1. ʻOku anga-fēfē ongoʻi ʻa e niʻihi fekauʻaki mo e fakaofiofi ki he niʻihi kehé ʻi he ngāue fakafaifekaú? (Sio foki ki he fakatātaá.)

 ʻI HE tuʻunga ko e kakai ʻa Sihova, ʻoku tau malanga ki he niʻihi kehé koeʻuhí ʻoku tau ʻofa ʻi heʻetau Tamai fakahēvaní pea ʻoku tau loto ke tokoniʻi hotau kaungāʻapí ke nau hoko ʻo ʻiloʻi ia. Ko e kau malanga tokolahi ʻoku nau fiefia moʻoni ʻi he ngāue fakamalangá. Ka ʻoku fāinga ʻa e niʻihi ke fiefia ai. Ko e hā hono ʻuhingá? Ko e niʻihi ʻoku nau ongoʻi mātuʻaki mā nai pea ʻikai ke loto-maʻu. Ko e niʻihi ʻoku ʻikai ke nau ongoʻi fiemālie ke ʻalu taʻefakaafeʻi ki he ʻapi ʻo e kakaí. ʻOku ongoʻi manavasiʻi nai ʻa e niʻihi naʻa talitekeʻi kinautolu. Ko e niʻihi kuo akoʻi ke nau fakaʻehiʻehi mei he fakakikihi mo e niʻihi kehé. Neongo ʻa e ʻofa lahi ʻa e fanga tokoua mo e fanga tuofāfine ko ení kia Sihová, ʻoku faingataʻa ke nau fakaofiofi ki he kau solá mo e ongoongo leleí. Neongo ia, ʻoku nau ʻiloʻi ʻa e mahuʻinga ʻo e ngāue ko ení, pea ʻoku nau kau maʻu pē ki ai. He fiefia ē ko Sihova ʻiate kinautolu!

2. Kapau ʻokú ke fāinga ke maʻu ʻa e fiefia ʻi he ngāue fakafaifekaú, ko e hā ʻoku ʻikai totonu ai ke ke hoko ʻo loto-siʻí?

² ʻOkú ke fāinga ʻi he taimi ʻe niʻihi ke maʻu ʻa e fiefia ʻi he ngāue fakafaifekaú koeʻuhi ko e ngaahi ongoʻi peheé? Kapau ko ia, ʻoua ʻe hoko ʻo loto-siʻi. Ko e ʻikai ke ke maʻu ha loto-maʻú ʻoku fakahaaʻi nai ai ʻokú ke loto anga-fakatōkilalo ke fakaʻehiʻehi mei he tohoakiʻi mai ʻa e tokangá kiate koé pea ʻoku ʻikai ke ke loto ke kau ʻi ha fekīhiaki. Pea ʻoku ʻikai loto ha taha ke talitekeʻi ia, tautefito ʻi heʻene feinga ke fai ha meʻa lelei maʻá e niʻihi kehé. Ko hoʻo Tamai fakahēvaní ʻokú ne ʻiloʻi lelei ʻa e ngaahi pole ʻokú ke fehangahangai mo iá pea loto ke ʻoatu kiate koe ʻa e tokoni ʻokú ke fiemaʻú. (ʻAi. 41:13) ʻI he kupu ko ení, te tau lāulea ai ki he  fokotuʻu ʻe nima ke fekuki ai mo e ngaahi ongoʻi peheé pea mo e founga ke fakatupulekina ai ʻa e fiefia ʻi he ngāue fakafaifekaú.

TUKU KE FAKAIVIMĀLOHIʻI KOE ʻE HE FOLOFOLA ʻA E ʻOTUÁ

3. Ko e hā naʻá ne tokoniʻi ʻa e palōfita ko Selemaiá ke malanga ki he niʻihi kehé?

³ Naʻa mo e ʻi he kuohilí, ko e pōpoaki mei he ʻOtuá kuó ne fakaivimālohiʻi ʻene kau sevānití ʻi heʻenau maʻu ha fatongia faingataʻa ke fakakakato. Ko e fakatātaá, fakakaukau ki he palōfita ko Selemaiá. Naʻá ne toumoua ʻi hono ʻoange kiate ia ʻe Sihova ʻa e vāhenga-ngāue ke malangá. Naʻe pehē ʻe Selemaia: “ʻOku ʻikai te u poto ʻi he leá, he ko ha tamasiʻi pē au.” (Sel. 1:6) Naʻe anga-fēfē ʻene ikuʻi ʻa e ʻikai ke ne maʻu ha loto-maʻú? Naʻá ne maʻu ʻa e mālohi mei he folofola ʻa e ʻOtuá. Naʻá ne pehē: “Naʻe hangē ʻene folofolá ha afi vela ʻoku nofo ʻi hoku ngaahi huí; pea naʻá ku ongosia he feinga ke taʻofi ia ʻi lotó.” (Sel. 20:​8, 9) Neongo naʻe maʻu ʻe Selemaia ha feituʻu ngāue faingataʻa, ko e pōpoaki naʻe vaheʻi ke ne fanongonongó naʻe ʻoange ai kiate ia ʻa e mālohi naʻá ne fiemaʻu ke fakahokoʻaki ʻa e ngāué.

4. Ko e hā ʻoku hoko ʻi he taimi ʻoku tau lau ai ʻa e Folofola ʻa e ʻOtuá pea fakalaulauloto ki aí? (Kolose 1:​9, 10)

⁴ Ko e kau Kalisitiané ʻoku nau maʻu ʻa e mālohi mei he pōpoaki ʻi he Folofola ʻa e ʻOtuá. ʻI he tohi ki he fakatahaʻanga ʻi Kolosé, naʻe pehē ʻe he ʻapositolo ko Paulá ko hono maʻu ʻa e ʻilo totonú te ne ueʻi ʻa hono fanga tokouá ke nau “ʻaʻeva ʻo taau mo Sihova” ʻi heʻenau hokohoko atu “ʻo fakatupu fua ʻi he ngāue lelei kotoa pē.” (Lau ʻa e Kolose 1:​9, 10.) Ko e ngāue lelei ko iá ʻoku kau ki ai ʻa e malangaʻi ʻo e ongoongo leleí. Ko ia ʻi he taimi ʻoku tau lau ai ʻa e Folofola ʻa e ʻOtuá pea fakalaulauloto ki aí, ʻoku fakaivimālohiʻi ai ʻetau tui kia Sihová pea ʻoku hoko ʻo māʻalaʻala ai ʻa e mahuʻinga ʻo hono vahevahe atu ʻa e pōpoaki ʻo e Puleʻangá.

5. ʻE lava fēfē ke tau maʻu ʻa e ʻaonga lahi tahá mei heʻetau lau mo ako ʻa e Tohi Tapú?

⁵ Ke maʻu ʻa e ʻaonga lahi taha mei he Folofola ʻa e ʻOtuá, ʻoku totonu ke ʻoua te tau fakavave ʻi heʻetau lau, ako, mo fakalaulauloto ki aí. Vaheʻi ki ai ha taimi. Kapau ʻokú ke aʻu ki ha konga Tohi Tapu ʻoku faingataʻa ke ke mahinoʻi, ʻoua ʻe hiki fakalaka mei ai. ʻI hono kehé, ngāueʻaki ʻa e Watch Tower Publications Index pe ko e Tataki Fakaefekumi Maʻá e Kau Fakamoʻoni ʻa Sihová ke kumi ki ha fakamatala fekauʻaki mo e vēsí. Kapau te ke vaheʻi ʻa e taimi ke fai ai hoʻo akó, te ke fakaivimālohiʻi ai hoʻo falala pau ki he moʻoni ʻa e Folofola ʻa e ʻOtuá. (1 Tes. 5:21) Ko e lahi ange hoʻo tuipaú, ko e lahi ange ia hoʻo  fiefia ke vahevahe atu ʻa e meʻa kuó ke akó ki he niʻihi kehé.

TEUTEU LELEI KI HE NGĀUE FAKAFAIFEKAÚ

6. Ko e hā ʻoku totonu ai ke tau teuteu lelei ki he ngāue fakafaifekaú?

⁶ Kapau ʻokú ke teuteu lelei ki he ngāue fakafaifekaú, ʻoku ngalingali te ke ongoʻi fiemālie ange ke lea ki he niʻihi kehé. Naʻe tokoniʻi ʻe Sīsū ʻene kau ākongá ke mateuteu ki muʻa ke ne fekauʻi atu kinautolu ʻi he ngāue fakafaifekaú. (Luke 10:​1-11) Koeʻuhi naʻa nau ngāueʻaki ʻa e meʻa naʻe akoʻi ʻe Sīsū kiate kinautolú, ko e kau ākongá naʻa nau ongoʻi fiefia lahi ʻi he meʻa naʻe malava ke nau fakahokó.—Luke 10:17.

7. ʻOku anga-fēfē nai ʻetau teuteu ki he ngāue fakafaifekaú? (Sio foki ki he fakatātaá.)

⁷ ʻE anga-fēfē nai ʻetau teuteu ki he ngāue fakafaifekaú? ʻOku fiemaʻu ke tau fakakaukau ki he founga ʻe lava ke tau fakahaaʻi ola lelei ai ʻa e moʻoní ʻi heʻetau lea pē ʻatautolu. ʻOku toe tokoni foki ke tomuʻa fakakaukau ki ha tali anga-maheni ʻe ua pe tolu mei he faʻahinga ʻi he feituʻu ngāué pea fakakaukau ki he founga te tau tali ai ʻi he tuʻunga taki taha. Pea ʻi heʻetau fakaofiofi leva ki he kakaí, ʻe lava ke tau feinga ke nonga, malimali, pea hoko ʻo anga-fakakaumeʻa.

8. ʻI he founga fē ʻoku hangē ai ʻa e kau Kalisitiané ko e ngaahi ipu ʻumea naʻe lave ki ai ʻi he talanoa fakatātā ʻa e ʻapositolo ko Paulá?

⁸ Naʻe fakatātaaʻi ʻe he ʻapositolo ko Paulá hotau ngafa ʻi he ngāue fakamalangá ʻi heʻene pehē: “ʻOku mau maʻu ʻa e koloá ni ʻi ha ngaahi ipu ʻumea.” (2 Kol. 4:7) Ko e hā ʻa e koloa ko ení? Ko e ngāue fakahaofi moʻui ia ʻo hono malangaʻi ʻa e pōpoaki ʻo e Puleʻangá. (2 Kol. 4:1) Ko e hā ʻa e ngaahi ipu ʻumeá? ʻOku nau fakafofongaʻi ʻa e kau sevāniti ʻa e ʻOtuá, ʻa ia ʻoku nau ʻave ʻa e ongoongo leleí ki he niʻihi kehé. ʻI he ʻaho ʻo Paulá, naʻe ngāueʻaki ʻe he kau mēsianití ʻa e ngaahi siā ʻumeá ke feʻaveʻaki ai ʻa e ngaahi koloa mahuʻingá, hangē ko e meʻakai, uaine mo e paʻanga. ʻI he tuʻunga meimei tatau, ʻoku tuku mai ʻe Sihova kiate kitautolu ʻa e pōpoaki mahuʻinga ʻo e ongoongo leleí. ʻI he tokoni ʻa Sihová, ʻe lava ke tau maʻu ai ʻa e mālohi ʻoku fiemaʻú ke fakahoko faitōnunga atu ai ʻetau pōpoakí.

LOTU KI HA LOTO-TOʻA

9. ʻE lava fēfē ke tau ikuʻi ʻa e manavahē tangatá pe ko e manavahē naʻa talitekeʻi kitautolú? (Sio foki ki he fakatātaá.)

⁹ ʻI he taimi ʻe niʻihi, te tau hoko nai ʻo manavahē tangata pe manavahē naʻa talitekeʻi kitautolu. ʻE lava fēfē ke tau ikuʻi ʻa e pole ko iá? Fakakaukau ki he lotu ʻa e kau ʻapositoló ʻi he taimi  naʻe tuʻutuʻuni atu ai ke ʻoua te nau toe malangá. ʻI he ʻikai ke ʻulutukua ki he manavaheé, naʻa nau kole kia Sihova ke tokoniʻi kinautolu ke “hanganaki lea loto-toʻa ʻaki ʻa [ʻene] folofolá.” Naʻe tali ʻe Sihova ʻenau lotú ʻi he taimi pē ko iá. (Ngā. 4:​18, 29, 31) Kapau ʻoku uesia kitautolu ʻe he manavahē tangatá ʻi he taimi ʻe niʻihi, ʻoku totonu foki ke tau lotu ki he tokoni ʻa Sihová. Kole kia Sihova ke tokoniʻi koe ke ikunaʻi hoʻo manavahē tangatá ʻaki hoʻo ʻofa ki he kakaí.

10. ʻOku anga-fēfē hono tokoniʻi kitautolu ʻe Sihova ke fakahoko hotau ngafa ʻi he tuʻunga ko ʻene Kau Fakamoʻoní? (ʻAisea 43:​10-12)

¹⁰ Kuo fakanofo kitautolu ʻe Sihova ke hoko ko ʻene Kau Fakamoʻoni, pea ʻokú ne talaʻofa ke tokoniʻi kitautolu ke hoko ʻo loto-toʻa. (Lau ʻa e ʻAisea 43:​10-12.) Fakakaukau ki ha founga pē ʻe fā ʻokú ne fai ai ia. ʻUluakí, ko Sīsū ʻokú ne ʻiate kitautolu ʻi ha taimi pē ʻoku tau malangaʻi ai ʻa e ongoongo leleí. (Māt. 28:​18-20) Uá, kuo fakanofo ʻe Sihova ʻa e kau ʻāngeló ke tokoniʻi kitautolu. (Fkh. 14:6) Tolú, kuo foaki mai ʻe Sihova kiate kitautolu hono laumālie māʻoniʻoní ko ha tokoni ke fakamanatu mai ʻa e ngaahi meʻa kuo tau akó. (Sione 14:​25, 26) Faá, kuo tokonaki mai ʻe Sihova ʻa e fanga tokoua mo e fanga tuofāfine ke ngāue fakataha mo kitautolu. ʻI he tokoni ʻa Sihová mo e poupou ʻetau fetokouaʻaki anga-ʻofá, ʻoku tau maʻu ai ʻa e meʻa kotoa ʻoku tau fiemaʻu ke hoko ai ʻo lavameʻá.

HOKO ʻO NGAOFENGOFUA, PEA MAʻU ʻA E VAKAI TOTONU

11. ʻI he kau ki he ngāue fakafaifekaú, ʻe anga-fēfē nai haʻo maʻu ha kakai tokolahi ange? (Sio foki ki he fakatātaá.)

¹¹ ʻOkú ke ongoʻi loto-siʻi ʻi he taimi ʻoku tātātaha ke ke maʻu atu ai ha kakai ki honau ʻapí? Fēfē ke ke ʻeke hifo: ‘ʻOku ʻi fē ʻa e kakai ʻi hoku feituʻu ngāué he taimi ko ení?’ (Ngā. 16:13) ‘ʻOku nau ʻi he ngāué pe ʻalu ʻo fai ha fakatau?’ Kapau ko e tuʻungá ia, ʻe lava ke ke maʻu ʻa e kakai tokolahi ange ʻi he faifakamoʻoni ʻi he halá? Ko ha tokoua ko Joshua ʻokú ne pehē, “ʻOku ou maʻu ʻa e ngaahi faingamālie ke malanga lolotonga ʻa e lue atu ʻi he ngaahi falekoloa lalahí pea mo e ngaahi tauʻanga meʻalelé.” Ko ia mo hono uaifí, ʻa Bridget, naʻá na toe maʻu foki ʻa e kakai tokolahi ange ki ʻapi ʻi heʻena ʻaʻahi kiate kinautolu ʻi he efiafí pea pehē foki ki he ngaahi hoʻatā Sāpaté.—ʻEf. 5:​15, 16.

12. ʻE lava fēfē ke tau ʻiloʻi ʻa e meʻa ʻoku tui pe hohaʻa ki ai ʻa e kakaí?

¹² Kapau ʻoku ʻikai loko mahuʻingaʻia ʻa e kakaí ʻi he pōpoakí, feinga ke ʻiloʻi ʻa e meʻa ʻoku nau tui ki aí pe hohaʻa fekauʻaki mo iá. ʻOku  ngāueʻaki ʻe Joshua mo Bridget ʻa e fehuʻi ʻi muʻa ʻi he takafi ʻo ha tuleki ʻi heʻena talateú. Ko e fakatātaá, ʻi hono ngāueʻaki ʻa e tuleki ʻOku Fēfē Hoʻo Vakai ki he Tohi Tapú? ʻokú na pehē: “ʻOku vakai ʻa e kakai ʻe niʻihi ki he Tohi Tapú ko ha tohi mei he ʻOtuá, ka ʻoku ʻikai ke fakakaukau pehē ʻa e niʻihi. Ko e hā hoʻo fakakaukaú?” ʻOku faʻa taki atu eni ki ha fetalanoaʻaki.

13. Ko e hā ʻe lava ke tau vakai ai ki heʻetau ngāue fakafaifekaú ʻoku lavameʻá naʻa mo e taimi ʻoku ʻikai tali ai ia ʻe he kakaí? (Palōveepi 27:11)

¹³ Ko ʻetau lavameʻa ʻi he ngāue fakafaifekaú ʻoku ʻikai makatuʻunga ia ʻi he ola ʻoku tau maʻú. Ko e hā hono ʻuhingá? Koeʻuhí kuo tau fai ʻa e meʻa ʻoku loto ʻa Sihova mo hono ʻAló ke tau faí—kuo tau fai ha fakamoʻoni. (Ngā. 10:42) Naʻa mo e taimi ʻoku ʻikai ke tau maʻu ai ha taha ke talanoa mo iá pe ko e taimi ʻoku talitekeʻi ai ʻetau pōpoakí, ʻe lava ke tau fiefia koeʻuhí ʻoku tau fakahōifuaʻi ʻetau Tamai fakahēvaní.—Lau ʻa e Palōveepi 27:11.

14. Ko e hā ʻe lava ke tau fiefia ai ʻi hono maʻu ʻe ha tokotaha malanga ʻe taha ha tokotaha mahuʻingaʻia ʻi he feituʻu ngāué?

¹⁴ ʻE lava foki ke tau fiefia ʻi hono maʻu ʻe ha tokotaha malanga ʻe taha ha tokotaha mahuʻingaʻia ʻi he feituʻu ngāué. ʻOku fakahoa ʻe he Taua Leʻo ʻetau ngāué ki hono kumi ha kiʻi leka mole. ʻOku kau ʻa e tokolahi ʻi hono kumi iá, ʻi he feituʻu ki he feituʻu. ʻI hono maʻu ʻa e kiʻi leká, ko e tokotaha kotoa—ʻo ʻikai ko e tokotaha pē naʻá ne maʻu iá—ʻoku nau maʻu ʻa e ʻuhinga ke fiefia. ʻI he tuʻunga meimei tatau, ko e ngāue ngaohi ākongá ko ha ngāue fakatimi. ʻOku fiemaʻu ki he tokotaha kotoa ke malangaʻi ʻa e feituʻu ngāué, pea ʻoku fiefia ʻa e tokotaha kotoa ʻi he kamata ke maʻu ʻe ha tokotaha foʻou ʻa e ngaahi fakatahá.

TOKANGATAHA KI HOʻO ʻOFA KIA SIHOVA PEA MO HO KAUNGĀʻAPÍ

15. ʻE lava fēfē ke tokoniʻi kitautolu ʻe hono ngāueʻaki ʻa e Mātiu 22:​37-39 ke fakalahi ʻetau faivelenga ʻi he ngāue fakafaifekaú? (Sio foki ki he fakatātā .)

¹⁵ ʻE lava ke tau fakalahi ʻetau faivelenga ʻi he ngāue fakamalangá ʻaki ʻa e tokangataha ki heʻetau ʻofa kia Sihova pea mo hotau kaungāʻapí. (Lau ʻa e Mātiu 22:​37-39.) Sioloto atu ki he fiefia ʻa Sihova ʻi heʻene vakai mai ʻoku tau fakahoko ʻa e ngāué pea ki he fiefia ʻa e kakaí ʻi heʻenau kamata ako ʻa e Tohi Tapú! Fakakaukau foki ki he fakamoʻui ʻoku fakatatali mai ki he faʻahinga ʻoku nau tali ʻetau pōpoakí.—Sione 6:40; 1 Tīm. 4:16.

16. ʻE lava fēfē ke tau maʻu ʻa e fiefia ʻi heʻetau ngāue fakafaifekaú ʻi he ʻikai malava ke tau mavahe mei hotau ʻapí? ʻOmai ha fakatātā.

¹⁶ ʻOku ʻikai malava ke ke mavahe mei ho ʻapí  ʻi ha faʻahinga ʻuhinga? Kapau ko ia, tokangataha ki he meʻa ʻe lava ke ke fai ke fakahaaʻi ai hoʻo ʻofa kia Sihova pea ki ho kaungāʻapí. Lolotonga ʻa e mahaki fakaʻauha COVID-19, ko Samuel mo Dania naʻe ʻikai malava ke na mavahe mei hona ʻapí. ʻI he taimi faingataʻa ko iá, naʻá na kau tuʻumaʻu ʻi he faifakamoʻoni ʻi he telefoní, faitohí, pea fakahoko ʻa e ngaahi ako Tohi Tapu fakafou ʻi he Zoom. Naʻe faifakamoʻoni ʻa Samuel ki he faʻahinga naʻá ne fetaulaki mo ia ʻi he kilīniki naʻá ne maʻu mei ai ʻa e faitoʻo ki he kanisaá. ʻOkú ne pehē: “Ko e ngaahi faingataʻá ʻe lava ke ne ʻai kitautolu ke tau hōloa fakaʻatamai, fakaesino mo fakalaumālie. ʻOku fiemaʻu ke tau maʻu ʻa e fiefia ʻi heʻetau ngāue kia Sihová.” Lolotonga ʻa e ngaahi meʻá ni, naʻe tō ʻa Dania pea naʻá ne toka mohenga ʻi he māhina ʻe tolu. Naʻe fiemaʻu leva ke ne ngāueʻaki ha saliote ʻi ha māhina ʻe ono. ʻOkú ne pehē: “Naʻá ku feinga ke fai ʻa e meʻa kotoa naʻe fakaʻatā au ʻe hoku tuʻungá ke faí. Naʻe malava ke u malanga ki ha neesi naʻe ʻaʻahi mai, pea naʻá ku talanoa ki he faʻahinga naʻa nau ʻomai ʻa e ngaahi meʻa ki he falé. Naʻá ku toutou fetalanoaʻaki lelei foki ʻi he telefoní mo ha fakafofonga ʻo ha kautaha fakafaitoʻo.” Naʻe fakangatangata ʻe he ngaahi tuʻunga ʻo Samuel mo Dania ʻena ngāué, ka naʻá na fai pē ʻa e meʻa naʻá na malavá pea maʻu ʻa e fiefia ʻi hono fai iá.

17. ʻE lava fēfē ke ke maʻu ʻa e ʻaonga lahi tahá mei he ngaahi fokotuʻu ʻi he kupu ko ení?

¹⁷ Ko e ngaahi fokotuʻu ʻoku ʻomai ʻi he kupu ko ení ʻoku ola lelei ia ʻi he taimi ʻoku ngāueʻaki fakataha aí. Ko e fokotuʻu taki taha ʻoku hangē ia ko e ngaahi meʻa ʻoku fiemaʻu ke fai ʻaki ha kuki. ʻI hono fakatahaʻi kotoa ʻa e ngaahi meʻa ki he kukí, te ke maʻu ai ha meʻakai ifo. ʻI hono ngāueʻaki kotoa ʻa e ngaahi fokotuʻú, ʻe teuʻi lelei ange ai kitautolu ke fekuki mo e ngaahi ongoʻi ʻikai leleí pea maʻu ʻa e fiefia lahi ange ʻi he ngāue fakafaifekaú.