Ko e kau Kalisitiane ‘e ni‘ihi ‘oku nau ngāue‘aki ‘a e tekinolosia ‘i onopōní ke fetu‘utaki ai mo honau fāmilí mo e kaungā-Fakamo‘oní. Ko e mo‘oni, ko e Kalisitiane matu‘otu‘á te ne manatu‘i ‘a e fale‘i ko ení: “Ko e tokotaha fakapotopotó ‘okú ne sio ki he fakatu‘utāmakí peá ne toi, ka ko e tokotaha ta‘etaukeí ‘okú ne hanganaki laka atu pē ‘o ne fuesia ‘a e ngaahi nunu‘á.”​—Pal. 27:12.

‘Oku tau hounga‘ia ‘i he loto ‘a Sihova ke ne malu‘i kitautolú. Ko ia ‘oku ‘ikai ke tau feohi mo e fa‘ahinga ‘oku nau fakatupunga ‘a e māvahevahé, fa‘ahinga kuo tu‘usi pe ‘oku nau pouaki ‘a e ngaahi akonaki mio‘í. (Loma 16:17; 1 Kol. 5:11; 2 Sio. 10, 11) ‘Oku ‘i ai ‘a e ni‘ihi ‘i he fakataha‘angá ‘oku ‘ikai nai ke nau tō‘onga ‘i ha founga lāngilangi‘ia. (2 Tīm. 2:20, 21) ‘I hono fili ha ngaahi kaume‘a, ‘oku tau manatu‘i eni. He‘ikai nai ke faingofua ke fili ‘a e ngaahi feohi leleí fakafou ‘i ha polokalama fe‘ave‘aki pōpoaki.

‘Oku tautefito ‘a e fe‘ungamālie ke filifili ‘a e fa‘ahinga ke feohi mo iá ‘i he‘ene ha‘u ki he ngaahi kulupu fe‘ave‘aki pōpoaki lalahí. Kuo kau ‘a e kau Kalisitiane ‘e ni‘ihi ‘i he ngaahi kulupu lalahi, ‘o iku atu ki he ngaahi ola kovi. ‘E lava fēfē ke tokanga ha tokoua pe tuofefine kapau ‘oku a‘u ha kulupu ki he lauingeau pe laui afe? He‘ikai malava ke ‘ilo‘i ‘a e tu‘unga totonu mo e tu‘unga fakalaumālie ‘o e fa‘ahinga kotoa ‘i he kulupú. ‘Oku pehē ‘i he Saame 26:4: “‘Oku ‘ikai te u feohi mo e kau tangata kākaá, pea ‘oku ou faka‘ehi‘ehi mei he fa‘ahinga ‘oku nau fufū honau tu‘unga totonú.” ‘Ikai ‘oku fakahaa‘i mai ai ke tau ngāue‘aki ha polokalama fe‘ave‘aki pōpoaki ke fetu‘utaki pē ki he fa‘ahinga ‘oku tau ‘ilo‘í?

Na‘a mo ha kulupu fe‘ave‘aki pōpoaki tokosi‘i ange, ‘oku fiema‘u ki ha Kalisitiane ke ne sivisivi‘i ‘a e taimi mo e me‘a ‘okú ne talanoa ki aí. ‘Oku ‘ikai ke ‘uhinga ia ‘oku totonu ke tau tali ‘a e me‘a ‘oku tohi ki ai ‘a e ni‘ihi kehé pe tatau ai pē pe ko e hā ‘a e lahi ‘o e taimi ‘oku nau fakamoleki aí. Na‘e fakatokanga ‘a Paula kia Tīmote fekau‘aki mo e fa‘ahinga te nau hoko “ko e kau ngutu-lau mo e kau kaunoa ‘i he ngaahi me‘a ‘a e kakai kehé.” (1 Tīm. 5:13) ‘I he ‘ahó ni, ‘oku malava ke fai ha me‘a meimei tatau ‘o ngāue‘aki ‘a e polokalama faka‘ilekitulōniká.

Ko ha Kalisitiane matu‘otu‘a he‘ikai ke ne fai pe fanongo ki he ngaahi fakamatala fakaangá pe fakahaa‘i ‘a e fakamatala fakapulipuli fekau‘aki mo ha kaungātui. (Saame 15:3; Pal. 20:19) Pea te ne faka‘ehi‘ehi mei he ngaahi fakamatala fakalahi pe ‘ikai fakapapau‘í. (‘Ef. 4:25) Ko hono mo‘oní ‘oku tau ma‘u ‘i he‘etau uepisaiti jw.org mo e ngaahi polokalama fakamāhina ‘i he JW Broadcasting^® ‘a e me‘akai fakalaumālie hulu fau mo e ngaahi fakamatala fakamuimui taha alafalala‘anga.

‘Oku ngāue‘aki ‘e he Kau Fakamo‘oni ‘e ni‘ihi ‘a e fe‘ave‘aki pōpoaki faka‘ilekitulōniká ke fakatau atu, fakatau mai mo tu‘uaki ai ‘a e ngaahi koloa pe ko ha ngāue. Ko e ngaahi ngāue fakakomēsiale ia ‘o ‘ikai ko ha me‘a fakateokalati. Ko e kau Kalisitiane ‘oku nau loto ke “‘ata‘atā mei he ‘ofa ki he pa‘angá” ‘oku nau taliteke‘i ha fa‘ahinga fakatauele pē ke ngāue‘aki ‘etau fetokoua‘akí ki ha taumu‘a fakakomēsiale.​—Hep. 13:5.

Kae fēfē hono ngāue‘aki ‘a e ngaahi polokalama fe‘ave‘aki pōpoakí ke kole ha pa‘anga ma‘á e kaungātui ‘oku masivá pe ke tokoni ki ha fakatamaki? ‘Oku tau fa‘a fakahāhā ‘a e mahu‘inga‘ia anga-‘ofa ‘i he fetokoni‘akí mo e fefakalototo‘a‘akí. (Sēm. 2:15, 16) Ka ko e feinga ke fai pehē fakafou ‘i ha kulupu fe‘ave‘aki pōpoaki tokolahi ‘e fakafaingata‘a‘ia‘i nai ai ‘a e ngaahi fokotu‘utu‘u maau kuo fai ‘e he ‘ōfisi va‘a fakalotofonuá pe fakataha‘angá. (1 Tīm. 5:3, 4, 9, 10, 16) Pea ko hono mo‘oní ‘oku ‘ikai ha taha ‘o kitautolu ‘e loto ke fakahaa‘i ‘oku tau ma‘u ha vāhenga-ngāue makehe ke tokanga‘i ‘a e fanga sipi ‘a e ‘Otuá.

‘Oku tau holi ke fai ‘a e me‘a ‘e ‘ave ai ‘a e lāngilangí ki he ‘Otuá. (1 Kol. 10:31) Ko ia ‘i he fili pe te ke ngāue‘aki ha polokalama fe‘ave‘aki pōpoaki pe ko ha tekinolosia kehe, fakakaukau ki he ngaahi fakatu‘utāmaki ‘e ala hokó pea tokanga.