1. Ko e hā ʻoku tau tuipau ki aí?

 ʻI HE tuʻunga ko e kakai ʻa Sihova, ʻoku tau ʻiloʻi ʻokú ne ʻofa ʻiate kitautolu pea ʻokú ne loto ke tau fiefia ʻi he moʻui lelei taha ʻe ala lavá. (Loma 8:35-39) ʻOku tau toe tuipau foki ko e ngaahi tefitoʻi moʻoni Fakatohitapú ʻoku ʻaonga maʻu pē kiate kitautolu ʻi he taimi ʻoku tau ngāueʻaki aí. (ʻAi. 48:17, 18) Kae fēfē kapau ʻoku tau fehangahangai mo e ngaahi pole naʻe ʻikai ke tau ʻamanekina?

2. Ko e hā ʻa e ngaahi palopalema te tau fehangahangai nai mo ia, pea ʻe lava ke fakatupunga kitautolu ʻe he ngaahi palopalema ko iá ke tau fifili ki he hā?

² Ko e kotoa ʻo e kau sevāniti ʻa Sihová ʻoku nau fekuki mo e ngaahi palopalema. Ko e fakatātaá, ʻe fakalotomamahiʻi nai kitautolu ʻe ha mēmipa ʻo e fāmilí. Te tau hokosia nai ha palopalema mafatukituki ki heʻetau moʻui leleí ʻo ne fakangatangata ʻa e meʻa ʻoku lava ke tau fai ʻi he ngāue ʻa Sihová. Te tau tofanga nai ʻi ha ngaahi nunuʻa fakatupu maumau ʻo ha fakatamaki fakanatula. Pe ʻe fakatangaʻi nai kitautolu koeʻuhi ko ʻetau tuí. ʻI heʻetau fehangahangai mo e ngaahi ʻahiʻahi peheé, te tau fifili nai: ‘Ko e hā ʻoku hoko ai eni kiate aú? Kuó u fai ha meʻa ʻoku hala? ʻOku fakahaaʻi heni ʻoku ʻikai tāpuakiʻi au ʻe Sihova?’ Kuo faifai ange peá ke ongoʻi pehē? Kapau ko ia, ʻoua ʻe loto-siʻí. ʻOku tokolahi ʻa e kau sevāniti mateaki ʻa Sihova kuo nau fāinga mo e ngaahi ongoʻi meimei tatau.​—Saame 22:1, 2; Hap. 1:2, 3.

3. Ko e hā ʻoku lava ke tau ako mei he Saame 34:19?

³ Lau ʻa e Saame 34:19. Fakatokangaʻi ʻa e poini ʻe ua ʻi he saame ko ení: (1) ʻOku fehangahangai ʻa e kakai māʻoniʻoní mo e ngaahi palopalema. (2) ʻOku fakahaofi ʻe Sihova kitautolu mei hotau ngaahi ʻahiʻahí. ʻOku anga-fēfē hono fakahaofi kitautolu ʻe Sihová? Ko e founga ʻe taha ʻaki ʻene tokoniʻi kitautolu ke tau maʻu  ha vakai pau ki he moʻui ʻi he fokotuʻutuʻu ko ení. Neongo ʻoku talaʻofa mai ʻe Sihova te tau maʻu ʻa e fiefia ʻi he tauhi kiate iá, ʻoku ʻikai ke ne fakapapauʻi mai ha moʻui ʻoku ʻatā mei he hohaʻá ʻi he taimí ni. (ʻAi. 66:14) ʻOkú ne ekinaki mai ke tau tokangataha ki hotau kahaʻú​—ki he taimi te tau maʻu ai ʻa e moʻui ʻokú ne loto ke tau fiefia taʻengata aí. (2 Kol. 4:16-18) ʻI he lolotongá ni, ʻokú ne tokoniʻi kitautolu ke hokohoko atu ʻi he ʻaho taki taha.​—Tangi. 3:22-24.

4. Ko e hā te tau lāulea ki ai ʻi he kupu ko ení?

⁴ Tau lāulea angé ki he meʻa ʻe lava ke tau ako mei he faʻifaʻitakiʻanga ʻa e kau lotu faitōnunga ʻa Sihova, fakatouʻosi ʻi he taimi ʻo e Tohi Tapú mo hotau ʻahó ni. Hangē ko ia te tau sio ki aí, te tau fehangahangai nai mo e ngaahi palopalema taʻeʻamanekina. Ka ʻi heʻetau falala kia Sihová, heʻikai ʻaupito te ne taʻetokoniʻi kitautolu. (Saame 55:22) ʻI heʻetau lāulea ki he ngaahi faʻifaʻitakiʻanga ko ení, ʻeke hifo kiate koe: ‘Naʻe mei fēfē haʻaku fakafeangai ʻi ha tuʻunga meimei tatau? ʻOku anga-fēfē hono fakaivimālohiʻi ʻe he faʻifaʻitakiʻanga ko ení ʻeku falala kia Sihová? Ko e hā ʻa e ngaahi lēsoni ʻe lava ke u ngāueʻaki ʻi heʻeku moʻuí?’

5. Ko e hā ʻa e ngaahi pole naʻe fehangahangai mo Sēkope koeʻuhí ko Lēpani? (Sio ki he tā ʻi he takafí.)

⁵ Ko e kau sevāniti ʻa Sihova ʻi he taimi ʻo e Tohi Tapú naʻa nau fehangahangai mo e ngaahi pole naʻe ʻikai ke nau ʻamanekina ʻe hoko. Fakakaukau kia Sēkope. Naʻe tuʻutuʻuni ʻene tamaí kiate ia ke ne maʻu ha uaifi mei he ngaahi ʻofefine ʻo Lēpaní, ko ha kāinga tui, pea fakapapauʻi ange ʻe tāpuakiʻi lahi ia ʻe Sihova. (Sēn. 28:1-4) Ko ia naʻe fai ʻe Sēkope ʻa e meʻa totonú. Naʻá ne mavahe mei he fonua ko Kēnaní pea fononga ki he ʻapi ʻo Lēpaní, ʻa ia naʻe ʻi ai hono ongo ʻofefine​—ko Lia mo Lesieli. Naʻe ʻofa ʻa Sēkope ʻi he ʻofefine siʻisiʻi ʻo Lēpaní, ʻa Lesieli, pea naʻá ne loto-lelei ke ngāue ʻi he taʻu ʻe fitu ki heʻene tamaí ki muʻa ke ne mali mo iá. (Sēn. 29:18) Ka naʻe ʻikai ke hoko ʻa e ngaahi meʻá ʻo hangē ko ia naʻe ʻamanekina ʻe Sēkopé. Naʻe kākaaʻi ia ʻe Lēpani ke ne mali mo hono ʻofefine lahí, ʻa Lia. Naʻe fakaʻatā ʻe Lēpani ʻa Sēkope ke mali mo Lesieli ʻi he ʻosi ha uike ʻe taha mei ai, ka ʻo kapau pē te ne ngāue kiate ia ʻi ha toe taʻu ʻe fitu. (Sēn. 29:25-27) Naʻe toe taʻefaitotonu foki ʻa Lēpani ʻi heʻene ngaahi meʻa fakapisinisi mo Sēkopé. Ko hono fakakātoá, naʻe ngaohikoviʻi ʻe Lēpani ʻa Sēkope ʻi ha taʻu ʻe 20!​—Sēn. 31:41, 42.

6. Ko e hā ʻa e ngaahi palopalema kehe naʻe kātekina ʻe Sēkopé?

⁶ Naʻe kātekina ʻe Sēkope mo e ngaahi palopalema kehe. Naʻá ne maʻu ha fāmili tokolahi, ka naʻe ʻikai ke vālelei maʻu pē hono ngaahi fohá. Naʻe aʻu ʻo nau fakatau pōpula atu honau tokoua ko Siosifá. Ko ha toko ua ʻi he ngaahi foha ʻo Sēkopé, ko Simione mo Līvai, naʻá na fakamaaʻi ʻa e fāmilí pea ʻoatu mo e luma ki he huafa ʻo Sihová. ʻIkai ko ia pē, ko e uaifi ʻofeina ʻo Sēkopé, ʻa Lesieli, naʻá ne mate lolotonga hono fāʻeleʻi ʻena tama hono uá. Pea koeʻuhí ko ha honge lahi, naʻe pau ai ke hiki ʻa Sēkope ki he fonua ko ʻIsipité ʻi heʻene taʻumotuʻá.​—Sēn. 34:30; 35:16-19; 37:28; 45:9-11, 28.

7. Naʻe anga-fēfē hono fakahāhā ʻe Sihova kia Sēkope naʻá ne maʻu ʻEne hōifuá?

⁷ ʻI he kotoa iá, naʻe ʻikai ʻaupito mole ʻa e tui ʻa Sēkope kia Sihová pea mo ʻene ngaahi talaʻofá. Ko ia naʻe fakahaaʻi ʻe Sihova kia Sēkope naʻá ne maʻu ʻEne hōifuá. Ko e fakatātaá, neongo ʻa e anga-kākā ʻa Lēpaní, naʻe tāpuakiʻi ʻe Sihova ʻa Sēkope ʻaki ʻa e ngaahi meʻa fakamatelie. Pea fakakaukau atu ki he houngaʻia lahi kuo pau pē naʻe maʻu ʻe Sēkope kia Sihova ʻi heʻene toe fakataha mo Siosifá​—ʻa e foha naʻá ne fakakaukau kuo fuoloa ʻene maté! Ko e kaumeʻa ofi ʻa Sēkope mo Sihová naʻe malava ai ke ne fehangahangai lavameʻa mo hono ngaahi ʻahiʻahí. (Sēn. 30:43; 32:9, 10; 46:28-30) ʻI he taimi ʻoku tau tauhi maʻu ai ha kaumeʻa ofi mo Sihova, ko kitautolu  foki ʻe lava ke tau fekuki lavameʻa mo e ngaahi ʻahiʻahi taʻeʻamanekiná.

8. Ko e hā naʻe fakaʻamu ʻa Tuʻi Tēvita ke faí?

⁸ Ko Tuʻi Tēvita naʻe ʻikai lava ke ne fai ʻa e meʻa kotoa naʻá ne fakaʻamu ke fai ʻi he ngāue ʻa Sihová. Ko e fakatātaá, naʻe holi loto-moʻoni ʻa Tēvita ke ne langa ha temipale maʻa hono ʻOtuá. Naʻá ne fakahaaʻi ʻa e holi ko iá ki he palōfita ko Nētané. ʻI he tali ki aí, naʻe pehē ʻe Nētane: “Fai ha meʻa pē ʻoku ʻi ho lotó, he ʻoku kau ʻa e ʻOtua moʻoní mo koe.” (1 Kal. 17:1, 2) ʻOku tau sioloto atu kuo pau pē naʻe fakalototoʻa ʻa e ngaahi lea ko iá kia Tēvita. Mahalo naʻá ne kamata leva ke palani ki he poloseki kāfakafa ko ení.

9. Naʻe anga-fēfē ʻa e fakafeangai ʻa Tēvita ki he ongoongo fakalotomamahí?

⁹ Neongo ia, naʻe vave ʻa e foki mai ʻa e palōfita ʻa Sihová mo ha ongoongo fakalotomamahi. “ʻI he pō pē ko iá,” naʻe tala ʻe Sihova kia Nētane ʻoku ʻikai ko Tēvita ʻa e tokotaha te ne langa ʻa e temipalé; ʻi hono kehé, ko e taha ʻi hono ngaahi fohá te ne fai iá. (1 Kal. 17:3, 4, 11, 12) Naʻe anga-fēfē ʻa e fakafeangai ʻa Tēvita ʻi heʻene maʻu ʻa e pōpoaki ko ení? Naʻá ne feʻunuʻaki ʻene taumuʻá. Naʻá ne tokangataha ki hono tānaki ʻa e paʻanga mo e ngaahi naunau ʻe fiemaʻu ʻe hono foha ko Solomoné ki he langá.​—1 Kal. 29:1-5.

10. Naʻe anga-fēfē hono tāpuakiʻi ʻe Sihova ʻa Tēvitá?

¹⁰ ʻI he hili pē hono tala ange kia Tēvita ʻoku ʻikai ko ia ʻa e tokotaha te ne langa ʻa e temipalé, naʻe fai ʻe Sihova ha fuakava mo ia. Naʻe talaʻofa ʻe Sihova kia Tēvita ko e taha ʻi hono hakó te ne pule ʻo taʻengata. (2 Sām. 7:16) ʻI he māmani foʻoú, sioloto atu ki he fiefia ʻa Tēvita ke ʻiloʻi ʻokú ne fiefia ʻi he moʻuí ʻi he malumalu ʻo e Pule Taʻu ʻe Afe ʻa Sīsuú, ko ha tuʻi mei hono laine hohoko fakafāmilí! Ko e talanoa ko ení ʻokú ne tokoniʻi kitautolu ke sio neongo kapau ʻoku ʻikai lava ke tau fai ʻa e meʻa kotoa ʻoku tau ʻamanaki ke fai maʻa Sihová, ko hotau ʻOtuá ʻokú ne tuku tauhi mai nai ʻa e ngaahi tāpuaki kehe naʻe ʻikai ʻaupito ke tau ʻamanekina.

11. Naʻe anga-fēfē hono tāpuakiʻi ʻa e kau Kalisitiane ʻi he ʻuluaki senitulí neongo naʻe ʻikai hoko mai ʻa e Puleʻangá ʻi he taimi naʻa nau ʻamanekiná? (Ngāue 6:7)

¹¹ Ko e kau Kalisitiane ʻi he ʻuluaki senitulí naʻa nau fehangahangai mo e ngaahi tuʻunga taʻepau. Ko e fakatātaá, naʻa nau vēkeveke ke hoko mai ʻa e Puleʻanga ʻo e ʻOtuá, ka naʻe ʻikai ke nau ʻiloʻi pe ʻe hoko fakakū mai ia. (Ngā. 1:6, 7) Ko ia ko e hā naʻa nau faí? Naʻa nau hanganaki femoʻuekina ʻi he ngāue fakamalangá. ʻI he mafola ʻa e ongoongo leleí, naʻa nau vakai ki ha fakamoʻoni hā mahino hono tāpuakiʻi ʻe Sihova ʻenau ngaahi feingá.​—Lau ʻa e Ngāue 6:7.

12. Ko e hā naʻe fai ʻe he kau Kalisitiane ʻi he ʻuluaki senitulí ʻi he taimi naʻe hoko ai ha honge?

¹² ʻI he taimi ʻe taha, naʻe hoko mai ha fuʻu honge lahi “ki he kotoa ʻo e māmani kuo nofoʻí.” (Ngā. 11:28) Naʻe ʻikai ke hao mei ai ʻa e kau Kalisitiane ʻi he ʻuluaki senitulí. ʻE lava ke ke sioloto atu ki he anga hono uesia kinautolu ʻe he nounou fakameʻatokoni lahi ko ení? ʻOku ʻikai ha veiveiua naʻe hohaʻa ʻa e ngaahi ʻuluʻi fāmilí fekauʻaki mo e founga ke tokonaki ai maʻa honau fāmilí. Pea fēfē ʻa e faʻahinga kei siʻi naʻa nau palani ke fakalahi ʻenau ngāue fakafaifekaú? Naʻa nau ongoʻi nai naʻe totonu ke toloi ʻa e ngaahi palani ko iá? Neongo pe ko e hā honau tuʻungá, naʻe feʻunuʻaki ʻa e kau Kalisitiané. Naʻe hokohoko atu ʻenau malangá ʻi ha faʻahinga founga pē naʻe malavá, pea naʻa nau vahevahe fiefia ʻenau ngaahi koloa fakamatelié mo honau kaungātui ʻi Siuteá.​—Ngā. 11:29, 30.

13. Ko e hā ʻa e ngaahi tāpuaki naʻe hokosia ʻe he kau Kalisitiané lolotonga ʻa e hongé?

¹³ Ko e hā ʻa e ngaahi tāpuaki naʻe hokosia ʻe he kau Kalisitiané lolotonga ʻa e hongé? Ko e faʻahinga naʻa nau maʻu ʻa e ngaahi tokoní naʻa nau sio tonu ki he poupou ʻa Sihová. (Māt. 6:31-33) Kuo pau pē naʻa nau ongoʻi ofi ange ki honau kaungātui naʻa nau haʻu ke tokoniʻi kinautolú. Pea ko e faʻahinga naʻa nau fai ʻa e ngaahi tokoní pe kau ʻi he ngāue tokoní naʻa nau hokosia ʻa e fiefia ʻoku maʻu mei he foaki atú. (Ngā. 20:35)  Naʻe tāpuakiʻi ʻe Sihova kinautolu kotoa ʻi heʻenau feʻunuʻaki ki he ngaahi tuʻunga feliliuakí.

14. Ko e hā naʻe hoko kia Panepasa mo e ʻapositolo ko Paulá, pea ko e hā hono olá? (Ngāue 14:21, 22)

¹⁴ Naʻe faʻa fakatangaʻi ʻa e kau Kalisitiane ʻi he ʻuluaki senitulí, ʻi he taimi naʻe ʻikai nai ke nau ʻamanekina. Fakakaukau ki he meʻa naʻe hoko kia Panepasa mo e ʻapositolo ko Paulá lolotonga ʻena malanga ʻi he kolo ko Līsitá. ʻI he kamatá, naʻe talitali lelei kinaua ʻe he faʻahinga naʻa nau fanongo kiate kinauá. Ka ki mui ai ʻi he ʻaho tatau, ko e kau fakafepakí naʻa nau “fakalotoʻi ʻa e fuʻu kakaí,” pea ko e niʻihi ʻo kinautolu naʻa nau tolomakaʻi ʻa Paula pea liʻaki ia ke ne mate. (Ngā. 14:19) Ka ko Panepasa mo Paula naʻá na hokohoko atu ke malanga ʻi ha feituʻu kehe. Ko e hā ʻa e olá? Naʻá na ngaohi ha “kau ākonga tokotokolahi,” pea ko ʻena ngaahi leá mo e faʻifaʻitakiʻangá naʻe fakaivimālohiʻi ai hona kaungātuí. (Lau ʻa e Ngāue 14:21, 22.) Naʻe maʻu ʻaonga ʻa e tokolahi koeʻuhí naʻe ʻikai ke foʻi ʻa Panepasa mo Paula ʻi he fehangahangai mo e fakatanga fakafokifaá. Kapau pē heʻikai ke tau foʻi ʻi he ngāue kuo kole mai ʻe Sihova ke tau faí, ʻe faitāpuekina kitautolu.

15. Ko e hā ʻokú ke ako mei he faʻifaʻitakiʻanga ʻa Tokoua A. H. Macmillan?

¹⁵ Lolotonga ʻa e ngaahi taʻu ʻo taki atu ki he 1914, ko e kakai ʻa Sihová naʻa nau ʻamanekina ʻe hoko ha meʻa. Ko e fakatātaá, fakakaukau kia Tokoua A. H. Macmillan. Hangē ko e tokolahi ʻi he taimi ko iá, naʻe fakakaukau ʻa Tokoua Macmillan ʻe vave ke ne maʻu ʻa hono pale fakahēvaní. ʻI ha malanga naʻá ne fai ʻi Sepitema 1914, naʻá ne pehē: “Mahalo ko e malanga maʻá e kakai fakaʻosi pē eni te u fakahokó.” Ko e moʻoni, naʻe ʻikai ko ʻene malanga fakaʻosí ia. Naʻe tohi ʻe Tokoua Macmillan ki mui ai: “Mahalo ko e niʻihi ʻo kitautolu naʻe fuʻu vave ʻetau fakakaukau te tau ʻalu leva ki hēvaní.” Naʻá ne toe pehē: “Ko e meʻa ke tau faí ke hanganaki femoʻuekina ʻi he ngāue ʻa e ʻEikí.” Naʻe hanganaki femoʻuekina ʻa Tokoua Macmillan. Naʻá ne faivelenga ʻi he ngāue fakafaifekaú. Naʻá ne maʻu ʻa e monū ʻo hono fakalototoʻaʻi ʻa e fanga tokoua tokolahi naʻa nau ʻi pilīsone koeʻuhi ko ʻenau tuʻu-ʻataá. Pea naʻá ne faitōnunga ʻi hono maʻu ʻa e ngaahi fakataha ʻa e fakatahaʻangá naʻa mo e ngaahi taʻu ki mui ange ʻene moʻuí. Naʻe anga-fēfē maʻu ʻaonga ʻa Tokoua Macmillan mei hono ngāueʻaongaʻaki hono taimí lolotonga ʻene tatali ki hono palé? Ki muʻa siʻi pē peá ne mate ʻi he 1966, naʻá ne tohi: “Ko ʻeku tuí ʻoku toe mālohi ange he ʻahó ni ʻi he taimi naʻe ʻi ai ki muʻá.” He vakai lelei ʻaupito ē ke tau faʻifaʻitaki kotoa ki ai​—tautefito kapau kuo fuoloa ange ʻetau kātekina ha ʻahiʻahi ʻi he meʻa naʻa tau ʻamanekiná!​—Hep. 13:7.

16. Ko e hā ʻa e pole taʻeʻamanekina naʻe fehangahangai mo Herbert Jennings mo hono uaifí? (Sēmisi 4:14)

¹⁶ Ko e tokolahi ʻo e kakai ʻa Sihová ʻoku nau fāinga mo e ngaahi palopalema taʻeʻamanekina ki heʻenau moʻui leleí. Ko e fakatātaá, ʻi he talanoa ki he moʻuí ʻa Tokoua Herbert Jennings b naʻá ne fakamatala ai ki he fiefia naʻá ne maʻu mo hono uaifí ʻi hona vāhenga-ngāue ko e ongo misinale ʻi Kana. Kae kehe, ʻi he faai atu ʻa e taimí, naʻá ne puke ʻi he ʻāvanga femaleleakí. ʻI he fakakaukau ki he ngaahi lea ʻi he Sēmisi 4:14, naʻe ui ʻe Tokoua Jennings ʻa e liliu ko ení “ko ha ‘ʻapongipongi’ naʻe ʻikai te ma ʻamanekina.” (Lau.) Naʻá ne tohi: “ʻI he fehangahangai mo e meʻa totonú, naʻá ma fokotuʻutuʻu ke mavahe mei Kana pea mei homa ngaahi kaumeʻa ofi tokolahí ʻo foki ki Kānata [ki ha tokoni fakafaitoʻo].” Naʻe tokoniʻi ʻe Sihova ʻa Tokoua Jennings mo hono uaifí ke hokohoko atu ʻena ngāue faitōnungá neongo ʻa e pole naʻá na fehangahangai mo iá.

17. Naʻe anga-fēfē ʻaonga ʻa e faʻifaʻitakiʻanga ʻa Tokoua Jennings ki he kaungātuí?

 ¹⁷ Ko e fakamatala tauʻatāina ʻa Tokoua Jennings ʻi heʻene talanoa ki he moʻuí naʻe maongo lahi ia ki he niʻihi kehé. Naʻe tohi ʻe ha tuofefine ʻe taha: “Naʻe teʻeki ai ke ueʻi loloto au ʻo hangē ko ia naʻe hokó ʻi heʻeku lau ʻa e kupu ko ení. . . . ʻI hono lau ʻa e pau ke tuku ange ʻe Tokoua Jennings ha vāhenga-ngāue ke tokangaʻi ai ʻa hono puké naʻe tokoni ia kia au ke u vakai ʻi ha tuʻunga mafamafatatau ki hoku tuʻungá.” ʻI ha tuʻunga meimei tatau, naʻe tohi ʻe ha tokoua: “ʻI he hili ha ngāue taʻu ʻe hongofulu ko ha mātuʻa ʻi ha fakatahaʻanga, naʻe pau ai ke u tuku ange ʻa hoku monuú koeʻuhi ko ha puke fakaʻatamai. Ko ʻeku ongoʻi taʻelavameʻá, naʻe ʻi ha tuʻunga ia naʻá ku faʻa ongoʻi fuʻu loto-mafasia ai ke lau ʻa e ngaahi kupu ʻo e talanoa ki he moʻuí. . . . Ka ko e kītaki ʻa Tokoua Jennings naʻe fakatupu langa hake ia kiate au.” ʻOku fakamanatu mai heni ʻi he taimi ʻoku tau kātekina ai ha palopalema taʻeʻamanekina, ʻe lava ke tau fakalototoʻaʻi ʻa e niʻihi kehé. Naʻa mo e taimi ʻoku ʻikai hoko ai ʻa e ngaahi meʻa ʻi he moʻuí ʻo hangē ko ia naʻa tau ʻamanekiná, ʻe kei lava pē ke tau hoko ko e faʻifaʻitakiʻanga ʻo e tuí mo e kātakí.​—1 Pita 5:9.

18. Hangē ko ia ʻoku hā ʻi he fakatātaá, ko e hā ʻokú ke ako mei he faʻifaʻitakiʻanga ʻa ha uitou ʻi Naisīlia?

¹⁸ Ko e ngaahi fakatamaki hangē ko e mahaki fakaʻauha COVID-19 kuó ne uesia ʻa e tokolahi ʻo e kakai ʻa Sihová. Ko e fakatātaá, naʻe ʻi ai ha uitou ʻi Naisīlia naʻá ne fehangahangai mo ha tuʻunga feʻamokaki. ʻI he pongipongi ʻe taha, naʻe ʻeke ange ʻe heʻene kiʻi taʻahiné pe ko e hā ʻa e meʻa te na kaí hili ʻena haka ʻena ipu laise fakaʻosí. Naʻe tala ange ʻe hotau tuofefiné ki heʻene kiʻi taʻahiné naʻe ʻikai ke toe ʻi ai haʻana paʻanga pe ko ha meʻakai ka ʻoku totonu ke na faʻifaʻitaki ki he uitou ʻo Salepitá​—ʻo teuteu ʻena houa kai fakaʻosí pea tuku ʻena falala kakató kia Sihova. (1 Tuʻi 17:8-16) Ki muʻa ke na fakakaukau ki he meʻa ke na kai ʻi he hoʻatā ʻo e ʻaho ko iá, naʻá na maʻu ha kofukofu ʻo e ngaahi tokoni mei he kaungātuí. Naʻe ʻi he kofukofú ʻa e meʻakai naʻe feʻunga mo ha uike nai ʻe ua. Naʻe pehē ʻe he tuofefiné naʻe ʻikai ke ne ʻiloʻi ʻa e fanongo lelei mai ʻa Sihova ki he meʻa naʻá ne tala ange ki heʻene kiʻi taʻahiné. Ko e moʻoni, ʻi heʻetau  falala kia Sihová, ko e ngaahi tuʻunga taʻepau ʻi he moʻuí ʻe lava moʻoni ke ne tohoakiʻi kitautolu ke toe ofi ange kiate ia.​—1 Pita 5:6, 7.

19. Ko e hā ʻa e fakatanga kuo kātekina ʻe Aleksey Yershov?

¹⁹ ʻI he ngaahi taʻu ki mui ní, ko e tokolahi ʻi hotau fanga tokouá mo e fanga tuofāfiné kuo nau kātekina ʻa e fakatanga naʻe ʻikai nai ke nau ʻamanekina. Fakakaukau kia Tokoua Aleksey Yershov, ʻokú ne nofo ʻi Lūsia. Ko e kakai ʻa Sihova ʻi he feituʻu ko iá naʻa nau maʻu ha tauʻatāina ʻi he taimi naʻe papitaiso ai ʻa Tokoua Yershov ʻi he 1994. Ka ʻi ha ngaahi taʻu ki mui ange ai, naʻe liliu ʻa e tuʻunga ʻi Lūsiá. ʻI he 2020, naʻe ʻohofi mo hua ʻa e ʻapi ʻo Tokoua Yershov, pea ko e lahi ʻo ʻene ngaahi koloá naʻe ʻave fakamālohi. ʻI ha ngaahi māhina ki mui ai, naʻe fakaʻilo ia ki ha hia. Ke ʻai ke kovi ange ʻa e tuʻungá, ko e ngaahi tukuakiʻí naʻe makatuʻunga ia ʻi ha ngaahi vitiō naʻe hiki ʻe ha tokotaha naʻá ne fakangalingali ʻo laka hake ʻi ha taʻu ʻe taha naʻá ne mahuʻingaʻia ʻi hono ako ʻa e Tohi Tapú. He lavaki ē ko ia!

20. Kuo anga-fēfē hono fakaivimālohiʻi ʻe Tokoua Yershov hono vahaʻangatae mo Sihová?

²⁰ Kuo ʻi ai ha ola lelei ʻo e ʻahiʻahi naʻe fehangahangai mo Tokoua Yershov? ʻIo. Ko hono vahaʻangatae mo Sihová kuo tupu ʻo toe mālohi ange. “Ko au mo hoku uaifí ʻoku toe lahi ange ʻema lotu fakatahá,” ko ʻene leá ia. “ʻOku ou ʻiloʻi heʻikai malava ke u fekuki mo e tuʻunga ko ení ʻo taʻekau ai ʻa e tokoni ʻa Sihová.” ʻOkú ne toe pehē: “Ko e ako fakafoʻituituí ʻokú ne tokoniʻi au ke fekuki mo e loto-siʻí. ʻOku ou fakalaulauloto ki he faʻifaʻitakiʻanga ʻa e kau sevāniti faitōnunga ʻi he kuohilí. ʻOku lahi ʻa e ngaahi talanoa ʻi he Tohi Tapú ʻoku fakamamafaʻi ai ʻa e mahuʻinga ke hanganaki nonga pea ke fakahāhā ʻa e falala kia Sihová.”

21. Ko e hā kuo tau ako ʻi he kupu ko ení?

²¹ Ko e hā kuo tau ako ʻi he kupu ko ení? Ko e moʻui ʻi he fokotuʻutuʻu ko ení ʻoku taʻepau. Neongo ia, ʻoku tokoniʻi maʻu pē ʻe Sihova ʻene kau sevānití ʻi he taimi ʻoku nau falala ai kiate iá. Hangē ko ia naʻe hā ʻi heʻetau konga Tohi Tapu ʻo e kaveingá, “ʻoku lahi ʻa e faingataʻaʻia ʻa e tokotaha māʻoniʻoní, ka ʻoku fakahaofi ia ʻe Sihova mei ai kotoa.” (Saame 34:19) ʻOfa ke tau hokohoko atu ke tokangataha, ʻo ʻikai ki heʻetau ngaahi faingataʻá, ka ʻi he mālohi ʻo Sihova ʻokú ne poupouʻi kitautolú. Pea hangē ko e ʻapositolo ko Paulá, ʻe lava ke tau pehē: “ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.”​—Fil. 4:13.