1. Ko e hā ʻa e ongoʻi ʻoku fāinga nai mo e kau sevāniti faitōnunga ʻe niʻihi ʻa Sihová?

 HE FAKAFIEMĀLIE ē ke ʻiloʻi ʻoku hōifua ʻa Sihova ki heʻene kakaí ʻi he tuʻunga ko ha kulupu! ʻOku pehē ʻe he Tohi Tapú: “ʻOku leleiʻia ʻa Sihova ʻi hono kakaí.” (Saame 149:4) Kae kehe, ʻi he taimi ʻe niʻihi, ʻoku mātuʻaki loto-siʻi ʻa e niʻihi ʻo nau fifili nai, ‘ʻOku hōifua mai ʻa Sihova kiate au fakafoʻituitui?’ Ko e tokolahi ʻo e kau lotu faitōnunga ʻa Sihova ʻi he taimi ʻo e Tohi Tapú naʻe ʻi ai ʻa e taimi naʻa nau fāinga ai mo e ngaahi fakakaukau peheé.—1 Sām. 1:​6-10; Siope 29:​2, 4; Saame 51:11.

2. Ko hai ʻokú ne maʻu ʻa e hōifua ʻa Sihová?

² ʻOku fakahaaʻi māʻalaʻala ʻe he Tohi Tapú ko e faʻahinga taʻehaohaoa ʻo e tangatá ʻe lava ke nau maʻu ʻa e hōifua ʻa Sihová. Anga-fēfē? Kuo pau ke tau ngāueʻi ʻa e tui kia Sīsū Kalaisi pea hoko ʻo papitaiso. (Sione 3:16) ʻOku tau talaki fakahāhā ai kuo tau fakatomala ʻi heʻetau ngaahi angahalá pea fai ha palōmesi ki he ʻOtuá ke fai ʻa hono finangaló. (Ngā. 2:38; 3:19) ʻOku fiefia ʻa Sihova ʻi heʻetau fou ʻi he ngaahi sitepu ko ení ke fakatupulekina ha vahaʻangatae mo ia. Kapau te tau hokohoko atu ai pē ke fai hotau lelei tahá ke moʻui ʻo fakatatau ki heʻetau fuakava ʻo e fakatapuí, ʻoku hōifua mai ai ʻa Sihova pea lau kitautolu ko hono ngaahi kaumeʻa ofi.—Saame 25:14.

3. Ko e hā te tau lāulea ki ai ʻi he taimi ní?

³ Neongo ia, ko e hā ʻoku faʻa ongoʻi nai ai ʻe he niʻihi ʻoku ʻikai ke hōifua mai ʻa e ʻOtuá kiate kinautolu? ʻOku anga-fēfē hono fakahāhā mai ʻe Sihova ʻene hōifuá? Pea ʻe lava fēfē ke fakaivimālohiʻi ʻe ha Kalisitiane ʻene tuipau ʻokú ne maʻu ʻa e hōifua ʻa e ʻOtuá?

 ʻUHINGA ʻOKU ONGOʻI NAI AI ʻE HE NIʻIHI ʻOKU ʻIKAI HŌIFUA MAI ʻA SIHOVA KIATE KINAUTOLÚ

4-5. Neongo ʻa e ngaahi ongoʻi ʻoku ʻikai hatau mahuʻingá, ko e hā ʻe lava ke tau fakapapauʻí?

⁴ Ko e tokolahi ʻo kitautolu kuo tau faitau mo e ngaahi ongoʻi ʻo e ʻikai hatau mahuʻinga talu mei he kei siʻí. (Saame 88:15) Ko ha tokoua ko Adrián ʻokú ne pehē: “Kuó u ongoʻi maʻu pē ʻoku ʻikai haku mahuʻinga. ʻI heʻeku tupu haké, ʻoku ou manatuʻi ʻeku lotu ke aʻu hoku fāmilí ki he Palataisí, neongo naʻá ku fakapapauʻi naʻe ʻikai ke u taau feʻunga ke ʻi ai.” Ko Tony, naʻe ʻikai ke tupu hake ʻi ha ʻapi Kalisitiane, ʻokú ne pehē: “Naʻe ʻikai ʻaupito ke tala mai ʻe heʻeku ongo mātuʻá naʻá na ʻofa pe laukauʻaki au. Naʻe ʻai heni ke u ongoʻi heʻikai pē ke u lava ʻo fakahōhōʻiaʻi kinaua.”

⁵ Kapau ʻoku tau fāinga ʻi he taimi ʻe niʻihi mo e ongoʻi ʻoku ʻikai hatau mahuʻingá, ʻe lava ke tau manatuʻi naʻe tohoaki mai ʻe Sihova kitautolu kiate ia ʻi he founga pē ʻaʻana. (Sione 6:44) ʻOkú ne sio ki he lelei ʻiate kitautolu ʻa ia ʻoku ʻikai nai ke tau sio ki ai, pea ʻokú ne ʻafioʻi ʻa hotau lotó. (1 Sām. 16:7; 2 Kal. 6:30) Ko ia ʻe lava ke tau falala kiate ia ʻi heʻene pehē ʻoku tau mahuʻingá.—1 Sio. 3:​19, 20.

6. Naʻe anga-fēfē ongoʻi ʻa e ʻapositolo ko Paulá fekauʻaki mo ʻene ngaahi angahala ʻi he kuohilí?

⁶ Ki muʻa ke ako ʻa e moʻoní, ko e niʻihi ʻo kitautolu naʻa tau fai ha ngaahi meʻa ʻokú ne kei ʻai nai ai kitautolu ke tau ongoʻi halaia. (1 Pita 4:3) Naʻa mo e kau Kalisitiane faitōnungá ʻoku nau faitau mo e ngaahi hehema angahalaʻiá. ʻOku fakahalaiaʻi koe ʻe ho lotó? Kapau ko ia, maʻu ʻa e fiemālie ʻi hono ʻiloʻi ko e kau sevāniti faitōnunga ʻa Sihová kuo nau fāinga mo e ngaahi ongoʻi pehē. Ko e fakatātaá, ko e ʻapositolo ko Paulá naʻá ne ongoʻi fakaʻofaʻia ʻiate ia pē ʻi heʻene fakakaukauloto atu ki heʻene ngaahi taʻehaohaoá. (Loma 7:24) Ko e moʻoni, naʻe ʻosi fakatomala ʻa Paula ʻi heʻene ngaahi angahalá pea hoko ʻo papitaiso. Neongo ia, naʻá ne lave kiate ia tonu “ko e siʻi taha . . . ʻi he kau ʻapositoló” pea ko e “tuʻu-ki-muʻa” ia ʻi he kau angahalá.—1 Kol. 15:9; 1 Tīm. 1:15.

7. Ko e hā ʻoku totonu ke tau manatuʻi fekauʻaki mo ʻetau ngaahi angahala ʻi he kuohilí?

⁷ ʻOku talaʻofa mai ʻe heʻetau Tamai fakahēvaní te ne fakamolemoleʻi kitautolu kapau ʻoku tau fakatomala. (Saame 86:5) Ko ia kapau ʻoku tau fakatomala moʻoni ʻi he ngaahi angahala kuo tau fakahokó, ʻe lava ke tau falala ki he lea ʻa Sihová—kuó ne fakamolemoleʻi kitautolu.—Kol. 2:13.

8-9. ʻE lava ke tau ikuʻi ʻa e ongoʻi heʻikai ʻaupito feʻunga ʻa e meʻa ʻoku tau fai ke fakahōifuaʻi ʻa Sihová?

⁸ ʻOku tau loto kotoa ke tauhi kia Sihova ʻi he kakato taha ʻe ala lavá. Kae kehe, ʻoku ongoʻi ʻe he niʻihi heʻikai ʻaupito feʻunga ʻa e meʻa ʻoku nau faí ke maʻu ai ʻene hōifuá. Ko ha tuofefine ko Amanda ʻokú ne pehē: “ʻOku ou hehema ke fakatatau ʻeku foaki kia Sihova hoku lelei tahá mo e fiemaʻu hokohoko ke u fai ha meʻa lahi ange. ʻOku ou faʻa ʻamanekina ʻa e meʻa lahi ange meiate au ʻi he meʻa ʻoku lava ke u foakí. ʻI heʻeku ‘taʻelavameʻá,’ ʻoku ou fakahuʻunga ʻoku loto-mamahi ʻa Sihova ʻiate au ʻo hangē pē ko ʻeku loto-mamahi ʻiate aú.”

⁹ ʻE lava fēfē ke tau ikuʻi ʻa e ongoʻi heʻikai ʻaupito feʻunga ʻa e meʻa ʻoku tau faí ke fakahōifuaʻi ʻa Sihová? Manatuʻi ko Sihová ʻoku ʻikai ke ne anga-fefeka pea ʻokú ne ngaofengofua. ʻOku ʻikai ʻaupito ke ne kounaʻi ha meʻa lahi ange meiate kitautolu ʻi he meʻa ʻe malava ke tau faí. ʻOkú ne houngaʻia ʻi ha meʻa pē ʻoku tau fai maʻana ʻo kapau pē ʻoku tau fai hotau lelei tahá. Pehē foki, fakakaukauloto ki he faʻifaʻitakiʻanga ʻa e faʻahinga ʻi he Tohi Tapú naʻa nau tauhi loto-kakato kia Sihova. Fakakaukau kia Paula. Naʻá ne ngāue tōtōivi ʻi he laui taʻu, ʻo fononga ʻi he ngaahi maile ʻe laui afe pea fokotuʻu ʻa e ngaahi fakatahaʻanga lahi. Neongo ia, ʻi hono fakangatangata ʻe hono tuʻungá ʻene kau ʻi he ngāue fakamalangá, naʻe mole ʻa e hōifua ʻa e ʻOtuá meiate ia? ʻIkai. Naʻe hokohoko atu ʻene  fai ʻa e meʻa naʻá ne malavá, pea naʻe tāpuakiʻi ia ʻe Sihova. (Ngā. 28:​30, 31) ʻI he tuʻunga meimei tatau, ko e meʻa ʻe lava ke tau foaki kia Sihová ʻe kehekehe nai ʻi he taimi ʻe niʻihi. Ka ko e meʻa ʻoku mahuʻinga kiate iá ko e ʻuhinga ʻoku tau fai ai iá. Tau lāulea angé he taimí ni ki he ngaahi founga ʻe niʻihi ʻoku fakahāhā mai ai ʻe Sihova ʻene hōifuá kiate kitautolu.

ʻOKU ANGA-FĒFĒ HONO FAKAHĀHĀ MAI ʻE SIHOVA ʻENE HŌIFUÁ?

10. ʻE lava fēfē ke tau “fanongo” kia Sihova ʻi heʻene fakahāhā mai ʻene hōifua kiate kitautolú? (Sione 16:27)

¹⁰ Fakafou ʻi he Tohi Tapú. ʻOku saiʻia ʻa Sihova ke fakahāhā ʻa e hōifua loto-māfaná ki he faʻahinga ʻokú ne ʻofa aí. ʻOku lave ʻa e Folofolá ki ha taimi ʻe ua naʻá Ne tala ange ai kia Sīsū ko ia ʻa hono ʻAlo ʻofeina kuó ne hōifua aí. (Māt. 3:17; 17:5) Te ke saiʻia ke fanongo ki hono fakapapauʻi atu ʻe Sihova kiate koe ʻene hōifuá? ʻOku ʻikai ke lea fakahangatonu mai ʻa Sihova kiate kitautolu, ka ʻokú ne lea mai fakafou ʻi he ngaahi peesi ʻo ʻene Folofolá. ʻOku lava ke tau “fanongo” ki he leʻo ʻo e hōifua ʻa Sihová ʻi heʻetau lau ʻa e ngaahi lea ʻa Sīsū ʻi he Ngaahi Kōsipelí. (Lau ʻa e Sione 16:27.) Naʻe tapua haohaoa mai ʻe Sīsū ʻa e ʻulungaanga ʻene Tamaí. Ko ia ʻi heʻetau lau fekauʻaki mo hono fakahāhā ʻe Sīsū ʻene leleiʻia ʻi hono kau muimui taʻehaohaoa kae faitōnungá, ʻe lava ke tau sioloto atu kia Sihova ʻokú ne lea mai ʻaki ʻa e ngaahi lea ko iá kiate kitautolu.—Sione 15:​9, 15.

11. Ko e hā ʻoku ʻikai ʻuhinga ai ʻetau hokosia ʻa e ngaahi faingataʻá kuo mole meiate kitautolu ʻa e hōifua ʻa Sihová? (Sēmisi 1:12)

¹¹ Fakafou ʻi heʻene ngaahi ngāué. ʻOku vēkeveke ʻa Sihova ke tokoniʻi kitautolu, hangē ko hono tokonaki mai ʻetau ngaahi fiemaʻu fakamatelié. ʻI he taimi ʻe niʻihi, ʻe fakaʻatā nai kitautolu ʻe Sihova ke tau tofanga ʻi he ngaahi faingataʻá, ʻo hangē ko e māʻoniʻoni ko Siopé. (Siope 1:​8-11) ʻOku ʻikai ʻuhinga ʻa e ngaahi ʻahiʻahí kuo mole meiate kitautolu ʻa e hōifua ʻa e ʻOtuá. ʻI hono kehé, ʻoku tokonaki mai ai ʻa e faingamālie ke fakamoʻoniʻi ʻa e loloto ʻetau ʻofa ki he ʻOtuá pea mo ʻetau falala kiate iá. (Lau ʻa e Sēmisi 1:12.) Te tau hokosia ʻene tokanga anga-ʻofá mo e poupoú ʻi heʻene tokoniʻi kitautolu ke kātekiná.

12. Ko e hā ʻe lava ke tau ako mei he hokosia ʻa Dmitrii?

¹² Fakakaukau ki ha tokoua ʻi ʻĒsia ko Dmitrii. Naʻe mole ʻene ngāué pea ʻikai lava ke ne maʻu ha ngāue ʻi ha ngaahi māhina lahi. Ko ia naʻá ne fili ke fakalahi ʻene kau ʻi he ngāue fakafaifekaú, ʻo fakahaaʻi ai ʻene falala kia Sihová. Naʻe ʻosi atu ʻa e ngaahi māhina mo e ʻikai pē ke ne maʻu ha ngāue. Pea naʻá ne puke lahi ʻo aʻu ki ha tuʻunga naʻá ne toka mohenga. Naʻe kamata ke ne veiveiua ʻi hono mahuʻinga ko ha husepāniti mo e  tamaí, pea naʻá ne fifili pe kuo mole ʻa e hōifua ʻa Sihová meiate ia. Pea ʻi he efiafi ʻe taha naʻe pulusi ʻe hono ʻofefiné ʻi ha lauʻi pepa ʻa e lea ʻi he ʻAisea 30:15: “Ko hoʻomou mālohí ʻe hoko ia ʻi hoʻomou hanganaki nonga mo fakahāhā ʻa e falalá.” Naʻá ne ʻoatu ia ki hono veʻe mohengá pea tala ange, “Teti, ʻi hoʻo ongoʻi mamahí, ʻe lava ke ke manatuʻi ʻa e veesi ko ení.” Naʻe ʻiloʻi ai ʻe Dmitrii, ko e tokoni ʻa Sihová, naʻe kei maʻu ai ʻe hono fāmilí ʻa e meʻakai feʻunga, vala pea mo e nofoʻanga. “Ko e meʻa naʻe fiemaʻu ke u faí,” ko ʻene leá ia, “ko e hanganaki nonga pea hokohoko atu ʻa e falala ki hoku ʻOtuá.” Kapau ʻokú ke fehangahangai mo ha ʻahiʻahi meimei tatau, ʻe lava ke ke falala ʻoku tokanga mai ʻa Sihova kiate koe pea te ne tokoniʻi koe ke kātaki.

13. Ko hai nai ʻoku ngāueʻaki ʻe Sihova ke fakahāhā mai ai ʻene hōifua kiate kitautolú, pea anga-fēfē?

¹³ Fakafou ʻi he kaungālotú. ʻOku ngāueʻaki ʻe Sihova hotau fanga tokouá mo e fanga tuofāfiné ke fakahāhā mai ai ʻene hōifuá. Ko e fakatātaá, te ne ueʻi nai ʻa e niʻihi kehé ke leaʻaki ʻa e ngaahi lea fakalototoʻa ʻi he taimi totonu. Naʻe hokosia eni ʻe ha tuofefine ʻi ʻĒsia lolotonga ha taimi mātuʻaki fakalotomafasia. Naʻe mole ʻene ngāué peá ne puke lahi. Pea naʻe fai ʻe hono husepānití ha angahala mamafa pea fakahifo ai mei he mātuʻá. “Naʻe ʻikai lava ke u mahinoʻi ʻa e ʻuhinga naʻe hoko ai ʻa e meʻá ni,” ko ʻene leá ia. “Naʻá ku fakakaukau mahalo naʻá ku fai ha fehālaaki pea mole ai ʻa e hōifua ʻa Sihová.” Naʻe kōlenga ʻe hotau tuofefiné kia Sihova ke fakapapauʻi ange kiate ia ʻene hōifuá. Naʻe anga-fēfē ʻene fai Iá? ʻOkú ne pehē, “Naʻá ku talanoa mo e kau mātuʻa ʻi he fakatahaʻangá pea nau fakapapauʻi mai kiate au ʻa e ʻofa ʻa Sihová.” Ki mui ai naʻá ne toe kole tokoni kia Sihova. ʻOkú ne pehē, “ʻI he ʻaho tatau pē naʻá ku maʻu ha tohi mei ha kulupu ʻo e fanga tokoua ʻi he fakatahaʻangá. ʻI heʻeku lau ʻenau ngaahi lea fakafiemālié, naʻá ku ongoʻi naʻe fanongo mai ʻa Sihova kiate au.” ʻIo, ʻoku faʻa fakahāhā mai  ʻe Sihova ʻene hōifuá fakafou ʻi he ngaahi lea anga-ʻofa ʻa e niʻihi kehé.—Saame 10:17.

14. Ko e hā ha toe founga ʻoku fakahāhā mai ai ʻe Sihova ʻene hōifuá?

¹⁴ ʻOku toe fakahāhā mai ʻe Sihova ʻene hōifuá ʻaki ʻene ngāueʻaki ʻa e kaungātuí ke ʻomai ʻa e akonaki ʻi he taimi ʻoku tau fiemaʻu aí. Ko e fakatātaá, ʻi he ʻuluaki senitulí, naʻe ngāueʻaki ʻe Sihova ʻa e ʻapositolo ko Paulá ke hiki ʻa e ngaahi tohi fakamānavaʻi ʻe 14 ki he kaungātuí. Naʻe fakakau ʻi he ngaahi tohi ko iá ʻa e akonaki hangatonu kae anga-ʻofa. Ko e hā naʻe fakamānavaʻi ai ʻe Sihova ʻa Paula ke hiki ha akonaki peheé? Ko Sihova ko ha Tamai lelei, pea ʻokú ne akonakiʻi ʻene fānaú ʻa ia “ʻokú ne ʻofa ai.” (Pal. 3:​11, 12) Ko ia kapau ʻoku tau maʻu ha akonaki makatuʻunga ʻi he Tohi Tapú, ʻe lava ke tau vakai ki ai ko ha fakamoʻoni ʻoku tau maʻu ʻa e hōifua ʻa e ʻOtuá, kae ʻikai ʻuhinga iá kuo mole ʻene hōifuá meiate kitautolu. (Hep. 12:6) Ko e hā ʻa e ngaahi fakamoʻoni kehe ʻoku fakahaaʻi ai ʻoku tau maʻu ʻa e hōifua ʻa Sihová?

FAKAMOʻONI KEHE ʻOKU HŌIFUA MAI ʻA SIHOVA KIATE KITAUTOLU

15. Ko hai ʻoku foaki ki ai ʻe Sihova hono laumālie māʻoniʻoní, pea ko e hā ʻoku tau maʻu ai ʻa e tuipau mei hení?

¹⁵ ʻOku foaki ʻe Sihova ʻa hono laumālie māʻoniʻoní ki he faʻahinga ʻokú ne hōifua aí. (Māt. 12:18) ʻE lava ke tau ʻeke hifo, ‘Kuó u malava ke fakahāhā ʻa e tafaʻaki ʻe niʻihi ʻo e fua ʻo e laumālie ʻo e ʻOtuá ʻi heʻeku moʻuí?’ ʻOkú ke fakatokangaʻi ʻokú ke kātaki lahi ange ki he niʻihi kehé ʻi he taimí ni ʻi he ki muʻa ke ke hoko ʻo ʻiloʻi ʻa Sihová? Ko e moʻoni, ko e lahi ange hoʻo ako ke fakahāhā ʻa e fua ʻo e laumālie ʻo e ʻOtuá, ko e hā mahino ange ia kiate koe ʻokú ke maʻu ʻa e hōifua ʻa Sihová!—Sio ki he puha “ Ko e Fua ʻo e Laumālié ko e . . . ”

16. Ko hai ʻoku ngāueʻaki ʻe Sihova ke malangaʻi ʻa e ongoongo leleí, pea ʻoku anga-fēfē hoʻo ongoʻi fekauʻaki mo iá? (1 Tesalonaika 2:4)

¹⁶ ʻOku fiefia ʻa Sihova ke tuku atu ʻa e ongoongo leleí ki he faʻahinga ʻokú ne hōifua aí. (Lau ʻa e 1 Tesalonaika 2:4.) Fakatokangaʻi ʻa e maʻu ʻaonga ha tuofefine ko Jocelyn mei hono vahevahe atu ʻa e ongoongo leleí ki he niʻihi kehé. ʻI he ʻaho ʻe taha, naʻe ʻā hake ʻa Jocelyn ʻokú ne ongoʻi loto-mafasia. “Naʻá ku ongoʻi ʻo hangē naʻe ʻikai ʻaupito ha meʻa ke u foaki atu,” ko ʻene leá ia. “Ka naʻá ku tāimuʻa, pea ko hoku ʻaho malangá ia. Ko ia naʻá ku fai ha lotu peá u ʻalu ʻi he malangá.” ʻI he pongipongi ko iá naʻe fetaulaki ʻa Jocelyn mo Mary, ko ha fefine anga-lelei naʻá ne tali ha ako Tohi Tapu. ʻI ha ngaahi māhina ki mui ai naʻe tala ange ʻe Mary naʻá ne lotu ki he ʻOtuá ki ha tokoni ʻi he taimi naʻe tukituki ange ai ʻa Jocelyn ʻi hono matapaá.  ʻI he fakakaukauloto ki he hokosia ko ení, ʻoku pehē ʻe Jocelyn, “Naʻá ku ongoʻi ʻo hangē naʻe tala mai ʻe Sihova, ‘ʻOku ou hōifua ʻiate koe.’” Ko e moʻoni, heʻikai ke tali lelei ʻe he tokotaha kotoa ʻetau ngāue fakamalangá. Ka ʻe lava ke tau fakapapauʻi ʻoku hōifua mai ʻa Sihova ʻi heʻetau feinga ke fai hotau lelei tahá ke vahevahe atu ʻa e ongoongo leleí ki he niʻihi kehé.

17. Ko e hā ʻokú ke ako mei he fakamatala ʻa Vicky fekauʻaki mo e huhuʻí? (Saame 5:12)

¹⁷ ʻOku ngāueʻaki ʻe Sihova ʻa e mahuʻinga ʻo e huhuʻí ki he faʻahinga ʻokú ne hōifua aí. (1 Tīm. 2:​5, 6) Kae fēfē kapau ʻoku talitekeʻi ʻe hotau lotó ʻa e foʻi fakakaukau ʻoku hōifua mai ʻa Sihova kiate kitautolu, neongo ʻoku tau tui ki he huhuʻí pea ʻosi papitaiso? Manatuʻi, heʻikai lava ke tau falala maʻu pē ki heʻetau ngaahi ongoʻí, ka ʻe lava ke tau falala kia Sihova. ʻOkú ne lau ʻa e faʻahinga ʻoku nau maʻu ʻa e tui ki he huhuʻí ʻoku nau māʻoniʻoni ʻi heʻene vakaí pea talaʻofa ke tāpuakiʻi kinautolu. (Lau ʻa e Saame 5:12; Loma 3:26) Ko e fakalaulauloto ki he huhuʻí naʻá ne tokoniʻi ʻa Vicky. ʻI he ʻaho ʻe taha, hili ʻene fakakaukau loloto ki he huhuʻí, naʻá ne ʻiloʻi: “Kuo fuoloa ʻa e anga-kātaki mai ʻa Sihova kiate au. . . . Neongo ia, naʻe hangē ia naʻá ku pehē ange kiate ia: ‘Ko hoʻo ʻofá ʻoku ʻikai ke lahi feʻunga ke aʻu mai kiate au. Ko e feilaulau ho ʻAló ʻoku ʻikai feʻunga ia ke ne ʻufiʻufi ʻeku angahalá.’” ʻI he fakalaulauloto ki he meʻaʻofa ko eni ʻo e huhuʻí, naʻe kamata ke ne ongoʻi ʻoku ʻofaʻi ia ʻe Sihova. Ko kitautolu foki te tau ongoʻi ʻoku ʻofaʻi kitautolu ʻe Sihova pea ongoʻi ʻene hōifuá ʻi heʻetau fakakaukauloto ki he huhuʻí.

18. Ko e hā ʻe lava ke tau tuipau ki ai kapau ʻe hokohoko atu ʻetau ʻofa ki heʻetau Tamai fakahēvaní?

¹⁸ Neongo te tau feinga mālohi nai ke ngāueʻaki ʻa e ngaahi fokotuʻu ʻi ʻolungá, te tau ongoʻi loto-siʻi nai ʻi he taimi ʻe niʻihi pea fifili pe ʻoku tau maʻu ʻa e hōifua ʻa Sihová. Kapau ʻoku hoko ia, manatuʻi ʻokú ne hōifua ʻi he “faʻahinga ʻoku hokohoko atu ʻenau ʻofa kiate Iá.” (Sēm. 1:12) Ko ia hokohoko atu ke ʻunuʻunu ofi kia Sihova pea fakatokangaʻi ʻa e founga ʻokú ne fakahāhā atu ai ʻene hōifuá. Manatuʻi maʻu pē ko Sihova “ʻoku ʻikai te ne mamaʻo mei ha taha ʻo kitautolu.”—Ngā. 17:27.