1. Ko e hā ʻoku holi ʻa e ngaahi mātuʻá ke maʻu ʻe heʻenau fānaú?

 MĀTUʻA, ʻoku mau ʻiloʻi ʻoku mou loto ke tokoniʻi hoʻomou fānaú ke nau hoko ʻo ʻiloʻi mo ʻofa kia Sihova. Ka ko e ʻOtuá ʻoku taʻehāmai. ʻE lava fēfē ke mou tokoniʻi hoʻomou fānaú ke nau vakai kiate ia ko ha Tokotaha moʻoni pea ke ʻunuʻunu ofi kiate ia?​—Sēm. 4:8.

2. ʻE lava fēfē ke akoʻi ʻe he ngaahi mātuʻá ʻenau fānaú fekauʻaki mo e ngaahi ʻulungaanga ʻo Sihová?

² Ko ha founga mahuʻinga ke tokoniʻi ai ʻa e fānaú ke nau ʻunuʻunu ofi kia Sihová ko hono ako ʻa e Tohi Tapú mo kinautolu. (2 Tīm. 3:14-17) Neongo ia, ʻoku fakahaaʻi mai ʻe he Tohi Tapú ha toe founga ʻe taha ʻe lava ke ako ai ʻa e fānaú fekauʻaki mo Sihova. ʻI he tohi ʻa Palōvēpí, ʻoku hā mahino ai hono fakamanatu ʻe ha tamai ki hono fohá ke ʻoua naʻa tuku ke puli ʻa e ngaahi ʻulungaanga ʻo Sihová, ʻa ia ʻoku fakaeʻa mai ʻi he fakatupú. (Pal. 3:19-21) Te tau lāulea ki he ngaahi founga ʻe niʻihi ʻe lava ke ngāueʻaki ai ʻe he ngaahi mātuʻá ʻa e fakatupú ke tokoniʻi ʻenau fānaú ke nau ako fekauʻaki mo e ʻulungaanga ʻo Sihová.

3. Ko e hā ʻa e tokoni ʻoku totonu ke fai ʻe he ngaahi mātuʻá ki heʻenau fānaú?

³ ʻOku pehē ʻi he Tohi Tapú ko e “ngaahi anga ʻoku taʻehāmaí [ʻo e ʻOtuá], . . . ʻoku hā mahino mai ia mei hono fakatupu ʻo e māmaní ʻo faai mai, koeʻuhi ʻoku ʻiloʻi ia ʻi he ngaahi meʻa kuo ngaohí.” (Loma 1:20) Ngaahi mātuʻa, ʻoku ngalingali ʻoku mou fiefia ke fakamoleki ʻa e taimi mo hoʻomou fānaú ʻi tuʻa. Ngāueʻaki ʻa e taimi ko iá ke tokoniʻi hoʻomou fānaú ke sio ki he felāveʻi ʻa e “ngaahi meʻa kuo ngaohí” mo e ngaahi ʻulungaanga fakaofo ʻo Sihová. ʻI he fekauʻaki mo e meʻá ni, tau vakai angé ki he meʻa ʻe lava ke ako ʻe he ngaahi mātuʻá mei he faʻifaʻitakiʻanga ʻa Sīsuú.

4. Naʻe anga-fēfē hono ngāueʻaki ʻe Sīsū ʻa e fakatupú ke akoʻi ʻene kau ākongá? (Luke 12:24, 27-30)

 ⁴ Fakatokangaʻi ʻa e founga naʻe ngāueʻaki ai ʻe Sīsū ʻa e fakatupú ʻi heʻene faiakó. ʻI he taimi ʻe taha, naʻá ne kole ki heʻene kau ākongá ke nau siofi ʻa e fanga lēvení mo e ngaahi lilé. (Lau ʻa e Luke 12:24, 27-30.) Naʻe mei lave ʻa Sīsū ki ha faʻahinga manu pe ʻakau kehe, ka naʻá ne fili ha manupuna mo ha matalaʻiʻakau naʻe ʻiloʻi lelei ʻe heʻene kau ākongá. Naʻe sio nai ʻa e kau ākongá ki he puna hake ʻa e fanga lēvení pea ki he ngaahi matalaʻiʻakau ʻo e vaó. ʻE lava ke ke sioloto atu kia Sīsū ʻi heʻene tuhu atu ki he ngaahi meʻa ko ení ʻi heʻene leá? Pea ko e hā naʻá ne fai ʻi he hili ʻene lave ki he ongo fakatātā ko ení? Naʻá ne akoʻi ki heʻene kau ākongá ha lēsoni fakaueʻiloto fekauʻaki mo e nima-homo mo e anga-lelei ʻenau Tamai fakahēvaní: ʻE fafanga ʻe Sihova mo fakateunga ʻene kau sevāniti faitōnungá ʻo hangē pē ko ʻene fai pehē ki he fanga lēvení mo e ngaahi matalaʻiʻakau ʻo e vaó.

5. Ko e hā ʻa e ngaahi fakatātā ʻi he fakatupú ʻe lava ke ngāueʻaki ʻe he mātuʻá ke akoʻi ʻenau fānaú fekauʻaki mo Sihová?

⁵ Mātuʻa, te mou faʻifaʻitaki ki he founga fakafaiako ʻa Sīsuú? Te ke talanoa nai ki hoʻo kiʻi tamá ha tafaʻaki ʻo e fakatupú ʻoku tautefito hoʻo houngaʻia aí, hangē ko e manu pe ʻakau ʻokú ke saiʻia taha aí. ʻI hoʻo fai peheé, fakapapauʻi ke fakamatalaʻi ʻa e meʻa ʻoku fakaeʻa mai ʻe he meʻa ko iá fekauʻaki mo Sihová. ʻE lava ke ke ʻeke ange leva ki hoʻo kiʻi tamá pe ko e hā ʻa e manu pe ʻakau ʻokú ne saiʻia taha aí. Kapau te ke ngāueʻaki ha tafaʻaki ʻo e fakatupú ʻa ia ʻoku ʻosi fakamānako kiate ia, mahalo te ne tokanga lelei ange ʻi hoʻo talanoa fekauʻaki mo e ngaahi ʻulungaanga ʻo Sihová.

6. Ko e hā ʻoku lava ke tau ako mei he faʻifaʻitakiʻanga naʻe fokotuʻu ʻe he faʻē ʻa Christopher?

⁶ ʻOku fiemaʻu ke fakamoleki ʻe he mātuʻá ha taimi lahi ʻi he fekumi ki ha manu pe ko ha ʻakau pau ki muʻa ke lāulea ki he meʻa ʻoku fakaeʻa mai ai fekauʻaki mo Sihová? ʻOku ʻikai fiemaʻu ia ke pehē. Naʻe ʻikai ke fai ʻe Sīsū ha fakamatala lōloa fekauʻaki mo e founga ʻoku fafanga ai ʻa e fanga lēvení pe ko e founga ʻoku tupu ai ʻa e lilé. Ko e moʻoni, ʻe fiefia nai hoʻo kiʻi tamá, mei he taimi ki he taimi, ke talanoa loloto ange fekauʻaki mo natula, ka ʻi he taimi ʻe niʻihi ko ha fakamatala pe fehuʻi faingofua ʻoku feʻunga pē ia ke ne fakamahinoʻi ʻa e poiní. Fakatokangaʻi ʻa e meʻa ʻoku manatuʻi ʻe ha tokoua ko Christopher mei heʻene kei siʻí: “Ko ʻeku faʻeé naʻá ne fai ʻa e fakamatala faingofua ke tokoniʻi kimautolu ke houngaʻia ʻi he fakatupu takatakai ʻiate kimautolú. Ko e fakatātaá, ʻi he taimi naʻa mau ofi ai ki ha ʻotu moʻunga, naʻá ne pehē mai: ‘Sio atu ki he lahi mo e fakaʻofoʻofa ʻa e ʻotu moʻungá! ʻIkai ʻoku fakaofo ʻa Sihova?’ Pe ʻi heʻemau ofi ki tahí, naʻá ne pehē mai: ‘Sio atu ki he mālohi ʻo e ngaahi peaú! ʻIkai ʻoku mālohi ʻa e ʻOtuá?’” ʻOku pehē ʻe Christopher: “Ko e ngaahi fakamatala faingofua mo fakatupu fakakaukau ko iá naʻe maongo lahi ia kiate kimautolu.”

7. ʻE lava fēfē ke ke akoʻi hoʻo fānaú ke fakakaukauloto ki he fakatupú?

⁷ ʻI he tupu ke toe lalahi ange hoʻo fānaú, ʻe lava ke ke akoʻi kinautolu ke fakakaukau lahi ange ki he fakatupú pea fai ʻa e ngaahi fakamulituku fekauʻaki mo e ʻulungaanga ʻo Sihová. ʻE lava ke ke fakamamafaʻi ha taha ʻo e ngaahi ngāue fakaefakatupu ʻa e ʻOtuá pea ʻeke ki hoʻo fānaú, “Ko e hā ʻoku akoʻi atu heni kiate koe fekauʻaki mo Sihová?” Te ke ʻohovale nai ʻi he fanongo ki he meʻa te nau leaʻakí.​—Māt. 21:16.

8. Ko e hā ʻa e faingamālie naʻe maʻu ʻe he ngaahi mātuʻa ʻIsilelí ʻi heʻenau fononga “ʻi he halá”?

⁸ Ko e ngaahi mātuʻa ʻIsilelí naʻe ekinaki kiate kinautolu ke nau akoʻi ki heʻenau fānaú ʻa e ngaahi fekau ʻa Sihová ʻi heʻenau “lue ʻi he halá.” (Teu. 11:19) Ko e ngaahi halá naʻe lele ia ʻi he feituʻu ʻuta ʻo ʻIsilelí. Naʻe lava ke sio ai ki he fanga manu, fanga manupuna mo e ngaahi matalaʻiʻakau. ʻI he fononga ʻa e ngaahi fāmili ʻIsilelí ʻi he ngaahi halá, naʻe maʻu ʻe he ngaahi mātuʻá ʻa e faingamālie ke langaʻi ʻa e mahuʻingaʻia ʻenau fānaú ʻi he fakatupu  ʻa Sihová. Ko kimoutolu ngaahi mātuʻa ʻoku ngalingali ʻoku mou maʻu ʻa e ngaahi faingamālie meimei tatau ke ngāueʻaki ʻa e fakatupú ke akoʻi hoʻomou fānaú. Fakakaukau ki he founga kuo fai ai ia ʻe he ngaahi mātuʻa ʻe niʻihi.

9. Ko e hā ʻe lava ke ke ako meia Punitha mo Katya?

⁹ Ko ha faʻē ko Punitha, ʻokú ne nofo ʻi ha kolo lahi ʻi ʻInitia, ʻokú ne pehē: “ʻI he taimi ʻoku mau ʻaʻahi ai ki ha fāmili ʻi he feituʻu ʻutá, ʻokú ma vakai ki ai ko ha faingamālie ia ke tokoniʻi ʻema fānaú ke ako fekauʻaki mo e fakatupu fakaofo ʻa Sihová. ʻOku ou ongoʻi ʻoku mahinoʻi lelei ange ʻe heʻeku fānaú ʻa e fakatupú ʻi he taimi ʻoku nau mamaʻo ai mei he ngaahi hala feʻefiʻefihí mo e kolo moʻumoʻuá.” Ngaahi mātuʻa, ʻoku ngalingali heʻikai ʻaupito ngalo ʻi hoʻomou fānaú ʻa e taimi ʻoku mou fakamoleki fakataha ʻi ha feituʻu fakaʻofoʻofa. Ko Katya, ko ha tuofefine mei Molotova, ʻokú ne pehē: “Ko e meʻa ʻoku ou manatuʻi lelei taha mei heʻeku kei siʻí ko e taimi naʻá ku fakamoleki mo ʻeku ongo mātuʻá ʻi he feituʻu ʻutá. ʻOku ou houngaʻia ʻiate kinaua ʻi heʻena akoʻi au ʻi heʻeku kei siʻí ke kiʻi tuʻu pea vakai ki he meʻa kuo ngaohi ʻe Sihová pea ke mātā Ia fakafou ʻi heʻene fakatupú.”

10. Ko e hā ʻe lava ke fai ʻe he ngaahi mātuʻá kapau ʻoku faingataʻa ke nau fononga mamaʻo mei he kolo lahí? (Sio ki he puha “ Tokoni ki he Mātuʻá.”)

¹⁰ Fēfē kapau ʻoku ʻikai malava ke ke fononga ki he feituʻu ʻutá? Ko Amol, ʻokú ne nofo foki ʻi ʻInitia, ʻokú ne pehē: “Ko e feituʻu ʻoku ou nofo aí, ko e ngaahi mātuʻá kuo pau ke nau ngāue ʻi he ngaahi houa lahi, pea ko e fononga ki he feituʻu ʻutá ʻoku mamafa. Kae kehe, ko ha kiʻi paʻake pe ko ha ngoue ʻi he ʻato ʻo ha fale ʻe lava ke hoko ia ko ha feituʻu ke vakai ai ki he fakatupú pea talanoa fekauʻaki mo e ngaahi ʻulungaanga ʻo Sihová.” ʻI he taimi ʻokú ke sio fakalelei aí, ʻoku ngalingali te ke ʻiloʻi foki ha ngaahi tafaʻaki ʻo e fakatupú ʻoku ofi atu ki ho ʻapí ʻa ia ʻe lava ke ke fakahaaʻi ki hoʻo fānaú. (Saame 104:24) Mahalo te ke sio ki he fanga manupuna, fanga ʻinisēkite, ʻuluʻakau mo e hā fua. Ko Karina, mei Siamane, ʻokú ne pehē: “ʻOku saiʻia ʻeku faʻeé ʻi he ngaahi matalaʻiʻakaú, ko ia ʻi he taimi naʻá ku kei siʻi aí, te ne fakahanga maʻu pē ʻeku tokangá ki he ngaahi  matalaʻiʻakau fakaʻofoʻofa naʻá ma sio ki ai ʻi ha taimi pē naʻá ma luelue fakataha ai.” Ngaahi mātuʻa, ʻe lava foki ke mou ngāueʻaki ʻa e ngaahi vitiō mo e ʻū tohi fekauʻaki mo e fakatupú kuo tokonaki mai ʻe heʻetau kautahá ke akoʻi hoʻomou fānaú. ʻIo, tatau ai pē pe ko e hā homou tuʻungá, ʻe lava ke mou tokoniʻi hoʻomou fānaú ke nau vakai ki he meʻa kuo ngaohi ʻe he ʻOtuá. Tau lāulea angé he taimí ni ki he ngaahi ʻulungaanga ʻe niʻihi ʻo Sihova ʻe lava ke mou fakahaaʻi ki hoʻomou fānaú.

11. ʻE lava fēfē ke tokoniʻi ʻe he ngaahi mātuʻá ʻenau fānaú ke nau ʻiloʻi ʻa e ʻofa ʻa Sihová?

¹¹ Ke tokoniʻi hoʻomou fānaú ke nau lāuʻilo ki he ʻofa ʻa Sihová, ʻe lava ke mou fakahanga ʻenau tokangá ki he founga fakaalaala ʻoku tokangaʻi ai ʻe he fanga manu tokolahi honau ʻuhikí. (Māt. 23:37) ʻE lava foki ke ke fakamamafaʻi ʻa e kehekehe ʻo e ngaahi fakatupu fakaofo ʻoku tau mātuʻaki fiefia aí. Ko Karina, naʻe lave ki ai ki muʻá, ʻokú ne pehē: “ʻI he taimi naʻá ma luelue aí, naʻe fakalototoʻaʻi au ʻe heʻeku faʻeé ke kiʻi tuʻu pea vakai ki he founga ʻoku makehe ai ʻa e matalaʻiʻakau taki taha pea mo e founga ʻoku tapua mai ai ʻe hono fakaʻofoʻofá ʻa e ʻofa ʻa Sihová. ʻI ha ngaahi taʻu ki mui ai, ʻoku ou kei siofi fakalelei pē ʻa e ngaahi matalaʻiʻakaú​—ʻa honau kehekehé, tisainí, mo e lanú. ʻOku hokohoko atu hono fakamanatu mai ai kiate au ʻa e lahi ʻo e ʻofa ʻa Sihova ʻiate kitautolú.”

12. ʻE lava fēfē ke tokoniʻi ʻe he ngaahi mātuʻá ʻenau fānaú ke ʻiloʻi ʻa e poto ʻo e ʻOtuá? (Saame 139:14) (Sio foki ki he fakatātaá.)

¹² Tokoniʻi hoʻo fānaú ke nau ʻiloʻi ʻa e poto ʻo e ʻOtuá. Ko hono moʻoní ko Sihova ʻokú ne poto mamaʻo ange ʻiate kitautolu. (Loma 11:33) Ko e fakatātaá, ʻe lava ke ke fakahanga ʻenau tokangá ki he founga ʻoku tētē holo ai ʻa e ngaahi konga ʻao ʻoku faʻuʻaki ʻa e vaí ʻi he langí mei he feituʻu ki he feituʻu. (Siope 38:36, 37) ʻE lava foki ke ke fakamamafaʻi ʻa e tisaini fakaofo ʻa e sino ʻo e tangatá. (Lau ʻa e Saame 139:14.) Fakakaukau ki hono fai ia ʻe ha tamai ko Vladimir. ʻOkú ne pehē: “ʻI he ʻaho ʻe taha, naʻe tō ʻema kiʻi tamasiʻí mei heʻene pasikalá ʻo lavea. Hili ha ngaahi ʻaho siʻi mei ai, naʻe sai ʻa e laveá. Naʻá ku fakamatalaʻi ange mo hoku uaifí naʻe fakatupu ʻe Sihova hotau ngaahi selá mo e malava ke fakafoʻou pē ʻiate ia. Naʻá ma tala ange ʻoku ʻikai ke tau sio ki ha meʻa pehē ʻi he ngaahi meʻa ʻoku ngaohi ʻe he tangatá. Ko e fakatātaá, ko ha meʻalele ʻoku ʻikai ke ne fakaleleiʻi pē ʻiate ia ʻa e maumaú hili ha fakatuʻutāmaki. Ko e hokosia ko ení naʻe tokoniʻi ai ʻema kiʻi tamasiʻí ke ne mahinoʻi ʻa e poto ʻo Sihová.”

13. ʻE lava fēfē ke tokoniʻi ʻe he ngaahi mātuʻá ʻenau fānaú ke ʻiloʻi ʻa e mālohi ʻo e ʻOtuá? (ʻAisea 40:26)

 ¹³ ʻOku fakaafeʻi kitautolu ʻe Sihova ke hanga hake hotau matá ki he langí pea fakakaukau fekauʻaki mo e founga ʻoku ʻai ai ʻe hono mālohi fakaofó ke kei tuʻu ʻa e ʻunivēsí. (Lau ʻa e ʻAisea 40:26.) ʻE lava ke ke fakalototoʻaʻi hoʻo fānaú ke nau hanga hake ki he langí pea fakakaukauloto. Ko ha tuofefine ko Tingting mei Taiuani, ʻokú ne manatu ki ha meʻa naʻe hoko ʻi heʻene kei siʻí: “ʻI he taimi ʻe taha, naʻá ku ʻalu mo ʻeku faʻeé ʻo kemi, pea koeʻuhí ko ʻema mamaʻo mei he ngaahi maama ʻo e koló, naʻá ma hanga hake ki he langí ʻo sio lelei ki he ngaahi fetuʻú. Naʻe hoko ia ʻi ha vahaʻa taimi naʻá ku hohaʻa ai fekauʻaki mo e tenge mei he toʻumeʻá pea naʻá ku fifili pe ʻe malava ke u kei tauhi faitōnunga kia Sihova. Naʻe fakalototoʻaʻi au ʻe heʻeku faʻeé ke u fakakaukau fekauʻaki mo e mālohi naʻe ngāueʻaki ʻe Sihova ke fakatupu ʻa e kotoa ʻo e ngaahi fetuʻu ko iá pea ke manatuʻi ʻoku malava moʻoni ke ne ngāueʻaki ʻa e mālohi ko iá ke tokoniʻi au ke fehangahangai mo ha ʻahiʻahi pē. Hili hono siofi ʻa e fakatupú ʻi he ʻeva ko iá, naʻe ueʻi ai au ke u hoko ʻo ʻiloʻi lelei ange ʻa Sihova, pea naʻe toe mālohi ai ʻeku fakapapau ke tauhi kiate iá.”

14. ʻE lava fēfē ke ngāueʻaki ʻe he ngaahi mātuʻá ʻa e fakatupú ke tokoniʻi ʻenau fānaú ke vakai kia Sihova ko ha ʻOtua fiefia?

¹⁴ Ko e fakatupu ʻa Sihová ʻoku fakahaaʻi mai ai ʻene fiefiá pehē foki ki heʻene anga-fakakatá. Kuo ʻiloʻi ʻe he kau faisaienisí ko e tokolahi taha ʻo e fanga manú ʻoku nau saiʻia ke vaʻinga, kau ai ʻa e fanga manupuná mo e iká. (Siope 40:20) Kuo faʻa kata hoʻo fānaú ʻi heʻenau sio ki he vaʻinga ʻa e fanga manú? Mahalo kuo nau sio ki ha kiʻi pusi ʻokú ne tuli ha foʻi pulu kulasi pe ko ha fanga kiʻi kulī ʻoku nau fakavā. Ko e taimi hono hoko pē ʻoku kata ai hoʻo fānaú ʻi heʻenau sio ki he fanga kiʻi tōʻonga ʻa e fanga manú, fēfē ke ke fakamanatu ange kiate kinautolu ʻoku tau tauhi ki ha ʻOtua fiefia?​—1 Tīm. 1:11.

15. Ko e hā ʻe lava ke tokoni ki he ngaahi mātuʻá ke fusi hake ʻa e fakakaukau ʻenau fānaú? (Palōveepi 20:5) (Sio foki ki he fakatātaá.)

¹⁵ ʻI he taimi ʻe niʻihi, ʻe faingataʻa nai ki he ngaahi mātuʻá ke ʻai ʻenau fānaú ke talanoa fekauʻaki mo e palopalema ʻoku nau fehangahangai mo iá. Kapau ko ho tuʻungá ia, ʻe fiemaʻu nai ke ke fusi hake ʻa e fakakaukau ʻa hoʻo fānaú. (Lau ʻa e Palōveepi 20:5.) Ko e ngaahi mātuʻa ʻe niʻihi ʻoku  faingofua ange ke nau fai pehē ʻi he taimi ʻoku nau fiefia fakataha ai mo ʻenau fānaú ʻi he vakai ki natulá. Ko e hā hono ʻuhingá? Ko e ʻuhinga ʻe taha ʻoku siʻisiʻi ange ai ʻa e ngaahi fakahohaʻá ki he fānaú mo e mātuʻá. Ko ha tamai ʻi Taiuani ko Masahiko ʻokú ne lave ki ha toe ʻuhinga ʻe taha: “ʻI he taimi ʻoku mau feohi ai ʻi tuʻa mo ʻema fānaú​—ʻo kaka ʻi he moʻungá pe luelue ʻi he matātahí​—ʻoku nau faʻa ongoʻi fiemālie ange ai. ʻOku faingofua ange ai ke ma fusi hake ʻenau fakakaukaú pea ʻiloʻi ʻa e meʻa ʻi honau ʻatamaí.” Ko Katya, naʻe lave ki ai ki muʻá, ʻokú ne pehē: “ʻI he tuku ʻa e akó, naʻe ʻave au ʻe heʻeku faʻeé ki ha paʻake fakaʻofoʻofa. ʻI ha ʻātakai nonga pehē, naʻe faingofua ange ai ke u tala ange kiate ia ʻa e meʻa naʻe hoko ʻi he ʻapiakó pe ko e meʻa naʻá ku hohaʻa ki aí.”

16. ʻE lava fēfē ke maʻu ʻe he ngaahi fāmilí ha taimi ke fakaivifoʻou pea ke nau fiefia ʻi he vakai ki he fakatupu ʻa Sihová?

¹⁶ Ko e fakatupu ʻa Sihová ʻoku lava foki ke ne tokonaki ki he ngaahi fāmilí ha taimi ke fakaivifoʻou pea ke nau fiefia, ʻo fakaivimālohiʻi ai ʻa e ngaahi haʻi ko ha fāmilí. ʻOku pehē ʻe he Tohi Tapú ʻoku ʻi ai “ha taimi ke kata” mo ha “taimi ke puna takai.” (Tml. 3:1, 4, fkm. ʻi lalo) Fakafou ʻi he ngāue ʻa e toʻukupu ʻo Sihová, kuó ne ʻomai ai kiate kitautolu ha ngaahi feituʻu fakaofo ke fiefia ai ʻi he ngaahi ngāue lelei. Ko e ngaahi fāmili tokolahi ʻoku nau saiʻia ke fakatahataha ʻi ha paʻake fakaʻofoʻofa, ʻi he feituʻu ʻutá, ʻi he ʻotu moʻungá pe ʻi he matātahí. ʻOku saiʻia ʻa e fānau ʻe niʻihi ke nau lele holo mo vaʻinga ʻi ha paʻake, ke nau sio ki he fanga manú pe ke kaukau ʻi ha vaitō pe ʻi tahi. He faingamālie lelei ʻaupito ē ʻoku tau maʻu ki he fakafiefiá ʻi he taimi ʻoku tau fiefia ai ʻi natulá, ʻo takatakaiʻi ʻe he meʻa kuo ngaohi ʻe Sihová!

17. Ko e hā ʻoku totonu ai ke tokoniʻi ʻe he ngaahi mātuʻá ʻenau fānaú ke fiefia ʻi he fakatupu ʻa e ʻOtuá?

¹⁷ ʻI he māmani foʻou ʻa e ʻOtuá, ko e ngaahi mātuʻá mo e fānaú te nau fiefia ʻi he fakatupu ʻa Sihová ʻo ʻikai ʻaupito hangē ko ha toe taimi ki muʻa. ʻI he ʻikai hangē ko e ʻaho ní, heʻikai ha ʻuhinga ke tau manavahē ai ʻi he fanga manú; pe ko haʻanau manavahē ʻiate kitautolu. (ʻAi. 11:6-9) Te tau fiefia taʻengata ʻi he meʻa kuo ngaohi ʻe Sihová. (Saame 22:26) Ka ki he ngaahi mātuʻá, ʻoua ʻe tatali ke aʻu ki he taimi ko iá pea toki tokoniʻi hoʻo fānaú ke nau fiefia ʻi he fakatupú. ʻI hoʻomou ngāueʻaki ʻa e fakatupú ke akoʻi hoʻomou fānaú fekauʻaki mo Sihová, ʻoku ngalingali te nau loto-tatau ai mo e meʻa naʻe leaʻaki ʻe Tuʻi Tēvitá: “ʻE Sihova, ʻoku ʻikai ha ngāue ʻe tatau mo hoʻo ngaahi ngāué.”​—Saame 86:8.