1. Ko e hā ʻa e palataisi fakalaumālie, pea ko e hā ʻoku totonu ke tau fakapapauʻi ke faí?

 ʻOKU ʻi ai ha palataisi ʻi he māmaní ʻi he ʻahó ni ʻoku fonu ʻi he kakai ʻe laui miliona. ʻOku nau femoʻuekina ʻi he ngaahi ngāue lelei pea maʻu ʻa e nonga moʻoni. Ko e faʻahinga ʻoku nau ʻosi ʻi he palataisi ko ení ʻoku nau fakapapauʻi ke ʻoua ʻaupito ʻe mavahe mei ai. ʻOku nau loto foki ke hoko ʻa e kakai tokolahi taha ʻe ala lavá ʻo kau fakataha mo kinautolu ʻi he ʻātakai makehe ko ení. Ko e hā ia? Ko e palataisi fakalaumālié! a

2. Ko e hā ʻoku fakaofo fekauʻaki mo e palataisi fakalaumālié?

² Ko e meʻa fakaofó, kuo faʻu ʻe Sihova ha ʻātakai nonga ʻi he lotolotonga ʻo ha māmani kuo liliu ʻe Sētane ke hoko ko ha feituʻu ʻoku fonu tāufehiʻa, fulikivanu mo fakatuʻutāmaki. (1 Sio. 5:19; Fkh. 12:12) Ko hotau ʻOtua ʻofá ʻokú ne ʻafioʻi ʻa e ngaahi nunuʻa fakatupu maumau ʻo e fokotuʻutuʻu ko ení pea tokonaki mai ʻa e maluʻanga ʻoku tau fiemaʻú koeʻuhí ke tau lakalakaimonū fakalaumālie ai. ʻOku fakamatalaʻi ʻi heʻene Folofolá ko e palataisi fakalaumālié ko ha “hūfangaʻanga” malu pea ko ha “ngoue mohu vaí.” (ʻAi. 4:6; 58:11) ʻI he tāpuaki ʻa Sihová, ko e faʻahinga ʻoku nofo ʻi he palataisi ko ení ʻoku malava ke nau tupu ʻāfaʻafa ʻi he lolotonga ʻa e ngaahi ʻaho fakaʻosi faingataʻa ko ení.—ʻAi. 54:14; 2 Tīm. 3:1.

3. Naʻe anga-fēfē hono fakahoko ʻi he kuonga muʻá ʻa e ʻAisea vahe 65?

³ Fakafou ʻi he palōfita ko ʻAiseá, naʻe fakamatalaʻi ʻe Sihova ʻa e tuʻunga ʻe ʻi ai ʻa e moʻui ʻa e faʻahinga te nau nofo ʻi he palataisi fakalaumālié. ʻE lava ke ke maʻu ʻa e fakamatala ko ení ʻi he ʻAisea vahe 65, ʻa ia naʻe ʻuluaki fakahoko ʻi he 537 K.M. ʻI he taimi ko iá, naʻe tuku ange ʻa e kau Siu fakatomalá mei he nofo pōpula ʻi Pāpiloné pea naʻa nau foki ki honau fonua tupuʻangá. Naʻe tāpuakiʻi ʻe  Sihova ʻene kakaí pea tokoniʻi kinautolu ke nau ʻai ke toe fakaʻofoʻofa ʻa e kolo kuo maumau ko Selusalemá pea toe langa ʻa hono temipalé ko e senitā ʻo e lotu moʻoní ʻi ʻIsileli.—ʻAi. 51:11; Sāk. 8:3.

4. ʻOku anga-fēfē hono fakahoko ʻi onopooni ʻa e ʻAisea vahe 65?

⁴ Ko hono fakahoko hono ua ʻo e kikite ʻa ʻAiseá naʻe kamata ʻi he 1919 T.S. ʻi he taimi naʻe fakatauʻatāinaʻi ai ʻa e kau lotu ʻa Sihova ʻi onopōní mei he nofo pōpula ki Pāpilone ko e Lahí. Pea ko e palataisi fakalaumālié leva naʻe kamata ke mafola atu ki he kotoa ʻo e māmaní. Ko e kau fanongonongo faivelenga ʻo e Puleʻangá naʻa nau fokotuʻu ʻa e ngaahi fakatahaʻanga lahi pea fakatupu ʻa e fua fakalaumālie. Ko e kau tangata mo e kau fefine naʻa nau fakahāhā ʻa e ngaahi hehema anga-fakamālohi mo anga-fakamanu ki muʻá ʻoku nau “kofuʻaki ʻa e angaʻitangata foʻou ʻa ia naʻe fakatupu ʻo fakatatau ki he finangalo ʻo e ʻOtuá.” (ʻEf. 4:24) Ko e moʻoni, ko e lahi ʻo e ngaahi tāpuaki naʻe fakamatalaʻi ʻe ʻAiseá ʻe fakahoko moʻoni ʻi he māmani foʻou ʻi he kahaʻú. Ka naʻa mo e ʻi he taimí ni ʻoku ʻi ai ʻa e ngaahi ʻaonga fakakoloa ʻoku tau fiefia ai. Tau vakai angé ki he anga ʻo e kaunga kiate kitautolu ʻa e palataisi fakalaumālie ko ení pea mo e ʻuhinga ʻoku totonu ke ʻoua ʻaupito te tau mavahe mei aí.

ANGA ʻO E ONGOʻI ʻA E FAʻAHINGA ʻI HE PALATAISI FAKALAUMĀLIÉ

5. Hangē ko e talaʻofa ʻi he ʻAisea 65:​13, ko e hā ʻoku tau maʻu ʻi loto ʻi he palataisi fakalaumālié?

⁵ Moʻui lelei mo fakaivifoʻou. ʻOku fakahaaʻi māʻalaʻala ʻi he kikite ʻa ʻAiseá ʻa e kehekehe lahi ʻi he tuʻunga ʻoku ʻi ai ʻa e moʻui ʻa e faʻahinga ʻi loto ʻi he palataisi fakalaumālié pea mo e tuʻunga ʻoku ʻi ai ʻa e moʻui ʻa e faʻahinga ʻi tuʻá. (Lau ʻa e ʻAisea 65:13.) ʻOku fakalato hulu fau ʻe Sihova ʻa e ngaahi fiemaʻu fakalaumālie ʻa ʻene kau lotú. ʻOku tau maʻu ʻa hono laumālie māʻoniʻoní, ko ʻene Folofola tohí, pea mo e meʻakai fakalaumālie feʻunga koeʻuhí ke tau lava ʻo “kai, . . . inu, . . . [mo] fiefia.” (Fakafehoanaki mo e Fakahā 22:17.) Ka ʻoku kehe ʻaupito ʻa e tuʻunga ʻoku ʻi ai ʻa e faʻahinga ʻi tuʻa ʻi he palataisi fakalaumālié, ʻoku nau “fiekaia . . . , fieinua . . . , [pea nau] mā.” ʻOku ʻikai ke fakalato ʻenau ngaahi fiemaʻu fakalaumālié.—ʻĒmosi 8:11.

6. ʻOku anga-fēfē hono fakamatalaʻi ʻi he Sioeli 2:​21-24 ʻetau ngaahi tokonaki fakalaumālié, pea ʻe lava fēfē ke tau maʻu ʻaonga mei ai?

⁶ ʻI he kikite ʻa Sioelí naʻá ne ngāueʻaki ʻa e ngaahi meʻa tefito ʻi he moʻuí hangē ko e uite, uaine mo e lolo ʻōlivé ke fakahaaʻi ʻa e nima-homo ʻa Sihova ke tokonaki maʻa ʻEne kakaí ʻa e meʻa ʻoku nau fiemaʻú, ʻo kau ai ʻa e meʻakai fakalaumālié. (Sioeli 2:​21-24) ʻOkú ne fai ia fakafou ʻi he Tohi Tapú pea mo ʻetau ʻū tohi Fakatohitapú, ko ʻetau uepisaití, pehē foki ʻi heʻetau ngaahi fakatahá, ʻasemipilií mo e fakataha-lahí. ʻOku lava ke tau maʻu ʻinasi mei he ngaahi tokonaki fakalaumālié ʻi he ʻaho kotoa, pea ko hono olá, ʻoku tau ongoʻi moʻui lelei ange ai mo fakaivifoʻou lahi ange.

7. Ko e hā ʻokú ne ʻai ke ʻi ha “tuʻunga lelei [hotau] lotó”? (ʻAisea 65:14)

⁷ Fiefia mo loto-topono. Ko e kakai ʻa e ʻOtuá ʻoku lava ke nau “kaila fiefia” koeʻuhí ʻoku fonu mahuohua honau lotó ʻi he houngaʻia. (Lau ʻa e ʻAisea 65:14.) Ko e ngaahi moʻoni fakatupu langa hake mo e talaʻofa fakafiemālie ʻi he Folofola ʻa e ʻOtuá pea mo ʻetau ʻamanaki mālohi makatuʻunga ʻi he feilaulau huhuʻi ʻa Kalaisí ʻokú ne ʻai ke ʻi ha “tuʻunga lelei [hotau] lotó.” Ko e talanoa fekauʻaki mo e ngaahi meʻa ko ení mo hotau fanga tokoua mo e fanga tuofāfine fakalaumālié ʻokú ne ʻai kitautolu ke tau fiefia moʻoni!—Saame 34:8; 133:​1-3.

8. Ko e hā ʻa e ongo tafaʻaki tefito ʻo e palataisi fakalaumālié?

⁸ Ko e ʻofa mo e fāʻūtaha ʻi he lotolotonga ʻo e kakai ʻa Sihová ʻa e ongo tafaʻaki tefito ʻo e palataisi fakalaumālié. Ko e “fakamaʻu [ko eni] ʻo e fāʻūtahá” ʻokú ne ʻomai ʻa e foʻi fakakaukau ʻo e tuʻunga ʻe ʻi ai ʻa e moʻuí ʻi he māmani foʻoú, ʻa ia ʻe maʻu ai ʻe he kau sevāniti ʻa Sihová ʻa e ʻofa  mo e fāʻūtaha ʻoku toe lahi ange ia ʻi he ʻahó ni. (Kol. 3:14) ʻOku lave ha tuofefine Kalisitiane ki he meʻa naʻá ne fakatokangaʻi fekauʻaki mo e kakai ʻa Sihová ʻi heʻene fuofua fetaulaki mo kinautolú: “Naʻe ʻikai ke u ʻiloʻi ʻa e founga ke fiefia aí, naʻa mo e ʻi hoku fāmilí. Ko e fuofua taimi naʻá ku sio ai ki hono fakahāhā ʻa e ʻofá ko e ʻi he lotolotonga ʻo e Kau Fakamoʻoni ʻa Sihová.” Ko ha taha pē ʻokú ne loto ke fiefia mo fiemālie moʻoni ʻoku fiemaʻu ke ne ʻahia ʻa hotau palataisi fakalaumālié. Tatau ai pē pe ko e hā ʻa e fakakaukau ʻa e māmani ko ení ki he kau sevāniti ʻa Sihová, ʻoku nau maʻu ha hingoa pe ongoongo fakangeingeia, fakataha mo hono fāmili fakaeʻunivēsí.—ʻAi. 65:15.

9. Ko e hā ʻoku talaʻofa mai ʻi he ʻAisea 65:​16, 17 fekauʻaki mo e ngaahi faingataʻa ʻi he moʻuí?

⁹ Fiemālie mo nonga. ʻOku pehē ʻi he ʻAisea 65:14 ko e faʻahinga ʻoku nau fili ke nofo pē ʻi tuʻa ʻi he palataisi fakalaumālié ʻoku nau “tangi koeʻuhí ko e mamahi ʻa [honau] lotó [pea] tangilāulau koeʻuhí ko ha laumālie mafesi.” Kae fēfē ʻa e ngaahi meʻa kotoa kuó ne fakatupunga ʻa e kakai ʻa e ʻOtuá ke nau mamahi mo faingataʻaʻiá? Faai atu pē, ko e ngaahi meʻa ko iá “ʻe ngalo [pea] fufū ia” mei he ʻao ʻo e ʻOtuá. (Lau ʻa e ʻAisea 65:​16, 17.) ʻE toʻo atu ʻe Sihova ʻetau ngaahi faingataʻaʻiá, pea ʻi he faai atu ʻa e taimí heʻikai ʻaupito ke tau toe manatua ʻa e ngaahi mamahi ko iá.

10. Ko e hā ʻokú ke ongoʻi ai ko ha tāpuaki ke feohi mo e fanga tokoua mo e fanga tuofāfine Kalisitiané? (Sio foki ki he fakatātaá.)

¹⁰ Naʻa mo e ʻi he taimí ni, ʻoku tau ongoʻi mātuʻaki nonga ke ʻi heʻetau ngaahi fakataha faka-Kalisitiané, ʻa ia ʻoku tau ongoʻi fiemālie ai pea tuku ki tafaʻaki ʻa e ngaahi loto-mafasia ʻo e māmani fulikivanu ko ení. ʻOku tau tokoni ki he nonga ʻa hotau ʻātakai fakalaumālié ʻi heʻetau fakahāhā ʻa e ʻofá, fiefiá, melinó, anga-leleí mo e anga-maluú ʻa ia ʻoku kau ʻi he fua ʻo e laumālie ʻo e ʻOtuá. (Kal. 5:​22, 23) He tāpuaki ē kiate kitautolu ke kau ʻi he kautaha ʻa e ʻOtuá! Ko e faʻahinga ʻoku nau nofo maʻu ʻi he palataisi fakalaumālié te nau sio ki hono fakahoko kakato ʻa e talaʻofa ʻa e ʻOtuá ki ha “ngaahi langi foʻou mo ha māmani foʻou.”

11. Fakatatau ki he ʻAisea 65:​18, 19, ʻoku totonu ke fēfē hono tākiekina kitautolu ʻe he palataisi fakalaumālie kuo fakatupu ʻe Sihová?

¹¹ Houngaʻia mo fiefia. ʻOku hoko atu ʻa ʻAisea ke fakahaaʻi ʻa e ʻuhinga ʻoku tau maʻu ai ʻa e ʻuhinga kotoa ke “mavava pea fiefia” ʻi he palataisi fakalaumālié. Ko e ʻātakai ko ení ko ha fakatupu ia ʻa Sihova. (Lau ʻa e ʻAisea 65:​18, 19.) Tāneʻineʻi ke ne ngāueʻaki kitautolu ke tataki ʻa e kakaí ki tuʻa mei he ngaahi kautaha pakukā fakalaumālie ʻo e māmani motuʻa ko ení pea ʻomi ki hotau ʻātakai fakalaumālie fakaʻofoʻofá! ʻOku tau fiefia ʻi he ngaahi tāpuaki ʻoku tau maʻu koeʻuhi  ko e kau ki he moʻoní, pea ʻoku ueʻi ai kitautolu ke talanoa ki he niʻihi kehé fekauʻaki mo ia.—Sel. 31:12.

12. ʻOku fēfē hoʻo ongoʻi fekauʻaki mo e talaʻofa ʻi he ʻAisea 65:​20-24, pea ko e hā hono ʻuhingá?

¹² ʻOku tau houngaʻia foki mo fiefia ʻi he ʻamanaki ʻoku tau maʻu ʻi he tuʻunga ko e faʻahinga ʻoku nofo ʻi he palataisi fakalaumālié. Fakakaukau atu pē ki he meʻa kotoa te tau sio ki ai mo fai ʻi he māmani foʻou ʻa e ʻOtuá! ʻOku talaʻofa ʻe he Tohi Tapú: “ʻE ʻikai toe ʻi ai ha valevale . . . ʻe siʻi ʻa e ngaahi ʻaho ʻo ʻene moʻuí, pea ko e tangata taʻumotuʻá ʻe moʻui aʻuaʻu.” Te tau “langa fale pea nofo ai [pea] tō ngoue kālepi pea kai ʻa hono fuá.” “ʻE ʻikai taʻeʻaonga ʻa [ʻetau] fakaongosiá” koeʻuhí ʻe “faitāpuekina ʻe Sihova” kitautolu. ʻOkú ne talaʻofa mai ha moʻui fiemālie mo malu fakataha mo ha taumuʻa moʻoni. “Naʻa mo e ki muʻa ke nau uí,” te ne ʻiloʻi ʻa e ngaahi fiemaʻu ʻa e tokotaha taki taha pea “fakatōliʻa ʻa e holi ʻa e meʻamoʻui kotoa.”—ʻAi. 65:​20-24; Saame 145:16.

13. ʻOku anga-fēfē hono fakamatalaʻi ʻi he ʻAisea 65:25 ʻa e ngaahi liliu ʻoku fai ʻe he kakaí ʻi heʻenau moʻuí ʻi heʻenau kamata tauhi kia Sihová?

¹³ Melino mo e malu. ʻI he tokoni ʻa e laumālie ʻo e ʻOtuá, ko e tokolahi naʻa nau anga-fakamanu ki muʻá kuo nau fai ha ngaahi liliu fakaofo ʻi heʻenau moʻuí. (Lau ʻa e ʻAisea 65:25.) Kuo nau ngāue mālohi ke taʻakifuʻu atu ʻa ʻenau ngaahi tōʻonga kovi ki muʻá. (Loma 12:2; ʻEf. 4:​22-24) Ko e moʻoni, ko e kakai ʻa e ʻOtuá ʻoku nau kei taʻehaohaoa, ko ia te tau hokohoko atu ke fai ʻa e ngaahi fehālaaki. Kae kehe, kuo fakafāʻūtahaʻi ʻe Sihova ʻa e “faʻahinga kakai kotoa pē” ʻi ha haʻi taʻealamamotu ʻo e ʻofa mo e melino. (Tai. 2:11) Ko ha mana eni ʻa ia ko e ʻOtua māfimafi-aoniú pē ʻe lava ke ne fakahokó!

14. Kuo anga-fēfē hono fakamoʻoniʻi ʻa e ʻAisea 65:25 ʻi he tuʻunga ʻo ha tokoua ʻe taha?

¹⁴ ʻE lava moʻoni ke liliu ʻe he kakaí ʻa honau angaʻitangatá? Fakakaukau ki he hokosia ko ení. Ko ha kiʻi talavou naʻe toutou tuku pilīsone ʻi hono taʻu 20 naʻá ne kau lahi ʻi he ʻulungaanga taʻetāú mo e anga-fakamālohí. Naʻe tuku pilīsone ia koeʻuhi ko ʻene kaihaʻa meʻalele, hae fale mo e ngaahi hia mafatukituki kehe. Naʻá ne mateuteu ke fuhu mo ha taha pē. ʻI heʻene fuofua fanongo ki he moʻoni mei he Tohi Tapú pea kamata maʻu ʻa e fakataha ʻa e Kau Fakamoʻoni ʻa Sihová, naʻá ne tuipau kuó ne maʻu ha taumuʻa ʻi he moʻuí, ʻa ia ke lotu kia Sihova ʻi he palataisi fakalaumālié. Ki muʻa ke hoko ko ha Fakamoʻoni ʻosi papitaisó, naʻá ne faʻa fakakaukau ki he anga ʻo e kaunga ʻa e ʻAisea 65:25 kiate iá. Naʻá ne liliu mei he hangē ko ha tokotaha anga-fakamālohi hangē ha laioné, ʻo hoko ko ha tokotaha fakamelino hangē ha lamí.

15. Ko e hā ʻoku tau loto ai ke fakaafeʻi mai ʻa e niʻihi kehé ke kau fakataha mo kitautolu ʻi he palataisi fakalaumālié, pea ʻe lava fēfē ke tau fai ia?

¹⁵ ʻOku kamataʻaki ʻa e ʻAisea 65:13 ʻa e fanongonongo: “Ko e folofola eni ʻa e ʻEiki Hau ko Sihová.” ʻOku fakaʻosiʻaki ʻa e veesi 25 ʻa e ngaahi lea “ko e folofola ia ʻa Sihová.” Ko ʻene ngaahi foʻi folofolá ʻoku hoko moʻoni maʻu pē. (ʻAi. 55:​10, 11) Ko e palataisi fakalaumālié kuo ʻosi hoko moʻoni. Kuo fakatupu ʻe Sihova ha fetokouaʻaki ʻoku makehe moʻoni. ʻI he haʻohaʻonga ʻo ʻene kakaí, ʻoku lava ke tau maʻu ai ha melino pea mo ha feituʻu maʻuiʻui mo malu ʻi ha māmani anga-fakamālohi. (Saame 72:7) Koeʻuhi ko e ngaahi ʻuhinga ko ení, ʻoku tau loto ai ke tokoniʻi ʻa e tokolahi taha ʻe ala lavá ke kau fakataha mo kitautolu ʻi heʻetau fetokouaʻaki faka-Kalisitiané. ʻE lava ke tau fai eni ʻaki ʻa e tokangataha ki he ngaohi ākongá.—Māt. 28:​19, 20.

FOUNGA KE TOHOAKIʻI MAI AI ʻA E NIʻIHI KEHÉ KI HE PALATAISI FAKALAUMĀLIÉ

16. ʻOku anga-fēfē hono tohoaki mai ʻa e kakaí ki he palataisi fakalaumālié?

¹⁶ Ko kitautolu taki taha ʻoku tau maʻu ha ngafa mahuʻinga ke fakahoko ʻi hono ʻai ʻa e palataisi fakalaumālié ke fakamānako ki he niʻihi kehé. ʻE lava ke tau fakahoko ʻa e ngafa ko ení kapau te tau faʻifaʻitaki kia Sihova. ʻOku ʻikai ke ne toho  fakamālohiʻi mai ʻa e kakaí ki heʻene kautahá. ʻI hono kehé, ʻokú ne “tohoaki” anga-fakaalaala mai ʻa e kakaí kiate ia. (Sione 6:44; Sel. 31:3) Ko e kakai loto-totonu ʻoku nau ako fekauʻaki mo e ngaahi ʻulungaanga anga-ʻofa mo fakamānako ʻo Sihová ʻoku tohoakiʻi taʻealataʻofi kinautolu kiate ia. ʻE lava fēfē ke tau tohoakiʻi mai ʻa e kakaí ki he palataisi fakalaumālié ʻaki hotau ngaahi ʻulungaanga leleí mo e tōʻonga leleí?

17. ʻE lava fēfē ke tau tohoakiʻi mai ʻa e niʻihi kehé ki he palataisi fakalaumālié?

¹⁷ Ko e founga ʻe taha ʻe lava ke tau tohoakiʻi mai ai ʻa e niʻihi kehé ki he palataisi fakalaumālié ko ʻetau fakafeangai ki hotau kaungālotú ʻi he ʻofa mo e anga-lelei. ʻI he maʻu ʻe he faʻahinga foʻoú ʻetau ngaahi fakatahá, ʻoku tau loto ke nau maʻu ʻa e fakamulituku tatau mo ia naʻe maʻu ʻe he kau taʻetui ʻoku ngalingali naʻa nau maʻu ʻa e ngaahi fakataha ʻi Kolinitō ʻo e kuonga muʻá. Naʻa nau kalanga: “ʻOku ʻiate kimoutolu moʻoni ʻa e ʻOtuá.” (1 Kol. 14:​24, 25; Sāk. 8:23) Ko ia kuo pau ke hokohoko atu ʻetau talangofua ki he faleʻi ke “nofo femelinoʻaki.”—1 Tes. 5:13.

18. Ko e hā te ne tohoakiʻi mai nai ʻa e kakaí ki heʻetau kautahá?

¹⁸ ʻOku totonu ke tau feinga maʻu pē ke vakai ki hotau fanga tokoua mo e fanga tuofāfine Kalisitiané ʻo hangē ko e vakai ʻa Sihova kiate kinautolú. ʻOku tau fai pehē ʻaki ʻa e tokangataha ki honau ngaahi ʻulungaanga leleí kae ʻikai ko ʻenau ngaahi taʻehaohaoá, ʻa ia ʻe faai atu pē ʻo puli. ʻE lava ke tau fakaleleiʻi ha faʻahinga fetōkehekeheʻaki pē ʻi hotau vahaʻá ʻi ha laumālie ʻo e ʻofa ʻaki ʻa e hoko maʻu pē “ʻo feangaleleiʻaki, manavaʻofa kaungāongoʻi, ʻo fefakamolemoleʻaki mātuʻaki loto-lelei.” (ʻEf. 4:32) ʻE tohoakiʻi mai leva ʻe he palataisi fakalaumālié ʻa e kakai ʻoku nau loto ke fakafeangai kiate kinautolu ʻi ha founga meimei tatau. b

 NOFO ʻI LOTO ʻI HE PALATAISI FAKALAUMĀLIÉ

19. (a) Hangē ko ia ʻoku hā ʻi he puha “ Naʻa Nau Mavahe pea Toe Foki Mai,” ko e hā naʻe leaʻaki ʻe he niʻihi ʻi he hili ʻenau toe foki mai ki he palataisi fakalaumālié? (e) Ko e hā ʻoku totonu ke hoko ko ʻetau fakapapaú? (Sio foki ki he fakatātaá.)

¹⁹ He houngaʻia ē ko kitautolu ʻi hotau palataisi fakalaumālié! ʻOku fakaʻofoʻofa ange ia ʻi ha toe taimi ki muʻa, pea ʻoku nofoʻi ia ʻe he faʻahinga ʻoku nau fakahīkihikiʻi ʻa Sihova ʻo tokolahi ange ia ʻi ha toe taimi ki muʻa. ʻOfa ke tau houngaʻia taʻengata ʻi he palataisi kuo fakatupu ʻe Sihova maʻa kitautolú. Ko ha taha pē ʻokú ne loto ke hoko ʻo fakaivifoʻou, fiemālie, nonga mo malu kuo pau ke ne hū ki loto ki he palataisi fakalaumālié pea ʻoua ʻaupito ʻe mavahe mei ai! Kae tokanga, koeʻuhí ʻoku fai ʻe Sētane hono lelei tahá ke tauheleʻi kitautolu ke tau mamaʻo mei ai. (1 Pita 5:8; Fkh. 12:9) Kuo pau ke ʻoua te tau fakaʻatā ia ke ne lavameʻa. Tau feinga tōtōivi ke maluʻi ʻa e fakaʻofoʻofa, maʻa mo e melino ʻa e palataisi fakalaumālié.