1. Ko e hā ‘oku ‘ikai ke fie ako ai ‘a e ni‘ihi?

‘I HE ‘ahó ni, ko e kakai tokolahi ‘oku fiema‘u ke nau ngāue mālohi ke ma‘u ha pa‘anga fe‘unga ke mo‘ui ai. Ko e tokolahi hotau fanga tokouá ‘oku nau ngāue ‘i he ngaahi houa lahi koe‘uhí pē ke tokonaki ‘a e ngaahi fiema‘u tefito honau ngaahi fāmilí. Ko e tokolahi ta‘efa‘alaua kehe ‘oku nau fakamoleki ‘a e houa lahi ‘i he ‘aho taki taha ‘i he fefononga‘aki mei honau ‘apí ki honau ‘api ngāué. Ko e tokolahi ‘oku nau ngāue mālohi fakaesino ke poupou‘i kinautolu tonu. ‘I he ngata‘anga ‘o e ‘ahó, ko e fanga tokoua mo e fanga tuofāfine ngāue mālohi ko ení ‘oku nau hela‘ia! Ko hono mo‘oní ‘oku nau fu‘u hela‘ia ‘o ‘ikai ha ivi ‘e toe ke fai ha ako.

2. Ko fē ‘a e taimi ‘okú ke vahe‘i ki he akó?

² Kae kehe, ko hono mo‘oní, kuo pau ke tau vahe‘i ha taimi ki he akó​—ke ako fakamātoato—​‘a e Folofola ‘a e ‘Otuá mo ‘etau ‘ū tohi faka-Kalisitiané. Ko hotau vaha‘angatae mo Sihová mo ‘etau mo‘ui ta‘engatá ‘oku fakatu‘unga ia ai! (1 Tīm. 4:15) ‘Oku ‘ā pongipongia ‘a e ni‘ihi ‘i he ‘aho kotoa ‘o ako ‘i he kei lōngonoa honau ‘apí pea kei fo‘ou honau ‘atamaí hili ‘enau mālōloó. Ko e ni‘ihi ‘oku nau vahe‘i ‘a e ngaahi miniti si‘i ‘i he ngata‘anga ‘o e ‘ahó ‘oku lōngonoá ke ako pea fakalaulauloto ai ki he ngaahi me‘akai fakalaumālié.

3-4. Ko e hā ‘a e ngaahi liliu kuo fai ki he lahi ‘o e fakamatala kuo tokonaki maí, pea ko e hā hono ‘uhingá?

³ ‘Oku ‘ikai ha veiveiua ‘okú ke loto-tatau ‘oku mahu‘inga ke vahe‘i ha taimi ke ako. Ka ko e hā ‘a e me‘a ‘oku totonu ke tau akó? ‘‘Oku fu‘u lahi e me‘a ke laú,’ ko ho‘o leá nai ia. ‘‘Oku faingata‘a ke u lau ‘a e me‘a kotoa.’ Ko e ni‘ihi ‘oku nau malava ke ngāuekakato‘aki ‘a e tokonaki fakalaumālie kotoa, ka ko e tokolahi hotau fanga tokouá ‘oku nau fāinga ke ma‘u ha taimi ke fai pehē. ‘Oku  lāu‘ilo ki heni ‘a e Kulupu Pulé. ‘I he ‘uhinga ko iá, na‘e ‘omai ki muí ni ‘a e fakahinohino ke fakasi‘isi‘i ‘a e ‘ū tohi ‘oku pulusí mo ia ‘i he tatau faka‘ilekitulōniká.

⁴ Ko e fakatātaá, ‘oku ‘ikai ke tau toe pulusi ‘a e Yearbook of Jehovah’s Witnesses, koe‘uhi ‘oku lahi ‘a e ngaahi hokosia fakalototo‘a ‘oku ala ma‘u ‘i he jw.org^® pehē foki ki he polokalama fakamāhina ‘o e JW Broadcasting^®. Ko e pulusinga ma‘á e kakaí ‘o e Taua Le‘o mo e Awake! ‘oku pulusi tu‘o tolu pē he ta‘u he taimí ni. Kuo ‘ikai fai ‘a e ngaahi liliu ko ení ke tau ma‘u ai ha taimi lahi ange ki he ngaahi ngāue kehé. Ko hono taumu‘á ke tau malava ‘o tokanga lahi ange ki he “ngaahi me‘a ‘oku mahu‘inga angé.” (Fil. 1:10) Tau lāulea angé ki he founga ‘e lava ke tau fokotu‘u ai ‘a e ngaahi me‘a ke fakamu‘omu‘á mo e founga ‘e lava ke tau ma‘u ‘aonga kakato ai mei he ako fakafo‘ituitui ‘o e Tohi Tapú.

5-6. Ko e hā ‘a e ‘ū tohi ‘oku totonu ke tau fakapapau‘i ke ako fakaleleí?

⁵ Ko e hā ‘oku totonu ke tau ‘uluaki akó? ‘Oku totonu ke tau vahe‘i ha taimi he ‘aho taki taha ke ako ‘a e Folofola ‘a e ‘Otuá. Ko e lahi ‘o e ngaahi veesi ‘oku vahe‘i he taimí ni ki he lau Tohi Tapu fakauike ‘a e fakataha‘angá kuo fakasi‘isi‘i koe‘uhi ke tau ma‘u ai ha taimi lahi ange ke fakalaulauloto ki he me‘a ‘oku tau laú pea ke fai ha fekumi lahi ange. Ko ‘etau taumu‘á ‘oku ‘ikai ko hono lau pē ‘o e ngaahi vēsí, ka ke faka‘atā ‘a e pōpoaki ‘o e Tohi Tapú ke a‘u ki hotau lotó pea ke tau ‘unu‘unu ofi ange kia Sihova.​—Saame 19:14.

⁶ Ko e hā mo ha toe me‘a ‘oku totonu ke tau ako fakalelei? Ko e mo‘oni, ‘oku tau loto ke teuteu ‘a e Ako Taua Le‘o mo e Ako Tohi Tapu ‘a e Fakataha‘angá pehē foki ke lau ‘a e fakamatala kehe ki he fakataha he lolotonga ‘a e uiké. ‘Oku totonu ke tau lau foki mo e ‘īsiu ‘o e Taua Le‘o.

7. ‘Oku totonu ke tau loto-si‘i kapau ‘oku ‘ikai malava ke tau vakai‘i ‘a e me‘a kotoa ‘oku ‘i he‘etau uepisaití mo e JW Broadcasting?

⁷ Te ke pehē nai, ‘‘Oku lelei ia, kae fēfē ‘a e me‘a kotoa ‘oku hā ‘i he‘etau uepisaiti, jw.org, pehē foki ki he fakamatala ‘oku ‘i he JW Broadcasting? ‘Oku lahi fau!’ Fakakaukau ki ha fakatātā: ‘Oku lahi ‘a e ngaahi me‘akai vovo kehekehe ‘i ha falekai pāhia. He‘ikai ‘aupito lava ke ‘ahi‘ahi‘i ‘e he kau kasitomaá ‘a e me‘akai kotoa ‘oku ‘i aí. Ko ia ‘oku nau fili pē ha me‘akai ‘e ni‘ihi. ‘I he tu‘unga meimei tatau, kapau ‘oku ‘ikai lava ke ke vakai‘i ‘a e me‘a kotoa pē ‘oku tokonaki faka‘ilekitulōnika maí, ‘oua ‘e loto-si‘i. Lau pe sio ‘i he me‘a ‘okú ke malavá. Tau lāulea angé ki he me‘a ‘oku kau ki he akó pea mo e founga ‘e lava ke tau ma‘u ai ‘a e ‘aonga lahi tahá mei he‘etau akó.

8. Ko e hā ‘a e ngaahi sitepu te tau fou nai ai ‘i hono ako ‘a e Taua Le‘o, pea ‘e anga-fēfē ho‘o ma‘u ‘aonga mei hono fai iá?

⁸ ‘I ho‘o akó, ‘okú ke tokangataha ki he me‘a ‘okú ke laú koe‘uhi ke ke ako ha me‘a mahu‘inga. ‘Oku ‘ikai ko e lau fakavave pē ‘a e fakamatala kuo vahe‘i atú mo laine‘i ‘a e talí. Ko e fakatātaá, ‘i ho‘o teuteu ki he Ako Taua Le‘o, ‘uluaki lau ‘a e fakanounou ‘i he kamata‘anga ‘o e kupú. Hokó, fakakaukau ki he kaveinga ‘o e kupú, pehē foki ki he ngaahi kaveinga tokoní mo e ngaahi fehu‘i fakamanatú. Pea lau fakalelei mo māmālie ‘a e kupú. Tokanga ki he sētesi ‘okú ne tala atu ‘a e me‘a ‘oku lāulea ki ai ‘a e palakalafí, ‘a ia ‘oku anga-mahení ko e sētesi ‘uluaki ‘o e palakalafi taki taha. ‘Oku fa‘a tokoni ‘a e sētesi ko iá ke ke ‘ilo‘i ‘a e poini ‘oku fakamatala‘i ‘i he palakalafí. ‘I ho‘o lau ‘a e kupú, fakakaukau ki he anga hono poupou‘i ‘e he palakalafi taki taha ‘a e kaveinga tokoní mo ‘ene fekau‘aki mo e kaveinga tefito ‘o e kupú. Faka‘ilonga‘i ha ngaahi fo‘i lea pe poini ‘ikai anga-maheni ‘a ia te ke sai‘ia ke fekumi lahi ange ki ai.

9. (a) Ko e hā ‘oku totonu ai ke tau tokanga makehe ki he ngaahi konga Tohi Tapú ‘i he‘etau ako ‘a e Taua Le‘o, pea ‘i he founga fē? (e) Hangē ko ia ‘oku hā ‘i he Siosiua 1:8, ko e hā ‘oku totonu ke tau fai ‘o tānaki atu ki hono lau ‘o e ngaahi konga Tohi Tapú?

 ⁹ Ko e Ako Taua Le‘o ko ha ako ia ‘o e Tohi Tapú. Ko ia ai, tokanga tefito ki he ngaahi konga Tohi Tapú, tautefito ki he ngaahi konga Tohi Tapu ‘e lau ‘i he lāulea ‘a e fakataha‘angá ki he fakamatalá. Tokanga makehe ki he anga hono poupou‘i ‘e he ngaahi fo‘i lea pe kupu‘i lea tefito ‘i he ngaahi konga Tohi Tapú ‘a e poini ‘o e palakalafí. ‘Ikai ngata aí, vahe‘i ‘a e taimi ke fakalaulauloto ai ki he ngaahi konga Tohi Tapu ‘okú ke laú, pea fakalaulauloto ki he founga ‘e lava ke ke ngāue‘aki fakafo‘ituitui ai ia ‘i ho‘o mo‘uí.​—Lau ‘a e Siosiua 1:8.

10. ‘I he fekau‘aki mo e Hepelū 5:14, ko e hā ‘oku totonu ai ke vahe‘i ‘e he ngaahi mātu‘á ‘a e taimi ‘i he lolotonga e lotu fakafāmilí ke ako‘i ‘enau fānaú ki he founga ke ako mo fai ai ‘a e fekumí?

¹⁰ ‘Oku hā mahino, ‘oku loto ‘a e ngaahi mātu‘á ke hoko ‘a e Lotu Fakafāmili fakauiké ko ha taimi fakafiefia ki he‘enau fānaú. Kae kehe, neongo ‘oku totonu ma‘u pē ki he ngaahi mātu‘á ke ‘ai ha ngaahi me‘a pau ki he lotu fakafāmilí, ‘oku ‘ikai fiema‘u kiate kinautolu ke nau fokotu‘utu‘u ma‘u pē ha ngaahi ngāue makehe pe poloseki fakafiefia he uike taki taha. Lolotonga ko e taimi Lotu Fakafāmilí ko e sio nai ‘i he polokalama fakamāhina ‘o e JW Broadcasting pe ko e ngāue ‘i ha poloseki makehe, hangē ko hono langa ‘o e ‘a‘ake ‘a Noá, ‘oku toe mahu‘inga ke ako‘i ‘a e fānaú ‘i he founga ke ako aí. Ko e fakatātaá, ‘oku fiema‘u ke nau ako ki he founga ke teuteu ai ki he ngaahi fakatahá pe ko e founga ke fai ai ha fekumi fekau‘aki mo ha ‘īsiu kuo malanga hake ‘i he ‘apiakó. (Lau ‘a e Hepelū 5:14.) Kapau ‘oku nau vahe‘i ha taimi ke ako ha kaveinga Fakatohitapu ‘i ‘api, ‘e teu‘i lelei ange ai kinautolu ke tokangataha ki he fakamatala ‘oku ‘omai ‘i he ngaahi fakataha ‘a e fakataha‘angá, ‘asemipilií mo e fakataha-lahí, ‘a ia ‘oku ‘ikai ke kau ma‘u pē ai ha vitioó. Ko e mo‘oni, ko e lōloa ‘o e taimi ako taki taha ‘e fakatu‘unga ia ‘i he ta‘u mo e natula ‘o e fānaú.

11. Ko e hā ‘oku mahu‘inga ai ke tau ako‘i ‘etau kau ako Tohi Tapú ki he founga ke fai ai ha ako mohu ‘uhinga ‘iate kinautolu pē?

¹¹ Ko ‘etau kau ako Tohi Tapú ‘oku fiema‘u foki ke nau ‘ilo ki he founga ke akó. ‘I he‘enau kamata ako ‘a e Tohi Tapú, ‘oku tau fiefia ke sio ki he‘enau laine‘i pē ‘enau talí ‘i he teuteu ki he‘enau ako Tohi Tapú pe ki he fakataha ‘a e fakataha‘angá. Ka ‘oku fiema‘u ke tau ako‘i ‘etau kau ako Tohi Tapú ki he founga ke fai ai ‘a e fekumí mo e founga ke fai ai ha ako mohu ‘uhinga ‘iate kinautolu pē. ‘I he founga ko iá, ‘i he taimi ‘e malanga hake ai ‘a e palopalemá, ‘i he ‘ikai kole tokoni  ‘i he taimi pē ko iá ki he ni‘ihi kehe ‘i he fakataha‘angá, te nau ‘ilo ‘a e founga ke ma‘u ai ‘a e fale‘i ‘aongá ‘aki ‘a e fai ha fekumi ‘i he‘etau ‘ū tohí.

12. Ko e hā nai ‘a e taumu‘a ‘oku tau ma‘u ‘i he taimi ‘oku tau ako aí?

¹² Kapau ‘oku ‘ikai ko ha tokotaha ako tōtōivi koe, te ke fakakaukau nai he‘ikai malava ia ke ke fiefia ‘i he akó. Ka ‘e lava. ‘E lava ke ke kamata‘aki ha ako nounou pē pea faai atu pē ‘o fakalahi ‘a e taimí. Fakakaukau ki he taumu‘a ho‘o akó. Ko e mo‘oni, ko ‘etau taumu‘a tefitó ke ‘unu‘unu ai pē ke toe ofi ange kia Sihova. Ko ha taumu‘a ‘e taha ‘e lava ke a‘usia vave ko e tali ha fehu‘i ‘oku ‘eke ‘e ha tokotaha pe ko e fai ha fekumi ‘i he fehangahangai mo ha palopalema.

13. (a) Fakamatala‘i ‘a e sitepu ‘e lava ke fou ai ha to‘utupu ke taukapo‘i ‘ene tuí ‘i he ‘apiakó. (e) ‘E lava fēfē ke ke ngāue‘aki ‘a e akonaki ‘oku ma‘u ‘i he Kolose 4:6?

¹³ Ko e fakatātaá, ko ha to‘utupu koe ‘okú ke kei ‘i he akó? ‘E fakatanga‘i nai koe ‘e ho kaungāakó koe‘uhi ko e ‘ikai ke ke hiva ‘a e fasi fakafonuá. Te ke loto ke taukapo‘i ‘a e me‘a ‘oku lea‘aki ‘e he Tohi Tapú fekau‘aki mo e kaveingá ni, kae mahalo ‘oku ‘ikai ke ke ongo‘i taau fe‘unga ke fai pehē. ‘Oku fiema‘u ki ai ha poloseki ako! Ko ho‘o taumu‘á ‘e lava ke tafa‘aki ua: (1) Fakaivimālohi‘i ho‘o fakapapau ‘oku totonu ke ke nofo‘aki mavahe mei he māmaní (2) fakalelei‘i ho‘o malava ke taukapo‘i ‘a e mo‘oní. (Sione 17:16; 1 Pita 3:15) Te ke ‘uluaki ‘eke hifo nai kiate koe, ‘Ko e hā ‘a e fakakikihi ‘oku ngāue‘aki ‘e hoku kaungāakó ke poupou‘i‘aki ‘a e hiva ‘i he fasi fakafonuá?’ Pea ngāue‘aki leva ‘etau ‘ū tohí, fai ha fekumi faka‘āuliliki. Ko hono taukapo‘i ho‘o tuí he‘ikai nai ke fu‘u faingata‘a ‘o hangē ko ho‘o fakakaukaú. ‘Oku tui ‘a e kakai tokolahi tahá ‘oku totonu ke nau hiva ‘a e fasi fakafonuá koe‘uhí pē ko hono tala ange ‘e ha tokotaha ‘oku nau faka‘apa‘apa‘i ‘oku totonu ke nau fai pehē. Kapau te ke ma‘u ha poini ‘e taha pe ua ‘e lava ke ke vahevahe, ‘e lava ke ke fai ha tali fakafiemālie ki ha tokotaha fehu‘i loto-mo‘oni.​—Lau ‘a e Kolose 4:6.

14-16. (a) ‘E anga-fēfē nai ha‘o hoko ‘o mahino‘i lelei ange ha tohi ‘o e Tohi Tapú ‘oku ‘ikai ke ke fu‘u alāanga mo ia? (e) ‘I hono ngāue‘aki ‘a e ngaahi konga Tohi Tapu ‘oku haá, fakamatala ki he founga ‘e lava ke ke mahino‘i lelei ange ai ‘a e tohi ‘a ‘Ēmosí. (Sio foki ki he puha “ ‘Ai ‘a e Tohi Tapú ke Mo‘oni Kiate Koe!”)

¹⁴ Sioloto atu ‘oku teu ke tau lāulea ‘i he fakataha ‘a e fakataha‘angá ki he taha ‘i he ngaahi tohi ‘a e kau palōfita īkí, mahalo ko e taha ‘oku ‘ikai ke ke fu‘u alāanga mo ia. Ko e ‘uluaki sitepú nai ke fakatupulekina ha mahu‘inga‘ia ‘i he me‘a na‘e hiki ‘e he palōfita ko iá. ‘E lava fēfē ke ke fakahoko ia?

¹⁵ ‘Uluakí, ‘eke hifo: ‘Ko e hā ‘oku ou ‘ilo‘i fekau‘aki mo e tokotaha hiki-tohí? Ko hai ia, na‘á ne nofo ‘i fē, ko e hā ‘ene ngāue?’ Ko e puipuitu‘a ‘o e tokotahá ‘e hā foki ia ‘i he ngaahi lea pe ko e fakatātā na‘á ne ngāue‘akí. ‘I ho‘o lau ‘a e Tohi Tapú, kumi ‘a e ngaahi kupu‘i lea ‘oku tapua atu ai ‘a e ‘ulungaanga ‘o e tokotaha hiki-tohí.

¹⁶ Hokó, ‘e toe tokoni foki kiate koe kapau te ke ‘ilo‘i ‘a e taimi na‘e hiki ai ‘a e tohí. ‘E lava ke ke fai ia ‘aki hono vakai‘i ‘a e “Tēpile ‘o e Ngaahi Tohi ‘o e Tohi Tapú” ‘i he konga ki mui ‘o e Liliu Tohi Tapu ‘o e Māmani Fo‘oú ‘o e Tohi Tapu Mā‘oni‘oní. Tānaki atu ki aí, ‘e lava ke ke vakai‘i ‘a e saati ‘o e kau palōfita mo e ngaahi tu‘í ‘i he Fakamatala Fakalahi A6. Kapau ko e tohi ‘o e Tohi Tapú ‘okú ke akó ko ha tohi fakaekikite, ‘e lelei ke ke ako fekau‘aki mo e ngaahi me‘a ne hoko ‘i he taimi na‘e hiki aí. Ko e hā ‘a e ngaahi ‘ulungaanga pe tō‘onga kovi na‘e fiema‘u ki he palōfitá ke ne fakatonutonú? Ko hai ‘a e fa‘ahinga ne mo‘ui he taimi ko iá? Ke mahino‘i lelei ange ‘a e tu‘ungá, ‘e fiema‘u nai ke ke toe vakai ki ha ngaahi tohi kehe ‘o e Tohi Tapú. Ko e  fakatātaá, ke mahino‘i kakato ange ‘a e me‘a na‘e hoko ‘i he taimi ‘o e palōfita ko ‘Ēmosí, te ke ma‘u ‘aonga mei hono vakai‘i ‘a e tohi ‘a 2 Tu‘i mo 2 Kalonikali, ‘a ia ‘oku hā ‘i he ngaahi ma‘u‘anga fakamatala he tafa‘akí ‘i he ‘Ēmosi 1:1. Tānaki atu ki aí, ‘e lava ke ke vakai‘i ‘a e tohi ‘a Hōseá, ‘a ia na‘e mo‘ui fakataha nai mo ‘Ēmosi. Ko e kotoa ‘o e ngaahi fakamatala ko ení ‘e tokoni ke ke mahino‘i lelei ange ai ‘a e vaha‘a taimi na‘e mo‘ui ai ‘a ‘Ēmosí.​—2 Tu‘i 14:25-28; 2 Kal. 26:1-15; Hōs. 1:1-11; ‘Ēm. 1:1.

17-18. ‘I hono ngāue‘aki ‘a e fakatātā he palakalafí pe ko ha‘o fakatātā tonu, fakatātaa‘i ‘a e founga ‘o e hoko ‘a e tokangataha ki he fanga ki‘i fakaikiikí ‘o ‘ai ‘a e ako Tohi Tapu fakafo‘ituituí ke fakafiefia.

¹⁷ ‘Oku lelei ke lau ‘a e Tohi Tapú fakataha mo e holi mālohi ke ako lahi ange. Ko e fakatātaá, tau pehē ‘okú ke lau ‘a e vahe 12 ‘o e kikite ‘a Sākalaiá, ‘a ia ‘oku tomu‘a tala ai ‘a e pekia ‘a e Mīsaiá. (Sāk. 12:10) ‘I ho‘o a‘u ki he veesi 12, ‘okú ke lau ko e “ngaahi fāmili ‘oku kau ki he fale ‘o Nētané” te nau mātu‘aki mamahi ‘i he pekia ‘a e Mīsaiá. ‘I he ‘ikai fakalaka fakavave pē ‘i he fakaikiiki ko iá, ‘okú ke ki‘i tu‘u ‘o ‘eke hifo kiate koe: ‘Ko e hā ‘a e fekau‘aki ‘a e fale ‘o Nētané mo e Mīsaiá? ‘Oku ‘i ai ha toe fakamatala lahi ange?’ Te ke fai ha fekumi. Ko e ma‘u‘anga fakamatala he tafa‘akí te ne ‘ave koe ki he 2 Sāmiuela 5:13, 14, ‘a ia te ke ako ai ko Nētané ko e taha ia ‘o e ngaahi foha ‘o Tu‘i Tēvitá. Ko e ma‘u‘anga fakamatala hono ua he tafa‘akí, ko e Luke 3:23, 31, ‘oku hā ai ko Sīsuú ko e hako tonu ‘o Nētane fakafou ‘ia Mele. (Sio ki he wp16.3 9 pal. 1-3.) ‘Oku to‘oa ai ho lotó! Na‘á ke ‘ilo‘i na‘e tomu‘a tala ko Sīsuú ‘e hoko ko ha hako ‘o Tēvita. (Māt. 22:42) Ka na‘e laka hake he toko 20 ‘a e ngaahi foha ‘o Tēvitá. ‘Ikai ‘oku fakaofo hono fakahaa‘i ‘e Sākalaia ko e fale tonu ‘o Nētané ‘oku ‘i ai hono ‘uhinga ke nau mamahi ‘i he pekia ‘a Sīsuú?

 ¹⁸ Fakakaukau ki ha fakatātā ‘e taha. ‘I he Luke vahe ‘uluakí, ‘oku tau lau ai na‘e ‘a‘ahi ‘a e ‘āngelo ko Kepalelí kia Mele ‘o tala kiate ia te ne fanau‘i ha tama tangata: “‘E hoko ‘a e tokotahá ni ko e lahi pea ‘e ui ia ko e ‘Alo ‘o e Fungani Mā‘olungá, pea ko Sihova ko e ‘Otuá te ne ‘oange kiate ia ‘a e taloni ‘o Tēvita ko ‘ene tamaí, pea te ne pule ko e Tu‘i ki he fale ‘o Sēkopé ‘o ta‘engata.” (Luke 1:32, 33) Te tau hehema pē nai ke tau tokangataha ki he konga ‘uluaki ‘o e pōpoaki ‘a Kepalelí, ‘a ia ko Sīsū ‘e ui ko e “‘Alo ‘o e Fungani Mā‘olungá.” Ka na‘e toe kikite‘i ‘e Kepaleli ko Sīsuú ‘e “pule ko e Tu‘i.” Ko ia te tau fifili nai pe ko e hā e fakakaukau ‘a Mele ki he me‘a na‘e tala ange ‘e Kepalelí. Na‘á ne fakakaukau nai na‘e ‘uhinga ‘a Kepalelí ‘e fetongi ‘e Sīsū ‘a Tu‘i Hēlota​—pe ko ha taha ‘i he kau hoko hake ke pule ‘i ‘Isilelí? Kapau na‘e hoko ‘a Sīsū ko ha tu‘i, ‘e hoko ‘a Mele ko e kuini fehuhu, pea ko hono fāmilí te nau nofo ‘i he palasi fakatu‘í. Neongo ia, ‘oku ‘ikai ha lēkooti na‘e ma‘u ‘e Mele ha fakakaukau pehē; pe kuo faifai ange ‘o tau lau na‘e kole ‘e Mele ha tu‘unga makehe ‘i he Pule‘angá, ‘o hangē ko e ongo ākonga ‘a Sīsuú. (Māt. 20:20-23) Ko e fakaikiiki ko ení ‘oku toe fakamamafa‘i ai ko Melé ko ha fefine mātu‘aki anga-fakatōkilalo mo‘oni!

19-20. Hangē ko ia ‘oku fakamatala‘i ‘i he Sēmisi 1:22-25 mo e 4:8, ko e hā ‘etau taumu‘a ‘i he taimi ‘oku tau ako aí?

¹⁹ Tau manatu‘i ko ‘etau taumu‘a tefito ‘i hono ako ‘a e Folofola ‘a e ‘Otuá mo ‘etau ‘ū tohi faka-Kalisitiané ke ‘unu‘unu ofi ange ai kia Sihova. ‘Oku tau toe loto foki ke vakai pe “ko e fa‘ahinga tokotaha fēfē” kitautolu pea mo e liliu ‘oku fiema‘u ke tau fai koe‘uhi ke fakahōifua ai ki he ‘Otuá. (Lau ‘a e Sēmisi 1:22-25; 4:8.) Pea ‘i he kamata‘anga ‘o e taimi ako taki taha, ‘oku totonu ke tau kole kia Sihova ki hono laumālié. ‘Oku totonu ke tau kōlenga kiate ia ke ne tokoni‘i kitautolu ke tau ma‘u ‘aonga kakato mei he fakamatalá pea ke tau vakai kiate kitautolu ‘o hangē ko ‘ene vakai hifó.

²⁰ ‘Ofa ke tau hangē kotoa ko e tangata ‘a e ‘Otuá ‘oku fakamatala‘i ‘e he tokotaha-tohi-sāmé: “Ko ‘ene fiefiá ‘oku ‘i he lao ‘a Sihová, pea ‘okú ne lau le‘o-si‘i ‘a ‘Ene laó ‘i he ‘aho mo e pō. . . . Ko e me‘a kotoa pē ‘okú ne faí ‘e lavame‘a.”​—Saame 1:2, 3.