KUÓ KE fakatokangaʻi ko e kakai tokolahi ʻi he māmaní ʻoku nau ongoʻi ʻoku nau tuha mo ha ngaahi monū, ngaahi totonu, pe fakafeangai makehe? Neongo pe ko e hā hono lahi ʻenau maʻu ʻa e ngaahi meʻá ni, ʻoku nau tui ʻoku totonu ke nau toe maʻu ha meʻa lahi ange. Ko e fakakaukau ko ení ʻoku faiaka ia ʻi he tōʻonga siokita mo taʻehoungaʻia ʻokú ne fakaʻilongaʻi ʻa e ngaahi ʻaho fakaʻosí.—2 Tīm. 3:2.

Ko e moʻoni, ko e siokitá ʻoku ʻikai ko ha meʻa foʻou. Ko ʻĀtama mo ʻIvi naʻá na fakapapauʻi ke na fili pē maʻanaua ʻa e meʻa naʻe leleí mo e meʻa naʻe koví, fakataha mo e ngaahi nunuʻa fakatupu ʻauha. ʻI ha ngaahi senituli ki mui ai, ko Tuʻi ʻŪsaia ʻo Siutá naʻá ne fakakaukau naʻá ne maʻu ʻa e totonu ke tutu ʻinisēnisi ʻi he temipalé, ka naʻá ne maʻuhala lahi. (2 Kal. 26:​18, 19) ʻI he tuʻunga meimei tatau, ko e kau Fālesí mo e kau Sātusí naʻa nau tui naʻa nau tuha mo e hōifua makehe ʻa e ʻOtuá koeʻuhi pē ko e hako kinautolu ʻo ʻĒpalahame.—Māt. 3:9.

ʻOku takatakaiʻi kitautolu ʻe he kakai ʻoku nau siokita mo hīkisia, pea ʻe lava ke tākiekina kitautolu ʻe heʻenau fakakaukaú. (Kal. 5:26) ʻE kamata nai ke tau fakakaukau ʻoku tau tuha ke maʻu ha monū pau pe ko ha fakafeangai makehe. ʻE lava fēfē ke tau fakaʻehiʻehi mei he faʻahinga fakakaukau ko ení? Ke kamatá, ʻoku totonu ke tau maʻu ʻa e vakai ʻa Sihova ki he meʻá. ʻE tokoniʻi kitautolu ʻe ha tefitoʻi moʻoni Fakatohitapu ʻe ua.

Ko Sihova ʻokú ne fakapapauʻi ʻa e meʻa ʻoku totonu ke tau maʻú. Fakakaukau ki ha fakatātā ʻe niʻihi.

• ʻI he fokotuʻutuʻu fakafāmilí, ko e husepānití ʻoku fiemaʻu ke ne ongoʻi ʻoku fakaʻapaʻapaʻi ia ʻe hono uaifí, pea ko e uaifí ʻoku fiemaʻu ke ne ongoʻi ʻoku  ʻofaʻi ia ʻe hono husepānití. (ʻEf. 5:33) Ko e ngaahi hoa malí ʻoku totonu ke nau fakahāhā ʻa e tokanga fakaemanakó ki honau hoá pē. (1 Kol. 7:3) Ko e totonu ia ʻa e ngaahi mātuʻá ʻa ʻenau fiemaʻu ke talangofua ange ʻenau fānaú, pea ko e fānaú ʻoku totonu ke nau maʻu ʻa e ʻofa lahi mo e poupou mei heʻenau ngaahi mātuʻá.—2 Kol. 12:14; ʻEf. 6:2.

• ʻI he fakatahaʻangá, ko e kau mātuʻa ngāue mālohí ʻoku nau tuha mo ʻetau fakaʻapaʻapá. (1 Tes. 5:12) Kae kehe, ʻoku ʻikai ke nau maʻu ʻa e totonu ke puleʻi fakaaoao honau fanga tokouá mo e fanga tuofāfiné.—1 Pita 5:​2, 3.

• Kuo ʻoange ʻe he ʻOtuá ki he ngaahi puleʻanga fakaetangatá ʻa e totonu ke kounaʻi ʻa e tukuhaú pea ke maʻu ʻa e fakaʻapaʻapa mei honau kakaí.—Loma 13:​1, 6, 7.

ʻOku ʻomai anga-ʻofa ʻe Sihova ʻa e meʻa ʻoku lahi mamaʻo ange ia ʻi he meʻa ʻoku tau tuha mo iá. Koeʻuhi ko hotau natula angahalaʻiá, ʻoku tau tuha pē mo e maté. (Loma 6:23) Neongo ia, ʻoku ʻomai ʻe Sihova ʻa e ngaahi tāpuaki lahi ʻo makatuʻunga ʻi heʻene ʻofa mateaki ʻiate kitautolú. (Saame 103:​10, 11) Ko ʻetau maʻu ʻa e tāpuaki pe monū taki taha meiate iá koeʻuhí pē ko ʻene ʻofa maʻataʻataá.—Loma 12:​6-8; ʻEf. 2:8.

Tokanga telia ʻa e fakakaukau ʻa e māmaní. ʻE kamata nai ke tau fakakaukau ʻoku tau tuha mo ha meʻa lahi ange ʻi he niʻihi kehé, ʻo ʻikai ke tau fakatokangaʻi. Naʻe fakahaaʻi ʻe Sīsū ʻa e faingofua ke malanga hake ʻa e fakakaukau peheé ʻaki ʻene ngāueʻaki ʻa e talanoa fakatātā ki he kau ngāue naʻe totongiʻaki ha foʻi tēnalí. Ko e kau ngāue ʻe niʻihi naʻa nau kamata pongipongia pea ngāue ʻi he ʻahó kotoa ʻi he vela ʻa e laʻaá; ko e niʻihi naʻa nau ngāue ʻi he houa pē ʻe taha. Ko e faʻahinga naʻe muʻomuʻá naʻa nau pehē naʻe totonu ke nau maʻu ha vahe lahi ange koeʻuhi ko e ngāue naʻa nau faí. (Māt. 20:​1-16) ʻI hono ngāueʻaki ʻa e talanoa fakatātā ko ení, naʻe fakahaaʻi ai ʻe Sīsū ko hono kau muimuí ʻoku totonu ke nau fiemālie pē ʻi he meʻa ʻoku fiefia ʻa e ʻOtuá ke tokonakí.

Fakamālō pē pea ʻoua ʻe fakakouna. (1 Tes. 5:18) Faʻifaʻitaki ki he ʻapositolo ko Paulá, ʻa ia naʻe ʻikai ke ne kole ha tokoni fakamatelie mei he fanga tokoua ʻi Kolinitoó neongo naʻá ne maʻu ʻa e totonu ke fai pehē. (1 Kol. 9:​11-14) ʻOku totonu ke tau fakahoungaʻi ʻa e tāpuaki taki taha ʻoku tau maʻú pea ʻoua ʻe fakakounaʻi ʻa e niʻihi kehé.

 Fakatupulekina ʻa e anga-fakatōkilalo. ʻI he taimi ʻoku fakakaukau tōtuʻa ai ha tokotaha fekauʻaki mo ia tonu, ʻoku faʻa kamata ke ne ongoʻi ʻoku totonu ke ne maʻu ʻa e meʻa lahi ange ʻi he meʻa ʻokú ne lolotonga maʻú. Ko e anga-fakatōkilaló ʻa e faitoʻo ki he fakakaukau kona peheé.

Ko e palōfita ko Tanielá naʻá ne fokotuʻu ha faʻifaʻitakiʻanga lelei ʻi hono fakahāhā ʻa e anga-fakatōkilaló. Ko e puipuituʻa hono fāmilí, ko ʻene matamataleleí, ʻatamaiʻiá, mo e ngaahi malavá naʻe mei lava ke ne ʻai ia ke ne ongoʻi naʻá ne tuha mo e fakafeangai makehe mo e ngaahi monū naʻá ne maʻú. (Tan. 1:​3, 4, 19, 20) Kae kehe, naʻe nofoʻaki anga-fakatōkilalo ʻa Taniela, pea naʻe ʻai ia ʻe he ʻulungaanga ko ení ke ne mahuʻinga kia Sihova.—Tan. 2:30; 10:​11, 12.

Tuku ke tau talitekeʻi ʻa e laumālie siokita mo hīkisia ʻoku mafolalahia ʻi he māmaní he ʻahó ni. ʻI hono kehé, ʻofa ke tau hokohoko atu ke maʻu ʻa e fiefia ʻi he tāpuaki taki taha ʻoku ʻomai ʻe Sihova kiate kitautolu fakafou ʻi heʻene ʻofa maʻataʻataá.