ʻI ha tuʻunga pehē, ko e fakatahaʻangá te nau vakai ki he nofo mali ki muʻá kuo fakangata ʻi he taimi ʻoku toe mali ai ʻa e tangatá pea vakai ki he nofo mali foʻoú ʻoku fakalao. Ke mahinoʻi ʻa e ngaahi ʻuhinga ki he fakamulituku ko ení, tau lāulea angé ki he meʻa naʻe leaʻaki ʻe Sīsū fekauʻaki mo e veté pea mo e toe malí.

Hangē ko ia ʻoku hiki ʻi he Mātiu 19:9, naʻe fakahaaʻi ai ʻe Sīsū ʻa e makatuʻunga Fakatohitapu pē ʻe taha ki hono fakangata ha nofo mali. Naʻá ne pehē: “ʻIlonga ʻa ia te ne veteʻi hono uaifí, tuku kehe pē ʻi he fehokotaki fakasino taʻetāú, peá ne mali mo ha taha kehe, ʻokú ne tono ai.” Mei he lea ʻa Sīsuú, ʻoku tau ako ai (1) ko e fehokotaki fakasino taʻetāú ko e makatuʻunga Fakatohitapu pē ia ʻe taha ki hono fakangata ha nofo mali ʻi he veté pea (2) ko ha tangata ʻokú ne veteʻi hono uaifí ʻo ʻikai ha makatuʻunga Fakatohitapu pea toe mali ʻokú ne tono ai. a

ʻOku ʻuhinga ʻa e lea ʻa Sīsuú ko ha tangata ʻokú ne fakahoko ʻa e fehokotaki fakasino taʻetāú pea veteʻi hono uaifí ʻokú ne ʻatā Fakatohitapu ke toe mali? Naʻe ʻikai ko e tuʻungá ia. ʻI he taimi ʻoku hoko ai ha tono ʻi ha nofo mali, ko e hoa tonuhiá ʻokú ne fili pe te ne fakamolemoleʻi hono husepānití pe ʻikai. Kapau heʻikai te ne tali ke na fakataha pea fai ha vete fakalao, ʻokú na fakatou ʻatā ke toe mali hili hono maʻu ʻa e veté.

ʻI he tafaʻaki ʻe tahá, ko e hoa tonuhiá te ne holi loto-moʻoni nai ke fakahaofi ʻa e nofo malí pea fakahaaʻi ʻene loto-lelei ke fakamolemoleʻi hono husepānití. Kae fēfē kapau ʻoku ʻikai ke tali ʻe he husepāniti naʻá ne fai ʻa e tonó hono fakamolemoleʻi ia ʻe hono uaifí peá ne fai toko taha pē ha vete fakalao? Koeʻuhi ʻoku loto-lelei ʻa e uaifí ke fakamolemoleʻi ia peá na toe fakataha, heʻikai ke ʻatā Fakatohitapu ʻa e husepānití ke toe mali. Kapau ʻokú ne hokohoko atu ʻi ha ʻalunga taʻefakatohitapu pea toe mali mo ha taha kehe lolotonga iá ʻoku ʻikai ke ne ʻatā Fakatohitapu ke fai pehē, ʻokú ne toe fakahoko ai ʻa e tono, ʻa ia ʻe toe fai hano fakamāuʻi ia ʻi he fakatahaʻangá.​—1 Kol. 5:1, 2; 6:9, 10.

ʻI he taimi ʻoku ʻikai ʻatā Fakatohitapu ai ha tangata ke toe mali, ʻoku anga-fēfē vakai ʻa e fakatahaʻangá ki he nofo mali ki muʻá mo e nofo mali foʻoú? ʻI he vakai Fakatohitapú, ʻoku kei fakalao pē ʻa e nofo mali ki muʻá? ʻE kei lava pē ke fili ʻa e hoa tonuhiá ke fakamolemoleʻi ʻa hono husepāniti ki muʻá pe ʻikai? ʻE fai ha vakai ki he nofo mali foʻoú ko ha tono?

ʻI he kuohilí, naʻe vakai ʻa e fakatahaʻangá ki he nofo mali foʻoú ko ha tono kapau naʻe kei moʻui pē ʻa e hoa tonuhiá, kei nofo taʻemali pē pea naʻe ʻikai ke ne halaia ʻi he fehokotaki fakasino taʻetaau. Kae kehe, naʻe ʻikai lave ʻa Sīsū ia ki he hoa tonuhiá ʻi heʻene lāulea ki he veté mo e toe malí. ʻI hono kehé, naʻá ne fakamatalaʻi ko ha tangata ʻokú ne veteʻi hono uaifí ʻo ʻikai ha makatuʻunga Fakatohitapu peá ne toe mali, ʻokú ne tono ai. ʻI ha tuʻunga pehē, ko e veté mo e toe malí, ʻa ia  naʻe fakatatau ʻe Sīsū ki he tonó, ʻoku fakangata ai ʻa e nofo mali ki muʻá.

ʻI he taimi ʻoku fakangata ai ha nofo mali koeʻuhi ko ha vete pea mo ha toe mali, ʻoku ʻikai toe malava ki he hoa tonuhiá ke ne fakamolemoleʻi ʻa hono hoa ki muʻá. Ko ia ai, heʻikai ke ne fuesia ʻa e fatongia ʻo e fili pe te ne fakamolemoleʻi pe ʻikai ʻa hono husepāniti ki muʻá. ʻIkai ko ia pē, tatau ai pē pe ko e hoa tonuhiá ʻokú ne mate, ʻokú ne toe mali pe fai ha fehokotaki fakasino taʻetaau, ʻoku ʻikai liliu heni ʻa e anga ʻo e vakai ʻa e fakatahaʻangá ki he nofo mali foʻoú. b

ʻI he fakatātā naʻe lāulea ki ai ʻi ʻolungá, ko e husepānití naʻá ne fakahoko ʻa e tono ʻo taki atu ai ki he vete. Kae fēfē kapau naʻe ʻikai ke fai ʻe he husepānití ha tono ka naʻá ne veteʻi hono uaifí pea toe mali? Pe fēfē kapau naʻe teʻeki fakahoko ʻe he husepānití ha fehokotaki fakasino taʻetaau ki muʻa ʻi he veté ka ne toki fai ia ʻi he hili ʻa e veté pea toe mali neongo ʻa e loto-lelei hono uaifí ke fakamolemoleʻi iá? ʻI he ngaahi fakatātā ko ení, ko e veté mo e toe malí, ʻa ia ʻoku tatau ia mo e tonó, te ne fakangata ʻa e nofo mali ki muʻá. Ko e nofo mali foʻoú ko ha haʻi fakalao ia. Hangē ko ia naʻe fakamatalaʻi ʻi he ʻīsiu ʻo e Watchtower, ʻo Nōvema 15, 1979, peesi 32, “ʻi he taimi ko ení ko e husepānití kuó ne kamata ha nofo mali foʻou pea heʻikai lava ke ne fakangata ia pea foki ki he tuʻunga ki muʻá; ko e nofo mali ki muʻá naʻe fakangata ia ʻi he veté, tonó mo e toe malí.”

Ko e fakatonutonu ko ení ʻoku ʻikai ke ne fakasiʻia ʻa e toputapu ʻo e nofo malí pe te ne fakasiʻia ʻa e mafatukituki ʻo e tonó. Ko ha tangata ʻokú ne veteʻi hono uaifí ʻo ʻikai ha makatuʻunga Fakatohitapu pea toe mali mo ha taha kehe lolotonga ia ʻoku ʻikai ke ne ʻatā Fakatohitapu ke fai pehē ʻe ngāue ki ai ʻa e kōmiti fakamāú ʻo makatuʻunga ʻi he tonó. (Kapau ko e hoa mali foʻoú ko ha Kalisitiane, ʻe toe ngāue ki ai ʻa e kōmiti fakamāú ʻo makatuʻunga ʻi he tonó.) Neongo ko e nofo mali foʻoú heʻikai fai ha vakai ki ai ko ha tono, ko e tangatá heʻikai ke ne taau ki ha ngaahi monū makehe ʻo e ngāué ʻi he fakatahaʻangá ʻi ha ngaahi taʻu lahi kae ʻoua kuo mātangalo atu pe ʻikai toe lumaʻi ʻene faihalá. ʻE kau ki heni ʻa e fakakaukau ki he tuʻunga lolotonga ʻo e hoa ki muʻá ʻa ia kuó ne fekuki nai mo e faikākaá pea mo ha fānau iiki ʻa ia naʻe liʻaki ʻe he hoa halaiá.​—Mal. 2:14-16.

ʻI he vakai ki he ngaahi nunuʻa mafatukituki ʻo e vete taʻefakatohitapú mo e toe malí, ʻoku fakapotopoto ki he kau Kalisitiané ke nau maʻu ʻa e vakai ʻa Sihová ʻaki hono pouaki ʻa e toputapu ʻo e fokotuʻutuʻu ki he nofo malí.​—Tml. 5:4, 5; Hep. 13:4.