1-2. ʻI he founga fē ʻoku hangē ai ʻa e tuʻunga ʻo e faʻahinga ʻo e tangatá ko e talavou naʻe lave ki ai ʻi he palakalafi 1?

 SIOLOTO atu ki ha talavou naʻe ʻohake ʻi ha fāmili tuʻumālie. ʻI he ʻaho ʻe taha ʻoku hoko ha meʻa fakamamahi; ʻoku mate ʻene ongo mātuʻá ʻi ha fakatuʻutāmaki. Ko e ongoongó ʻoku mātuʻaki fakalotomamahi kiate ia. Kae kehe, ʻoku toe ʻi ai ha meʻa fakaʻohovale ʻoku fakatatali mai ki he talavou ko ení. ʻOkú ne ʻiloʻi ko ʻene ongo mātuʻá naʻá na fakamoleki noaʻia ʻa e fuʻu paʻanga ʻa e fāmilí pea naʻe lahi ʻaupito hona ngaahi moʻuá. Sioloto atu he taimí ni, ʻi he ʻikai ke maʻu tukufakaholo ʻena koloá, ʻokú ne maʻu tukufakaholo hona ngaahi moʻuá, pea ko e faʻahinga naʻá na moʻua ki aí ʻoku nau ʻeke ʻa e totongí. Ko e moʻuá ʻoku lahi mamaʻo ia ʻi he meʻa ʻe faifai ange peá ne lava ʻo totongí.

² ʻI ha founga, ko hotau tuʻungá ʻoku hangē ko e talavou ko ení. Ko ʻetau ʻuluaki ongo mātuʻá, ʻa ʻĀtama mo ʻIvi, naʻá na haohaoa pea moʻui ʻi ha palataisi fakaʻofoʻofa. (Sēn. 1:27; 2:​7-9) Naʻá na maʻu ʻa e ʻamanaki ʻo ha moʻui fakakoloa mo tuʻuloa. Ka naʻe liliu ʻa e meʻa kotoa. Naʻe mole meiate kinaua hona ʻapi Palataisí pea pehē ki heʻena ʻamanaki ʻo e moʻui taʻengatá. Ko e hā ʻe lava ke maʻu tukufakaholo ʻe heʻena fānaú ʻi he kahaʻú? ʻOku tala mai ʻe he Tohi Tapú: “Hangē tofu pē ko e fou mai ʻi he tangata ʻe toko taha [ko ʻĀtama] ʻa e hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē koeʻuhi kuo nau angahala kotoa pē.” (Loma 5:12) ʻOku tau maʻu tukufakaholo meia ʻĀtama ʻa e angahalá, ʻo iku atu ki he maté. Ko e angahala tukufakaholo ko ení ʻoku hangē ia ha fuʻu moʻuá, ʻa ia heʻikai lava ha taha ʻo kitautolu ke totongi.—Saame 49:8.

 3. Ko e hā ʻoku lava ai ke fakatatau ʻetau ngaahi angahalá ki he “ngaahi moʻuá”?

 ³ Naʻe fakatatau ʻe Sīsū ʻa e ngaahi angahalá ki he “ngaahi moʻuá.” (Māt. 6:12; Luke 11:4) ʻI he taimi ʻoku tau faiangahala aí, ʻoku hangē ia ʻoku tau moʻua kia Sihova. Kuo pau ke tau totongi ʻa e tautea ki he angahalá. Kapau ʻe tuku ʻa e moʻua ko ení ʻo ʻikai ke totongi, ʻe toki kaniseli pē ia ʻi heʻetau maté.—Loma 6:​7, 23.

 4. (a) Kapau naʻe ʻikai ha tokoni, ko e hā ʻe hoko ki he kotoa ʻo e kau angahalá? (Saame 49:​7-9) (e) ʻOku ʻuhinga ki he hā ʻa e foʻi lea ko e “angahala” ʻi he Tohi Tapú? (Sio ki he puha “ Angahala.”)

⁴ ʻOku lava ke tau toe maʻu mai ʻa e meʻa kotoa naʻe fakamoleki ʻe ʻĀtama mo ʻIví? ʻIo, kae ʻikai ʻiate kitautolu pē. (Lau ʻa e Saame 49:​7-9.) Kapau naʻe ʻikai ha tokoni, heʻikai ke tau maʻu ha ʻamanaki ki ha moʻui ʻi he kahaʻú pe ko ha toetuʻu. Ko hono moʻoní, ko ʻetau maté ʻe hangē tofu pē ko e mate ʻa e fanga manú.—Tml. 3:19; 2 Pita 2:12.

 5. Kuo anga-fēfē hono tokoniʻi kitautolu ʻe heʻetau Tamai ʻofá ke totongi hotau moʻua tukufakaholo ʻo e angahalá? (Sio ki he fakatātā.)

⁵ ʻI he fakakaukau atu ki he talavou naʻe lave ki ai ʻi he kamatá, ʻe fēfē nai ʻene ongoʻí kapau naʻe loto ha tangata tuʻumālie ke totongi ʻa e kotoa hono ngaahi moʻuá? ʻOku ʻikai ha veiveiua, ko e talavoú ʻe ueʻi ia ʻe heʻene houngaʻia lolotó ke tali ʻa e tokoni nima-homo ko iá. ʻI he founga meimei tatau, ko ʻetau Tamai ʻofá, ʻa Sihova, kuó ne foaki mai ha meʻaʻofa ke totongiʻaki ʻa e moʻua ʻo e angahalá ʻa ia kuo tau maʻu tukufakaholo meia ʻĀtamá. Naʻe fakamatalaʻi ia ʻe Sīsū ʻo anga peheni: “Naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.” (Sione 3:16) Tānaki atu ki aí, ko e meʻaʻofa tatau pē ko ení ʻokú ne ʻai ke tau malava ʻo maʻu ha vahaʻangatae lelei mo Sihova.

 6. Ko e hā ʻa e ngaahi kupuʻi lea Fakatohitapu te tau lāulea ki ai ʻi he kupu ko ení, pea ko e hā hono ʻuhingá?

⁶ ʻE lava fēfē ke tau maʻu ʻaonga mei he meʻaʻofa fakaofo ko ení, pea fakamolemoleʻi ʻetau ngaahi angahalá pe “ngaahi moʻuá”? Ko e tali ki he fehuʻi ko iá ʻoku maʻu ia ʻi hono ngāueʻaki ʻe he Tohi Tapú ʻa e ngaahi kupuʻi lea hangē ko e fakalelei, ʻufiʻufi angahala, fakatupuhōifuaʻanga, huhuʻi, fakatauʻatāinaʻi, mo e lau ʻoku māʻoniʻoni. ʻI he kupu ko ení, te tau lāulea ai ki he ʻuhinga ʻo e ngaahi kupuʻi lea taki taha. ʻI heʻetau fakalaulauloto ki he ngaahi fakamatala ko ení, ʻe tupulaki ai ʻetau houngaʻia ki he makatuʻunga ʻo e fakamolemole ʻa Sihová.

KO E TAUMUʻÁ: FAKALELEI

 7. (a) Ko e hā ʻa e meʻa naʻe toe mole meia ʻĀtama mo ʻIví? (e) ʻI he tuʻunga ko e hako ʻo ʻĀtama mo ʻIvi, ko e hā ʻa e meʻa ʻoku tau fiemaʻu vivilí? (Loma 5:​10, 11)

⁷ Tānaki atu ki he mole ʻa e ʻamanaki ʻo e moʻui taʻengatá, naʻe mole meia ʻĀtama mo ʻIvi hona vahaʻangatae mahuʻinga mo ʻena Tamaí, ʻa  Sihova. ʻI he kamataʻangá, ko ʻĀtama mo ʻIvi naʻá na hoko ko ha konga ʻo e fāmili ʻo e ʻOtuá. (Luke 3:38) Ka ʻi heʻena talangataʻa kia Sihová, naʻe kapusi kinaua mei hono fāmilí ki muʻa ke na kamata maʻu fānaú. (Sēn. 3:​23, 24; 4:1) ʻI he tuʻunga ko hona hako, ʻoku fiemaʻu leva ke tau fai ha fakalelei mo Sihova. (Lau ʻa e Loma 5:​10, 11.) ʻI hono fakalea ʻe tahá, ʻoku fiemaʻu ke tau fakatupulekina ha vahaʻangatae lelei mo ia. Fakatatau ki ha maʻuʻanga fakamatala ʻe taha, ko e foʻi lea faka-Kalisi naʻe ngāueʻaki heni ki he “fakaleleí” ʻe lava ke ʻuhinga ia ke “ʻai ho filí ko ha kaungāmeʻa.” Ko e meʻa ʻoku fakaofó, ko Sihova ʻa e tokotaha naʻe tamuʻomuʻa ʻi hono ʻai eni ke malavá. Anga-fēfē?

KO E FOKOTUʻUTUʻÚ: ʻUFIʻUFI ANGAHALÁ

 8. Ko e hā ʻa e (a) ʻufiʻufi angahala? (e) feilaulau fakatupuhōifuaʻanga?

⁸ Ko e ʻufiʻufi angahalá ko e fokotuʻutuʻu ia ʻa Sihova ki hono toe fakafoki ha vahaʻangatae lelei ʻi he vahaʻa ʻoʻona mo e faʻahinga angahalaʻia ʻo e tangatá. ʻOku kau ki ai hono fakafetongi ha meʻa ʻaki ha meʻa ʻe taha ʻoku tatau hona mahuʻingá. ʻI he foungá ni, ko ha meʻa naʻe mole pe maumau ʻe lava ke toe maʻu pe fetongi. ʻOku ngāueʻaki ʻi he Ngaahi Konga Tohi Tapu Faka-Kalisi Kalisitiané ha kupuʻi lea ʻoku meimei tatau hono ʻuhingá mo e “ʻufiʻufi angahalá,” ʻa ia ko e fakatupuhōifuaʻanga. (Loma 3:25) Ko e feilaulau fakatupuhōifuaʻangá ko e ngāue ia ʻoku fakaʻatā ai ha taha ke hoko ʻo fakamelino mo e ʻOtuá pea ke maʻu ha vahaʻangatae lelei mo ia.

 9. Ko e hā ʻa e fokotuʻutuʻu fakataimi naʻe fai ʻe Sihova koeʻuhí ke lava ai ʻo fakamolemoleʻi ʻa e ngaahi angahala ʻa e kau ʻIsilelí?

⁹ Ke malava ʻa e kau ʻIsilelí ʻo maʻu ha vahaʻangatae lelei mo ia, naʻe kamataʻi ʻe Sihova ha fokotuʻutuʻu fakataimi ki hono fakamolemoleʻi ʻenau ngaahi angahalá. ʻI ʻIsileli, ko e ʻAho ʻo e ʻUfiʻufi Angahalá naʻe kātoangaʻi fakataʻu. ʻI he ʻaho ko iá, ko e taulaʻeiki lahí te ne fai ha ngaahi feilaulau monumanu maʻá e kakaí. Ko e moʻoni, ko e ngaahi feilaulau monumanú heʻikai lava ke ne ʻufiʻufi kotoa ʻa e ngaahi angahala ʻa ha tokotaha koeʻuhí ʻoku māʻulalo ange ʻa e fanga manú ʻi he faʻahinga ʻo e tangatá. Ka ʻi he kei ʻoatu ʻe he kau ʻIsileli fakatomalá ʻa e ngaahi feilaulau naʻe fiemaʻu ʻe Sihová, naʻá ne loto-lelei ke fakamolemoleʻi ʻenau ngaahi angahalá. (Hep. 10:​1-4) Tānaki atu ki aí, ko e fokotuʻutuʻu ko iá pea mo ʻenau ʻoatu maʻu pē ʻa e ngaahi feilaulau angahalá naʻá ne ʻai ke maongo ki he ʻatamai ʻo e kau ʻIsilelí ʻa e mafatukituki ʻa honau tuʻunga angahalaʻiá pea mo ʻenau fiemaʻu lahi ha fakaleleiʻanga tuʻuloá.

10. Ko e hā ʻa e fokotuʻutuʻu tuʻuloa naʻe fai ʻe Sihova ki hono fakamolemoleʻi ʻo e ngaahi angahalá?

¹⁰ Naʻe ʻi he fakakaukau ʻa Sihová ha fokotuʻutuʻu tuʻuloa ki hono fakamolemoleʻi ʻo e ngaahi angahalá. Naʻá ne fokotuʻutuʻu ki hono ʻAlo ʻofeiná ke “ʻoatu tā-tuʻo-taha ia ke ne fua ʻa e ngaahi angahala ʻa e tokolahi.” (Hep. 9:28) Naʻe foaki ʻe Sīsū “ʻene moʻuí ko ha huhuʻi ko e fetongi ʻo e tokolahi.” (Māt. 20:28) Ko e hā ʻa e huhuʻi?

KO E TOTONGÍ: KO E HUHUʻÍ

11. (a) Fakatatau ki he Tohi Tapú, ko e hā ʻa e huhuʻi? (e) Ko e hā ʻe fiemaʻu ki he totongi huhuʻi ko ení?

¹¹ Fakatatau ki he Tohi Tapú, ko ha huhuʻi ko e totongi ia ʻoku fai ke maʻu ai ʻa e fakamolemolé pea fai ha fakalelei. a Mei he vakai ʻa Sihová, ʻoku tokonaki mai ai ʻa e makatuʻunga ke toe fakafoki ʻa e meʻa naʻe molé. ʻI he founga fē? Manatuʻi, naʻe mole meia ʻĀtama mo ʻIvi ʻena moʻui haohaoá fakataha mo e ʻamanaki ʻo e moʻui taʻengatá. Ko ia ko e totongi huhuʻí ʻe fiemaʻu ke tatau hono mahuʻingá mo e meʻa naʻe molé. (1 Tīm. 2:6) ʻE toki lava pē ke totongi ia ʻe ha tangata ʻa ia (1) naʻe haohaoa; (2) naʻá ne maʻu ʻa e malava ke moʻui taʻengata ʻi he māmaní; pea (3) naʻá ne loto-lelei ke tuku ange, pe feilaulauʻi  ʻene moʻuí maʻa kitautolu. Ko e toki taimi pē ia ʻe lava ai ʻe he moʻui ʻa e tokotaha ko iá ʻo fetongi, pe ʻufiʻufi, ʻa e moʻui naʻe molé.

12. Ko e hā naʻe malava ai ʻa Sīsū ke tokonaki ʻa e totongi huhuʻi fehoanakimālié?

¹² Fakakaukau ki he ʻuhinga ʻe tolu naʻe malava ai ke totongi ʻe Sīsū ʻa e mahuʻinga ʻo e huhuʻí. (1) Naʻá ne haohaoa—“naʻe ʻikai te ne fai ha angahala.” (1 Pita 2:22) (2) ʻI he ʻuhinga ko iá, naʻá ne maʻu ai ʻa e malava ke moʻui taʻengata ʻi he māmaní. (3) Naʻá ne loto-lelei ke pekia pea tuku ange ʻa e moʻui ko iá koeʻuhi ko kitautolu. (Hep. 10:​9, 10) ʻI he tuʻunga ko ha tangata haohaoa, naʻe tatau ai ʻa Sīsū mo e ʻuluaki tangatá, ʻa ʻĀtama, ki muʻa ke ne faiangahalá. (1 Kol. 15:45) Ko ia fakafou ʻi he pekia ʻa Sīsuú, naʻe malava ai ke ne ʻufiʻufi ʻa e angahala ʻa ʻĀtamá, ʻa ia, ke fetongi ʻa e meʻa naʻe fakamoleki ʻe ʻĀtamá. (Loma 5:19) Naʻe hoko leva ʻa Sīsū “ko e ʻĀtama fakamuimuí.” ʻOku ʻikai toe fiemaʻu ha tangata haohaoa ʻe taha ke haʻu ʻo totongi ʻa e meʻa naʻe fakamoleki ʻe ʻĀtamá. Naʻe pekia ʻa Sīsū ʻo “tā-tuʻo-taha pē.”—Hep. 7:27; 10:12.

13. Ko e hā ʻa e faikehekehe ʻi he fokotuʻutuʻu ʻo e ʻufiʻufi angahalá mo e huhuʻí?

¹³ Ko e hā leva ʻa e faikehekehe ʻi he fokotuʻutuʻu ʻo e ʻufiʻufi angahalá mo e huhuʻí? Ko e fokotuʻutuʻu ʻo e ʻufiʻufi angahalá ko e ngāue ia ʻoku fai ʻe he ʻOtuá ke toe fakafoki ha vahaʻangatae lelei ʻi he vahaʻa ʻoʻona mo e faʻahinga ʻo e tangatá. Ko e huhuʻí ko e totongi ia ʻoku fai ke ʻai ke malava ʻa e ʻufiʻufi angahalá maʻá e faʻahinga angahalaʻia ʻo e tangatá. Ko e totongi ko ení ʻoku fakafofongaʻi ia ʻe he taʻataʻa mahuʻinga ʻo Sīsū naʻe lilingi maʻa kitautolú.—ʻEf. 1:7; Hep. 9:14.

KO E OLÁ: FAKATAUʻATĀINAʻI PEA LAU KITAUTOLU ʻOKU TAU MĀʻONIʻONI

14. Ko e hā te tau lāulea ki ai he taimi ní, pea ko e hā hono ʻuhingá?

¹⁴ Ko e hā ʻa e ngaahi ola ʻoku maʻu mei he fokotuʻutuʻu ʻo e ʻufiʻufi angahalá? ʻOku ngāueʻaki ʻe he Tohi Tapú ʻa e ngaahi fakalea kehekehe ke fakamamafaʻi ʻa hono ngaahi ʻaongá. Neongo ko e ngaahi ʻuhinga ʻo e ngaahi kupuʻi lea ko ení ʻoku nau fehopeʻaki, ko e kupuʻi lea taki taha ʻokú ne fakamamafaʻi ha tafaʻaki pau ʻo e fokotuʻutuʻu ʻo e ʻufiʻufi angahalá ʻa ia ʻoku fakaava ai ʻa e hala ki he fakamolemole ʻa Sihová. ʻI heʻetau sivisiviʻi ha niʻihi ʻo e ngaahi kupuʻi lea ko ení, te tau sio foki ai ki he anga ʻene kaunga fakafoʻituitui kiate kitautolú.

15-16. (a) ʻI he Tohi Tapú, ʻoku ʻuhinga ki he hā ʻa e “fakatauʻatāinaʻi”? (e) ʻOku anga-fēfē hono tākiekina kitautolu ʻe he meʻá ni?

¹⁵ ʻI he Tohi Tapú, ʻe lava ke ʻuhinga ʻa e fakatauʻatāinaʻí ki hono tuku ange pe fakaʻatā ha meʻa koeʻuhí ko hono totongi ʻa e huhuʻí. Naʻe fakamatalaʻi ia ʻe he ʻapositolo ko Pitá ʻo anga peheni: “ʻOku mou ʻilo naʻe ʻikai ke fai ʻaki ʻa e ngaahi meʻa ʻoku ala ʻauha, ʻaki ʻa e siliva pe koula, ʻa hono fakatauʻatāinaʻi kimoutolu mei hoʻomou founga moʻui muna naʻa mou maʻu mei hoʻomou fanga kuí. Ka naʻe fai ʻaki ia ʻa e taʻataʻa mahuʻinga, ʻo hangē ko e toto ʻo ha lami taʻemele mo taʻehaʻila, ʻa e taʻataʻa ko ia ʻo Kalaisí.”—1 Pita 1:​18, 19.

¹⁶ Koeʻuhi ko e feilaulau huhuʻí, ʻe lava ke fakatauʻatāinaʻi kitautolu mei he pule fakaaoao ʻa e angahalá mo e maté. (Loma 5:21) Ko e moʻoni, ʻoku tau maʻu ʻa e ʻuhinga lelei ke ongoʻi ʻoku tau moʻua lahi kia Sihova mo Sīsū koeʻuhi ko e tauʻatāina ʻoku haʻu mei he taʻataʻa mahuʻinga pe moʻui, ʻa Sīsuú.—1 Kol. 15:22.

17-18. (a) ʻOku ʻuhinga ki he hā ʻa hono lau kitautolu ʻoku māʻoniʻoní? (e) ʻOku anga-fēfē ʻa e kaunga ʻeni kiate kitautolú?

¹⁷ ʻOku ʻuhinga ʻa e lau kitautolu ʻoku tau māʻoniʻoní kuo ʻikai toe tukuakiʻi kitautolu pea ko hotau lēkōtí kuo tāmateʻi, pe lapaʻi. ʻI hono fai ení, ʻoku ʻikai ke maumauʻi ai ʻe Sihova ʻene ngaahi tuʻunga ʻo e fakamaau totonú. ʻOku ʻikai te ne lau ʻoku tau māʻoniʻoni ko e meʻa ʻiate kitautolu pē; pea ʻoku ʻikai ke ne makātakiʻi ʻetau ngaahi faiangahalá. Ka koeʻuhi ko ʻetau tui ki he fokotuʻutuʻu ʻo e ʻufiʻufi angahalá  pea mo e totongi huhuʻi naʻe fakahokó, ʻoku maʻu ai ʻe Sihova ha makatuʻunga ke kaniseli hotau ngaahi moʻuá.—Loma 3:24; Kal. 2:16.

¹⁸ Ko e hā ʻa e ʻuhinga ʻo e meʻá ni kiate kitautolu taki taha? Ko e faʻahinga kuo fili ke pule fakataha mo Sīsū ʻi hēvaní kuo ʻosi lau ʻoku nau māʻoniʻoni ko e fānau ʻa e ʻOtuá. (Tai. 3:7; 1 Sio. 3:1) Ko ʻenau ngaahi angahalá kuo fakamolemoleʻi. ʻOku ʻikai ke nau toe maʻu, hangē ko e laú, ha lēkooti faihia, pea ʻoku nau taau ai ke ʻi he Puleʻangá. (Loma 8:​1, 2, 30) Ko e faʻahinga ʻoku nau maʻu ʻa e ʻamanaki ke moʻui ʻi he māmaní kuo lau ʻoku nau māʻoniʻoni ko e ngaahi kaumeʻa ʻo e ʻOtuá, pea kuo fakamolemoleʻi ʻenau ngaahi angahalá. (Sēm. 2:​21-23) Ko e fuʻu kakai lahí, ʻa ē te nau hao ʻi ʻĀmaketoné, ʻoku nau maʻu ʻa e ʻamanaki heʻikai ʻaupito te nau teitei mate. (Sione 11:26) Ko e “māʻoniʻoní” mo e “taʻemāʻoniʻoní” ʻa ia ʻoku nau mohe ʻi he maté ʻe toe fokotuʻu hake kinautolu. (Ngā. 24:15; Sione 5:​28, 29) Faai atu pē, ko e kotoa ʻo e kau sevāniti talangofua ʻa Sihova ʻi he māmaní te nau “maʻu ʻa e tauʻatāina lāngilangiʻia ʻa e fānau ʻa e ʻOtuá.” (Loma 8:21) He tāpuaki fakaofo ē ʻoku haʻu mei he fokotuʻutuʻu ʻo e ʻufiʻufi angahalá—ko e fakalelei kakato mo ʻetau Tamaí, ʻa Sihova!

19. Kuo anga-fēfē liliu hotau tuʻungá ki he lelei angé? (Sio foki ki he puha “ Ko ʻEne ʻUhinga Kiate Kitautolú.”)

¹⁹ Ko e moʻoni, ko hotau tuʻungá naʻe hangē ko e talavou naʻe lave ki ai ki muʻá ʻa ia naʻe mole ʻa e meʻa kotoa pea naʻá ne maʻu tukufakaholo ha fuʻu moʻua heʻikai ʻaupito ke ne lava ʻo totongi. Kae fakamālō kia Sihova, ʻoku tau maʻu ha tokoni. Kuo liliu hotau tuʻungá koeʻuhí ko e fokotuʻutuʻu ʻo e ʻufiʻufi angahalá mo e totongi ʻo e huhuʻí. Ko ʻetau tui kia Sīsū Kalaisí ʻokú ne ʻai ke malava ʻo fakatauʻatāinaʻi kitautolu mei he angahalá mo e maté. Ko ʻetau ngaahi angahalá ʻe lava foki ʻo kaniseli, pea ko hotau lēkooti faihiá ʻe tāmateʻi. Neongo ia, ko e meʻa ʻoku mahuʻinga tahá ko ʻetau lava he taimí ni ʻo maʻu ha vahaʻangatae lelei mo ʻetau Tamai fakahēvani ʻofá, ʻa Sihova.

20. Ko e hā te tau lāulea ki ai ʻi he kupu hono hokó?

²⁰ ʻI heʻetau fakalaulauloto ki he meʻa kuo fai ʻe Sihova mo Sīsū maʻa kitautolú, ʻoku fonu ai hotau lotó ʻi he houngaʻia. (2 Kol. 5:15) Ka ne taʻeʻoua ʻena tokoní, ʻe ʻikai ʻaupito ke tau maʻu ha ʻamanaki! Ka ko e hā ʻene ʻuhinga moʻoni kiate kitautolu tāutaha ʻa e fakamolemole ʻa Sihová? Ko e meʻa ia te tau lāulea ki ai ʻi he kupu hono hokó.