KUPU AKO 7
HIVA 15 Fakahīkihikiʻi ʻa e ʻUluaki Foha ʻo Sihová!
Fakamolemole ʻa Sihová—Ko ʻEne ʻUhinga Kiate Koé
“ʻOku ʻiate koe ʻa e fakamolemole moʻoní.”—SAAME 130:4.
TAUMUʻÁ
ʻI hono sivisiviʻi ʻa e ngaahi lea fakaefakatātā māʻalaʻala ʻoku maʻu ʻi he Tohi Tapú, te tau fakalahi ai ʻetau houngaʻia ki he fakamolemole moʻoni ʻoku fakaaʻu mai ʻe Sihova kiate kitautolu tāutahá.
1. Ko e hā ʻoku faʻa faingataʻa ai ke mahinoʻi ʻa e fakamolemole ʻoku fakahāhā ʻe he faʻahinga ʻo e tangatá?
“ʻOKU OU FAKAMOLEMOLEʻI KOE.” He fakafiemālie ē ko e ngaahi lea ko iá, tautefito kapau ʻokú ke ʻiloʻi naʻá ke leaʻaki pe fai ha meʻa naʻá ne fakalotomamahiʻi ha taha! Ka ʻoku ʻuhinga moʻoni ki he hā ʻa e lea “ʻOku ou fakamolemoleʻi koe”? Ko hano fakahaaʻi ia ʻe he tokotaha naʻá ke fakalotomamahiʻí kuo fakaleleiʻi kakato homo vaá? Pe ko ʻene ʻuhingá pē ke ʻoua ʻe toe fai ha talanoa ki he palopalemá? Ko e fakamolemole ʻoku fakahāhā ʻe he faʻahinga ʻo e tangatá ʻe lava ke faingataʻa ke mahinoʻi.
2. Kuo anga-fēfē hono fakamatalaʻi ʻa e fakamolemole ʻa Sihová ʻi he Tohi Tapú? (Sio foki ki he fakamatala ʻi laló.)
2 Ko e founga ʻoku fakamolemoleʻi ai ʻe Sihova ʻa kitautolu faʻahinga taʻehaohaoa ʻo e tangatá ʻoku mātuʻaki kehe ia mei he founga ʻoku tau fefakamolemoleʻaki aí. Ko e fakamolemole ʻoku fakaaʻu mai ʻe Sihová ʻoku taʻehanotatau. Naʻe lea ʻa e tokotaha-tohi-sāmé fekauʻaki mo Sihova: “ʻOku ʻiate koe ʻa e fakamolemole moʻoní, koeʻuhiā ke fai ai ha ʻapasia kiate koe.” a (Saame 130:4) ʻIo, ko e fakamolemole ʻa Sihová ʻa e “fakamolemole moʻoní.” ʻOkú ne fokotuʻu ʻa e tuʻunga māʻolunga taha ʻo e meʻa ʻoku ʻuhinga moʻoni ki ai ʻa e fakamolemolé. ʻI he tuʻunga ʻe niʻihi, ko e kau hiki Tohi Tapú naʻa nau ngāueʻaki ha foʻi lea faka-Hepelū ki he fakamolemolé ʻa ia naʻe ʻikai ʻaupito ngāueʻaki ia ke fakamatalaʻi ʻaki ʻa e fakamolemole ʻa e faʻahinga ʻo e tangatá.
3. ʻOku anga-fēfē ʻa e kehe ʻa e fakamolemole ʻa Sihová mei haʻatautolú? (ʻAisea 55:6, 7)
3 ʻI hono fakamolemoleʻi ʻe Sihova ha taha, ko e angahala ʻa e tokotaha ko iá ʻoku tāmateʻi. Ko e vahaʻangatae kuo maumaú ʻoku toe fakaleleiʻi fakaʻaufuli. ʻOku fakaofo ʻa e kakato mo nima-homo ʻa e fakamolemole ʻa Sihová.—Lau ʻa e ʻAisea 55:6, 7.
4. ʻOku anga-fēfē hono tokoniʻi kitautolu ʻe Sihova ke tau mahinoʻi ʻa e ʻuhinga moʻoni ʻo e fakamolemolé?
4 Kapau ʻoku kehe ʻa e fakamolemole ʻa Sihová mei haʻatautolú, ʻe lava fēfē kiate kitautolu faʻahinga taʻehaohaoá ke tau mahinoʻi ʻa hono ʻuhinga moʻoní? ʻOku tokoniʻi kitautolu ʻe Sihova ʻaki hono ngāueʻaki ha ngaahi lea fakaefakatātā māʻalaʻala ke fakamatalaʻiʻaki ʻene fakamolemolé. ʻI he kupu ko ení, te tau sivisiviʻi ha niʻihi ʻo kinautolu. Te nau fakahaaʻi mai ʻa e founga ʻoku toʻo ai ʻe Sihova ʻa e angahalá, pea ʻi he taimi tatau, ʻokú ne toe fakaleleiʻi ʻa e vahaʻangatae kuo maumauʻi ʻe he angahalá. ʻI heʻetau vakaiʻi ʻa e ngaahi talanoa fakatātā ko ení, te tau ʻai ai ke loloto ʻetau houngaʻia ki heʻetau Tamai anga-ʻofá, ʻa ia ʻokú ne fakahāhā ʻene fakamolemolé ʻi he ngaahi founga lahi.
ʻOKU TOʻO ʻE SIHOVA ʻA E ANGAHALÁ
5. Ko e hā ʻoku hoko ʻi he taimi ʻoku fakamolemoleʻi ai ʻe Sihova ʻetau ngaahi angahalá?
5 ʻI he Tohi Tapú, ko e ngaahi angahalá ʻoku faʻa fakahoa ki he ngaahi kavenga mamafá. Naʻe fakamatalaʻi ʻe Tuʻi Tēvita ʻene ngaahi angahalá tonu ʻo anga peheni: “Ko ʻeku ngaahi faihalá ʻoku maluʻaki mai ki hoku ʻulú; ʻo hangē ha kavenga mamafa, ʻoku fuʻu lahi kiate au ke u fuá.” (Saame 38:4) Ka ʻoku fakamolemoleʻi ʻe Sihova ʻa e ngaahi angahala ʻa e kau faihala fakatomalá. (Saame 25:18; 32:5) Ko e foʻi lea faka-Hepelū naʻe liliu ko e “fakamolemoleʻi” ʻoku ʻuhingá ke “hiki hake” pe “fua.” Te tau fakakaukau nai kia Sihova ʻokú ne hangē ko ha tangata mālohí ʻa ia ʻokú ne hiki ʻa e kavenga ʻo e angahalá mei hotau umá pea fua ʻo ʻave ia.
“Fakamolemoleʻi” (Saame 32:5)
6. ʻOku mamaʻo fēfē hono ʻave ʻe Sihova ʻetau ngaahi angahalá?
6 ʻOku fakahaaʻi ʻe ha lea fakaefakatātā ʻe taha ʻa e mamaʻo ʻo hono ʻave ʻe Sihova ʻetau ngaahi angahalá. ʻOku tala mai ʻe he Saame 103:12: “Hangē ko e mamaʻo ʻa e hopoʻanga laʻaá mei he tōʻanga laʻaá, ʻoku pehē ʻa e mamaʻo ʻo ʻene ʻave meiate kitautolu ʻa ʻetau laka halá.” Ko e hahaké ko e tafaʻaki mamaʻo taha ia mei he hihifó. ʻOku ʻikai ʻaupito ke na fetaulaki. ʻI hono fakalea ʻe tahá, ʻoku ʻave ʻe Sihova ʻetau ngaahi angahalá ʻo mamaʻo ʻaupito meiate kitautolu ʻi he mamaʻo taha ʻoku tau ala sioloto atu ki aí. He founga fakatuipau ē ke fakamatalaʻiʻaki ʻene fakamolemolé!
“Hangē ko e mamaʻo ʻa e hopoʻanga laʻaá mei he tōʻanga laʻaá” (Saame 103:12)
7. ʻOku anga-fēfē hono fakamatalaʻi ʻe he Tohi Tapú ʻa e meʻa ʻoku fai ʻe Sihova ki heʻetau ngaahi angahalá? (Maika 7:18, 19)
7 Neongo ʻoku ʻave fakaefakatātā ʻe Sihova ʻetau ngaahi angahalá ʻo mamaʻo meiate kitautolu, ʻokú ne hanganaki tauhi ia? ʻIkai. Naʻe tohi ʻa Tuʻi Hesekaia fekauʻaki mo Sihova: “Kuó ke lī ʻa ʻeku ngaahi angahalá kotoa ki mui ki ho tuʻá.” Pe ʻi hono fakalea ʻi he fakamatala ʻi laló, “kuó ke toʻo ʻeku ngaahi angahalá kotoa mei ho ʻaó.” (ʻAi. 38:9, 17; fkm. ʻi lalo) ʻOku fakahaaʻi ʻe he lea fakaefakatātā ko ení ʻoku ʻave ʻe Sihova ʻa e ngaahi angahala ʻa e faʻahinga ʻoku fakatomalá ʻo lī ke pulia mei heʻene vakaí. Ko e fakamatala ko ení ʻe lava ke toe liliu ia: “Kuó ke ʻai [ʻeku ngaahi angahalá] ke hangē pē naʻe ʻikai ke hoko iá.” ʻOku toe fakamamafaʻi ʻe he Tohi Tapú ʻa e poini ko ení ʻi ha lea fakaefakatātā ʻe taha, naʻe hiki ʻi he Maika 7:18, 19. (Lau.) Naʻe lave ai kia Sihova ʻokú ne lī ʻetau ngaahi angahalá ki he loloto ʻo e tahí. ʻI he kuonga muʻá, naʻe ʻikai malava ki ha taha ke ne toe maʻu mai ha meʻa naʻe lī ki he loloto ʻo e tahí.
“Kuó ke lī ʻa ʻeku ngaahi angahalá kotoa ki mui ki ho tuʻá” (ʻAi. 38:17)
“Te ke lī ʻa e kotoa ʻo ʻenau ngaahi angahalá ki he loloto ʻo e tahí” (Mai. 7:19)
8. Ko e hā ʻa e meʻa kuo tau akó?
8 ʻOku tau ako mei he ngaahi lea fakaefakatātā ko ení, ʻi hono fakamolemoleʻi kitautolu ʻe Sihová, ʻokú ne toʻo atu ʻa e kavenga ʻo ʻetau ngaahi angahalá. Ko e moʻoni, hangē ko e lea ʻa Tēvitá, “fiefia ē ko e faʻahinga kuo fakamolemoleʻi ʻenau ngaahi ngāue maumau-laó pea kuo ʻufiʻufi ʻenau ngaahi angahalá; fiefia ē ko e tangata ʻa ia ʻe ʻikai ʻaupito lau ʻe Sihova ʻa ʻene angahalá. (Loma 4:7, 8) Ko e fakamolemole moʻoní ia!
ʻOKU TĀMATEʻI ʻE SIHOVA ʻETAU ANGAHALÁ
9. Ko e hā ʻa e ngaahi lea fakaefakatātā ʻoku ngāueʻaki ʻe Sihova ke fakamatalaʻiʻaki ʻa e lahi ʻo ʻene fakamolemolé?
9 ʻOku ngāueʻaki ʻe Sihova ha ngaahi lea fakaefakatātā kehe ke tokoniʻi kitautolu ke houngaʻia ʻi he founga ʻokú ne tāmateʻi ai ʻa e ngaahi angahala ʻa e faʻahinga ʻoku fakatomalá fakafou ʻi he feilaulau huhuʻí. ʻI ha ʻuhinga fakaefakatātā, ʻoku lave fekauʻaki mo Sihova ʻokú ne fufulu pea fakamaʻa ʻa e ngaahi angahala ko ení. Ko e olá ʻoku hoko ai ʻo maʻa ʻa e tokotaha angahalá. (Saame 51:7; ʻAi. 4:4; Sel. 33:8) Ko Sihova tonu ʻokú ne fakamatalaʻi ʻa e ola ʻo e ngāue ko ení: “Neongo ʻoku hangē hoʻomou angahalá ko ha tupenu kula ʻahoʻahó, ʻe ʻai ia ke hinehina ʻo hangē ko e sinoú; neongo ʻene kulokula ʻo hangē ko e tupenu kulokula mālohí, ʻe hoko ia ʻo hangē ko e fulufuluʻisipí.” (ʻAi. 1:18) ʻOku faingataʻa ʻaupito ke toʻo ha toiʻi meʻa lanu kula ʻahoʻaho pe kulokula mālohi mei ha tupenu. Neongo ia, ʻi he lea fakaefakatātā ko ení, ʻoku fakapapauʻi mai ai ʻe Sihova ko ʻetau ngaahi angahalá ʻe lava ke fakamaʻa fakaʻāuliliki ʻo ʻikai toe lava ke fai ha sio ki ai.
“Neongo ʻoku hangē hoʻomou angahalá ko ha tupenu kula ʻahoʻahó, ʻe ʻai ia ke hinehina ʻo hangē ko e sinoú” (ʻAi. 1:18)
10. Ko e hā ha lea fakaefakatātā ʻe taha ʻoku ngāueʻaki ʻe Sihova ke fakatātaaʻiʻaki ʻa e lahi ʻo ʻene fakamolemolé?
10 Hangē ko ia naʻe lave ki ai ʻi he kupu ki muʻá, ko e ngaahi angahalá ʻoku toe fakahoa ia ki he “ngaahi moʻuá.” (Māt. 6:12; Luke 11:4) Ko ia ʻi he taimi kotoa pē ʻoku tau faiangahala ai kia Sihová, ʻoku hangē ia ʻoku tātānaki pē hotau moʻuá. ʻOku tau moʻua lahi fakaʻulia kiate ia! Ka ʻi he taimi ʻoku fakamolemoleʻi ai kitautolu ʻe Sihová, ʻoku hangē ia ʻokú ne kaniseli ʻa e moʻua ʻa ia naʻe mei hilifaki mai ki heʻetau ʻakauní. ʻOku ʻikai ke ne ʻeke ha totongi ki he ngaahi angahala kuo fakamolemoleʻí. He fakatātā fakafiemālie ē ke fakamatalaʻiʻaki ʻetau fiefia ʻi hono fakamolemoleʻi kitautolu ʻe Sihová!
“Fakamolemoleʻi homau ngaahi moʻuá” (Māt. 6:12)
11. ʻI he taimi ʻoku pehē ai ʻe he Tohi Tapú kuo “tāmateʻi” ʻetau ngaahi angahalá, ʻoku ʻuhinga ia ki he hā? (Ngāue 3:19)
11 ʻOku ʻikai ke kaniseli pē ʻe Sihova hotau ngaahi moʻuá, pe ngaahi angahalá; ʻokú ne tāmateʻi ia. (Lau ʻa e Ngāue 3:19.) ʻI he taimi ʻoku kaniseli ai ha moʻua, te tau sioloto atu nai ki ha foʻi laine ʻoku kohiʻi ʻaki ʻa e moʻuá. Kae kehe, ko e ngaahi mataʻifika naʻe kohiʻí ʻe kei ʻasi pē nai. Ka ko hono tāmateʻi ha meʻá ʻoku kehe ia. Ke mahinoʻi ʻa e lea fakaefakatātā ko ení, ʻoku fiemaʻu ke tau manatuʻi ʻi he kuonga muʻá ko e vaitohi naʻe ngāueʻakí ko ha fio ia naʻe kau ki ai ʻa e kāponi, pulukamu, mo e vai. ʻE lava ʻe ha tokotaha ke ne toʻo ha konga ulapa viviku ʻo tāmateʻi ʻaki ʻa e tohinimá. Ko ia ʻi he taimi naʻe “tāmateʻi” ai ha moʻua, naʻe puli ʻosi. Naʻe ʻikai lava ke sio ki he meʻa naʻe tohi ki muʻá. ʻOku hangē ia naʻe ʻikai ʻaupito pē ke ʻi ai ha moʻua ia ki muʻa. He fakalotomāfana ē ke ʻiloʻi ʻoku ʻikai ngata pē ʻi hono kaniseli ʻe Sihova ʻetau ngaahi angahalá ka ʻokú ne toe tāmateʻi fakaʻaufuli ia!—Saame 51:9.
“Koeʻuhi ke tāmateʻi hoʻomou ngaahi angahalá” (Ngā. 3:19)
12. Ko e hā ʻene ʻuhinga kiate kitautolu ʻa e lea fakaefakatātā fekauʻaki mo ha konga ʻao matolú?
12 ʻOku ngāueʻaki ʻe Sihova ha lea fakaefakatātā meimei tatau ke fakamatalaʻiʻaki ʻa e founga ʻokú ne tāmateʻi ai ʻetau ngaahi angahalá. ʻOkú ne talaki: “Te u tāmateʻi ʻa hoʻo ngaahi laka halá ʻo hangē ʻoku ʻufiʻufiʻaki ha konga ʻaó mo hoʻo ngaahi angahalá ʻo hangē ʻoku ʻufiʻufiʻaki ha konga ʻao matolú.” (ʻAi. 44:22) ʻI he taimi ʻoku fakamolemole ai ʻa Sihová, ʻoku hangē ia haʻane ngāueʻaki ha konga ʻao matolu ke ʻufiʻufiʻaki ʻetau ngaahi laka halá koeʻuhí ke ʻoua naʻa toe lava ʻo fai ha sio ki ai.
“Te u tāmateʻi ʻa hoʻo ngaahi laka halá ʻo hangē ʻoku ʻufiʻufiʻaki ha konga ʻaó” (ʻAi. 44:22)
13. ʻI hono fakamolemoleʻi ʻe Sihova ʻetau ngaahi angahalá, ʻoku totonu ke fēfē ʻetau ongoʻí?
13 Ko e hā ʻene ʻuhinga kiate kitautolu ʻa e meʻá ni? ʻI hono fakamolemoleʻi ʻe Sihova ʻetau ngaahi angahalá, ʻoku totonu ke ʻoua te tau ongoʻi te tau fataki ʻa e toiʻi meʻa ʻo e ngaahi angahala ko iá ʻi he toenga ʻetau moʻuí. Fakafou ʻi he taʻataʻa ʻo Sīsū Kalaisí, ko hotau ngaahi moʻuá kuo kaniseli fakaʻaufuli. Naʻa mo e lēkooti ʻo e ngaahi moʻua ko iá ʻoku ʻikai toe ʻiloa. Ko e ʻuhinga ʻeni kiate kitautolu ʻa e fakamolemole moʻoni ʻoku haʻu meia Sihova ʻi heʻetau fakatomala mei heʻetau ngaahi angahalá.
ʻOKU TOE FAKAFOKI ʻE SIHOVA HA VAHAʻANGATAE LELEI
Ko e fakamolemole ʻoku fakaaʻu mai ʻe heʻetau Tamai fakahēvaní ʻoku fakaʻatā ai kitautolu ke maʻu ha vahaʻangatae lelei mo ia (Sio ki he palakalafi 14)
14. Ko e hā ʻe lava ai ke tau falala ki he fakamolemole ʻa Sihová? (Sio foki ki he fakatātaá.)
14 Ko e fakamolemole moʻoni ʻoku haʻu meia Sihová ʻokú ne fakaʻatā kitautolu ke maʻu ha vahaʻangatae lelei mo ia. ʻOku tokoni ia ke tau fakaʻehiʻehi mei he hoko ʻo lōmekina ʻe he ongoʻi halaiá. ʻOku ʻikai fiemaʻu ke tau ilifia naʻa ʻoku tukulotoʻi fakapulipuli ʻe Sihova ʻa e ʻitá pea ʻokú ne kumi ki ha founga ke tauteaʻi kitautolu. Heʻikai ʻaupito ke hoko ha meʻa pehē. Ko e hā ʻe lava ai ke tau falala kia Sihova ʻi he taimi ʻokú ne pehē ai ʻokú ne fakamolemoleʻi kitautolú? ʻOku lave ʻa e palōfita ko Selemaiá ki he folofola ʻa Sihova ʻo pehē: “Te u fakamolemoleʻi ʻenau faihalá, pea ʻe ʻikai te u kei manatua ʻa ʻenau angahalá.” (Sel. 31:34) ʻI he lave ki he ngaahi lea ko ení, naʻe ngāueʻaki ʻe he ʻapositolo ko Paulá ha fakalea meimei tatau, ʻo pehē: “ʻE ʻikai te u kei manatua ʻa ʻenau ngaahi angahalá.” (Hep. 8:12) Ka ʻoku ʻuhinga moʻoni ia ki he hā?
“ʻE ʻikai te u kei manatua ʻa ʻenau angahalá” (Sel. 31:34)
15. ʻI he ʻuhinga fē ʻoku ʻikai toe manatua ai ʻe Sihova ʻetau ngaahi angahalá?
15 ʻI he Tohi Tapú, ko e foʻi lea “manatua” ʻoku ʻikai ke ʻuhinga maʻu pē ia ki ha taha ʻoku manatu pe fakakaukau ki ha meʻa. ʻI hono kehé, ʻe lava ke kau ki ai ʻa hono fai ʻe ha tokotaha ha ngāue. Ko e tangata faihia naʻe tautau ʻi he ʻakaú ʻi he tafaʻaki ʻo Sīsuú naʻá ne kole: “Sīsū, manatuʻi au ʻi hoʻo hoko ki ho Puleʻangá.” (Luke 23:42, 43) Naʻe ʻikai ko ʻene kole pē kia Sīsū ke fakakaukau fekauʻaki mo ia ʻi he taimi ko iá. Ko e tali ʻa Sīsuú naʻe fakahaaʻi ai te ne fai ha ngāue ke toe fokotuʻu hake ʻa e tangata faihiá. Ko ia ai, ʻi he taimi ʻoku pehē ai ʻe Sihova ʻoku ʻikai te ne kei manatua ʻetau ngaahi angahalá, ko ʻene ʻuhingá ʻe ʻikai te ne toe fai ha meʻa kiate kitautolu. ʻE ʻikai te ne tauteaʻi kitautolu ʻi ha taimi ʻi he kahaʻú koeʻuhi ko e ngaahi angahala kuó ne fakamolemoleʻí.
16. ʻOku anga-fēfē hono fakamatalaʻi ʻe he Tohi Tapú ʻa e tauʻatāina ʻoku haʻu mei he fakamolemole moʻoní?
16 ʻOku ngāueʻaki ʻe he Tohi Tapú ha lea fakaefakatātā ʻe taha ke tokoniʻi kitautolu ke tau mahinoʻi ʻa e tauʻatāina ʻoku haʻu mei he fakamolemole moʻoní. Koeʻuhi ko ʻetau hehema mo hotau natula angahalaʻiá, ʻoku fakahoa ai kitautolu ki he “kau pōpula ʻa e angahalá.” Kae fakamālō ki he fakamolemole ʻa Sihová, ʻoku tau hangē ko ha kau pōpula kuo “fakatauʻatāinaʻi . . . mei he angahalá.” (Loma 6:17, 18; Fkh. 1:5) ʻIo, ko e fakamolemole ʻa Sihová ʻokú ne ʻomai kiate kitautolu ʻa e ongoʻi fiefia vale ʻo hano fakatauʻatāinaʻi mei he nofo pōpulá.
“Naʻe fakatauʻatāinaʻi kimoutolu mei he angahalá” (Loma 6:18)
17. ʻOku anga-fēfē iku atu ʻa e fakamolemolé ki he fakamoʻuí? (ʻAisea 53:5)
17 Lau ʻa e ʻAisea 53:5. Ko e lea fakaefakatātā fakaʻosi te tau lāulea ki aí ʻoku fakahoa ai kitautolu ki ha kakai kuo nau maʻu ha mahaki fakatupu mate. Koeʻuhi ko e feilaulau huhuʻi naʻe tokonaki mai ʻe Sihova fakafou ʻi hono ʻAló, ʻoku lave fakaefakatātā kiate kitautolu ʻoku fai hotau fakamoʻui. (1 Pita 2:24) ʻOku ʻai ʻe he huhuʻí ke malava ʻo fakaleleiʻi kakato hotau vahaʻangatae mo Sihová, ʻa ia kuo maumauʻi ʻe he puke fakalaumālié. Hangē pē ko e fiefia lahi ha tokotaha kuo fakamoʻui mei ha puke lahi, ʻoku tau fiefia foki ʻi he taimi ʻoku fakamoʻui fakalaumālie ai kitautolu pea toe maʻu ʻa e hōifua ʻa Sihová koeʻuhi ko ʻene fakamolemolé.
“Koeʻuhí ko hono ngaahi laveá naʻe fakamoʻui ai kimautolu” (ʻAi. 53:5)
KO ʻENE ʻUHINGA KIATE KITAUTOLU ʻA E FAKAMOLEMOLE ʻA SIHOVÁ
18. Ko e hā kuo tau ako ʻi hono sivisiviʻi ʻa e ngaahi lea fakaefakatātā kehekehe ʻi he Tohi Tapú fekauʻaki mo e fakamolemole ʻa Sihová? (Sio foki ki he puha “Founga ʻOku Fakamolemoleʻi Ai Kitautolu ʻe Sihová.”)
18 Ko e hā kuo tau ako ʻi hono sivisiviʻi ʻa e ngaahi lea fakaefakatātā ʻi he Tohi Tapú fekauʻaki mo e fakamolemole ʻa Sihová? ʻI he taimi ʻokú ne fakamolemole aí, ʻokú ne fakamolemole kakato mo tuʻuloa. ʻOku fakaʻatā ai heni ke tau maʻu ha vahaʻangatae lelei mo ʻetau Tamai fakahēvaní. ʻI he taimi tatau, ʻoku tau manatuʻi ko e fakamolemole moʻoní ko ha meʻaʻofa. ʻOku haʻu ia mei he anga-ʻofa mo e ʻofa maʻataʻatā ʻa Sihová, ʻa ia ʻokú ne fakahāhā ki he faʻahinga angahalaʻia ʻo e tangatá. ʻOku ʻikai ko ha totonu ia ke ʻeke ʻe he faʻahinga ʻo e tangatá.—Loma 3:24.
19. (a) Ko e hā ʻoku totonu ke tau houngaʻia aí? (Loma 4:8) (e) Ko e hā te tau lāulea ki ai ʻi he kupu hono hokó?
19 Lau ʻa e Loma 4:8. He houngaʻia lahi ē ko kitautolu taki taha ʻi he hoko ʻa Sihova ko e ʻOtua ʻo e “fakamolemole moʻoní”! (Saame 130:4) Kae kehe, ko ʻetau maʻu ʻa e fakamolemolé ʻoku makatuʻunga ia ʻi ha meʻa mahuʻinga. Naʻe fakamatalaʻi ʻe Sīsū: “Kapau ʻe ʻikai ke mou fakamolemoleʻi ʻa e faihala ʻa e kakaí, ʻe ʻikai foki ke fakamolemoleʻi ʻe hoʻomou Tamaí ʻa hoʻomou faihalá.” (Māt. 6:14, 15) ʻOku hā mahino leva, ʻoku mātuʻaki mahuʻinga ke tau faʻifaʻitaki ki he fakamolemole ʻa Sihová. Ka ʻe lava fēfē ke tau fai pehē? Ko ʻetau kupu hono hokó ʻe fakahaaʻi mai ai ʻa e meʻa ʻoku kau ki hení.
HIVA 46 ʻOku Mau Fakamālō Kiate Koe, Sihova
a ʻOku ngāueʻaki ʻi he muʻaki konga tohi faka-Hepeluú ʻa e kupuʻi lea “ʻa e fakamolemole,” ʻo fakahuʻunga mai ai ko e fakamolemole moʻoní pē ʻeni, neongo ʻoku ʻi ai ʻa e ngaahi tuʻunga kehe ʻo e fakamolemolé. ʻOku lahi ʻa e ngaahi liliu ʻo e Tohi Tapú ʻoku ʻikai ʻasi ai ʻa e faikehekehe mahuʻinga ko ení, ka ʻoku hā ia ʻi he Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní, ʻo makehe ai ʻa hono fakalea ʻo e Saame 130:4.
