ʻE lava ke fakamolemoleʻi ʻetau ngaahi angahalá ʻo fakafou pē ʻi he feilaulau huhuʻi naʻe totongi ʻe Sīsū ʻaki hono taʻataʻá. (ʻEf. 1:7) Neongo ia, ʻoku pehē ʻe he Tohi Tapú: “Ko e ʻOtuá ʻi heʻene anga-kātakí naʻá ne fakamolemoleʻi ʻa e ngaahi angahala naʻe hoko ʻi he kuohilí,” ʻa ia, ki muʻa ke tokonaki ʻe Sīsū ʻa e huhuʻí. (Loma 3:​25, fkm. ʻi lalo) ʻE lava fēfē ke fai eni ʻe Sihova pea ʻi he taimi tatau ʻokú ne tauhi maʻu ʻene tuʻunga haohaoa ʻo e fakamaau totonú?

Mei he vakai ʻa Sihová, ko e huhuʻí naʻe ʻosi totongi ia ʻi he mōmeniti pē naʻá ne fili ai ke tokonaki ha “hakó” ʻa ia te ne fakahaofi ʻa e faʻahinga ʻo e tangata ʻoku tuí. (Sēn. 3:15; 22:18) Naʻe fakapapauʻi moʻoni ʻe he ʻOtuá ʻi hono taimi kotofá ko hono ʻAlo tofu-pē-taha-ne-fakatupú te ne loto-lelei ke tokonaki ʻa e huhuʻí. (Kal. 4:4; Hep. 10:​7-10) ʻI he ʻi māmani ʻa Sīsū ko e fakafofonga ʻo e ʻOtuá, naʻá ne maʻu ʻa e mafai ke fakamolemoleʻi ʻa e ngaahi angahalá ki muʻa ke ʻoatu ʻa e huhuʻí. Naʻá ne fai ia ʻaki hono ngāueʻaki ʻa e mahuʻinga ʻo ʻene feilaulau ʻi he kahaʻú ki he kakai naʻa nau tuí.—Māt. 9:​2-6.