NA‘E tomu‘a tala ‘e Sīsū ‘e fiefia ‘a hono kau muimuí ‘i ha utu-ta‘u lahi ‘i he taimi ko eni ‘o e ngata‘angá. (Māt. 9:37; 24:14) Fakakaukau angé ki hono fakamo‘oni‘i ‘a e hoko ‘a ‘ene lea ko ení ‘i ha founga makehe ‘i ha feitu‘u ko Transcarpathia, ‘i ‘Iukalaine. ‘I he lotolotonga ‘o e ngaahi kolo kaungā‘api pē ‘e tolu ‘i he feitu‘u ko iá, ‘oku ‘i ai ‘a e fakataha‘anga ‘e 50 mo e kau malanga ‘e toko 5,400 tupu. * Ko e mo‘oni, ko e toko 1 mei he kakai ‘e toko 4 ‘o e tokolahi fakakātoa ‘o e kolo ‘e tolu ko ení ko e taha ia ‘o e Kau Fakamo‘oni ‘a Sihová!

‘Oku fēfē ‘a e feitu‘u ngāue fakamalangá? “‘Oku faka‘apa‘apa‘i ‘e he kakai ‘i hení ‘a e Tohi Tapú, fakamahu‘inga‘i ‘a e fakamaau totonú, ma‘u ‘a e ngaahi ha‘i fakafāmili mālohi, pea feinga loto-mo‘oni ke fetokoni‘aki,” ko e lau ia ‘a ha tokoua ‘i he feitu‘ú ko Vasile. ‘Okú ne toe pehē: “‘Oku ‘ikai ma‘u pē ke nau loto-tatau mo ‘etau tuí. Ka ‘i he taimi ‘okú ke fakahaa‘i ange ai kiate kinautolu ha me‘a mei he Tohi Tapú, ‘oku nau fanongo tokanga.”

Ko e mo‘oni, ‘oku fehangahangai hotau fanga tokouá mo e fanga tuofāfiné mo ha ngaahi pole anga-kehe ‘i he‘enau malanga ‘i ha feitu‘u ‘oku mā‘olunga ai ‘a e ‘avalisi ‘o e kau malangá ‘i he tokolahi ‘o e kakaí. Ko e fakatātaá, ko e fakataha‘anga ‘e taha ‘oku ‘i ai ‘a e kau malanga ‘e toko 134 ka ko e ngaahi ‘api tāutaha pē ‘e 50 ‘oku ‘i hono feitu‘u ngāué! ‘Oku anga-fēfē ‘a e fe‘unu‘aki ‘a e kau malangá ki he tu‘unga ko ení?

‘Oku ngāue mālohi ‘a e fanga tokoua mo e fanga tuofāfine tokolahi koe‘uhí ke nau malanga ‘i he ngaahi feitu‘u ‘oku lahi ange ai ‘a e fiema‘ú. “Ko e ‘avalisi ‘o e kau malangá ki he ngaahi ‘api ‘i he feitu‘u ngāue ‘o ‘emau fakataha‘angá ko e toko 1 ki he 2,” ko e lau ia ‘a ha tokoua ta‘u 90 ko Ionash. “‘Oku ou malanga ‘i he koló, ka ki muí ni mai ‘i he hōloa ‘a hoku tu‘unga mo‘ui leleí, na‘á ku fononga foki ai ‘i he maile nai ‘e 100 (kilomita ‘e 160) ki ha feitu‘u na‘e te‘eki ke ngāue‘i, ‘a ia na‘á ku malanga ai ‘i he lea faka-Hungalí.” Kuo pau ke fai ‘e he kau malangá ‘a e ngaahi feilaulau ke nau tokoni ‘i he ngaahi feitu‘u ngāue kehé. “Ke ma‘u ‘a e lēlué, ‘oku ou tu‘u hake ‘i he 4:00 hengihengi peá u malanga ‘o a‘u ki he 6:00 efiafi ‘i he mavahe ‘a e lēlué ki ‘apí. Na‘á ku fai tu‘o ua pe tu‘o tolu ia ‘i he uike,” ko e lau ia ‘a Ionash. Na‘á ne ongo‘i na‘e tuha ‘a ‘ene ngaahi feingá? “Na‘á ku ma‘u ‘a e fiefia lahi ‘i he founga ngāue fakafaifekau ko iá,” ko ‘ene laú ia. “Na‘á ku fiefia ‘i hono tokoni‘i ha fāmili na‘e nofo mama‘o ke nau ako ‘a e mo‘oní.”

‘Oku hā mahino, ‘oku ‘ikai malava ke fononga mama‘o ‘a e tokotaha kotoa ‘i he ngaahi fakataha‘anga ‘i he feitu‘u ko ení. Ka ko e fa‘ahinga kotoa, kau ai ‘a e kau malanga ta‘umotu‘á, ‘oku nau feinga lahi ke ‘osiki faka‘āuliliki ‘a e feitu‘u ngāue fakalotofonuá. Ko hono olá, ‘i he 2017, ko hono fakataha‘i ‘a e kau ma‘u Fakamanatu ‘i he kolo ko eni ‘e tolú na‘e meimei liunga ua ia ‘i he tokolahi ‘o e kau malangá​—pe vaeua ‘o e tokolahí fakakātoa. ‘Oku ‘ikai toe fehu‘ia, ko fē pē ha feitu‘u ‘oku tau ngāue ai, ‘oku kei fiema‘u ke tau “femo‘uekina ai pē ‘i he ngāue ‘a e ‘Eikí.”​—1 Kol. 15:58.