1. Naʻe anga-fēfē hono fakahāhā ʻe ha kiʻi tamasiʻi ʻene ʻamanaki ki he toetuʻú?

 KO HA kiʻi tamasiʻi ko Matthew ʻokú ne maʻu ha mahaki fakatupu mate pea naʻe fiemaʻu ke fai hono ngaahi tafa. ʻI heʻene taʻu fitú, naʻá ne sio fakataha mo hono fāmilí ʻi ha polokalama fakamāhina ʻo e JW Broadcasting^®. ʻI he ofi ki he ngataʻanga ʻo e polokalamá, naʻa nau sio ʻi ha vitiō hiva fekauʻaki mo hono talitali lelei ʻo e faʻahinga ʻoku tau ʻofa aí ʻi he toetuʻú. b Hili ʻa e polokalamá, naʻe fakaofiofi atu ʻa Matthew ki heʻene ongo mātuʻá, ʻo puke hona nimá, peá ne pehē: “ʻOkú mo sio, Mami mo Teti, neongo kapau te u mate, te u toe ʻā hake ʻi he toetuʻú. ʻE lava ke mo tatali mai kiate au; ʻe sai pē ʻa e meʻa kotoa.” ʻE lava ke ke sioloto atu ki he anga ʻo e ongoʻi ʻa e ongo mātuʻa ko iá ʻi heʻena ʻiloʻi ʻa e moʻoni ʻa e ʻamanaki ʻo e toetuʻú ki heʻena kiʻi tamá?

2-3. Ko e hā ʻoku lelei ai ke tau fakakaukauloto ki he talaʻofa fekauʻaki mo e toetuʻú?

² Mei he taimi ki he taimi, ʻoku lelei ke tau fakakaukauloto ki he talaʻofa ʻa e Tohi Tapú fekauʻaki mo ha toetuʻu ʻi he kahaʻú. (Sione 5:28, 29) Ko e hā hono ʻuhingá? Koeʻuhí ʻoku ʻikai ʻaupito ke tau ʻiloʻi ʻa e taimi te tau fehangahangai nai ai mo ha mahaki fakatupu mate pe ko e mole fakafokifā ha taha ʻoku tau ʻofa ai ʻi he maté. (Tml. 9:11; Sēm. 4:13, 14) Ko ʻetau ʻamanaki ʻo e toetuʻú ʻe lava ke ne tokoniʻi kitautolu ke kātekina ʻa e ngaahi pole peheé. (1 Tes. 4:13) ʻOku fakapapauʻi mai ʻe he Folofolá ko ʻetau Tamai fakahēvaní ʻokú ne ʻiloʻi lelei kitautolu pea ʻokú ne ʻofa lahi ʻiate kitautolu. (Luke 12:7) Fakakaukau atu ki he pau ko ia ke ʻiloʻi lelei kitautolu ʻe Sihova ko e ʻOtuá kae lava ke ne toe fakatupu kitautolu mo e angaʻitangata pea mo e ngaahi manatu naʻa tau maʻu ki muʻá. Pea he anga-ʻofa ē ko Sihova ʻi heʻene ʻomai kiate kitautolu ʻa e faingamālie ke moʻui taʻengatá! Pea neongo kapau te tau mate, te ne toe fokotuʻu hake kitautolu!

³ ʻI he kupu ko ení, te tau ʻuluaki lāulea ki he ʻuhinga ʻe lava ke  tau tui ai ki he talaʻofa fekauʻaki mo e toetuʻú. Pea te tau sivisiviʻi leva ʻa e talanoa fakatupu tui mālohi ʻi he Tohi Tapú ʻa ia ʻoku maʻu ai ʻa e ngaahi lea ʻi heʻetau konga tohi ʻo e kaveingá: “ʻE tuʻu hake ho tuongaʻané.” (Sione 11:23) Fakaʻosí, te tau ako ki he founga ke ʻai ai ke toe moʻoni ange kiate kitautolu ʻa e ʻamanaki ʻo e toetuʻú.

4. Ke tui ki ha talaʻofa pe palōmesi, ko e hā kuo pau ke tau falala pau ki aí? Fakatātaaʻi.

⁴ Ke tui ki ha talaʻofa, kuo pau ke tau falala pau ko e tokotaha ʻokú ne fai ʻa e talaʻofá ʻokú ne maʻu ʻa e holi pea pehē foki ki he mālohi, pe malava ke fakahoko ia. Ke fakatātāʻí: Sioloto atu ko ho falé kuo maumauʻi lahi ʻe ha afā. ʻOku haʻu ha kaumeʻa kiate koe pea palōmesi atu, ‘Te u tokoni atu kiate koe ke toe langa ho falé.’ ʻOkú ne loto-moʻoni pea ʻokú ke falala pau ʻokú ne holi ke tokoniʻi koe. Kapau ko ha tokotaha tufunga pōtoʻi ia peá ne maʻu mo e ngaahi meʻangāue ʻoku fiemaʻú, ʻokú ke ʻiloʻi ʻokú ne toe maʻu foki ʻa e malavá. Ko ia ʻokú ke tui ki heʻene palōmesí. Kae fēfē leva ʻa e talaʻofa ʻa e ʻOtuá fekauʻaki mo ha toetuʻú? ʻOkú ne maʻu moʻoni ʻa e holi mo e mālohi ke fakahoko ia?

5-6. Ko e hā ʻe lava ke tau fakapapauʻi ai ʻoku maʻu ʻe Sihova ʻa e holi ke fokotuʻu hake ʻa e maté?

⁵ ʻOku maʻu ʻe Sihova ʻa e holi ke fokotuʻu hake ʻa e maté? ʻOku ʻikai toe fehuʻia, ʻoku pehē. Naʻá ne fakamānavaʻi ha kau hiki Tohi Tapu tokolahi ke hiki ʻene talaʻofa fekauʻaki mo ha toetuʻu ʻi he kahaʻú. (ʻAi. 26:19; Hōs. 13:14; Fkh. 20:11-13) Pea ʻi he taimi ʻoku fai ai ʻe Sihova ha talaʻofa, ʻokú ne fakahoko maʻu pē ia. (Sios. 23:14) Ko hono moʻoní, ko Sihova ʻokú ne vēkeveke ke toe fakamoʻui ʻa e maté. Ko e hā ʻoku lava ke tau lea pehē aí?

⁶ Fakakaukau ki he ngaahi lea ʻa e pēteliake ko Siopé. Naʻá ne fakapapauʻi neongo kapau te ne mate, ʻoku fakaʻamu ʻa Sihova ke sio ʻokú ne toe moʻui mai. (Siope 14:14, 15, fkm. ʻi lalo) ʻOku maʻu ʻe Sihova ʻa e holi tatau ki he kotoa ʻo ʻene kau lotu kuo nau maté. ʻOkú ne vēkeveke ke toe fokotuʻu hake kinautolu ke nau maʻu ha moʻui lelei mo fiefia. Kae fēfē ʻa e laui piliona kuo nau mate ʻo ʻikai maʻu ha faingamālie ke ako ʻa e moʻoni fekauʻaki mo Sihová? Ko hotau ʻOtua ʻofá ʻokú ne loto ke fokotuʻu hake mo kinautolu foki. (Ngā. 24:15) ʻOkú ne loto ke nau maʻu ʻa e faingamālie ke hoko ko hono ngaahi kaumeʻa pea moʻui taʻengata ʻi he māmaní. (Sione 3:16) ʻOku hā mahino, ʻoku maʻu ʻe Sihova ʻa e holi ke fokotuʻu hake ʻa e maté.

7-8. Ko e hā ʻoku lava ke tau fakapapauʻi ai ʻoku maʻu ʻe Sihova ʻa e mālohi ke fokotuʻu hake ʻa e maté?

⁷ ʻOku toe maʻu ʻe Sihova ʻa e mālohi ke fokotuʻu hake ʻa e maté? ʻAupito! Ko ia “ʻa e Māfimafi-Aoniú.” (Fkh. 1:8) Ko ia ʻokú ne mālohi feʻunga ke ikunaʻi ha fili pē, naʻa mo e maté. (1 Kol. 15:26) ʻOku tau maʻu ʻa e mālohi mo e fiemālie ʻi hono ʻiloʻi iá. Fakakaukau ki he hokosia ʻa Tuofefine Emma Arnold. Naʻá ne fehangahangai mo hono fāmilí mo ha ngaahi ʻahiʻahi kakaha ʻo e tuí lolotonga ʻa e Tau II ʻa Māmaní. Ke fakafiemālieʻi ʻene kiʻi taʻahiné ʻi he mole atu ʻi he maté ʻa e faʻahinga ʻofeiná ʻi he kemi fakamamahi Nasí, naʻe pehē ʻe Emma: “Kapau naʻe lava ʻe he maté ʻo puketuʻu ʻi heʻene haʻí ʻa e faʻahinga ʻo e tangatá, ʻe mālohi ange ia ʻi he ʻOtuá, ʻikai ko ia?” Ko e moʻoni, ʻoku halaʻatā ha meʻa ʻe mālohi ange ʻia Sihova! Ko e ʻOtua māfimafi-aoniú ʻa ia naʻá ne fakatupu ʻa e moʻuí ʻokú ne maʻu ʻa e malava ke toe fakamoʻui ʻa e faʻahinga kuo nau maté.

⁸ Ko e toe ʻuhinga ʻe taha ʻoku tau ʻiloʻi ai ʻoku maʻu ʻe he ʻOtuá ʻa e malava ke fokotuʻu hake ʻa e maté he ʻoku taʻefakangatangata ʻene manatú. ʻOkú ne ui ʻa e foʻi fetuʻu taki taha ʻaki honau hingoá. (ʻAi. 40:26) Pehē foki, ʻokú ne manatuʻi ʻa e faʻahinga kuo nau maté. (Siope 14:13; Luke 20:37, 38) ʻOku lavangofua ke ne manatuʻi ʻa e ngaahi fakaikiiki siʻi taha fekauʻaki mo e faʻahinga te ne fokotuʻu haké, ʻo kau ai honau faʻunga fakakēnisí, ko ʻenau hokosia ʻi he moʻuí, pea mo ʻenau ngaahi manatú.

9. Ko e hā ʻokú ke tui ai ki he talaʻofa ʻa Sihova fekauʻaki mo ha toetuʻu ʻi he kahaʻú?

 ⁹ ʻOku hā mahino, ʻoku lava ke tau tui ki he talaʻofa ʻa Sihova fekauʻaki mo ha toetuʻu ʻi he kahaʻú koeʻuhí ʻoku tau ʻiloʻi ʻokú ne maʻu fakatouʻosi ʻa e holi mo e mālohi ke fakahoko ia. Fakakaukau ki ha toe ʻuhinga ʻe taha ke tui ai ki he talaʻofa ʻa e ʻOtuá fekauʻaki mo ha toetuʻú: Kuo ʻosi fakahoko ʻe Sihova ʻa e meʻa ko iá ki muʻa. ʻI he taimi ʻo e Tohi Tapú, naʻá ne fakaivia ha kau tangata faitōnunga ʻe niʻihi, kau ai ʻa Sīsū, ke fokotuʻu hake ʻa e maté. Tau sivisiviʻi angé ʻa e talanoa fekauʻaki mo ha toetuʻu naʻe fakahoko ʻe Sīsū, ʻoku hiki ʻi he Sione vahe 11.

10. Ko e hā ʻoku hoko lolotonga ʻa e malanga ʻa Sīsū ʻi he tafaʻaki ʻe taha ʻo Sioataní, pea ko e hā ʻokú ne faí? (Sione 11:1-3)

¹⁰ Lau ʻa e Sione 11:1-3. Sioloto atu ki he meʻa naʻe hoko ʻi Pētani ʻi he ofi ke ngata ʻa e 32 T.S. ʻOku ʻi ai ha ngaahi kaumeʻa ofi ʻo Sīsū ʻi he kolo ko ení​—ko Lāsalosi mo hono ongo tuofāfiné, ʻa Mele mo Māʻata. (Luke 10:38-42) Ka ʻoku puke ʻa Lāsalosi, pea ʻoku hohaʻa hono ongo tuofāfiné. ʻOkú na ʻave ha pōpoaki kia Sīsū, ʻokú ne ʻi he tafaʻaki ʻe taha ʻo Sioataní, ʻoku fakafuofua ki he ʻaho ʻe ua ʻa e lue ki ai mei Pētaní. (Sione 10:40) Ko e meʻa fakamamahí, ʻoku mate ʻa Lāsalosi ʻi he aʻu ʻa e talafekaú kia Sīsuú. Neongo ʻoku ʻiloʻi ʻe Sīsū naʻe toki mate pē hono kaumeʻá, ʻokú ne nofo pē ʻi he feituʻu ʻokú ne ʻi aí ʻi ha toe ʻaho ʻe ua peá ne toki fononga leva ki Pētani. Ko ia ʻi he taimi ʻoku aʻu atu ai ʻa Sīsuú, kuo ʻosi ʻa e ʻaho ʻe fā ʻo e mate ʻa Lāsalosí. ʻOku fakataumuʻa ʻa Sīsū ke ne fai ha meʻa ʻe maʻu ʻaonga mei ai hono kaungāmeʻá pea fakalāngilangiʻi ʻa e ʻOtuá.​—Sione 11:4, 6, 11, 17.

11. Ko e hā ʻa e lēsoni fekauʻaki mo e kaumeʻá ʻe lava ke tau ako mei he talanoa ko ení?

¹¹ ʻOku tau ako ha lēsoni fekauʻaki mo e kaumeʻá mei he talanoa ko ení. Fakakaukau angé: ʻI he taimi naʻe ʻoatu ai ʻe Mele mo Māʻata ʻa e pōpoakí kia Sīsuú, naʻe ʻikai ke na kole kiate ia ke haʻu ki Pētani. Naʻá na pehē pē ko hono kaumeʻa ʻofeiná naʻe puke. (Sione 11:3) ʻI he mate ʻa Lāsalosí, naʻe mei lava ke fokotuʻu hake ia ʻe Sīsū mei he mamaʻó. Neongo ia, naʻe fili ʻa Sīsū ke ʻalu ki Pētani ke ʻi ai fakataha mo hono ongo kaumeʻa ko Mele mo Māʻatá. ʻOku ʻi ai hao kaumeʻa te ne ʻalu atu ke tokoni kiate koe ʻo ʻikai toe fakapuʻia? ʻOkú ke ʻiloʻi leva ʻe lava ke ke falala kiate ia ki ha tokoni ʻi he “taimi faingataʻá.” (Pal. 17:17) Hangē ko Sīsuú, ʻofa ke tau hoko ko ha kaumeʻa pehē ki he niʻihi kehé! Tau toe foki angé ʻo vakai ki he hoko atu ʻa e talanoá.

12. Ko e hā ʻa e talaʻofa ʻa Sīsū kia Māʻatá, pea ko e hā ʻoku ʻikai ko ha talaʻofa lau pē iá? (Sione 11:23-26)

¹² Lau ʻa e Sione 11:23-26. ʻOku ʻiloʻi ʻe Māʻata ʻoku ofi mai ʻa Sīsū ki Pētani. ʻOkú ne fakavave atu ke fakafetaulaki kiate ia peá ne pehē: “ʻEiki, kapau naʻá ke ʻi heni, ne ʻikai mei mate hoku tuongaʻané.” (Sione 11:21) Ko e moʻoni, naʻá ne mei lava ʻo fakamoʻui ʻa Lāsalosi. Ka ʻoku fakakaukau ʻa Sīsū ke ne fai ha meʻa ʻoku makehe ange. ʻOkú ne talaʻofa: “ʻE tuʻu hake ho tuongaʻané.” ʻOkú ne toe ʻoange kia Māʻata ha ʻuhinga lahi ange ke tui ki heʻene talaʻofá, ʻo pehē: “Ko au ʻa e toetuʻú pea mo e moʻuí.” ʻIo, ʻokú ne maʻu ʻa e mālohi kuo ʻoange ʻe he ʻOtuá  ke ne fokotuʻu hake ʻa e maté. Ki muʻa ange, naʻá ne fokotuʻu hake ha kiʻi taʻahine ʻi he hili pē ʻene maté pea naʻá ne fokotuʻu hake foki mo ha kiʻi talavou, ngalingali ʻi he ʻaho pē naʻá ne mate aí. (Luke 7:11-15; 8:49-55) Ka ʻe lava ke ne fokotuʻu hake ha taha ʻa ia kuó ne mate ʻi ha ʻaho ʻe fā pea ko hono sinó kuo kamata ke ʻauʻaunga?

13. Hangē ko ia ʻoku hiki ʻi he Sione 11:32-35, ʻoku anga-fēfē ʻa e fakafeangai ʻa Sīsū ʻi heʻene sio ki he tangi ʻa Mele mo e niʻihi kehé? (Sio foki ki he fakatātaá.)

¹³ Lau ʻa e Sione 11:32-35. Sioloto atu ki he meʻa ʻoku hoko atu aí. Ko Mele, ʻa e tuofefine ʻe taha ʻo Lāsalosí, ʻokú ne ʻalu atu ke fakafetaulaki kia Sīsū. ʻOkú ne toe tala ange ʻa e meʻa tatau naʻe leaʻaki ʻe hono tokouá: “ʻEiki, kapau naʻá ke ʻi heni, ne ʻikai mei mate hoku tuongaʻané.” Ko ia mo e niʻihi kehe naʻe haʻu mo iá ʻoku nau tofanga ʻi he mamahi. ʻI he sio mo fanongo ʻa Sīsū ki heʻenau tangí, ʻokú ne loto-mamahi lahi. ʻI he ueʻi ia ʻe he manavaʻofa kaungāongoʻi ki hono ongo kaumeʻá, ʻokú ne tangi. ʻOkú ne mahinoʻi ʻa e mātuʻaki fakamamahi ʻa e mate ʻa ha taha ʻofeina. Ko e moʻoni, ʻokú ne vēkeveke ke toʻo atu ʻa e tupuʻanga ʻo ʻenau tangí!

14. Ko e hā ʻe lava ke tau ako fekauʻaki mo Sihova mei he fakafeangai ʻa Sīsū ki he tangi ʻa Melé?

¹⁴ Ko e fakafeangai ʻa Sīsū ki he tangi ʻa Melé ʻoku akoʻi mai ai kiate kitautolu ko Sihová ko ha ʻOtua ʻo e manavaʻofa kaungāongoʻi. Ko e hā ʻoku lava ke tau lea pehē aí? Hangē ko ia naʻa tau vakai ki ai ʻi he kupu ki muʻá, ʻoku tapua haohaoa mai ʻe Sīsū ʻa e fakakaukau mo e ongoʻi ʻene Tamaí. (Sione 12:45) Ko ia ʻi heʻetau lau fekauʻaki mo e ongoʻi manavaʻofa loloto ʻa Sīsū ki hono ongo kaumeʻá ʻo ne tangí, ʻoku lava ke tau fakamulituku ai ko Sihova foki ʻoku maongo moʻoni kiate ia hotau loʻimata ʻo e mamahí. (Saame 56:8) ʻIkai ʻoku ueʻi ai koe ke ke loto ke ʻunuʻunu ofi ange ki hotau ʻOtua manavaʻofá?

15. Hangē ko ia ʻoku hiki ʻi he Sione 11:41-44, ko e hā ʻa e meʻa ʻoku hoko ʻi he fonualoto ʻo Lāsalosí? (Sio foki ki he fakatātaá.)

¹⁵ Lau ʻa e Sione 11:41-44. ʻOku aʻu atu ʻa Sīsū ki he fonualoto ʻo Lāsalosí pea kole ke toʻo ʻa e maka tāpuni ʻo e fonualotó. ʻOku taʻofi ia ʻe Māʻata, ʻo ne tala ange kuo pau pē kuo nanamu ʻa e sino ʻo e pekiá. ʻOku tali ange ʻe Sīsū: “ʻIkai naʻá ku tala atu kiate koe kapau te ke tui te ke mamata ki he lāngilangi ʻo e ʻOtuá?” (Sione 11:39, 40) ʻOku hanga hake leva ʻa e fofonga ʻo Sīsuú  ki he langí peá ne fai ha lotu fakahāhā. ʻOkú ne loto ke ʻave kia Sihova ʻa e kotoa ʻo e lāngilangi ʻo e meʻa ʻoku teu ke hokó. ʻOku ui atu leva ʻa Sīsū: “Lāsalosi, hū mai ki tuʻa!” Pea ʻoku hū mai leva ki tuʻa ʻa Lāsalosi mei he fonualotó! ʻOku fakahoko ʻe Sīsū ha meʻa naʻe fakakaukau ʻa e niʻihi ʻe taʻemalava.​—Sio ki he “Naʻá Ke ʻIloʻi?” ʻi he ʻīsiu ʻo e Taua Leʻo ʻo Sanuali 1, 2008, p. 31.

16. ʻOku anga-fēfē hono fakaivimālohiʻi ʻe he talanoa ʻi he Sione vahe 11 ʻetau tui ki he ʻamanaki ʻo e toetuʻú?

¹⁶ Ko e talanoa ʻi he Sione vahe 11 ʻoku fakaivimālohiʻi ai ʻetau tui ki he ʻamanaki ʻo e toetuʻú. Anga-fēfē? Manatuʻi ʻa e talaʻofa ʻa Sīsū kia Māʻatá: “ʻE tuʻu hake ho tuongaʻané.” (Sione 11:23) Hangē ko ʻene Tamaí, ʻoku maʻu ʻe Sīsū ʻa e holi mo e mālohi ke fakahoko ʻa e talaʻofa ko iá. Ko ʻene tangí naʻe fakaeʻa mai ai ʻokú ne fakaʻamu loto-moʻoni ke toʻo ʻosi atu ʻa e maté pea mo e mamahi ʻokú ne fakatupungá. Pea ko e mōmeniti pē naʻe hū mai ai ʻa Lāsalosi ki tuʻa mei he fonualotó, naʻe toe fakamoʻoniʻi ai ʻe Sīsū ʻokú ne maʻu ʻa e mālohi ke fokotuʻu hake ʻa e maté. Pehē foki, fakakaukau ki he meʻa naʻe fakamanatu ange ʻe Sīsū kia Māʻatá: “ʻIkai naʻá ku tala atu kiate koe kapau te ke tui te ke mamata ki he lāngilangi ʻo e ʻOtuá?” (Sione 11:40) ʻOku tau maʻu ʻa e ngaahi ʻuhinga lelei ke tui ai ko e talaʻofa ʻa e ʻOtuá ki ha toetuʻú ʻe hoko moʻoni. Ka ko e hā ʻe lava ke tau fai ke ʻai ai ʻa e ʻamanaki ko ení ke toe moʻoni ange kiate kitautolú?

17. Ko e hā ʻoku totonu ke tau manatuʻi ʻi heʻetau lau ʻa e fakamatala ʻi he Tohi Tapú fekauʻaki mo e toetuʻú?

¹⁷ Lau mo fakalaulauloto ki he ngaahi toetuʻu ʻi he kuohilí. ʻOku fakamatalaʻi ʻi he Tohi Tapú ʻa e toetuʻu ʻe valu ʻo e kakai naʻe fokotuʻu hake ke moʻui ʻi he māmaní. c Fēfē ke ke sivisiviʻi fakalelei ʻa e fakamatala taki taha? ʻI hoʻo fai iá, manatuʻi ko e kakai moʻoni eni​—kau tangata, kau fefine mo e fānau. Vakai ki ha ngaahi lēsoni ʻe lava ke ke ako. Fakakaukau ki he founga ʻoku fakahaaʻi ai ʻe he fakatātā taki taha ʻa e holi mo e mālohi ʻo e ʻOtuá ke ne fakamoʻui ʻa e maté. Hiliō he meʻa kotoa, fakakaukauloto ki he toetuʻu mahuʻinga tahá​—ʻa e toetuʻu ʻa Sīsuú. Manatuʻi ko ʻene toetuʻú  naʻe fakapapauʻi ia ʻe ha kau fakamoʻoni sio tonu ʻe lauingeau pea ʻoku ʻomai ai kiate kitautolu ha makatuʻunga fefeka ki heʻetau tuí.​—1 Kol. 15:3-6, 20-22.

18. ʻE lava fēfē ke ke ngāueleleiʻaki ʻetau ngaahi hiva fekauʻaki mo e ʻamanaki ʻo e toetuʻú? (Sio foki ki he fakamatala ʻi laló.)

¹⁸ Ngāueleleiʻaki ʻa e “ngaahi hiva fakalaumālié” ʻa ia ʻoku lave ai ki he ʻamanaki ʻo e toetuʻú. d (ʻEf. 5:19) Ko e ngaahi hiva ko ení ʻokú ne ʻai ke toe moʻoni ange kiate kitautolu ʻa e toetuʻú pea fakaivimālohiʻi ai ʻetau tui ki he ʻamanaki mahuʻinga ko ení. Fanongo ki ai, ʻahiʻahiʻi ia, pea lāulea ki he ʻuhinga ʻo e ngaahi lea ʻo e hivá lolotonga hoʻo lotu fakafāmilí. Fakamaʻu ʻa e ngaahi lea ʻo e hivá ki ho ʻatamaí mo e lotó. Kapau leva ʻokú ke fehangahangai mo ha ʻahiʻahi ʻokú ne fakamanamanaʻi hoʻo moʻuí pe ko e mole hao ʻofaʻanga ʻi he maté, ko e laumālie ʻo Sihová te ne tokoniʻi koe ke manatuʻi ʻa e ngaahi hiva ko ení peá ke maʻu ʻa e fakafiemālie mo e mālohi mei ai.

19. Ko e hā nai te tau sioloto atu ki ai fekauʻaki mo e toetuʻú? (Sio ki he puha “ Ko e Hā Te Ke ʻEke Kiate Kinautolú?”)

¹⁹ Ngāueʻaki hoʻo siolotó. Kuo foaki mai ʻe Sihova ʻa e malava ke tau sioloto atu kiate kitautolu ʻi he māmani foʻoú. ʻOku fakamatala ha tuofefine ʻe taha: “Naʻá ku fakamoleki ʻa e taimi lahi ʻaupito ʻi he sioloto atu kiate au ʻi he māmani foʻoú ʻo hangē ai ʻoku lava ke u nāmuʻi atu pē ʻa e ngaahi matalaʻi lose ʻi he Palataisí.” Sioloto atu ki he fetaulaki mo e kau tangata mo e kau fefine ʻo e tuí mei he taimi ʻo e Tohi Tapú. Ko hai ʻokú ke fakatuʻotuʻa atu ke fetaulaki mo iá? Ko e hā ʻa e ngaahi fehuʻi te ke ʻeke ange ki he tokotaha ko iá? Sioloto atu foki ki hoʻo toe fakataha mo ho ngaahi ʻofaʻanga kuo nau maté. Sioloto atu ki he ngaahi fakaikiiki ʻo e toe fakataha ko iá​—ko e fuofua meʻa te ke leaʻakí, ko e fāʻofua māfaná, ko e loʻimata ʻo e fiefiá.

20. Ko e hā ʻoku totonu ke tau fakapapauʻi ke faí?

²⁰ He fakamālō ē ko kitautolu ki he talaʻofa ʻa Sihova fekauʻaki mo e toetuʻú! ʻOku lava ke tau fakapapauʻi ko e talaʻofa ko ení ʻe hoko moʻoni, he ko Sihova ʻokú ne maʻu ʻa e holi mo e mālohi ke fakahoko ia. ʻOfa ke tau fakapapauʻi ke hanganaki fakaivimālohiʻi ʻetau tui ki he ʻamanaki mahuʻinga ko ení. ʻI he fai peheé, te tau ʻunuʻunu ofi ange ai ki he ʻOtuá ʻa ia, ko hono moʻoní, ʻokú ne talaʻofa mai ki he tokotaha taki taha ʻo kitautolu, ‘ʻE tuʻu hake ho ʻofaʻangá!’