1. Ko e hā ʻoku fiemaʻu ʻe Sihova meiate kitautolú?

 KO E taha ʻo e ngaahi mōmeniti fakafiefia taha ki ha ongo meʻa mali, ko hono fanauʻi mai ʻena kiʻi pēpē moʻui lelei. Kae kehe, neongo ʻoku ʻofa ʻa e ngaahi mātuʻá ʻi heʻenau kiʻi pēpē toki fanauʻi foʻoú, ʻoku ʻikai ke nau loto ke ne hoko ai pē ko ha kiʻi pēpē. Ko hono moʻoní, te nau hohaʻa lahi kapau heʻikai ke ne tupu ʻo fuʻu lahi. ʻI he tuʻunga meimei tatau, ʻoku fiefia ʻa Sihova ʻi heʻetau fou ʻi he fuofua sitepu ke hoko ko e kau muimui ʻo Sīsū, ka ʻoku ʻikai ke Ne loto ke tau nofoʻaki hoko ko e kau valevale fakalaumālie. (1 Kol. 3:1) ʻI hono kehé, ʻokú ne fiemaʻu ke tau “hoko ʻo matuʻotuʻa” ko e kau Kalisitiane.—1 Kol. 14:20.

2. Ko e hā te tau lāulea ki ai ʻi he kupu ko ení?

² ʻOku ʻuhinga ki he hā ʻa e hoko ko ha Kalisitiane matuʻotuʻa? ʻOku anga-fēfē ʻetau tupulekina ki he tuʻunga matuʻotuʻa faka-Kalisitiané? Ko e hā ʻa e ngafa ʻo e meʻakai fakalaumālie mālohí ʻi heʻetau tupu faka-Kalisitiané? Pea ko e hā ʻoku totonu ai ke tau fakaʻehiʻehi mei he falala tōtuʻá? ʻI he kupu ko ení, te tau lāulea ai ki he tali ki he ngaahi fehuʻi ko ení.

ʻOKU ʻUHINGA KI HE HĀ ʻA E HOKO KO HA KALISITIANE MATUʻOTUʻA?

3. ʻOku ʻuhinga ki he hā ʻa e hoko ko ha Kalisitiane matuʻotuʻa?

³ ʻI he Tohi Tapú, ko e foʻi lea faka-Kalisi naʻe liliu ko e “matuʻotuʻa” ʻe lava ke toe ʻuhinga ko e “haohaoa,” pea mo e “kakato.” a (1 Kol. 2:6) ʻOku tau hoko ʻo matuʻotuʻa, ʻi he tuʻunga ko e kau Kalisitiane ʻi heʻetau tupu hake mei he valevale fakalaumālié pea  hoko ko e kau tangata pe kau fefine fakalaumālie. Ko e moʻoni, naʻa mo ʻetau aʻusia ʻa e taumuʻa ko iá, ʻoku totonu ke ʻoua ʻaupito ʻe taʻofi ʻa ʻetau laka ki muʻa fakalaumālié. (1 Tīm. 4:15) Ko kitautolu kotoa, kau ai ʻa e faʻahinga kei siʻí, ʻe lava ke tau hoko ʻo matuʻotuʻa fakalaumālie. Ka ko e hā ʻokú ne fakahaaʻi kuo tupu ha Kalisitiane ʻo matuʻotuʻa?

4. Ko e hā ʻoku ʻiloʻiʻaki ha Kalisitiane matuʻotuʻa?

⁴ Ko ha Kalisitiane matuʻotuʻa ko ha tokotaha ia ʻokú ne moʻuiʻaki ʻa e kotoa ʻo e ngaahi fiemaʻu ʻa e ʻOtuá, ʻo ʻikai ke toe filifili ʻa e ngaahi meʻa ʻokú ne loto ke muimui ki aí. Ko e moʻoni, koeʻuhi ko ʻene taʻehaohaoá, te ne fai ʻa e ngaahi fehālaaki. Neongo ia, ʻokú ne fakahaaʻi ʻi heʻene moʻui fakaʻahó ʻokú ne fakakaukau mo tōʻonga ʻo fehoanaki mo e finangalo ʻo e ʻOtuá. Kuó ne kofuʻaki ʻa e angaʻitangata foʻoú pea feinga maʻu pē ke fakatonutonu ʻene fakakaukaú ke ofi ange ki he fakakaukau ʻa e ʻOtuá. (ʻEf. 4:​22-24) Kuó ne akoʻi ʻa ia tonu ke fai ʻa e ngaahi fili fakapotopoto ʻo makatuʻunga ʻi he ngaahi lao mo e tefitoʻi moʻoni ʻa Sihová, koeʻuhi ʻoku ʻikai ke ne fiemaʻu ha lisi lōloa ʻo e ngaahi lao ke puleʻi ʻene tōʻongá. ʻI heʻene fai ha fili, ʻokú ne maʻu ʻa e akonakiʻi-kita ke pipiki ki heʻene filí.—1 Kol. 9:​26, 27.

5. Ko e hā ʻa e fakatuʻutāmaki ʻoku fehangahangai mo ha Kalisitiane ʻoku ʻikai ke matuʻotuʻa? (ʻEfesō 4:​14, 15)

⁵ ʻI he tafaʻaki ʻe tahá, ko ha Kalisitiane ʻoku ʻikai ke ne matuʻotuʻa ʻe lavangofua ke takihalaʻi ia ʻe he “ngaahi faʻufaʻu kākaá” mo “olopoto” pea kākaaʻi ʻe he faʻahinga ʻoku nau tufaki ʻa e ngaahi fakamatala loí pea mo e kau tafoki ʻo fakafepaki ki he moʻoní. b (Lau ʻa e ʻEfesō 4:​14, 15.) Te ne hehema nai ke hoko ʻo meheka, fakatupunga ʻa e fekeʻikeʻi, ʻita, pe ʻulutukua ki he fakatauelé.—1 Kol. 3:3.

6. ʻE lava fēfē ke fakatātaaʻi ʻa e tupulekina ki he matuʻotuʻá? (Sio foki ki he fakatātaá.)

⁶ Hangē ko ia naʻe lave ki ai ki muʻá, ʻoku fakahoa ʻe he Folofolá ʻa e tupulekina ki he matuʻotuʻa fakalaumālié ki he tupu ʻa ha kiʻi leka ʻo fuʻu lahi. Ko ha kiʻi leka ʻoku ʻikai ke ne ʻiloʻilo, ko ia ʻokú ne fiemaʻu ʻa e maluʻi mo e tokanga ʻa ha tokotaha lahi. Ke fakatātāʻí, ko ha faʻē te ne tala ange nai ki heʻene kiʻi taʻahiné te ne puke hono nimá lolotonga ʻene kolosi ʻi he halá. ʻI he tupu ʻa e kiʻi taʻahiné ʻo fuʻu lahi angé, ʻe fakaʻatā nai ia ʻe he faʻeé ke ne kolosi toko taha pē ʻi he halá, ka te ne kei fakamanatu pē kiate ia ke tuʻu ʻo sio ʻoku ʻatā ʻa e halá pea toki kolosi. ʻI he hoko ʻa e  kiʻi tamá ko ha tokotaha lahí, ʻokú ne kalofi ai ha fakatamaki pehē. Hangē pē ko e fiemaʻu ʻe he fānaú ʻa e tokoni mei he kakai lalahí ke fakaʻehiʻehi ai mei he fakatuʻutāmakí, ko e kau Kalisitiane ʻoku ʻikai ke nau matuʻotuʻá ʻoku nau faʻa fiemaʻu ʻa e tokoni mei he kau Kalisitiane matuʻotuʻá ke fakaʻehiʻehi ai mei he fakatuʻutāmaki fakalaumālié pea fai ʻa e ngaahi fili fakapotopoto. ʻI hono kehé, ʻi hono fai ʻe he kau Kalisitiane matuʻotuʻá ha fili, ʻoku nau fakaʻuhinga ʻi he ngaahi tefitoʻi moʻoni Fakatohitapú ke maʻu ʻa e fakakaukau ʻa Sihova ki he meʻá pea fakahoko leva ia ʻo fakatatau ki ai.

7. ʻOku fiemaʻu ʻe he kau Kalisitiane matuʻotuʻá ʻa e tokoni ʻa e niʻihi kehé?

⁷ ʻOku ʻuhinga ení ko ha Kalisitiane matuʻotuʻa ʻoku ʻikai ʻaupito ke ne fiemaʻu ha tokoni mei ha taha? ʻIkai. Ko e faʻahinga matuʻotuʻá ʻoku nau fiemaʻu foki ke kole ha tokoni ʻi he taimi ʻe niʻihi. Ka ko ha taha ʻoku ʻikai ke matuʻotuʻa ʻokú ne ʻamanekina nai ʻa e niʻihi kehé ke tala ange ʻa e meʻa ke ne faí pe ke fai ha fili ʻa ia ʻoku totonu ke ne fai. ʻI he tafaʻaki ʻe tahá, ko ha Kalisitiane matuʻotuʻa, te ne ako mei he poto mo e taukei ʻa e niʻihi kehé lolotonga iá ʻokú ne ʻiloʻi ʻoku ʻamanekina ʻe Sihova meiate ia ke “fua ʻene kavenga pē ʻaʻana.”—Kal. 6:5.

8. ʻI he ngaahi founga fē ʻoku kehekehe ai ʻa e faʻahinga matuʻotuʻá?

⁸ Hangē pē ko e kehekehe ʻa e fōtunga hā mai ʻo e kakai lalahí, ko e kau Kalisitiane matuʻotuʻá ʻoku kehekehe ʻa honau ngaahi ʻulungaanga fakalaumālié hangē ko e poto, loto-toʻa, nima-homo mo e kaungāongoʻi. ʻIkai ko ia pē, ʻi he fehangahangai ha Kalisitiane matuʻotuʻa ʻe toko ua mo ha tuʻunga meimei tatau, te na maʻu nai ha fakamulituku kehekehe ka ʻoku fakatou tali Fakatohitapu. ʻOku moʻoni ia tautefito ki he ngaahi fili fakakonisēnisí. ʻI hono ʻiloʻi ení, ʻokú na fakaʻehiʻehi ai mei he fefakamaauʻaki ʻi he faikehekehe peheé. ʻI hono kehé, ʻokú na tokangataha ki he nofoʻaki fāʻūtahá.—Loma 14:10; 1 Kol. 1:10.

ʻOKU ANGA-FĒFĒ ʻETAU TUPULEKINA KI HE TUʻUNGA MATUʻOTUʻA FAKA-KALISITIANÉ?

9. ʻOku ʻotomētiki pē ʻetau tupu ki he matuʻotuʻa fakalaumālié? Fakamatalaʻi.

⁹ ʻOku fakanatula pē nai ke tau tupu ʻo fuʻu lahi ʻi he faai mai ʻa e taimí, ka ʻoku ʻikai ke ʻotomētiki pē ʻa e tupulaki ʻa ha taha ki he matuʻotuʻa fakalaumālié. Ko e fakatātaá, ko e fanga tokoua mo e fanga tuofāfine ʻi Kolinitoó naʻa nau tali ʻa e ongoongo leleí, hoko ʻo papitaiso, maʻu ʻa e laumālie māʻoniʻoní, pea maʻu ʻaonga mei he fakahinohino fakafoʻituitui ʻa e ʻapositolo ko Paulá. (Ngā. 18:​8-11) Neongo ia, ʻi he hili ha ngaahi taʻu mei heʻenau papitaisó, ko e tokolahi naʻe ʻikai pē ke nau hoko ʻo matuʻotuʻa. (1 Kol. 3:2) ʻE lava fēfē ke tau fakaʻehiʻehi mei he fakatuotuai ʻi heʻetau tupu fakalaumālié?

10. Ko e hā kuo pau ke tau fai ke aʻusia ai ʻa e tuʻunga matuʻotuʻá? (Sute 20)

¹⁰ Ke aʻusia ʻa e tuʻunga matuʻotuʻá, kuo pau ke tau ʻuluaki fakatupulekina ʻa e holi ke hoko ʻo matuʻotuʻa. Ko e faʻahinga ʻoku nau “ʻofa ʻi he taʻetaukeí,” ʻo saiʻia ange ke hoko ko e kau valevale fakalaumālié, heʻikai ke nau fai ha fakalakalaka. (Pal. 1:22) ʻOku ʻikai ke tau loto ke hoko ʻo hangē ko e faʻahinga kuo nau lalahi kae kei fakafalala pē ki heʻenau ngaahi mātuʻá ke fai ʻa e ngaahi filí maʻanautolu. ʻI hono kehé, ʻoku tau loto ke fua ʻa e fatongia ki heʻetau tupu fakalaumālié tonu. (Lau ʻa e Sute 20.) Kapau ʻokú ke kei ngāue ke aʻusia ʻa e tuʻunga matuʻotuʻá, lotu kia Sihova ke foaki atu kiate koe “ʻa e holi mo e mālohi [ke ke] ngāue ki he meʻa [ʻokú ke] hōhōʻia aí.”—Fil. 2:13.

11. Ko e hā ʻa e tokoni ʻoku tokonaki mai kiate kitautolu ke fakalakalaka ai ki he tuʻunga matuʻotuʻá? (ʻEfesō 4:​11-13)

¹¹ ʻOku ʻikai ke ʻamanekina mai ʻe Sihova ke tau tupulekina ki he tuʻunga matuʻotuʻá ʻiate kitautolu pē. Ko e faʻahinga ʻoku nau ngāue ko e kau tauhi-sipi mo e kau faiako ʻi he fakatahaʻanga Kalisitiané ʻoku nau mateuteu ke tokoniʻi kitautolu ʻi heʻetau hoko ʻo “matuʻotuʻa” ʻi ha ʻuhinga fakalaumālié,  “pea hoko hotau ʻulungāngá ʻo kakato ko ha tokotaha lahi, hangē ko e Kalaisí.” (Lau ʻa e ʻEfesō 4:​11-13.) ʻOku toe tokonaki mai ʻe Sihova hono laumālie māʻoniʻoní ke tokoniʻi kitautolu ke maʻu “ʻa e fakakaukau ʻa Kalaisí.” (1 Kol. 2:​14-16) ʻIkai ko ia pē, naʻe fakamānavaʻi ʻe he ʻOtuá ʻa hono hiki ʻa e Kōsipeli ʻe faá ke fakahaaʻi mai ai ʻa e anga ʻo e fakakaukau, lea, mo e tōʻonga ʻa Sīsuú lolotonga ʻene ngāue fakafaifekau ʻi he māmaní. ʻI he faʻifaʻitaki ki he anga ʻo e fakakaukau mo e tōʻonga ʻa Sīsuú, ʻe lava ke ke aʻusia ai ʻa hoʻo taumuʻa ʻo e hoko ko ha Kalisitiane matuʻotuʻá.

NGAFA ʻO E MEʻAKAI FAKALAUMĀLIE MĀLOHÍ

12. Ko e hā ʻa e “tokāteline tefito fekauʻaki mo e Kalaisí”?

¹² Koeʻuhi ke tau laka ki muʻa ki he tuʻunga matuʻotuʻá, kuo pau foki ke tau mavahe atu “mei he tokāteline tefito fekauʻaki mo e Kalaisí,” ʻa ia, ko e ngaahi akonaki faka-Kalisitiane tefitó. Ko e fakatātā ʻo e ngaahi akonaki tefito ko iá ʻoku kau ki ai ʻa e fakatomala, tui, papitaiso mo e toetuʻu. (Hep. 6:​1, 2) Ko e ngaahi akonaki peheé ʻoku faʻuʻaki ʻa e fakavaʻe ʻo e lotu faka-Kalisitiané. ʻI he ʻuhinga ko ení, ko e ʻapositolo ko Pitá naʻá ne lea fekauʻaki mo ia ʻi heʻene malanga ki he fuʻu kakai ʻi he Penitekosí. (Ngā. 2:​32-35, 38) Kuo pau ke tau tali ʻa e ngaahi akonaki tefito ko ení ke hoko ai ko e kau ākonga ʻa Kalaisi. Ko e fakatātaá, naʻe fakatokanga ʻa Paula ko ha taha pē naʻá ne fakaʻikaiʻi ʻa e akonaki ʻo e toetuʻú ʻokú ne talitekeʻi ʻa e tui faka-Kalisitiané kotoa. (1 Kol. 15:​12-14) Kae kehe, kuo pau ke ʻoua te tau fiemālie pē ʻi ha ʻilo tefito pē ʻo e moʻoní.

13. Ko e hā kuo pau ke tau fai ke maʻu ʻaonga ai mei he meʻakai fakalaumālie mālohi ʻoku lave ki ai ʻi he Hepelū 5:14? (Sio foki ki he fakatātaá.)

¹³ ʻI hono kehe mei he tokāteline tefitó, ko e meʻakai fakalaumālie mālohí ʻoku kau ki ai ʻo ʻikai ngata pē ʻi he ngaahi lao ʻa Sihová kae pehē foki ki heʻene ngaahi tefitoʻi moʻoní, ʻa ia ʻokú ne tokoniʻi kitautolu ke mahinoʻi ʻene fakakaukaú. Ke maʻu ʻaonga mei he meʻakai ko iá, kuo pau ke tau ako, fakalaulauloto, pea ngāueleleiʻaki ʻa e Folofola ʻa e ʻOtuá. ʻI heʻetau fai peheé, ʻoku tau akoʻi ai kitautolu ke fai ʻa e ngaahi fili ʻoku fakahōifua kia Sihova. c—Lau ʻa e Hepelū 5:14.

14. Naʻe anga-fēfē hono tokoniʻi ʻe Paula ʻa e kau Kolinitoó ke nau tupulekina ki he tuʻunga matuʻotuʻá?

¹⁴ Ko e kau Kalisitiane ʻoku ʻikai ke nau matuʻotuʻá ʻoku faʻa faingataʻa ke nau ʻiloʻi ʻa e meʻa ke  faí ʻi heʻenau fehangahangai mo e ngaahi tuʻunga ʻoku fiemaʻu ki ai ʻa e fakaʻuhinga pea ngāueʻaki ʻa e ngaahi tefitoʻi moʻoní. Kapau ʻoku ʻikai ʻomai ʻi he Tohi Tapú ha lao, ʻoku ongoʻi nai ʻe he niʻihi ʻe lava ke nau fai ha meʻa pē ʻoku nau loto ki ai. Ko e niʻihi ʻoku nau kumi nai ki ha lao ʻi he taimi ʻoku ʻikai fiemaʻu ai ha laó. Ko e fakatātaá, ʻoku ngalingali ko e kau Kalisitiane ʻi Kolinitoó naʻa nau ʻeke kia Paula ha lao pe ʻe lava ke nau kai ʻa e meʻakai naʻe faiʻaki ha feilaulau ki ha ʻaitoli. ʻI he ʻikai ke tala ange ʻa e meʻa ke nau faí, naʻe lāuʻilo ʻa Paula ki he ngafa ʻo e konisēnisí pea mo e moʻoniʻi meʻa ko e tokotaha taki taha ʻokú ne maʻu ha “totonu ki hono fai ha filí.” Naʻá ne fakaʻuhinga ʻi he ngaahi tefitoʻi moʻoni ʻa ia naʻe fakaʻatā ai ʻa e tokotaha taki taha ke ne maʻu ʻa e nonga ʻi hono konisēnisí ʻo ʻikai fakatūkiaʻi ʻa e niʻihi kehé. (1 Kol. 8:​4, 7-9) Naʻe tokoniʻi ai ʻe Paula ʻa e kau Kolinitoó ke nau tupu fakalaumālie koeʻuhí ke nau lava ʻo ngāueʻaki ʻenau mafai ʻiloʻiló kae ʻikai fakafalala ki ha tokotaha kehe pe kumi pē ki ha ngaahi lao.

15. Naʻe anga-fēfē hono tokoniʻi ʻe Paula ʻa e kau Kalisitiane Hepeluú ke fai ha fakalakalaka fakalaumālié?

¹⁵ ʻOku tau ako ha lēsoni mahuʻinga mei he meʻa naʻe tohi ʻe Paula ki he kau Kalisitiane Hepeluú. Ko e niʻihi naʻe ʻikai ke hokohoko atu ʻenau tupu fakalaumālié; ko hono moʻoní naʻa nau “toe foki [kinautolu] ʻo fiemaʻu ʻa e huʻakaú, kae ʻikai ko e meʻakai [fakalaumālie] mālohí.” (Hep. 5:12) Naʻe ʻikai lava ke nau ʻalu fakataha mo e moʻoní, ʻa ia naʻe fakaeʻa māmālie mai ia fakafou ʻi he fakatahaʻangá. (Pal. 4:18) Ko e fakatātaá, ko e kau tui Siu tokolahi naʻa nau kei pouaki ʻa e Lao ʻa Mōsesé neongo naʻe ʻosi fakangata ʻa e Laó ʻi he taʻu ʻe 30 ki muʻa aí ʻo makatuʻunga ʻi he feilaulau ʻa Kalaisí. (Loma 10:4; Tai. 1:10) Ko e moʻoni naʻe ʻikai ko ha meʻa lahi ia ke kole ki he kau Kalisitiane Siú ke fakatonutonu ʻenau fakakaukaú ʻi ha vahaʻa taimi ko e taʻu ʻe 30! Ko ha taha pē kuó ne lau ʻa e tohi fakamānavaʻi ʻa Paula ki he kau Hepeluú ʻe lava ke ne fakapapauʻi ʻoku ʻi he tohi ko ení ʻa e meʻakai fakalaumālie mālohi. Ko e meʻa tofu pē ia naʻe fiemaʻu ʻe he kau Kalisitiane ko iá ke fakaivimālohiʻi ʻenau tui ki he māʻolunga ʻa e fokotuʻutuʻu faka-Kalisitiane ki he lotú pea ke ʻoange kiate kinautolu ʻa e loto-toʻa ke hanganaki malanga neongo ʻa e fakafepaki mei he kau Siú.—Hep. 10:​19-23.

FAKAʻEHIʻEHI MEI HE HOKO ʻO FALALA TŌTUʻÁ

16. Tānaki atu ki he fakalakalaka ki he tuʻunga matuʻotuʻá, ko e hā kuo pau ke tau faí?

¹⁶ Kuo pau ke tau kīvoi ʻo ʻikai ke aʻusia pē ʻa e  tuʻunga matuʻotuʻá ka ke hanganaki tauhi maʻu foki ia. ʻOku fiemaʻu heni ke tau fakaʻehiʻehi mei he hoko ʻo falala tōtuʻá. (1 Kol. 10:12) ʻOku totonu ke tau “hanganaki siviʻi” kitautolu ke fakapapauʻi ʻoku tau hokohoko atu ke fai ha fakalakalaka.—2 Kol. 13:5.

17. ʻOku anga-fēfē hono fakahaaʻi ʻi he tohi ʻa Paula ki he kau Kolosé ʻa e fiemaʻu ke tauhi maʻu ʻa e tuʻunga matuʻotuʻá?

¹⁷ ʻI he tohi ʻa Paula ki he kau Kolosé, naʻá ne toe fakamamafaʻi ai ʻa e fiemaʻu ko ia ke tauhi maʻu ʻa e tuʻunga matuʻotuʻá. Neongo naʻa nau hoko ko e kau Kalisitiane matuʻotuʻa, naʻe fakatokanga ʻa Paula kiate kinautolu fekauʻaki mo e hoko ʻo tauheleʻi ʻe he fakakaukau ʻa e māmaní. (Kol. 2:​6-10) Pea ko ʻEpafasi, ʻa ia ʻoku hā mahino naʻá ne ʻiloʻi lelei ʻa e faʻahinga ʻi he fakatahaʻangá, naʻá ne lotu maʻu pē ke nau hoko ʻo “tuʻu maʻu ko ha faʻahinga ʻoku matuʻotuʻa.” (Kol. 4:12) Ko e hā ʻa e poiní? Naʻe mahinoʻi fakatouʻosi ʻe Paula mo ʻEpafasi ko hono tauhi maʻu ʻa e tuʻunga matuʻotuʻá ʻoku fiemaʻu ki ai ʻa e feinga fakafoʻituitui pea mo e poupou ʻa e ʻOtuá. Naʻá na loto ke tauhi maʻu ʻe he kau Kolosé honau tuʻunga matuʻotuʻa faka-Kalisitiané neongo ha faʻahinga pole pē naʻa nau fehangahangai mo ia.

18. Ko e hā ʻe lava ke hoko ki ha Kalisitiane matuʻotuʻa? (Sio foki ki he fakatātaá.)

¹⁸ Naʻe fakatokanga ʻa Paula ki he kau Hepeluú ko ha Kalisitiane matuʻotuʻa ʻe lava ke mole tuʻuloa meiate ia ʻa e hōifua ʻa e ʻOtuá. ʻE lava ke hoko ha Kalisitiane ʻo mātuʻaki loto-fefeka ʻo ʻikai malava ai ke ne fakatomala pea maʻu ʻa e fakamolemole ʻa e ʻOtuá. Kae mālō, naʻe ʻikai ke aʻu ʻa e kau Hepeluú ki he tuʻunga ko iá. (Hep. 6:​4-9) Kae fēfē ʻa e faʻahinga ʻi he ʻahó ni ʻoku nau hoko ʻo ʻikai longomoʻui pe naʻe tuʻusi kae fakatomala ki mui ai? Ko ʻenau fakatomala anga-fakatōkilaló ʻoku fakahaaʻi mai ai ʻoku nau kehe mei he faʻahinga naʻe tohi ʻa Paula ʻo fekauʻaki mo iá. Kae kehe, ʻi heʻenau foki kia Sihová, ʻoku nau fiemaʻu ʻa e tokoni ʻokú ne tokonaki maí. (ʻIsi. 34:​15, 16) Ko e kau mātuʻá te nau fokotuʻutuʻu nai ki ha Fakamoʻoni taukei ke ne tokoniʻi kinautolu ke toe maʻu honau mālohi fakalaumālié.

19. Ko e hā ʻa e taumuʻa ʻoku totonu ke tau maʻú?

¹⁹ Kapau ʻokú ke tutui atu ki he tuʻunga matuʻotuʻa faka-Kalisitiané, ʻe lava ke ke aʻusia hoʻo taumuʻá! Hokohoko atu ke kai ʻa e meʻakai fakalaumālie mālohí pea fakatonutonu hoʻo fakakaukaú ke toe ofi ange ki he fakakaukau ʻa Sihová. Pea kapau kuó ke ʻosi hoko ʻo matuʻotuʻa, nofoʻaki tuʻu maʻu ai pē ʻi he tuʻunga ko ha Kalisitiane matuʻotuʻa.