1. Ko e hā ʻoku tau tali ai ʻi he ngaahi fakatahá?

 KO E HĀ ʻoku tau maʻu ai ʻa e ngaahi fakataha ʻa e fakatahaʻangá? Ko e ʻuhinga tefitó, ke fakahīkihikiʻi ʻa Sihova. (Saame 26:12; 111:1) ʻOku tau toe maʻu foki ʻa e ngaahi fakatahá koeʻuhí ke tau lava ʻo fefakalototoʻaʻaki lolotonga ʻa e ngaahi taimi faingataʻa ko ení. (1 Tes. 5:11) ʻI he taimi ʻoku tau hiki ai hotau nimá pea fai ha tali, ʻoku tau tokoni ai ke fakahoko ʻa e ongo meʻa ko iá.

2. Ko e hā ʻa e ngaahi faingamālie ʻoku tau maʻu ke tali ai ʻi heʻetau ngaahi fakatahá?

² ʻI he uike taki taha, ʻoku tau maʻu ʻa e ngaahi faingamālie ke tali ʻi heʻetau ngaahi fakatahá. Ko e fakatātaá, ʻi he ngaahi fakaʻosinga uiké, ʻe lava ke tau fai ha tali lolotonga ʻa e Ako Taua Leʻo ʻa e fakatahaʻangá. ʻI heʻetau fakataha lolotonga ʻa e uiké, te tau tali nai ʻi he Keli ki he Makakoloa Fakalaumālié, ko e Ako Tohi Tapu ʻa e Fakatahaʻangá, pea mo e ngaahi konga fetalanoaʻaki kehé.

3. Ko e hā ʻa e ngaahi pole te tau fehangahangai nai mo ia, pea ʻe lava fēfē ke tokoni ʻa e Hepelū 10:24, 25?

³ ʻOku tau loto kotoa ke fakahīkihikiʻi ʻa Sihova pea fakalototoʻaʻi ʻa hotau kaungālotú. Ka ʻi he taimi ʻoku tau fai ai ha tali, te tau fehangahangai nai mo ha ngaahi pole. Te tau ongoʻi hohaʻa nai fekauʻaki mo hono fai ha tali pe te tau holi vēkeveke nai ke fai ha tali ka ʻoku ʻikai ke faʻa ʻomai ke tau tali ʻo hangē ko ʻetau fakaʻamú. ʻE lava fēfē ke tau fekuki mo e ngaahi pole ko ení? ʻOku tau maʻu ha fakalika ki he talí ʻi he tohi ʻa e ʻapositolo ko Paulá ki he kau Hepeluú. ʻI he lāulea ki he mahuʻinga ʻo e fakataha fakatahatahá, naʻá ne pehē ʻoku totonu ke tau tokangataha  ki he “fefakalototoʻaʻaki.” (Lau ʻa e Hepelū 10:24, 25.) Te tau ongoʻi fiemālie ange ke fai ha tali, ʻi heʻetau ʻiloʻi ʻe lava ke fakalototoʻa ia ki he niʻihi kehe ʻi he kau fanongó naʻa mo ha fakahāhā faingofua pē ʻetau tuí. Pea kapau ʻoku ʻikai ke toutou ʻomai ke tau tali, ʻoku lava ke tau fiefia he ʻe maʻu ai ʻe he niʻihi kehe ʻi he fakatahaʻangá ʻa e faingamālie ke tali.​—1 Pita 3:8.

4. Ko e hā ʻa e poini ʻe tolu ʻe lāulea ki ai ʻi he kupu ko ení?

⁴ ʻI he kupu ko ení, te tau ʻuluaki lāulea ki he founga ʻe lava ke tau fefakalototoʻaʻaki ai ʻi ha fakatahaʻanga tokosiʻi ʻa ia ʻoku ʻikai fuʻu tokolahi ai ʻa e kau talí. Te tau sivisiviʻi leva ʻa e founga ke tau fefakalototoʻaʻaki ai ʻi ha fakatahaʻanga tokolahi ʻa ia ʻoku tokolahi ai ʻa e kau hiki nima ke talí. Fakaʻosí, te tau lāulea ki he ngaahi founga ʻe lava ke tau ʻai ai ʻa e kakano ʻetau talí ke fakalototoʻa moʻoni ki he niʻihi kehé.

5. ʻE lava fēfē ke tau fefakalototoʻaʻaki kapau ʻoku tokosiʻi ʻa e kau maʻu fakatahá?

⁵ ʻI ha fakatahaʻanga pe kulupu tokosiʻi, ʻoku ʻikai ke loko tokolahi ʻa e kau tali ke fili mei ai ʻa e tokotaha faiakó. ʻI he taimi ʻe niʻihi, ʻe fiemaʻu nai ke ne kiʻi tatali ki muʻa ke pole ha taha ke fai ha tali. ʻE hā ngali ʻe toe lōloa ange ʻa e fakatahá​—ʻa ia ʻe ʻikai ke fuʻu fakalototoʻa. Ko e hā ʻe lava ke ke faí? Loto-lelei ke hiki nima maʻu pē. ʻI hoʻo fai iá, te ke fakaʻaiʻai nai ai ʻa e niʻihi kehé ke nau kau lahi ange ki he fakatahá.

6-7. ʻE anga-fēfē nai haʻatau fakasiʻisiʻi ʻetau ongoʻi hohaʻá ʻi hono fai ha tali?

⁶ Kae fēfē kapau ʻokú ke ongoʻi manavasiʻi ʻi he fakakaukau atu pē ke ke fai ha talí? Ko e tokolahi ʻoku nau maʻu ʻa e ongoʻi tatau. Neongo ia, koeʻuhi ke hoko ʻo fakalototoʻa lahi ange ki ho fanga tokouá mo e fanga tuofāfiné, fēfē ke ke kumi ki ha ngaahi founga ke fakasiʻisiʻi hoʻo ongoʻi hohaʻa ʻi he talí? ʻE anga-fēfē nai haʻo fai ia?

⁷ ʻE ʻaonga nai ke ke fakamanatu ʻa e niʻihi ʻo e ngaahi fokotuʻu naʻe pulusi ʻi he ngaahi ʻīsiu ki muʻa ʻo e Taua Leʻo. b Ko e fakatātaá, teuteu lelei. (Pal. 21:5) Ko e lahi ange hoʻo alāanga mo e fakamatalá, ko e lahi ange ia hoʻo ongoʻi fiemālié pea loto-lelei ke fai ha talí. Pehē foki, ʻai hoʻo talí ke nounou. (Pal. 15:23; 17:27) ʻOku tokoni ʻa e tali nounoú ke fakasiʻisiʻi hoʻo hohaʻá. Ko ha tali nounou, mahalo ko ha sētesi pē ʻe taha pe ua, ʻe faingofua ange ia ke mahinoʻi ʻe ho fanga tokouá mo e fanga tuofāfiné ʻi ha tali lōloa mo ha ngaahi fakakaukau lahi. ʻI hono fai ha tali nounou ʻi he lea pē ʻaʻau, te ke fakahāhā ai naʻá ke teuteu lelei pea ʻokú ke mahinoʻi lelei ʻa e fakamatalá.

8. ʻOku anga-fēfē vakai mai ʻa Sihova ki heʻetau ngaahi feinga lelei tahá?

⁸ Kae fēfē kapau ʻokú ke ʻahiʻahiʻi ha niʻihi ʻo e ngaahi fokotuʻu ko ení kae kei ongoʻi hohaʻa pē ke fai ha tali laka hake he tuʻo tahá pe tuʻo ua? Fakapapauʻi ʻe houngaʻia ʻa Sihova ʻi hoʻo ngaahi feinga loto-moʻoni ke fai ʻa e meʻa ʻokú ke malavá. (Luke 21:1-4) Ko hono fai ho lelei tahá ʻoku ʻikai ʻuhinga iá ke ke ʻai koe ke ke ongoʻi mafasia. (Fil. 4:5) Fakapapauʻi ʻa e meʻa ʻokú ke lava ʻo faí, fokotuʻu ha taumuʻa ke fai ia, pea lotu ki ha loto ʻoku nonga. ʻI he kamatá, ko hoʻo taumuʻá nai ke fai pē ha tali nounou ʻe taha.

9. Ko e hā nai ha pole ʻoku malanga hake ʻi ha fakatahaʻanga tokolahi?

⁹ Kapau ʻoku tokolahi ʻa e kau malanga ʻi ho fakatahaʻangá, ʻe kehe nai ʻa e pole te ke fehangahangai mo iá. Mahalo ʻoku tokolahi ʻa e fanga tokoua mo e fanga tuofāfine ʻoku nau loto ke fai ha talí ʻo ʻikai faʻa fakatokangaʻi ʻa e taimi ʻokú ke hiki nima aí. Ko e fakatātaá, ko  Danielle kuó ne fiefia maʻu pē ʻi he tali ʻi he ngaahi fakatahá. c ʻOkú ne vakai ki ai ko e konga ia ʻene lotú, ko ha founga ia ke fakalototoʻaʻi ai ʻa e niʻihi kehé, pea ko ha founga ia ke toe fakamaʻu ai ʻa e ngaahi moʻoni ʻi he Tohi Tapú ki hono ʻatamaí tonu. Ka ʻi he taimi naʻá ne hiki ai ki ha fakatahaʻanga tokolahi ange, naʻe ʻikai ke faʻa ʻoange ke ne tali​—ʻi he taimi ʻe niʻihi naʻe halaʻatā ke ʻoange ke ne fai ha tali lolotonga ha fakataha kakato. “Naʻá ku loto-mamahi,” ko ʻene leá ia. “Naʻá ku ongoʻi ʻo hangē naʻe mole meiate au ha monuú. ʻI heʻene toutou hoko iá, ʻoku kamata ke ke fifili pe naʻe fai ʻosi fakakaukauʻi pē ia.”

10. ʻE anga-fēfē nai ʻetau fakalahi hotau faingamālie ke fai ha talí?

¹⁰ Kuó ke maʻu ha ongoʻi tatau mo Danielle? Kapau ko ia, ʻe fakataueleʻi nai koe ke ke foʻi pea fanongo ʻataʻatā pē ki he fakatahá. Kae ʻoua ʻe tuku ʻa e feinga ke fai ha talí. Ko e hā ʻe lava ke ke faí? ʻE ʻaonga nai ke ke teuteu ke lahi ʻa e ngaahi tali ki he fakataha taki taha. Pea kapau leva ʻoku ʻikai fili koe ke ke tali ʻi he kamataʻanga ʻo e akó, ʻe kei lahi pē ʻa e ngaahi faingamālie ke ke tali ʻi he toenga ʻo e fakatahá. ʻI he teuteu ki he Ako Taua Leʻo, fakakaukau ki he felāveʻi ʻa e palakalafi taki taha mo e kaveinga ʻo e kupú. Kapau te ke fai ia, ʻoku ngalingali te ke maʻu ha tali ʻi he kotoa ʻo e lēsoní. ʻIkai ko ia pē, te ke teuteu nai ke tali ʻi he ngaahi palakalafi ʻoku lāulea ai ki he ngaahi moʻoni loloto angé ʻa ia ʻoku faingataʻa ange ke fakamatalaʻí. (1 Kol. 2:10) Ko e hā hono ʻuhingá? Koeʻuhí ʻe tokosiʻi ange nai ʻa e niʻihi te nau pole ke tali lolotonga ʻa e konga ko ia ʻo e lēsoní. Kae fēfē, kapau ʻokú ke ngāueʻaki ʻa e ngaahi fokotuʻu ko ení, ka ʻoku ʻikai pē ke maʻu hao faingamālie ke tali ʻi he hili atu ha ngaahi fakataha? Te ke fakaofiofi nai ki he faiakó ki muʻa ʻi he fakatahá pea tala ange ʻa e fehuʻi te ke saiʻia ke talí.

11. Ko e hā ʻoku fakalototoʻaʻi mai ʻe he Filipai 2:4 ke tau faí?

¹¹ Lau ʻa e Filipai 2:4. ʻI hono fakamānavaʻi ʻa e ʻapositolo ko Paulá, naʻá ne fakalototoʻaʻi ʻa e kau Kalisitiané ke nau kumi ki he lelei ʻa e niʻihi kehé. ʻE lava fēfē ke tau ngāueʻaki ʻa e faleʻi ko iá lolotonga ʻa e fakatahá? ʻAki hono manatuʻi ko e niʻihi kehé, hangē pē ko kitautolú, ʻoku nau loto ke fai ha tali.

12. Ko e hā ha founga ʻe taha ke fakalototoʻaʻi ai ʻa e niʻihi kehé ʻi he fakatahá? (Sio foki ki he fakatātaá.)

 ¹² Fakakaukau ki ai ʻi he tuʻunga ko ení. ʻI he taimi ʻokú ke fetalanoaʻaki ai mo ho kaungāmeʻá, meʻa ní te ke fakamatala pē koe kae ʻikai pē ke tuku ange hano faingamālie ke lea? Ko hono moʻoní ʻikai! ʻOkú ke loto ke nau kau ʻi he fetalanoaʻakí. ʻI he tuʻunga meimei tatau, ʻi he ngaahi fakatahá, ʻoku tau loto ke fakaʻatā ʻa e tokolahi taha ʻe ala lavá ke nau tali. Ko hono moʻoní, ko e taha ʻi he ngaahi founga lelei taha ke fakalototoʻaʻi ai hotau fanga tokouá mo e fanga tuofāfiné ko hono ʻoange ha faingamālie ke fakahaaʻi ʻenau tuí. (1 Kol. 10:24) Tau lāulea angé ki he founga ʻe lava ke tau fai ai iá.

13. ʻE lava fēfē ke tau fakaʻatā ʻa e faʻahinga tokolahi ange ʻi he kau fanongó ke nau fai ha tali?

¹³ Ko e meʻa ʻe taha, ʻe lava ke tau tauhi ʻetau talí ke nounou, ʻo fakaʻatā ai ʻa e taimi ke tokolahi ange ʻa e faʻahinga ke talí. Ko e kau mātuʻá mo e kau malanga taukei kehé ʻe lava ke nau fokotuʻu ʻa e faʻifaʻitakiʻangá. Neongo kapau ʻokú ke fai ha tali nounou, fakaʻehiʻehi mei he lave ki ha ngaahi poini lahi. Kapau te ke taliʻi kotoa ʻa e palakalafí, ʻe toe siʻisiʻi ange ʻa e meʻa ke lave ki ai ʻa e niʻihi kehé. Ko e fakatātaá, ʻi he palakalafi ko ení, ʻoku ʻomai ai ha fokotuʻu ʻe ua​—tauhi ʻa e talí ke nounou pea fakaʻehiʻehi mei he lave ki ha ngaahi poini lahí. Kapau ko koe ʻoku fuofua ʻoatu ke ke tali ʻi he palakalafi ko ení, fēfē ke ke lave pē ki ha poini ʻe taha?

14. Ko e hā ʻe lava ke ne tokoniʻi kitautolu ke fili pe ʻe tuʻo fiha ʻetau hiki nimá? (Sio foki ki he fakatātaá.)

¹⁴ Ngāueʻaki ʻa e fakapotopotó ʻi he fili pe ʻe tuʻo fiha hoʻo pole ke fai ha talí. Kapau ʻoku tau toutou hiki nima, te tau ʻai nai ʻa e faiakó ke ne ongoʻi ʻoku fiemaʻu ke ne toutou ʻomai ʻa e talí kiate kitautolu neongo kapau ʻoku teʻeki ai ke maʻu ʻe he niʻihi kehé ha faingamālie ke tali. ʻE lava ke ʻai heni ʻa e niʻihi kehé ke nau loto-siʻi ʻo ʻikai hiki honau nimá.​—Tml. 3:7.

15. (a) ʻOku totonu ke fēfē ʻetau fakafeangaí kapau ʻoku ʻikai ʻomai ke tau tali? (e) ʻE lava fēfē ke fakahāhā ʻe he kau faiakó ʻa e tokanga ki he taha kotoa? (Sio ki he puha “ Kapau ʻOkú Ke Faiako.”)

¹⁵ ʻI he taimi ʻoku tokolahi ai ʻa e kau malanga ʻoku hiki nima lolotonga ha ako, heʻikai  nai ke tau toutou tali ʻo hangē ko ʻetau fakaʻamú. ʻI he taimi ʻe niʻihi, ko e faiakó heʻikai nai malava ke ne ʻomai ke tau tali. ʻE lava ke fakalotomamahi ia, ka ʻoku totonu ke tau feinga ke ʻoua ʻe mamahingofua ʻi he ʻikai ʻomai ke tau talí.​—Tml. 7:9.

16. ʻE anga-fēfē nai haʻatau fakalototoʻaʻi ʻa e faʻahinga ʻoku nau fai ha talí?

¹⁶ Kapau ʻoku ʻikai malava ke ke toutou tali ʻo hangē ko ia ʻokú ke fakaʻamu ki aí, fēfē ke ke fanongo lelei ki he tali ʻa e niʻihi kehé pea ʻi he tuku ʻa e fakatahá, fakaongoongoleleiʻi kinautolu ki heʻenau talí? Ko hoʻo fakaongoongoleleiʻi ko eni ho fanga tokouá mo e fanga tuofāfiné ʻe hoko ʻo fakalototoʻa tatau tofu pē mo e tali naʻá ke mei faí. (Pal. 10:21) Ko hono fai ʻa e fakaongoongoleleí ko ha toe founga ia ʻe taha ʻe lava ke tau fefakalototoʻaʻaki ai.

17. (a) ʻE lava fēfē ke tokoniʻi ʻe he ngaahi mātuʻá ʻenau fānaú ke teuteu ha ngaahi tali feʻungamālié? (e) Fakatatau ki he vitioó, ko e hā ʻa e sitepu ʻe fā ke teuteu ai ha tali? (Sio foki ki he fakamatala ʻi laló.)

¹⁷ Ko e hā mo ha toe founga ʻe lava ke tau fefakalototoʻaʻaki ai ʻi heʻetau fakatahá? Kapau ko ha mātuʻa tauhi fānau koe, tokoniʻi hoʻo fānaú ke teuteu ʻa e ngaahi tali ʻo fakatatau ki honau taʻú. (Māt. 21:16) ʻI he taimi ʻe niʻihi, ko e ngaahi ʻīsiu mafatukituki, hangē ko e palopalema ʻi he nofo malí pe tuʻunga fakaeʻulungāngá, ʻoku lāulea ki ai ʻi ha ako, kae mahalo ʻe  ʻi ai ha palakalafi ʻe taha pe ua ʻe lava ke tali ai ʻa e kau leká. Pehē foki, tokoniʻi hoʻo fānaú ke nau mahinoʻi ʻa e ʻuhinga ʻoku ngalingali heʻikai ʻoange ai ke nau tali ʻi he taimi kotoa ʻoku nau hiki nima aí. Ko hono fakamatalaʻi ení ʻe lava ke taʻofi ai kinautolu mei he loto-mamahi ʻi he taimi ʻoku ʻoange ai ke tali ʻa e niʻihi kehé kae ʻikai ko kinautolú.​—1 Tīm. 6:18. d

18. ʻE lava fēfē ke tau fakaʻehiʻehi mei hono tohoakiʻi mai ʻa e tokangá kiate kitautolu ʻi he taimi ʻoku tau tali aí? (Palōveepi 27:2)

¹⁸ Ko kitautolu kotoa ʻe lava ke tau teuteu ʻa e ngaahi tali fakatupu langa hake ʻoku fakalāngilangiʻi ai ʻa Sihova pea fakalototoʻa ki hotau kaungā-Kalisitiané. (Pal. 25:11) Neongo te tau faʻa lave nounou ki ha hokosia fakafoʻituitui, ʻoku totonu ke tau fakaʻehiʻehi mei he talanoa ʻo fuʻu tōtuʻa ʻo fekauʻaki mo kitautolu tonu. (Lau ʻa e Palōveepi 27:2; 2 Kol. 10:18) ʻI hono kehé, ʻoku tau feinga mālohi ke fakahanga ʻa e tokangá kia Sihova, ko ʻene Folofolá, pea mo ʻene kakaí fakalūkufua. (Fkh. 4:11) Ko e moʻoni, kapau ko e fehuʻi ki ha palakalafi ʻoku fakaafeʻi mai ai ke tau fai ha fakamatala fakafoʻituitui, ʻoku feʻungamālie ke fai pehē. Ko ha fakatātā ʻo e meʻá ni ʻe lave ki ai ʻa e palakalafi hono hoko ʻo e kupu ko ení.

19. (a) Ko e hā ʻa e olá ʻi heʻetau fakahāhā ʻa e tokanga ki he faʻahinga kotoa ʻoku nau maʻu ʻa e fakatahá? (Loma 1:11, 12) (e) Ko e hā ʻokú ke houngaʻia fakafoʻituitui ai fekauʻaki mo e tali ʻi he fakatahá?

¹⁹ Neongo ʻoku ʻikai ha ngaahi lao pau ki he founga ke tau fai ai ha talí, ko kitautolu kotoa ʻe lava ke tau feinga mālohi ke fai ha tali fakalototoʻa. ʻE ʻuhinga nai eni ko hono toutou fai ha tali. Pe ʻe ʻuhinga nai iá ko e fiemālie pē ʻi heʻetau maʻu ha faingamālie ke fai ha tali pea fiefia ʻi he houngaʻia ʻa e niʻihi kehé ʻi hono maʻu ʻa e monū ko iá ʻo hangē pē ko kitautolú. ʻI he tokangataha ki he lelei ʻa e niʻihi kehe ʻi he ngaahi fakataha ʻa e fakatahaʻangá, ʻe lava ke tau fiefia kotoa ʻi heʻetau “fefakalototoʻaʻaki.”​—Lau ʻa e Loma 1:11, 12.