1-2. (a) Ko e hā ʻa e tuʻunga naʻe ʻi ai ʻa Paula ʻi heʻene hiki ʻa e tohi ki he kau ʻEfesoó? (e) Ko e hā ʻa e ongo fehuʻi te tau lāulea ki aí?

 ʻI HE tuku pōpula ʻa e ʻapositolo ko Paulá ʻi ha fale ʻi Loma, naʻá ne loto ke fakalototoʻaʻi hono kaungātuí. Naʻe ʻikai lava ke ne ʻaʻahi kiate kinautolu mata ki he mata, ko ia naʻá ne fai ʻa e ngaahi tohi kiate kinautolu. Ko e tohi ʻe taha ai naʻá ne hiki ki he kau ʻEfesoó ʻi he 60 pe 61 T.S. nai.—ʻEf. 1:1; 4:1.

² ʻI he meimei taʻu ʻe hongofulu ki muʻa ange, naʻe fakamoleki ʻe Paula ha taimi ʻi ʻEfesō, ʻo malanga mo faiakoʻaki ʻa e ongoongo leleí. (Ngā. 19:​1, 8-10; 20:​20, 21) Naʻá ne ʻofa lahi ʻi hono fanga tokouá pea loto ke tokoniʻi kinautolu ke nofoʻaki faitōnunga kia Sihova. Ka ko e hā naʻá ne tohi ai ki he kau Kalisitiane paní fekauʻaki mo e fakapoʻulí mo e māmá? Pea ko e hā ʻa e ngaahi lēsoni ʻe lava ke ako ʻe he kau Kalisitiané kotoa mei he faleʻi ko ení? Tau lāulea angé ki he tali ki he ongo fehuʻi ko ení.

MEI HE FAKAPOʻULÍ KI HE MĀMÁ

3. Ko e hā ʻa e lea fakaefakatātā naʻe ngāueʻaki ʻe Paula ʻi heʻene tohi ki he kau ʻEfesoó?

³ Naʻe tohi ʻe Paula ki he kau Kalisitiane ʻEfesoó: “Ko kimoutolú ko e koto fakapoʻuli ki muʻa, ka ko e koto maama he taimí ni.” (ʻEf. 5:8) Naʻe ngāueʻaki heni ʻe Paula ʻa e lea fakaefakatātā ʻo e fakapoʻulí mo e māmá ke fakamatalaʻi ʻa e ngaahi tuʻunga kehekehe pe fehangahangai. Tau lāulea angé ki he ʻuhinga naʻe pehē ai ʻe Paula ko e kau ʻEfesoó naʻa nau hoko ko e “koto fakapoʻuli ki muʻa.”

4. ʻI he ʻuhinga fē naʻe ʻi he fakapoʻuli fakalotu ai ʻa e kau ʻEfesoó?

⁴ Fakapoʻuli fakalotu. Ki muʻa ke ako ʻa e moʻoní pea hoko ko e kau Kalisitiané, ko e kau ʻEfesoó ʻa ia naʻe tohi ki ai ʻa Paulá naʻe taki pōpula kinautolu ʻe he ngaahi fakakaukau fakalotu loí mo e  tui fakafaʻahikehé. Ko e kolo ko ʻEfesoó naʻe tuʻu ai ʻa e temipale ʻiloa ko ʻĀtemisí, ʻa ia naʻe lau ʻi he kuonga muʻá ko e taha ʻi he ngaahi meʻa fakaofo ʻe fitu ʻo e māmaní. Ko e kakai naʻe lotu ʻi aí naʻe tākiekina lahi ʻe he tauhi ʻaitolí. Ko hono ngaohi mo fakatau atu ʻa e ngaahi fale toputapu fakalotu loi ʻo e ʻotua-fefine ko ʻĀtemisí naʻe hoko ia ko ha pisinisi fakatupu paʻanga lahi. (Ngā. 19:​23-27) ʻIkai ko ia pē, naʻe ʻiloa ʻa e koló ki he ngaahi tōʻonga fakafaimaná.—Ngā. 19:19.

5. ʻI he ʻuhinga fē naʻe ʻi he fakapoʻuli fakaeʻulungaanga ai ʻa e kau ʻEfesoó?

⁵ Fakapoʻuli fakaeʻulungaanga. Naʻe ʻiloa ʻa ʻEfesō ʻi he ʻulungaanga taʻetaau mātuʻaki pangó mo e faikovi taʻemīngaó. Naʻe anga-maheni ke fanongo ki he talanoa fakalieliá ʻi he ngaahi fale faiva ʻi he koló pea naʻa mo e ʻi he ngaahi kātoanga fakalotú. (ʻEf. 5:3) Ko e tokolahi ʻo hono kakaí naʻe “ʻikai ke nau toe maʻu ʻa e ongoʻi fakaeʻulungaanga totonu,” ko ha kupuʻi lea ʻoku ʻuhinga fakafoʻileá ko e “ʻikai ke kei ongoʻi ʻa e mamahí.” (ʻEf. 4:​17-19) Ki muʻa ke ako ʻe he kau ʻEfesoó ʻa e meʻa naʻe tonu moʻoní pe mātuʻaki halá, naʻe ʻikai ke nau ongoʻi ʻa e tā ʻa e konisēnisí pe fakakaukau naʻe pau ke nau fai ha fakamatala kia Sihova. ʻOku lava ke fakamatalaʻi ai kinautolu ʻe Paula naʻa nau “ʻi he fakapoʻuli fakaefakakaukau pea mavahe mei he moʻui ʻoku fekauʻaki mo e ʻOtuá.”

6. Ko e hā ʻoku lava ai ke pehē ʻe Paula ko e kau ʻEfesoó naʻa nau hoko ko e “koto maama he taimí ni”?

⁶ Neongo ia, ko e niʻihi ʻo e kau ʻEfesoó naʻe ʻikai ke nau nofo ai pē ʻi he fakapoʻulí. Naʻe tohi ʻe Paula naʻa nau hoko ko e “koto maama he taimí ni ʻi he fekauʻaki mo e ʻEikí.” (ʻEf. 5:8) Naʻa nau tali ʻa e maama ʻo e moʻoni Fakatohitapú. (Saame 119:105) Naʻe liʻaki ʻe he kau ʻEfesō ko ení ʻenau ngaahi tōʻonga fakalotu loí mo e ʻulungaanga taʻetāú. Naʻa nau “hoko ko e kau faʻifaʻitaki ki he ʻOtuá” pea nau fai honau lelei tahá ke lotu kia Sihova pea fakahōifuaʻi ia.—ʻEf. 5:1.

7. ʻI he ngaahi ʻuhinga fē ʻoku meimei tatau ai hotau tuʻungá mo e kau Kalisitiane tokolahi ʻi ʻEfesoó?

⁷ ʻI ha founga meimei tatau, ki muʻa ke tau ako ʻa e moʻoní, naʻa tau ʻi he koto fakapoʻuli fakalotu mo fakaeʻulungaanga. Ko e niʻihi ʻo kitautolu naʻa tau kātoangaʻi ʻa e ngaahi ʻaho mālōlō fakalotu loi; ko e niʻihi kehe naʻa tau tuli  ki ha ʻalunga moʻui taʻetaau. Ka ʻi heʻetau ako pē fekauʻaki mo e tuʻunga ʻa Sihova ki he tonú mo e halá, naʻa tau fai ʻa e ngaahi liliu. Naʻe kamata ke tau fakatonutonu ʻetau moʻuí ke fehoanaki mo ʻene ngaahi fiemaʻu māʻoniʻoní. Pea ko hono olá, kuo tau maʻu ʻa e ʻaonga lahi. (ʻAi. 48:17) Neongo ia, ʻi he taimi ní, ʻoku tau fehangahangai mo e ngaahi pole hokohoko. ʻOku fiemaʻu ke tau fakamamaʻo mei he koto fakapoʻuli naʻa tau tuku angé pea “hokohoko atu ʻa e ʻaʻeva ʻi he tuʻunga ko e fānau ʻo e māmá.” ʻE lava fēfē ke tau fai pehē?

FAKAʻEHIʻEHI MEI HE FAKAPOʻULÍ

8. Fakatatau ki he ʻEfesō 5:​3-5, ko e hā naʻe fiemaʻu ke fakaʻehiʻehi mei ai ʻa e kau ʻEfesoó?

⁸ Lau ʻa e ʻEfesō 5:​3-5. Koeʻuhi ke fakamamaʻo mei he fakapoʻuli fakaeʻulungāngá, ko e kau Kalisitiane ʻi ʻEfesoó naʻe pau ke hokohoko atu ʻenau talitekeʻi ʻa e ngaahi tōʻonga naʻe taʻefakahōifua kia Sihová. Naʻe kau ai ʻa e tōʻonga fakaefehokotaki fakasino taʻetāú pea pehē foki ki he talanoa fakalieliá. Naʻe fakamanatu ʻe Paula ki he kau ʻEfesoó naʻe pau ke nau fakaʻehiʻehi mei he ngaahi meʻa peheé kapau naʻa nau loto ke maʻu hanau “tofiʻa ʻi he Puleʻanga ʻo e Kalaisí mo e ʻOtuá.”

9. Ko e hā ʻoku totonu ai ke tau talitekeʻi ha meʻa pē ʻoku felāveʻi mo e ʻulungaanga taʻetāú?

⁹ Kuo pau ke hokohoko atu ʻetau faitau ke ʻoua ʻe fakafihiaʻi kitautolu ʻi he “ngaahi ngāue taʻefua ʻo e fakapoʻulí.” (ʻEf. 5:11) ʻI he taimi ki he taimi, kuo fakahaaʻi ʻe he hokosiá ko e lahi ange ʻa e mamata, fanongo pe talanoa ha taha fekauʻaki mo e ngaahi meʻa taʻemaʻa mo taʻetāú, ko e faingofua ange ia ke ne tō ʻi he faihalá. (Sēn. 3:6; Sēm. 1:​14, 15) ʻI ha fonua ʻe taha, naʻe ʻi ai ha kulupu ʻo e fanga tokouá naʻa nau kau ʻi ha kulupu feʻaveʻaki pōpoaki ʻi he ʻinitanetí. Ko e tokolahi ʻo kinautolu naʻa nau kamata fetalanoaʻaki ki he ngaahi meʻa fakalaumālie. Kae kehe, ʻi he faai atu ʻa e taimí, naʻa nau fetalanoaʻaki ki he ngaahi meʻa ʻikai lelei. Naʻe kamata ke fakatefito pē ʻenau talanoá ʻi he fehokotaki fakasinó. Ko e niʻihi ʻi he faʻahingá ni naʻa nau fakahaaʻi ki mui ai ko e talanoa taʻemaʻa ko ení naʻe taki atu ai ke nau fakahoko ʻa e fehokotaki fakasino taʻetaau.

10. ʻOku anga-fēfē feinga ʻa Sētane ke kākaaʻi kitautolú? (ʻEfesō 5:6)

¹⁰ ʻOku feinga ʻa e māmani ʻo Sētané ke kākaaʻi kitautolu, ke ʻai ke tau tui ko e meʻa ʻoku lau ʻe Sihova ʻoku taʻetaau mo taʻemaʻá ʻoku ʻikai ʻaupito hala ia. (2 Pita 2:19) ʻOku ʻikai ke hokonoa pē eni! Ko e taha ʻi he ngaahi founga kuo ngāueʻaki fuoloa ʻe he Tēvoló ko hono fakapuputuʻuʻi ʻa e kakaí koeʻuhí ke ʻoua te nau malava ʻo ʻiloʻi ʻa e meʻa ʻoku tonú mo e meʻa ʻoku halá. (ʻAi. 5:20; 2 Kol. 4:4) ʻOku ʻikai ha ofo ʻi he lahi ʻa e ngaahi faiva, polokalama televīsone mo e uepisaiti ʻoku nau pouaki ʻa e ngaahi fakakaukau ʻoku fepaki mo e ngaahi tuʻunga māʻoniʻoni ʻa Sihová! ʻOku feinga ʻa Sētane ke kākaaʻi kitautolu ke tau fakakaukau ko e ngaahi tōʻonga mo e founga moʻui taʻemaʻá ʻoku ʻikai ngata pē hono ala talí ka ʻoku toe fakafiefia mo ʻikai hano maumau.—Lau ʻa e ʻEfesō 5:6.

11. ʻOku anga-fēfē hono fakamamafaʻi ʻe he hokosia ʻa Angela ʻa e fiemaʻu ke ngāueʻaki ʻa e faleʻi fakapotopoto ʻi he ʻEfesō 5:7? (Sio foki ki he fakatātaá.)

¹¹ ʻOku loto ʻa Sētane ke tau feohi mo e kakai ʻoku nau ʻai ke faingataʻa ange ke tau pipiki ki he ngaahi tuʻunga ʻa Sihová. Ko ia naʻe ekinaki ʻa Paula ki he kau ʻEfesoó: “ʻOua te mou kau fakataha mo kinautolu,” ʻa ia, ko e faʻahinga ʻoku nau tōʻongaʻaki ʻa e meʻa ʻoku hala ʻi he vakai ʻa e ʻOtuá. (ʻEf. 5:7) ʻOku fiemaʻu ke tau manatuʻi ko ʻetau feohí ʻoku ʻikai ke fakangatangata pē ki he faʻahinga ʻoku tau fakamoleki ʻa e taimi mo ia mata ki he matá. ʻOku kau ki ai ʻa e faʻahinga ʻoku tau fetuʻutaki mo ia ʻi he mītia fakasōsialé, ko ha fakatuʻutāmaki naʻe ʻikai ke fetaulaki mo e kau ʻEfesō ʻi he kuonga  muʻá. Ko Angela, a ʻokú ne nofo ʻi ʻĒsia, naʻá ne ʻiloʻi ʻa e fakatuʻutāmaki ʻo e mītia fakasōsialé. ʻOkú ne pehē: “ʻE lava ke hoko ia ko ha tauhele, ʻo ne ʻai ke ongonoa hoʻo ngaahi ongó. Naʻe aʻu ki ha tuʻunga naʻe ʻikai ke toe fakahohaʻasi au ʻe heʻeku maʻu ʻa e ‘ngaahi kaumeʻa’ naʻe ʻikai ke nau fakaʻapaʻapaʻi ʻa e ngaahi tefitoʻi moʻoni Fakatohitapú. Faai atu pē, naʻe kamata ke u fakakaukau naʻe sai pē ke u tuli ki ha founga moʻui naʻe taʻefakahōifua kia Sihova.” Kae mālō, ko e kau mātuʻa anga-ʻofá naʻa nau tokoniʻi ʻa Angela ke fai ʻa e ngaahi liliu naʻe fiemaʻú. ʻOkú ne pehē: “ʻOku ou fakafonu he taimí ni hoku ʻatamaí ʻaki ʻa e ngaahi meʻa fakalaumālié kae ʻikai ko e mītia fakasōsialé.”

12. Ko e hā te ne tokoniʻi kitautolu ke pipiki ki he ngaahi tuʻunga ʻa Sihova ki he tonú mo e halá?

¹² Kuo pau ke tau faitau mo e fakakaukau ʻa e māmaní ʻo pehē ʻoku ala tali ʻa e tōʻonga taʻetāú. ʻOku tau ʻiloʻi lelei ʻa e moʻoní. (ʻEf. 4:​19, 20) ʻOku lelei ke tau ʻeke hifo: ‘ʻOku ou feinga ke fakaʻehiʻehi mei he feohi ʻikai fiemaʻu kotoa pē mo e kaungāngāué, kaungāakó pe niʻihi kehe ʻoku ʻikai ke nau fakaʻapaʻapaʻi ʻa e ngaahi tuʻunga māʻoniʻoni ʻa Sihová? ʻOku ou pouaki loto-toʻa ʻa e ngaahi tuʻunga ʻa Sihová neongo ʻe ui nai au ʻe he niʻihi ʻoku ou fuʻu fakataputapui ʻi he fai peheé?’ Hangē ko ia ʻoku hā ʻi he 2 Tīmote 2:​20-22, ʻe toe fiemaʻu nai ke tau tokanga ʻi hono fili hotau ngaahi kaumeʻa vāofi ʻi loto ʻi he fakatahaʻangá. ʻOku tau manatuʻi ʻe ʻi ai ʻa e niʻihi heʻikai nai ke nau tokoniʻi kitautolu ke nofoʻaki faitōnunga ʻi heʻetau ngāue kia Sihová.

ʻAʻEVA “ʻI HE TUʻUNGA KO E FĀNAU ʻO E MĀMÁ”

13. ʻOku ʻuhinga ki he hā ʻa e “hokohoko atu ʻa e ʻaʻeva ʻi he tuʻunga ko e fānau ʻo e māmá”? (ʻEfesō 5:​7-9)

¹³ Naʻe fakalototoʻaʻi ʻe Paula ʻa e kau Kalisitiane ʻi ʻEfesoó ke ʻikai ngata pē ʻenau hokohoko atu ke nau talitekeʻi ʻa e fakapoʻulí ka ke toe “hokohoko atu ʻa e ʻaʻeva ʻi he tuʻunga ko e fānau ʻo e māmá.” (Lau ʻa e ʻEfesō 5:​7-9.) ʻOku ʻuhinga ia ki he hā? Ko hono ʻai mahinó, ʻoku ʻuhingá ke tau tōʻonga ʻo hangē ko e kau Kalisitiane moʻoni ʻi he taimi kotoa pē. Ko e founga ʻe taha ke aʻusia ai ʻa e taumuʻa ko ení ko hono lau mo ako tōtōivi ʻa e Tohi Tapú fakataha mo ʻetau ʻū tohi Fakatohitapú. ʻOku tautefito ʻa e mahuʻinga ke tokanga fakamātoato ki he faʻifaʻitakiʻanga mo e ngaahi akonaki ʻa Sīsū Kalaisí, “ko e maama ʻo e māmaní.”—Sione 8:12; Pal. 6:23.

14. ʻE lava fēfē ke tokoniʻi kitautolu ʻe he laumālie māʻoniʻoní?

 ¹⁴ ʻOku tau toe fiemaʻu ʻa e tokoni ʻa e laumālie māʻoniʻoni ʻo e ʻOtuá koeʻuhí ke lava ke tau hanganaki tōʻonga ʻo hangē “ko e fānau ʻo e māmá.” Ko e hā hono ʻuhingá? Koeʻuhí ko ha pole moʻoni ia ke nofoʻaki maʻa ʻi he māmani taʻetaau ko ení. (1 Tes. 4:​3-5, 7, 8) Ko e laumālie māʻoniʻoní ʻe lava ke ne tokoniʻi kitautolu ke tauʻi ʻa e fakakaukau ʻa e māmaní, ʻo kau ai ʻa hono ngaahi filōsofia mo e vakai ʻoku fepaki mo e fakakaukau ʻa e ʻOtuá. ʻE lava ke toe tokoniʻi kitautolu ʻe he laumālie māʻoniʻoní ke fakatupulekina “ʻa e faʻahinga kotoa pē ʻo e leleí mo e māʻoniʻoní.”—ʻEf. 5:9.

15. ʻI he ngaahi founga fē ʻe lava ke tau maʻu ai ʻa e laumālie māʻoniʻoní? (ʻEfesō 5:​19, 20)

¹⁵ Ko e founga ʻe taha ʻe lava ke tau maʻu ai ʻa e laumālie māʻoniʻoní ko e lotu fekauʻaki mo ia. Naʻe pehē ʻe Sīsū ko Sihova te ne “foaki ʻa e laumālie māʻoniʻoní ki he faʻahinga ʻoku kole kiate iá.” (Luke 11:13) Pea ʻi heʻetau fakahīkihikiʻi fakataha ʻa Sihova ʻi he ngaahi fakatahá, ʻoku tau toe maʻu ai ʻa e laumālie māʻoniʻoní. (Lau ʻa e ʻEfesō 5:​19, 20.) Ko e tākiekina lelei ʻa e laumālie māʻoniʻoni ʻo e ʻOtuá te ne tokoniʻi kitautolu ke moʻui ʻi ha founga ʻoku fakahōifua ki he ʻOtuá.

16. Ko e hā te ne tokoniʻi kitautolu ke fai ʻa e ngaahi fili fakapotopotó? (ʻEfesō 5:​10, 17)

¹⁶ ʻI he taimi ʻoku ʻai ai ke tau fai ha fili mahuʻinga, ʻoku fiemaʻu ke tau ʻiloʻi “ʻa e meʻa ʻoku finangalo ki ai ʻa Sihová” pea ngāue leva ʻo fehoanaki mo ia. (Lau ʻa e ʻEfesō 5:​10, 17.) ʻI hono ʻiloʻi ʻa e ngaahi tefitoʻi moʻoni Fakatohitapu ʻoku kaunga ki hotau tuʻungá, ʻoku tau kumi moʻoni ai ki he fakakaukau ʻa e ʻOtuá ki he tuʻungá. Pea ʻi heʻetau ngāueʻaki ʻene ngaahi tefitoʻi moʻoní, ʻoku ngalingali ange te tau fai ʻa e ngaahi fili lelei.

17. Ko e hā ʻoku kaunga ki hono ngāueʻaki fakapotopoto hotau taimí? (ʻEfesō 5:​15, 16) (Sio foki ki he fakatātaá.)

¹⁷ Naʻe toe faleʻi ʻa Paula ki he kau Kalisitiane ʻEfesoó ke nau ngāueʻaki fakapotopoto honau taimí. (Lau ʻa e ʻEfesō 5:​15, 16.) Ko e “tokotaha fulikivanú,” ʻa hotau filí ʻa Sētane, te ne saiʻia ke ʻai kitautolu ke tau mātuʻaki femoʻuekina ʻi he ngaahi ngāue ʻo e māmani ko ení  ʻo ʻikai ai hatau taimi ki heʻetau ngāue ki he ʻOtuá. (1 Sio. 5:19) ʻE mātuʻaki faingofua ai ki ha Kalisitiane ke fakamuʻomuʻa ʻa e ngaahi koloa fakamatelié, ako fakamāmaní pe ko ʻene ngāué ʻi he ngaahi faingamālie ke ngāue kia Sihová. Kapau ʻe hoko ia, ʻe fakahaaʻi ai ʻoku tākiekina ia ʻe he fakakaukau ʻa e māmaní. Ko e moʻoni, ko e ngaahi meʻa ko ení ʻoku ʻikai ke hala ʻiate ia pē, ka ʻoku totonu ke ʻoua ʻaupito ʻe fakamuʻomuʻa ia ʻi heʻetau moʻuí. Ke ʻaʻeva ʻo hangē “ko e fānau ʻo e māmá,” ʻoku fiemaʻu ke tau “ngāue lelei taha ʻaki [hotau] taimí,” ʻo tokangataha ki he meʻa ʻoku mahuʻinga moʻoní.

18. Ko e hā ʻa e ngaahi sitepu naʻe fou ai ʻa Donald ke ngāue lelei taha ʻaki hono taimí?

¹⁸ Tokanga ki ha faingamālie pē ke ngāue ʻo toe kakato ange ai kia Sihova. Ko e meʻa eni naʻe fai ʻe Donald, ʻokú ne nofo ʻi ʻAfilika Tonga. ʻOkú ne pehē: “Naʻá ku vakai ki hoku tuʻungá pea hū tōtōaki kia Sihova ke tokoniʻi au ke hoko ʻo ola lelei ange ʻi he ngāue fakafaifekaú. Naʻá ku lotu ke maʻu ha ngāue ʻe fakaʻatā ai au ke maʻu ha taimi lahi ange ke malanga. ʻI he tokoni ʻa Sihová, naʻá ku maʻu ha ngāue feʻungamālie. Naʻá ku kamata fakataha leva ai mo hoku uaifí ʻi he ngāue taimi-kakató.”

19. ʻE lava fēfē ke tau hokohoko atu ke ʻaʻeva “ʻi he tuʻunga ko e fānau ʻo e māmá”?

¹⁹ Ko e tohi ʻa Paula ki he kau ʻEfesoó kuo pau pē naʻá ne tokoniʻi moʻoni kinautolu ʻi honau ʻalunga faka-Kalisitiané. Pea ko e faleʻi fakamānavaʻi ko iá ʻe lava foki ke ne tokoniʻi kitautolu. Hangē ko ia naʻa tau ako ki aí, ʻe lava ke ne tokoniʻi kitautolu ʻi hono fili fakapotopoto ʻetau fakafiefiá mo ʻetau feohí. ʻE lava ke ueʻi ai kitautolu ke hokohoko atu ʻetau nōfoʻi ʻi he maama ʻo e moʻoní ʻaki hono maʻu ha polokalama ako Tohi Tapu tuʻumaʻu. Pea ʻoku fakamamafaʻi ai ʻa e mahuʻinga ʻo e laumālie māʻoniʻoní, ʻa ia ʻe lava ke ne fakatupulekina ʻa e ngaahi ʻulungaanga lelei ʻiate kitautolu. ʻI hono ngāueʻaki ʻa e meʻa naʻe hiki ʻe Paulá ʻe lava ke ne tokoniʻi kitautolu ke fai ʻa e ngaahi fili fakapotopoto, ko ha ngaahi fili ʻoku fehoanaki mo e fakakaukau ʻa Sihová. ʻI hono fai ʻa e ngaahi meʻá ni, ʻe malava ai ke tau fakaʻehiʻehi mei he koto fakapoʻuli ʻo e māmani ko ení pea nofo maʻu ʻi he māmá!