Ko e niʻihi naʻa nau lau fakavave ʻa e fakamatala ko ení kuo nau fifili fekauʻaki mo ia. Ka naʻe toko ua ʻa e ongo tangata naʻe ui ko Mefipōseti ʻi he fakamatalá, pea ʻoku lava ke tau ako ha meʻa ʻi hono sivisiviʻi ʻa e meʻa naʻe hokó.

Ko Tuʻi Saula ʻo ʻIsilelí naʻá ne maʻu ʻa e ngaahi foha ʻe toko fitu mo ha ʻofefine ʻe toko ua. Ko e ʻuluaki foha ʻo Saulá ko Sionatane. Ki mui ange naʻe ʻi ai ha foha ʻo e tuʻí ko hono hingoá ko Mefipōseti, ʻa ia naʻe fanauʻi kia Saula ʻe heʻene sinifu ko Līsipá. Ko e meʻa ʻoku fakatupu tokangá, ko Sionatane naʻe ʻi ai foki mo hono foha ko hono hingoá ko Mefipōseti. Ko ia naʻe fakatou maʻu ʻe Tuʻi Saula ha foha ko Mefipōseti mo hano mokopuna naʻe uiʻaki ʻa e hingoa ko iá.

ʻI ha taimi ʻe taha, naʻe tafoki hake ʻa Tuʻi Saula ki he kau Kipioné naʻa nau nofo ʻi he lotolotonga ʻo e kau ʻIsilelí pea feinga ke fakaʻauhamālie kinautolu. ʻOku ngalingali ko e tokolahi ʻo kinautolu naʻe tāmateʻi. Naʻe mātuʻaki hala ʻaupito ia. Ko e hā hono ʻuhingá? Koeʻuhí ʻi he ʻaho ʻo Siosiuá, naʻe fai ʻe he ngaahi ʻeiki ʻo ʻIsilelí ha fuakava ʻo e melino mo e kau Kipioné.​—Sios. 9:3-27.

Ko e fuakava ko iá naʻe kei ngāueʻaki pē ʻi he taimi ʻo Tuʻi Saulá. ʻI he ʻikai tauhi ki he fuakavá, naʻe feinga ʻa e tuʻí ke ne fakaʻauhamālie ʻa e kau Kipioné. Naʻe iku ai ʻo “halaia ʻi he toto ʻa Saula pea mo hono falé.” (2 Sām. 21:1) Naʻe faai atu pē ʻo hoko ʻa Tēvita ko e tuʻí. Pea naʻe lea leva ʻa e kau Kipione naʻa nau hao moʻuí kiate ia fekauʻaki mo e faihala mamafá. Naʻe ʻeke ange ʻe Tēvita kiate kinautolu pe ko e hā ʻa e ʻufiʻufi angahala naʻe totonu ke fai koeʻuhi ko e tōʻonga fakalilifu ʻa Saulá pea ʻe fakaava ai ʻa e hala ke tāpuakiʻi ʻe Sihova ʻa e fonuá. Naʻe ʻikai ʻeke ʻe he kau Kipioné ha totongi paʻanga, ka ʻi hono kehé naʻa nau kole ange ke tuku mai kiate kinautolu ha ngaahi foha ʻe toko fitu ʻo e tangata naʻá ne “faʻufaʻu ke fakaʻauhamālie” kinautolú ke nau tāmateʻi. (Nōm. 35:30, 31) Naʻe tali ʻe Tēvita ʻenau kolé.​—2 Sām. 21:2-6.

ʻI he taimi ko iá, ko Saula mo Sionatane naʻá na ʻosi mate ʻi he taú, ka ko e foha ʻo Sionatane ko Mefipōsetí naʻá ne kei moʻui. Naʻá ne heke mei heʻene kei siʻí koeʻuhi ko ha fakatuʻutāmaki naʻe hoko pea naʻe ʻikai ke ne kau ʻi hono ʻohofi ko ia ʻe heʻene kuí ʻa e kau Kipioné. Naʻe ʻosi fai ʻe Tēvita ia ha fuakava ʻo e kaumeʻa mo Sionatane, ʻa ia ʻe maʻu ʻaonga mei ai hono hakó, kau ai ʻa e foha ʻo Sionatane ko Mefipōsetí. (1 Sām. 18:1; 20:42) ʻOku pehē ʻe he fakamatalá: “Naʻe fakahāhā ʻe he tuʻí [ʻe Tēvita] ʻa e manavaʻofa kia Mefipōseti, ko e foha ʻo Sionatane ko e foha ʻo Saulá, koeʻuhi ko e fuakava naʻe fai ʻi he ʻao ʻo Sihová.”​—2 Sām. 21:7.

Neongo ia, naʻe tali ʻe Tēvita ʻa e kole ʻa e kau Kipioné. Naʻá ne tuku atu ʻa e foha ʻe ua ʻo Saula, ko e taha ai naʻe ui ko Mefipōseti, pea mo e toko nima ʻi he fanga makapuna ʻo Saulá. (2 Sām. 21:8, 9) Ko e tōʻonga ko eni naʻe fai ʻe Tēvitá naʻe fakangata ai ʻa e halaia ʻi he toto ʻa e fonuá.

Ko e talanoa ko ení ʻoku ʻikai ko ha meʻa pē ia naʻe hoko ʻi he hisitōliá. Ko e lao ʻa e ʻOtuá naʻe māʻalaʻala. Naʻe pehē ai: “ʻE ʻikai ke mate ʻa e fānaú koeʻuhi ko e meʻa ʻoku fai ʻe heʻenau ngaahi tamaí.” (Teu. 24:16) Naʻe ʻikai mei fakaʻatā ʻe Sihova ʻa e meʻa naʻe fai ki he ongo foha mo e fanga makapuna ʻe toko nima ʻo Saulá kapau naʻa nau tonuhia. Naʻe toe pehē ʻi he laó: “ʻE mate ha taha ʻi heʻene angahala pē ʻaʻaná.” ʻOku hā ngali ko e hako ʻe toko fitu ʻo Saulá naʻa nau maté naʻa nau kau ʻi he feinga ʻa Saula ke fakaʻauhamālie ʻa e kau Kipioné. Ko hono olá, ko e toko fitu ko iá naʻa nau totongi pē ʻenau faihalá.

Ko e fakamatala ko ení ʻokú ne fakahaaʻi ko ha tokotaha heʻikai lava ke ne kumi kalofanga ʻi haʻane faihala ʻaki haʻane fakakaukau pe pehē naʻá ne muimui pē ki he fakahinohinó. ʻOku pehē ʻe ha palōveepi ʻa e potó: “Fakatokalelei ʻa e ʻalunga ʻo ho vaʻé, pea ʻe pau ai ho hala kotoa pē.”​—Pal. 4:24-27; ʻEf. 5:15.