ʻI HE Pulelulu, Sanuali 18, 2023, naʻe hā ha fanongonongo makehe ʻi he jw.org, ʻo fakahaaʻi ai ko Tokoua Gage Fleegle mo Jeffrey Winder kuo fakanofo ke na ngāue ko ha mēmipa ʻo e Kulupu Pule ʻo e Kau Fakamoʻoni ʻa Sihová. Ko e ongo tokouá kuó na maʻu ha hisitōlia fuoloa ʻo e ngāue faitōnunga kia Sihova.

Ko Tokoua Fleegle naʻe ʻohake ʻi he fakahihifo ʻo Pennsylvania, ʻAmeliká, ʻe heʻene ongo mātuʻa manavahē-ʻOtuá. ʻI heʻene taʻu hongofulu tupú, naʻe hiki hono fāmilí ki ha kiʻi kolo ʻuta ʻa ia naʻe lahi ange ai ʻa e fiemaʻú. Taimi nounou mei ai, naʻá ne papitaiso ʻi Nōvema 20, 1988.

Naʻe fakalototoʻaʻi maʻu pē ʻe he ongo mātuʻa ʻa Tokoua Fleegle ia ke ne hū ki he ngāue taimi-kakató. Naʻa nau faʻa talitali ʻa e kau ʻovasia sēketí mo e kau Pētelí ki honau ʻapí, pea naʻe lava ke sio ʻa Tokoua Fleegle ki he fiefia ʻa e fanga tokoua mo e fanga tuofāfine ko ení. ʻIkai fuoloa mei heʻene papitaisó, naʻe kamata ke ne tāimuʻa tuʻumaʻu—ʻi Sepitema 1, 1989. ʻI ha taʻu ʻe ua mei ai, naʻá ne aʻusia ha taumuʻa naʻá ne fokotuʻu ʻi heʻene taʻu 12—ko e taumuʻa ke ngāue ʻi Pēteli. Naʻe kamata ʻene ngāué ʻi he Pēteli ʻi Brooklyn ʻi ʻOkatopa 1991.

ʻI Pēteli, naʻe ngāue ʻa Tokoua Fleegle ʻi he Takafi-Tohí ʻi he taʻu ʻe valu, hili iá naʻe vaheʻi ia ki he Potungāue Ngāué. Lolotonga ʻa e taimi ko iá, naʻá ne ngāue ʻi ha fakatahaʻanga lea faka-Lūsia ʻi ha ngaahi taʻu siʻi. ʻI he 2006 naʻá ne mali mo hono uaifí, ʻa Nadia, peá ne kau fakataha mo ia ʻi he ngāue Pētelí. Kuó na ngāue fakataha ʻi he malaʻe lea faka-Potukalí pea laka hake ʻi he taʻu ʻe hongofulu ʻi he malaʻe lea faka-Sipeiní. Hili ha ngaahi taʻu lahi ʻi he Potungāue Ngāué, naʻe vaheʻi ʻa Tokoua Fleegle ke ngāue ʻi he ʻŌfisi Kōmiti Faiakó pea ki mui ai ʻi he ʻŌfisi Kōmiti Ngāué. ʻI Maʻasi 2022 naʻe fakanofo ia ko ha tokotaha-tokoni ki he Kōmiti Ngāue ʻo e Kulupu Pulé.

 Ko Tokoua Winder naʻe ʻohake ia ʻi Murrieta, Kalefōnia, ʻAmelika. Naʻe ʻohake ia ʻi he moʻoní ʻe heʻene ongo mātuʻá, pea naʻá ne papitaiso ʻi Maʻasi 29, 1986. ʻI he māhina hokó pē, naʻá ne fili ke tāimuʻa tokoni. Naʻá ne fiefia lahi ai pea loto ke hokohoko atu. Hili ʻa e tāimuʻa tokoni ʻi ha ngaahi māhina, naʻá ne kamata tāimuʻa tuʻumaʻu ʻi ʻOkatopa 1, 1986.

ʻI he kei taʻu hongofulu tupú, naʻe ʻaʻahi ʻa Tokoua Winder ki hono ongo tokoua lalahi naʻá na ngāue ʻi Pēteli ʻi he taimi ko iá. Ko e ʻaʻahi ko iá naʻe langaʻi ai ʻene holi ke tohi kole ki he ngāue Pētelí ʻi heʻene fuʻu lahí. Pea ʻi Mē 1990, naʻe fakaafeʻi ia ke ngāue ʻi he Pēteli ʻi Wallkill.

ʻI Pēteli, naʻe ngāue ʻa Tokoua Winder ʻi he ngaahi potungāue kehekehe, kau ai ʻa e Potungāue Fakamaʻá, Fāmá mo e ʻŌfisi Pētelí. Naʻá ne mali mo hono uaifí, ʻa Angela, ʻi he 1997, pea kuó na ngāue fakataha ʻi Pēteli talu mei ai. ʻI he 2014 naʻá na hiki ki Warwick, ʻa ia naʻe tokoni ai ʻa Tokoua Winder ʻi he langa ʻo e ʻuluʻi ʻapitanga ʻi māmaní. ʻI he 2016 naʻá na hiki ki he Senitā Fakaeako Taua Leʻo ʻi Patterson, ʻa ia naʻe ngāue ai ʻa Tokoua Winder ʻi he Potungāue Hiki-Leʻo/Vitiō. ʻI ha taʻu ʻe fā ki mui ai, naʻá na foki ki Warwick, pea naʻe vaheʻi ʻa Tokoua Winder ke ngāue ʻi he ʻŌfisi Kōmiti Kau Ngāué. ʻI Maʻasi 2022 naʻe fakanofo ia ko ha tokotaha-tokoni ki he Kōmiti Kau Ngāue ʻo e Kulupu Pulé.

ʻOku tau lotu ke faitāpuekina lahi ʻe Sihova ʻa e ongo “meʻaʻofa ko e kau tangata” ko ení ʻi he hokohoko atu ʻena ngāue mālohi ʻi he ngaahi meʻa ʻo e Puleʻangá.—ʻEf. 4:8.