ma teitei lave‘iloa ‘a e feitu‘u ‘e iku atu ki ai ‘ema fekumí. Ko e mo‘oni ‘o e Pule‘angá ‘oku ‘ikai ha veiveiua ko ha mata‘itofe mahu‘inga ta‘ealafakatataua! ‘Okú ma fakapapau‘i ke piki ma‘u ki he mata‘itofe mahu‘inga ko iá ‘aki ‘a e kotoa homa mālohí!