1. Naʻe anga-fēfē hono fokotuʻutuʻu maau ʻa e kakai ʻa Sihová ʻi he ʻuluaki senitulí?

 ʻI HA taimi pē ʻoku ʻoange ai ʻe Sihova ha vāhenga-ngāue ki heʻene kakaí, ʻokú ne ʻamanekina ke nau fakahoko ia ʻi ha founga ʻoku fokotuʻutuʻu maau. (1 Kol. 14:33) Ko e fakatātaá, ko e finangalo ia ʻo e ʻOtuá ke malangaʻi ʻa e ongoongo leleí ʻi he kotoa ʻo e māmani kuo nofoʻí. (Māt. 24:14) Kuo fokotuʻu ʻe Sihova ʻa Sīsū ke ne tokangaʻi ʻa e ngāue ko iá. Kuo fakapapauʻi ʻe Sīsū ke fakahoko ia ʻi ha founga ʻoku fokotuʻutuʻu maau. ʻI he ʻuluaki senitulí, ʻi he taimi naʻe fokotuʻu ai ʻa e ngaahi fakatahaʻangá ʻi he ngaahi feituʻu kehekehe, naʻe fakanofo ʻa e kau mātuʻá ke ʻoatu ʻa e fakahinohino pea takimuʻa. (Ngā. 14:23) ʻI Selusalema ko ha kulupu tefito ʻo e kau mātuʻá, ʻa ia naʻe faʻuʻaki ʻa e kau ʻapositoló pea mo e kau tangata taʻumotuʻa angé, naʻa nau fai ʻa e ngaahi fili pau ʻa ia naʻe fiemaʻu ke muimui ki ai ʻa e ngaahi fakatahaʻangá kotoa. (Ngā. 15:2; 16:4) Ko e ola ʻenau talangofua ki he ngaahi fakahinohino naʻa nau maʻú, “naʻe hokohoko atu ʻa hono ʻai ʻa e ngaahi fakatahaʻangá ke tuʻu mālohi ʻi he tuí mo tupulekina ai pē honau tokolahí.”—Ngā. 16:5.

2. Talu mei he 1919, kuo anga-fēfē hono tokonaki ʻe Sihova ʻa e tatakí mo e meʻakai fakalaumālié?

² ʻOku hokohoko atu ʻa Sihova ke fokotuʻutuʻu maau ʻene kakaí naʻa mo e ʻi he ʻahó ni. Talu mei he 1919, kuo ngāueʻaki ʻe Sīsū ha kiʻi kulupu tokosiʻi ʻo e kau tangata pani ke fokotuʻutuʻu maau ʻa e ngāue fakamalangá pea tokonaki ʻa e meʻakai fakalaumālié ki hono kau muimuí. a (Luke 12:42) ʻOku hā mahino ʻoku tāpuakiʻi ʻe Sihova ʻa e ngāue ʻa e kulupu ko iá.—ʻAi. 60:22; 65:​13, 14.

3-4. (a) Fakatātaaʻi ʻa e founga ʻoku tau maʻu ʻaonga ai mei hono fokotuʻutuʻu maau kitautolú. (e) Ko e hā te tau lāulea ki ai ʻi he kupu ko ení?

 ³ Kapau naʻe ʻikai ke fokotuʻutuʻu maau kitautolu, heʻikai malava ke tau fakahoko ʻa e ngāue kuo vaheʻi mai ʻe Sīsū ke tau faí. (Māt. 28:​19, 20) Ko e fakatātaá, tau pehē pē naʻe ʻikai ke vaheʻi mai ha feituʻu ngāue ia; ko e tokotaha kotoa ʻe lava ke ne malanga ʻi ha feituʻu pē naʻá ne loto ki ai. Ko e ngaahi feituʻu ngāue ʻe niʻihi ʻe toutou ngāueʻi nai ʻe ha kau malanga kehekehe tokolahi, lolotonga ia ko e ngaahi feituʻu ngāue ʻe niʻihi heʻikai pē ke ngāueʻi. ʻE lava ke ke fakakaukau ki ha ngaahi founga kehe ʻoku tau maʻu ʻaonga ai mei hono fokotuʻutuʻu maau kitautolú?

⁴ Ko e meʻa naʻe fai ʻe Sīsū ʻi he māmaní naʻe fokotuʻu mai ai ʻa e sīpinga ki he founga ʻokú ne fokotuʻutuʻu maau ai kitautolu ʻi he ʻaho ní. ʻI he kupu ko ení, te tau lāulea ai ki he faʻifaʻitakiʻanga naʻe fokotuʻu ʻe Sīsuú pea mo e founga ʻoku muimui ai ʻetau kautahá ki he faʻifaʻitakiʻanga ko iá. Te tau toe lāulea ki he founga ʻe lava ke tau fakahāhā ai ʻoku tau houngaʻia ʻi he kautaha ʻa Sihová.

ʻOKU MUIMUI ʻETAU KAUTAHÁ KI HE FAʻIFAʻITAKIʻANGA ʻA SĪSUÚ

5. Ko e hā ʻa e founga ʻe taha ʻoku tau muimui ai ki he faʻifaʻitakiʻanga ʻa Sīsuú? (Sione 8:28)

⁵ Naʻe ako ʻe Sīsū mei heʻene Tamai fakahēvaní ʻa e meʻa ke faí mo e meʻa ke leaʻakí. ʻI he muimui ki he faʻifaʻitakiʻanga ʻa Sīsuú, ko e kautaha ʻa Sihová ʻoku makatuʻunga ʻene ngaahi akonaki fakaeʻulungāngá mo e fakahinohinó ʻi he Folofola ʻa e ʻOtuá. (Lau ʻa e Sione 8:28; 2 Tīm. 3:​16, 17) ʻOku tau maʻu maʻu pē ʻa e fakamanatu ke lau mo ngāueʻaki ʻa e Folofola ʻa e ʻOtuá. ʻOku anga-fēfē ʻetau maʻu ʻaonga mei he muimui ki he faleʻi ko ení?

6. Ko e hā ʻa e founga mahuʻinga ʻe taha ʻoku tau maʻu ʻaonga ai mei hono ako ʻa e Tohi Tapú?

⁶ ʻOku tau maʻu ʻaonga lahi ʻi heʻetau ako ʻa e Tohi Tapú fakataha mo e tokoni ʻetau ʻū tohi faka-Kalisitiané. Ko e fakatātaá, ʻoku malava ke tau fakahoa ʻa e ngaahi akonaki Fakatohitapú mo e fakahinohino ʻoku tau maʻu mei he kautahá. ʻI heʻetau sio ko e tataki ʻoku tau maʻú ʻoku makatuʻunga ʻi he Folofolá, ʻoku tupulekina ai ʻetau falala pau ki he kautaha ʻa Sihová.—Loma 12:2.

7. Ko e hā ʻa e pōpoaki naʻe malangaʻi ʻe Sīsuú, pea ʻoku anga-fēfē muimui ʻa e kautaha ʻa Sihová ki heʻene faʻifaʻitakiʻangá?

⁷ Naʻe malangaʻi ʻe Sīsū “ʻa e ongoongo lelei ʻo e Puleʻanga ʻo e ʻOtuá.” (Luke 4:​43, 44) Pehē foki, naʻe fekauʻi ʻe Sīsū ʻene kau ākongá ke malanga fekauʻaki mo e Puleʻangá. (Luke 9:​1, 2; 10:​8, 9) ʻI he ʻahó ni ko e kotoa ʻo e faʻahinga ʻoku kau ʻi he kautaha ʻa Sihová ʻoku nau malangaʻi ʻa e pōpoaki ʻo e Puleʻangá ʻo tatau ai pē pe ko fē ʻoku nau nofo aí pe ko e hā ʻa e lahi ʻo e fatongia ʻoku nau maʻú.

8. Ko e hā ʻa e monū kuo ʻomai kiate kitautolú?

⁸ ʻOku tau lau ko ha monū ia ke vahevahe atu ʻa e moʻoni fekauʻaki mo e Puleʻanga ʻo e ʻOtuá ki he niʻihi kehé! ʻOku ʻikai ke ʻatā ʻa e monū ko iá ki ha faʻahinga taha pē. Ko e fakatātaá, ʻi he taimi naʻe ʻi māmani ai ʻa Sīsuú, naʻe ʻikai ke ne fakaʻatā ʻa e ngaahi laumālie fulikivanú ke faifakamoʻoni fekauʻaki mo ia. (Luke 4:41) ʻI he ʻahó ni, ki muʻa ke kau ha taha ʻi he ngāue fakafaifekaú mo e kakai ʻa Sihová, kuo pau ke ne taau ki he monū ko iá. ʻOku tau fakahāhā ʻa e lahi ʻetau houngaʻia ʻi he monū ke malangá ʻaki ʻetau faifakamoʻoni ʻi ha feituʻu pē pea mo ha taimi pē ʻe ala lava. Hangē ko Sīsuú, ko ʻetau taumuʻá ia ke tō mo fuʻifuʻi ʻa e ngaahi tenga ʻo e moʻoni ʻo e Puleʻangá ʻi he loto ʻo e kakaí.—Māt. 13:​3, 23; 1 Kol. 3:6.

9. ʻOku anga-fēfē hono ʻai ʻe he kautahá ke ʻiloa ʻa e huafa ʻo e ʻOtuá?

⁹ Naʻe ʻai ʻe Sīsū ke ʻiloa ʻa e huafa ʻo e ʻOtuá. ʻI he lotu ʻa Sīsū ki heʻene Tamai fakahēvaní, naʻá ne pehē: “Kuó u ʻai ke nau ʻilo ho huafá.” (Sione 17:26) ʻI he fehoanaki mo e  faʻifaʻitakiʻanga ʻa Sīsuú, ko e kautaha ʻa Sihová ʻoku nau fai ʻa e meʻa kotoa ʻoku nau malavá ke tokoniʻi ʻa e niʻihi kehé ke nau hoko ʻo ʻiloʻi ʻa e huafa ʻo e ʻOtuá. Ko e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní kuó ne fakahoko ha ngafa mahuʻinga ʻi hono toe fakafoki ʻa e huafa ʻo e ʻOtuá ki hono feituʻu totonú. Ko e liliu Tohi Tapu ko ení ʻoku ala maʻu ʻi he taimí ni, kakato pe ʻi hano konga, ʻi he lea laka hake ʻi he 270. ʻI he Fakamatala Fakalahi A4 mo e A5 ʻo e liliu ko ení, te ke maʻu ai ʻa e ngaahi fakaikiiki fekauʻaki mo hono toe fakafoki ʻa e huafa ʻo e ʻOtuá ʻi he Tohi Tapú. ʻI he Fakamatala Fakalahi F, ʻa ia ʻoku maʻu ʻi he Study Bible, ʻoku tokonaki mai ai ʻa e fakamoʻoni lahi ange ko e huafa ʻo e ʻOtuá ʻoku totonu ke hā ia ʻi he Ngaahi Konga Tohi Tapu Faka-Kalisi Kalisitiané ʻo tuʻo 237.

10. Ko e hā ʻokú ke ako mei he fakamatala ʻa ha fefine ʻoku nofo ʻi Mienimā?

¹⁰ Hangē ko Sīsuú, ʻoku tau loto ke tokoniʻi ʻa e kakai tokolahi taha ʻe ala lavá ke nau hoko ʻo ʻiloʻi ʻa e huafa ʻo e ʻOtuá. ʻI hono ʻiloʻi ʻe ha fefine taʻu 67 ʻi Mienimā ʻoku ʻi ai ha huafa ʻo e ʻOtuá naʻe ueʻi ia ke ne fakatō loʻimata peá ne pehē: “Ko e ʻuluaki taimi eni ʻi heʻeku moʻuí kuó u fanongo ai ko Sihova ʻa e huafa ʻo e ʻOtuá. . . . Kuó ke akoʻi kiate au ʻa e meʻa mahuʻinga taha ʻoku lava ke faifai ange peá u akó.” Hangē ko ia ʻoku fakahaaʻi ʻi he hokosia ko ení, ko hono ʻiloʻi ʻa e huafa ʻo e ʻOtuá ʻe lava ke ne tākiekina mālohi ʻa e kakai loto-totonú.

HOKOHOKO ATU HONO FAKAHĀHĀ ʻA E HOUNGAʻIA KI HEʻETAU KAUTAHÁ

11. ʻE lava fēfē ke fakahaaʻi ʻe he kau mātuʻá ʻenau houngaʻia ki he kautaha ʻa Sihová? (Sio foki ki he fakatātaá.)

¹¹ Ko e hā ʻa e founga ʻe taha ʻe lava ke fakahāhā ai ʻe he kau mātuʻá ʻoku nau houngaʻia ʻi he kautaha ʻa e ʻOtuá? ʻI hono maʻu ʻe he kau mātuʻá ha fakahinohino, ʻoku fiemaʻu ke nau lau fakalelei ia pea fai honau lelei tahá ke ngāueʻaki ia. Ko e fakatātaá, ʻoku ʻikai ngata pē ʻenau maʻu ʻa e fakahinohino ki he founga ke fakahoko ai ʻa e ngaahi konga ʻi he fakatahá pea mo e founga ke fakahoko ai ʻa e ngaahi lotu maʻá e fakatahaʻangá, kae toe pehē foki ki he founga ke tokangaʻi ai ʻa e fanga sipi ʻa Kalaisí. Ko e kau mātuʻa ʻoku nau muimui ki he fakahinohino ʻa e kautahá ʻoku nau tokoniʻi ʻa e faʻahinga ʻoku nau tokangaʻí ke nau ongoʻi malu mo ongoʻi ʻoku ʻofaʻi kinautolu.

12. (a) Ko e hā ʻoku totonu ai ke tau ngāue fakataha mo e faʻahinga ʻoku takimuʻá? (Hepelū 13:​7, 17) (e) Ko e hā ʻoku totonu ai ke tau tokangataha ki he ngaahi ʻulungaanga lelei ʻo e faʻahinga ʻoku takimuʻá?

¹² ʻI he taimi ʻoku tau maʻu ai ha fakahinohino mei he kau mātuʻá, ʻoku totonu ke tau muimui loto-lelei ki ai. ʻI heʻetau fai iá, te tau ʻai ai ke faingofua ange ki he faʻahinga ʻoku takimuʻá ke fai ʻenau ngāué. ʻOku fakalototoʻaʻi kitautolu ʻe he Tohi Tapú ke tau talangofua pea fakamoʻulaloa ki he faʻahinga ʻoku takimuʻá. (Lau ʻa e Hepelū 13:​7, 17.) ʻE lava ke hoko eni ko ha pole ʻi he taimi ʻe niʻihi. Ko e hā hono ʻuhingá? Koeʻuhí ko e kau tangata ko ení ʻoku nau taʻehaohaoa. Kae kehe, kapau ʻoku tau tokangataha ki honau ngaahi ʻulungaanga ʻikai leleí kae ʻikai ki honau ngaahi ʻulungaanga leleí, ko hono moʻoní, te tau tokoni ai kitautolu ki hotau ngaahi filí. ʻI he founga fē? ʻE fakavaivaiʻi ai ʻetau falala ki he kautaha ʻa e ʻOtuá, ʻa ia ko e meʻa ia kuo fakapapauʻi ʻe hotau kau fakafepakí ke faí. Ko e hā ʻa e meʻa pau ʻe lava ke tau fai ke ʻiloʻi pea talitekeʻi ai ʻa e fakamatala fakangalilelei ʻa hotau ngaahi filí?

ʻOUA NAʻA TUKU KE FAKAVAIVAIʻI ʻE HE NIʻIHI KEHÉ HOʻO HOUNGAʻIÁ

13. Kuo anga-fēfē feinga ʻa e ngaahi fili ʻo e ʻOtuá ke fakaongoongokoviʻi ʻene kautahá?

¹³ Ko e kau fakafepaki ʻo e ʻOtuá ʻoku nau feinga ke ʻai ʻa e ngaahi tafaʻaki lelei ʻene kautahá ke hā ngali kovi. Ko e fakatātaá, kuo tau ako mei he Folofolá ʻoku ʻamanekina ʻe Sihova ʻene kau lotú ke nau hoko ʻo maʻa fakaesino, fakaeʻulungaanga mo fakalaumālie. ʻOkú ne fiemaʻu ke fakamavaheʻi mei he fakatahaʻangá ha taha pē ʻoku taʻefakatomala ʻo tuli ki ha ʻalunga moʻui  taʻemaʻa. (1 Kol. 5:​11-13; 6:​9, 10) ʻOku tau pipiki ki he fekau Fakatohitapu ko iá. Ka ʻoku ngāueʻaki ia ʻe hotau ngaahi filí ke fakafepakiʻi kitautolu ʻaki ʻenau tukuakiʻi ʻoku tau fuʻu fakataputapui, faifakamaau mo taʻeʻofa.

14. Ko hai ʻa e tupuʻanga ʻo e ngaahi talanoa loi fekauʻaki mo e kautaha ʻa Sihová?

¹⁴ ʻIloʻi ʻa e tupuʻanga ʻo e ngaahi ʻohofí. Ko Sētane ko e Tēvoló ʻoku teke mui ʻi he ngaahi talanoa loí. Ko e “tamai ia ʻa e loí.” (Sione 8:44; Sēn. 3:​1-5) Ko ia ʻoku totonu ke tau ʻamanekina ʻe ngāueʻaki ʻe Sētane hono kau poupoú ke pouaki ʻa e ngaahi talanoa loi fekauʻaki mo e kautaha ʻa Sihová. Naʻe hā mahino eni ʻi he ʻuluaki senitulí.

15. Ko e hā ʻa e meʻa naʻe fai ʻe he kau taki lotú kia Sīsū mo hono kau muimuí?

¹⁵ ʻI he ʻuluaki senitulí, ko e kau poupou ʻo Sētané naʻa nau toutou tala ha ngaahi loi fekauʻaki mo e ngāue fakaemana fakaofo ʻa e ʻAlo ʻo e ʻOtuá. Ko e fakatātaá, ko e kau taki lotú naʻa nau tala ki he kakaí ko e mālohi ʻo Sīsū ke kapusi ʻa e fanga tēmenioó naʻe ʻoange kiate ia ʻe he “pule ʻo e fanga tēmenioó.” (Mk. 3:22) ʻI he taimi naʻe fakamāuʻi ai ʻa Sīsuú, ko e kau taki lotú naʻa nau tukuakiʻi ia ki he lea fieʻotua pea fakaʻaiʻai ʻa e fuʻu kakaí ke nau kōlenga ke tāmateʻi ia. (Māt. 27:20) Ki mui ai, ʻi hono malangaʻi ʻe he kau muimui ʻo Kalaisí ʻa e ongoongo leleí, ko e faʻahinga naʻa nau fakafepakiʻi kinautolú “naʻa nau fakakoviʻi mo takihalaʻi” ʻa e kakaí ke fakatangaʻi ʻa e kau Kalisitiane ko iá. (Ngā. 14:​2, 19) ʻI he fekauʻaki mo e Ngāue 14:​2, naʻe fakamatalaʻi ʻi he Taua Leʻo ʻo Tīsema 1, 1998: “ʻI he ʻikai ke fiemālie pē ʻi heʻenau talitekeʻi ʻa e pōpoakí, naʻe fakatupunga ʻe he kau Siu fakafepakí ha feingatau talatalaakiʻi taʻeʻuhinga lelei, ʻo feinga ke tomuʻa fehiʻa ʻa e kakai Senitailé ki he kau Kalisitiané.”

16. Ko e hā ʻoku totonu ke tau manatuʻí kapau ʻoku tau fanongo ki ha ngaahi talanoa loi?

¹⁶ Naʻe ʻikai ke ngata ʻa e loi ʻa Sētané ʻi he ʻuluaki senitulí. ʻI he ʻahó ni, ʻokú ne kei “takihalaʻi ʻa e kotoa ʻo e māmani kuo nofoʻí.” (Fkh. 12:9)  Kapau ʻokú ke fanongo ki ha ngaahi talanoa ʻikai lelei fekauʻaki mo e kautahá pe ko e fanga tokoua ʻoku nau takimuʻá, manatuʻi ʻa e anga ʻo e fakafeangai ʻa e ngaahi fili ʻo e ʻOtuá kia Sīsū pea mo e kau ākonga ʻi he ʻuluaki senitulí. ʻI he ʻahó ni, ko e kakai ʻa Sihová ʻoku fakatangaʻi pea lauʻikoviʻi ʻo hangē tofu pē ko ia naʻe tomuʻa tala ʻi he Tohi Tapú. (Māt. 5:​11, 12) Ko e ngaahi talanoa loí heʻikai ke ne takihalaʻi kitautolu kapau ʻoku tau ʻiloʻi ʻa honau tupuʻangá pea fai leva ha ngāue ki ai. Ko e hā ʻa e ngāue ʻoku totonu ke tau faí?

17. ʻE lava fēfē ke tau fakaʻehiʻehi mei hono uesia ʻe he ngaahi talanoa loí? (2 Tīmote 1:13) (Sio foki ki he puha “ Founga ke Fakafeangai Ai ki he Talanoa Loí.”)

¹⁷ Siʻaki ʻa e ngaahi talanoa loí. Naʻe ʻomai ʻe he ʻapositolo ko Paulá ʻa e ngaahi fakahinohino māʻalaʻala fekauʻaki mo e meʻa ke tau fai kapau ʻoku tau fanongo ki ha ngaahi talanoa loi. Naʻá ne tala ange kia Tīmote ke “fai ha akonaki fefeka ki he niʻihi tāutaha ke ʻoua te nau . . . tokanga ki he ngaahi talanoa loí” pea ke “siʻaki ʻa e ngaahi talanoa loi taʻemolumalú.” (1 Tīm. 1:​3, 4; 4:7) Neongo ko ha kiʻi pēpē te ne toʻo fāinoa hake ha meʻa mei he falikí ʻo ʻai ki hono ngutú, heʻikai ʻaupito ke fai pehē ha tokotaha matuʻotuʻa ʻokú ne mahinoʻi ʻa ʻene fakatuʻutāmakí. ʻOku tau siʻaki ʻa e ngaahi talanoa loí koeʻuhí ʻoku tau ʻiloʻi ʻa e tupuʻanga ʻo e fakamatalá. ʻOku tau piki ki he ‘ngaahi lea lelei’ ʻo e moʻoní.—Lau ʻa e 2 Tīmote 1:13.

18. ʻE lava fēfē ke tau fakahāhā ʻetau houngaʻia ki he kautaha ʻa Sihová?

¹⁸ Kuo tau lāulea ki he founga pē ʻe tolu ʻo e ngaahi founga lahi ʻoku faʻifaʻitaki ai ʻa e kautaha ʻa e ʻOtuá kia Sīsuú. ʻI hoʻo ako ʻa e Tohi Tapú, fakatokangaʻi ha toe ngaahi founga ʻoku muimui ai ʻa e kautahá ki he faʻifaʻitakiʻanga ʻa Sīsuú. Tokoniʻi ʻa e niʻihi kehe ʻi hoʻo fakatahaʻangá ke langa hake ʻenau houngaʻia ʻi he kautaha ʻa Sihová. Pea hokohoko atu ke fakahāhā hoʻo houngaʻiá ʻaki ʻa e tauhi mateaki kia Sihova pea pipiki ofi ki he kautaha ʻa ia ʻokú ne ngāueʻaki ke fakahoko hono finangaló. (Saame 37:28) ʻOfa ke hokohoko atu ʻetau koloaʻaki ʻa e monū ʻoku tau maʻu ke feohi fakataha mo e kakai ʻofa mo mateaki ʻa Sihová.