1-2. Fakatatau ki he Mātiu 5:11, ‘oku totonu ke fēfē ‘etau vakai ki he ngaahi ‘ahi‘ahí?

NA‘E tala‘ofa ‘e Sīsū ki hono kau muimuí te nau ma‘u ‘a e fiefia mo‘oni. Na‘á ne toe fakatokanga ki he fa‘ahinga ‘oku nau ‘ofa kiate iá te nau fehangahangai mo e ngaahi ‘ahi‘ahi. (Māt. 10:22, 23; Luke 6:20-23) ‘Oku tau ma‘u ‘a e fiefia ‘i he hoko ko e kau ākonga ‘a Kalaisí. Ka ‘oku anga-fēfē ‘etau ongo‘i kapau ‘e fakafepaki‘i kitautolu ‘e he fāmilí, fakatanga‘i ‘e he pule‘angá pe tenge kitautolu ‘e he kaungāngāué pe kaungāakó ke faihala? ‘Oku hā mahino, ‘i he‘etau fakakaukau ki he ngaahi me‘a ko iá ‘e ‘ai ai kitautolu ke tau ongo‘i hoha‘a.

² Ko e anga-mahení ‘oku ‘ikai vakai ‘a e kakaí ki he fakatangá ko ha me‘a ke nau fiefia ai. Neongo ia, ko e me‘a tofu pē ia ‘oku tala mai ‘e he Folofola ‘a e ‘Otuá ke tau faí. Ko e fakatātaá, na‘e tohi ‘e he ākonga ko Sēmisí ‘i he ‘ikai ongo‘i lōmekina ‘i he fekuki mo e ngaahi ‘ahi‘ahí, ‘oku totonu ke tau lau ia ko e koto fakafiefia. (Sēm. 1:2, 12) Pea na‘e pehē ‘e Sīsū ‘oku totonu ke tau fiefia na‘a mo hono fakatanga‘i kitautolú. (Lau ‘a e Mātiu 5:11.) ‘E lava fēfē ke tau tauhi ma‘u ‘etau fiefiá neongo ‘a e ngaahi ‘ahi‘ahí? ‘E lava ke tau ako ‘a e me‘a lahi ‘i he lāulea ki he ngaahi fakakaukau ‘e ni‘ihi mei he tohi ‘a Sēmisi ki he mu‘aki kau Kalisitiané. ‘Uluakí, tau lāulea angé ki he ngaahi pole na‘e fehangahangai mo e kau Kalisitiane ko iá.

3. Ko e hā na‘e hoko taimi nounou mei he hoko ‘a Sēmisi ko e ākonga ‘a Sīsuú?

³ Taimi nounou pē mei he hoko ‘a e tokoua fa‘ē taha ‘o Sīsū ko Sēmisí ko ha ākongá, na‘e kamata ke fakafepaki‘i ‘a e kau Kalisitiane ‘i Selusalemá. (Ngā. 1:14; 5:17, 18) Pea ‘i he taimi na‘e fakapoongi ai ‘a e ākonga ko Sitīvení, na‘e tokolahi ‘a e kau Kalisitiane na‘a nau hola mei he koló pea na‘e “movete atu ‘a e fa‘ahinga kotoa ‘i he kotoa ‘o e ngaahi feitu‘u ‘o Siutea mo Samēliá,” pea faai atu  pē ‘o nau a‘u ki Saipalo mo ‘Aniteoke. (Ngā. 7:58–8:1; 11:19) ‘Oku tau sioloto atu pē ki he faingata‘a na‘e kātekina ‘e he kau ākongá. Neongo ia, na‘a nau malanga‘i vēkeveke ‘a e ongoongo leleí ‘i ha fetu‘u pē na‘a nau ‘alu ki ai, pea fokotu‘u mo e ngaahi fakataha‘anga ‘i he ‘Emipaea Lomá kotoa. (1 Pita 1:1) Ka na‘e lahi ‘a e ngaahi taimi faingata‘a na‘e toka mei mu‘a ki he mu‘aki kau Kalisitiané.

4. Ko e hā ‘a e ngaahi ‘ahi‘ahi kehe na‘e pau ke kātekina ‘e he mu‘aki kau Kalisitiané?

⁴ Na‘e pau ke kātekina ‘e he mu‘aki kau Kalisitiané ha ngaahi ‘ahi‘ahi kehekehe. Ko e fakatātaá, ‘i he ta‘u 50 T.S. nai, na‘e tu‘utu‘uni ‘e he ‘Emipola Loma ko Kalautiasí ki he kau Siú kotoa ke nau mavahe mei Loma. Ko ia ko e kau Kalisitiane Siú na‘e fakamālohi‘i ke nau li‘aki honau ngaahi ‘apí pea hiki ki ha feitu‘u kehe. (Ngā. 18:1-3) ‘I he 61 T.S. nai, na‘e tohi ‘e he ‘apositolo ko Paulá ko hono kaungā-Kalisitiané na‘e luma‘i fakahāhā kinautolu, tuku pilīsone, pea fa‘ao fakamālohi. (Hep. 10:32-34) Pea hangē pē ko e kakai kehé, na‘e pau ki he kau Kalisitiané ke nau kātekina ‘a e masivá mo e mahamahakí.​—Loma 15:26; Fil. 2:25-27.

5. Ko e hā ‘a e ngaahi fehu‘i te tau talí?

⁵ ‘I he taimi na‘e hiki ai ‘e Sēmisi ‘ene tohí ki mu‘a ‘i he ta‘u 62 T.S., na‘á ne ‘ilo‘i lelei ‘a e ngaahi ‘ahi‘ahi na‘e hokosia ‘e hono fanga tokouá mo e fanga tuofāfiné. Na‘e fakamānava‘i ‘e Sihova ‘a Sēmisi ke ne ‘oatu ki he kau Kalisitiane ko iá ‘a e fale‘i ‘aonga ke tokoni kiate kinautolu ke nofo‘aki fiefia neongo ‘a e ngaahi ‘ahi‘ahí. Te tau sivisivi‘i ‘a e tohi ‘a Sēmisí pea tali ‘a e ngaahi fehu‘i ko ení: Ko e hā ‘a e fiefia na‘e tohi ‘a Sēmisi ‘o fekau‘aki mo iá? Ko e hā te ne kaiha‘asia ‘a e fiefia ‘a ha Kalisitiane? Pea ‘e lava fēfē ke tokoni‘i kitautolu ‘e he potó, tuí mo e loto-to‘á ke tauhi ma‘u ‘etau fiefiá neongo pe ko e hā ha ‘ahi‘ahi te tau fekuki mo ia?

6. Fakatatau ki he Luke 6:22, 23, ko e hā ‘e lava ke fiefia ai ha Kalisitiane ‘i he tofanga ‘i he ‘ahi‘ahí?

⁶ ‘Oku fakakaukau nai ‘a e kakaí te nau toki fiefia pē kapau ‘oku nau ma‘u ha mo‘ui lelei, ma‘u ha pa‘anga lahi, pea melino ‘a e fāmilí. Ka ko e fa‘ahinga fiefia na‘e tohi ‘a Sēmisi ‘o fekau‘aki mo iá ko e konga ia ‘o e fua ‘o e laumālie ‘o e ‘Otuá, pea ‘oku ‘ikai fakatu‘unga ia ‘i he tu‘unga ‘o ha tokotaha. (Kal. 5:22) ‘Oku ma‘u ‘e ha Kalisitiane ‘a e fiefia mo‘oní ‘i he‘ene ‘ilo‘i ‘okú ne fakahōifua‘i ‘a Sihova pea muimui ‘i he fa‘ifa‘itaki‘anga ‘a Sīsuú. (Lau ‘a e Luke 6:22, 23; Kol. 1:10, 11) Ko e fa‘ahinga fiefia ko eni ‘oku ‘i he loto ‘o ha Kalisitiane ‘oku hangē ia ko e ulo ‘oku ‘i ha maama matangi. ‘Oku ‘ikai tamatemate ia ‘i he mahamahakí pe si‘i ‘a e pa‘angá. Pea ‘oku ‘ikai mate ia ‘i he manukí pe fakatanga mei he fāmilí pe ni‘ihi kehé. ‘I he ‘ikai ke mate ‘i he taimi ‘oku feinga ai ‘a e kau fakafepakí ke tāmate‘í, ‘oku toe ‘āsili ange ‘ene uló. Ko e ngaahi ‘ahi‘ahi ‘oku tau fekuki mo ia koe‘uhi ko ‘etau tuí ‘okú ne fakapapau‘i ai ko e kau ākonga mo‘oni kitautolu ‘a Kalaisi. (Māt. 10:22; 24:9; Sione 15:20) Ko e ‘uhinga ia na‘e tohi ai ‘e Sēmisi: “Mou lau ko e koto fakafiefia, ‘e hoku fanga tokoua, ‘a e taimi ‘oku mou fetaulaki ai mo e ngaahi ‘ahi‘ahi kehekehé.”​—Sēm. 1:2.

7-8. ‘Oku ‘aonga fēfē ‘a e ‘ahi‘ahí ki he‘etau tuí?

⁷ ‘Oku lave ‘a Sēmisi ki ha toe ‘uhinga ‘e taha ‘oku loto-lelei ai ‘a e kau Kalisitiané ke fekuki mo ha ngaahi ‘ahi‘ahi kakaha. ‘Okú ne pehē: “‘Oku fakatupu ai ‘e ho‘omou tui ko ‘eni kuo ‘osi sivi‘í ‘a e kātaki.” (Sēm. 1:3) Ko e ngaahi ‘ahi‘ahí ‘oku lava ke fakahoa ia ki ha afi ‘oku ngāue‘aki ke ne fakafuo ha mata‘i-hele ukamea. ‘I he taimi ‘oku tutu ai ‘a e ukameá pea fakamokomokó, ‘oku fefeka ange ai ‘a e ukameá. ‘I he tu‘unga meimei tatau, ‘i he taimi ‘oku tau kātekina ai ‘a e ngaahi ‘ahi‘ahí, ‘oku fakaivimālohi‘i ai ‘etau tuí. Ko e ‘uhinga ia na‘e tohi ai ‘e Sēmisi: “Tuku mu‘a ke fakakakato ‘e he kātakí ‘ene ngāué, koe‘uhi ke mou hoko ai ‘o kakato mo haohaoa ‘i he ngaahi tafa‘aki kotoa pē.” (Sēm. 1:4) ‘I he‘etau sio ki hono ‘ai ‘e he ngaahi ‘ahi‘ahí ‘etau tuí ke toe mālohi angé, ‘e lava ke tau kātekina kinautolu ‘i he fiefia.

⁸ ‘I he tohi ‘a Sēmisí, na‘á ne toe lave ai ki he ngaahi me‘a ‘e lava ke ne ‘ai ke mole ‘etau fiefiá. Ko e hā ‘a e ngaahi pole ko iá, pea ‘e lava fēfē ke tau iku‘i ia?

9. Ko e hā ‘oku tau fiema‘u ai ‘a e potó?

⁹ Ko e pole: ‘Ikai ‘ilo‘i ‘a e me‘a ke faí. ‘I he tofanga ‘i ha ‘ahi‘ahi, ‘oku tau loto ke hanga kia Sihova ki ha tokoni ke fai ha fili ke fakahōifua‘i ia, ma‘u ‘aonga mei ai hotau fanga tokouá mo e fanga tuofāfiné, pea tauhi ma‘u ai ‘etau anga-tonú. (Sel. 10:23) ‘Oku tau fiema‘u ‘a e poto ke ‘ilo‘i ‘a e ‘alunga ke tau fou aí mo e me‘a ‘oku totonu ke tau lea‘aki ki he fa‘ahinga ‘oku nau fakafepaki‘i kitautolú. Kapau ‘oku ‘ikai ke tau ‘ilo‘i ‘a e me‘a ke faí, te tau ongo‘i feifeitamaki nai pea ‘e vave ke mole ‘etau fiefiá.

10. Ko e hā ‘oku tala mai ‘i he Sēmisi 1:5 ke tau faí ke ma‘u ai ‘a e potó?

 ¹⁰ Fakalelei‘anga: Kole kia Sihova ha poto. Kapau ‘oku tau loto ke kātekina hotau ngaahi ‘ahi‘ahí ‘i he fiefia, kuo pau ke tau ‘uluaki kole kia Sihova ‘i he lotu ke foaki mai ‘a e poto ‘oku tau fiema‘u ke fai ‘aki ‘a e ngaahi fili leleí. (Lau ‘a e Sēmisi 1:5.) ‘Oku totonu ke fēfē ‘etau fakafeangaí kapau ‘oku ‘ikai tali vave mai ‘e Sihova ‘etau lotú? ‘Oku pehē ‘e Sēmisi ‘oku totonu ke tau “hanganaki kole” ki he ‘Otuá. ‘Oku ‘ikai faka‘ita‘i ‘a Sihova ‘i he taimi ‘oku tau hanganaki kole ai kiate ia ha potó. He‘ikai te ne ngāhi‘i kitautolu. Ko ‘etau Tamai fakahēvaní ‘okú ne “foaki nima-homo” ‘i he taimi ‘oku tau lotu ai ki ha poto ke kātekina hotau ngaahi ‘ahi‘ahí. (Saame 25:12, 13) ‘Okú ne ‘afio‘i hotau ngaahi ‘ahi‘ahí, ‘okú ne kaungāongo‘i, pea ‘okú ne loto-lelei ke tokoni‘i kitautolu. Ko hono mo‘oní, ko ha ‘uhinga ia ki he‘etau fiefiá! Ka ‘oku anga-fēfē hono foaki mai ‘e Sihova ‘a e potó?

11. Ko e hā ha toe me‘a kuo pau ke tau fai ke ma‘u ai ‘a e potó?

¹¹ ‘Oku foaki mai ‘e Sihova ‘a e potó fakafou ‘i he‘ene Folofolá. (Pal. 2:6) Ke ma‘u ‘a e poto ko iá, kuo pau ke tau ako ‘a e Folofola ‘a e ‘Otuá, pea mo e ngaahi tohi Fakatohitapú. Ka ‘oku fiema‘u ke tau fai ‘a e me‘a lahi ange ‘i hono ma‘u pē ‘a e ‘iló. Kuo pau ke tau ngāue‘aki ‘a e poto ‘o e ‘Otuá ‘i he‘etau mo‘uí ‘aki ‘a e talangofua ki he‘ene fale‘í. Na‘e tohi ‘e Sēmisi: “Mou hoko ko e kau fai ki he folofolá ‘o ‘ikai ko e kau fanongo pē.” (Sēm. 1:22) ‘I he‘etau ngāue‘aki ‘a e fale‘i ‘a e ‘Otuá, ‘oku tau hoko ‘o fakamelino ange, faka‘atu‘i ange mo fonu he meesi. (Sēm. 3:17) ‘Oku tokoni‘i kitautolu ‘e he ngaahi ‘ulungaanga ko iá ke tau fekuki mo ha ‘ahi‘ahi pē pea ‘ikai mole ai ‘etau fiefiá.

12. Ko e hā ‘oku mahu‘inga ai ke tau ‘ilo‘i lelei ‘a e Tohi Tapú?

¹² ‘Oku hangē ‘a e Folofola ‘a e ‘Otuá ko ha sio‘atá, ‘okú ne tokoni‘i kitautolu ke tau ‘ilo‘i mo mahino‘i ‘a e me‘a ‘oku totonu ke tau ngāue ki aí.  (Sēm. 1:23-25) Ko e fakatātaá, hili hano ako ‘a e Folofola ‘a e ‘Otuá, te tau ‘ilo‘i nai ‘oku fiema‘u ke tau mapule‘i ‘etau ‘itá. ‘I he tokoni ‘a Sihová, ‘oku tau ako ai ke anga-malū ‘i he fakafeangai ki he kakai pe ko ha palopalema te ne faka‘ita‘i kitautolu. Koe‘uhi ko ‘etau anga-maluú, ‘oku tau fekuki lelei ange mo e ngaahi tenge ‘oku tau fehangahangai mo iá. ‘Oku lava ai ke tau fakakaukau lelei ange pea fai ha ngaahi fili lelei ange. (Sēm. 3:13) He mahu‘inga ē ke tau ‘ilo‘i lelei ‘a e Tohi Tapú!

13. Ko e hā ‘oku totonu ai ke tau ako ‘a e ngaahi fa‘ifa‘itaki‘anga ‘a e fa‘ahinga ‘i he Tohi Tapú?

¹³ ‘I he taimi ‘e ni‘ihi ‘oku tau toki ‘ilo‘i pē me‘a ke tau faka‘ehi‘ehi mei aí hili ha‘atau fai ha fehālaaki. Ka ko ha founga faingata‘a ia ‘o e akó. Ko e founga lelei ange ke ma‘u ai ‘a e potó ko e ako mei he ngaahi lavame‘a mo e ngaahi fehālaaki ‘a e ni‘ihi kehé. Ko e ‘uhinga ia ‘oku fakalototo‘a‘i ai kitautolu ‘e Sēmisi ke tau vakai ki he fa‘ifa‘itaki‘anga ‘a e fa‘ahinga ‘i he Tohi Tapú, hangē ko ‘Ēpalahame, Lēhapi, Siope, mo ‘Ilaisiā. (Sēm. 2:21-26; 5:10, 11, 17, 18) Ko e kau sevāniti mateaki ko ia ‘a Sihová na‘a nau lava ke kātekina ‘a e ngaahi ‘ahi‘ahi na‘e mei malava ke ne kaiha‘asia ‘enau fiefiá. ‘I he‘enau ngaahi fa‘ifa‘itaki‘anga ‘o e kātakí ‘oku fakahaa‘i ai ‘i he tokoni ‘a Sihová ‘e lava ke tau fai ‘a e me‘a tatau.

14-15. Ko e hā ‘oku totonu ai ke ‘oua te tau tukunoa‘i ‘etau veiveiuá?

¹⁴ Ko e pole: Ngaahi veiveiua. ‘I he taimi ‘e ni‘ihi, ‘oku faingata‘a nai ke tau mahino‘i ha me‘a ‘i he Folofola ‘a e ‘Otuá. Pe ‘oku ‘ikai nai tali ‘e Sihova ‘etau ngaahi lotú ‘i he founga na‘a tau ‘amanekiná. ‘E tupu nai heni ha ngaahi veiveiua. Kapau te tau tukunoa‘i ‘etau ngaahi veiveiuá, ‘e vaivai ai ‘etau tuí pea maumau‘i ai hotau vaha‘angatae mo Sihová. (Sēm. 1:7, 8) Pea ‘e lava ke mole ai ‘etau ‘amanaki ki he kaha‘ú.

¹⁵ Na‘e fakahoa ‘e he ‘apositolo ko Paulá ‘etau ‘amanaki ki he kaha‘ú ki ha taula. (Hep. 6:19) Ko ha taula ‘okú ne ‘ai ke tu‘u ma‘u ‘a e vaká lolotonga ‘a e matangí pea ta‘ofi ia mei ha‘ane hake ‘i ha maka. Ka ko e taulá ‘e toki ngāue pē ia kapau ko e sēini ‘okú ne fakama‘u ia ki he vaká ‘oku ‘ikai ke motu. Hangē ko hono fakavaivai‘i ‘e he ‘ume‘umeá ‘a e sēini taulá, ‘oku pehē pē hono fakavaivai‘i ‘e he veiveiuá ‘etau tuí. ‘I hono fakafepaki‘i ha tokotaha ‘oku veiveiua, ‘e lava ke mole ai ‘ene tui ‘e fakahoko ‘e Sihova ‘ene ngaahi tala‘ofá. Kapau ‘e mole ‘etau tuí ‘e mole ‘etau ‘amanakí. Hangē ko e lea ‘a Sēmisí, ko ha tokotaha veiveiua “‘okú ne hangē ko e peau ‘o e tahí ‘a ia ‘oku ‘ave takai mo fepale‘ekina holo ‘e he matangí.” (Sēm. 1:6) Ko ha tokotaha ‘i ha tu‘unga pehē ‘oku ngalingali he‘ikai ‘aupito ke fiefia!

16. Ko e hā ‘oku totonu ke tau faí kapau ‘oku ‘i ai ha‘atau ngaahi veiveiua?

¹⁶ Fakalelei‘anga: Faitau mo ho‘o veiveiuá; fakaivimālohi‘i ho‘o tuí. ‘Oua ‘e lotolotoua. ‘I he ngaahi ‘aho ‘o e palōfita ko ‘Ilaisiaá, na‘e lotolotoua ‘a e kakai ‘a Sihová. Na‘e tala ange ‘e ‘Ilaisiā: “Ko e hā hono fuoloa ‘o e ‘ikai te mou ‘ai ke pau ‘a ho‘omou fakakaukaú? Kapau ko Sihova ‘a e ‘Otua mo‘oní, muimui ‘iate ia ka ‘o kapau ko Pēali, muimui ‘iate ia!” (1 Tu‘i 18:21) ‘Oku tatau pē ia mo e ‘ahó ni. ‘Oku fiema‘u ke tau fai ha fekumi ke tau fakamo‘oni‘i kiate kitautolu ko Sihova ‘a e ‘Otuá, ko e Tohi Tapú ‘ene Folofolá, pea ko e Kau Fakamo‘oni ‘a Sihová ‘a ‘ene kakaí. (1 Tes. 5:21) ‘I he‘etau fai kotoa iá te tau to‘o atu ‘etau ngaahi veiveiuá pea fakaivimālohi‘i ‘etau tuí. Kapau ‘oku tau fiema‘u ha tokoni ke iku‘i ‘etau ngaahi veiveiuá, ‘e lava ke tau kole ki he kau mātu‘á. Kuo pau ke tau ngāue vave kapau ‘oku tau fiema‘u ke tauhi ma‘u ‘etau fiefiá ‘i he‘etau tauhi kia Sihová!

17. Ko e hā ‘e hoko kapau ‘e mole ‘etau loto-to‘á?

¹⁷ Ko e pole: Loto-si‘i. ‘Oku pehē ‘e he Folofola ‘a e ‘Otuá: “Kapau te ke hoko ‘o loto-si‘i ‘i he ‘aho ‘o e mamahí, ‘e si‘i ai ho iví.” (Pal. 24:10) Ko e lea faka-Hepelū na‘e liliu ko e “hoko ‘o loto-si‘i” ‘e lava ke ‘uhinga ko e “mole ‘a e loto-to‘á.” Kapau ‘e mole ho‘o loto-to‘á, ‘e vave ke mole ho‘o fiefiá.

18. Ko e hā ‘oku ‘uhinga ki ai ‘a e kātakí?

 ¹⁸ Fakalelei‘anga: Falala kia Sihova ke ne ‘oatu ‘a e loto-to‘a ke kātaki. ‘Oku fiema‘u ke tau ma‘u ‘a e loto-to‘á kapau ‘oku tau loto ke kātekina ‘a e ngaahi ‘ahi‘ahí. (Sēm. 5:11) Ko e fo‘i lea na‘e ngāue‘aki ‘e Sēmisi na‘e liliu ko e “kātaki” ‘okú ne ‘omai ‘a e fo‘i fakakaukau ki ha tokotaha ‘oku tu‘u ma‘u ‘i hono tu‘u‘angá. ‘E lava ke tau fakakaukau nai ki ha sōtia ‘oku tu‘u loto-to‘a ‘i hono tu‘u‘angá ‘o fakafepaki‘i ‘a e filí, ‘o fakafisi ke ne holomui neongo ‘a e fakailifia ‘a e ‘oho ‘a e filí.

19. Ko e hā ‘e lava ke tau ako mei he fa‘ifa‘itaki‘anga na‘e fokotu‘u ‘e he ‘apositolo ko Paulá?

¹⁹ Na‘e fokotu‘u ‘e he ‘apositolo ko Paulá ‘a e fa‘ifa‘itaki‘anga tu‘u-ki-mu‘a ‘o e loto-to‘á mo e kātakí. ‘I ha taimi, na‘á ne ongo‘i vaivai. Ka na‘e malava ke ne kātaki koe‘uhí na‘á ne falala kia Sihova ke ne ‘oange kiate ia ‘a e ivi na‘á ne fiema‘ú. (2 Kol. 12:8-10; Fil. 4:13) ‘E lava ke tau ma‘u ‘a e fa‘ahinga ivi ko iá mo e loto-to‘á kapau te tau lāu‘ilo anga-fakatōkilalo ‘oku tau fiema‘u ‘a e tokoni ‘a Sihová.​—Sēm. 4:10.

20-21. Ko e hā ‘e lava ke tau fakapapau‘í?

²⁰ ‘Oku lava ke tau fakapapau‘i ko e ngaahi ‘ahi‘ahi ‘oku tau fekuki mo iá ‘oku ‘ikai ko ha tautea meia Sihova. ‘Oku fakapapau‘i mai ‘e Sēmisi: “‘I he tofanga ‘i he ‘ahi‘ahí, tuku ke ‘oua na‘a pehē ‘e ha taha: ‘Kuo ‘ahi‘ahi‘i au ‘e he ‘Otuá.’ He ‘oku ‘ikai malava ke ‘ahi‘ahi‘i ‘a e ‘Otuá ‘aki ‘a e ngaahi me‘a ‘oku koví, pea ‘oku ‘ikai te ne ‘ahi‘ahi‘i ‘aki ia ha taha.” (Sēm. 1:13) ‘I he‘etau falala pau ki he mo‘oni‘i me‘a ko iá, ‘oku tau ‘unu‘unu ofi ange ai ki he‘etau Tamai fakahēvani ‘ofá.​—Sēm. 4:8.

²¹ Ko Sihová “‘oku ‘ikai ha‘ane liliu pe fetongitongi.” (Sēm. 1:17) Na‘á ne tokoni‘i ‘a e kau Kalisitiane ‘i he ‘uluaki senitulí ‘i honau ngaahi ‘ahi‘ahí, pea te ne tokoni‘i foki kitautolu tāutaha ‘i he ‘ahó ni. Kole tōtōivi kia Sihova ke ne foaki atu ‘a e poto, tui mo e loto-to‘a. Te ne tali ho‘o ngaahi lotú. Pea ‘e lava ke ke fakapapau‘i te ne tokoni‘i koe ke tauhi ma‘u ho‘o fiefiá lolotonga ho‘o kātekina ‘a e ngaahi ‘ahi‘ahí!