1. Ko e hā ‘a e me‘a ‘e ua ‘oku lava ke tau fakapapau‘í?

‘OKU ‘ofa ‘a Sihova ko e ‘Otuá ‘i he‘ene kau lotú. Kuó ne fai pehē, pea te ne fai pehē ma‘u pē. ‘Okú ne toe ‘ofa foki ‘i he fakamaau totonú. (Saame 33:5) Ko ia ‘oku lava ke tau fakapapau‘i ‘a e me‘a ‘e ua: (1) ‘Oku fakamamahi kia Sihova ‘a e taimi ‘oku ngaohikovia ta‘etotonu ai ‘a ‘ene kau sevānití. (2) Te ne fakapapau‘i te nau ma‘u ‘a e fakamaau totonú. ‘I he kupu ‘uluaki ‘i he kupu hokohoko ko ení, * na‘a tau ako ai ko e Lao na‘e ‘oange ‘e he ‘Otuá ki ‘Isileli fakafou ‘ia Mōsesé na‘e makatu‘unga ia ‘i he ‘ofa. ‘Oku pouaki ai ‘a e fakamaau totonu​—fakamaau totonu ki he taha kotoa, na‘a mo e fa‘ahinga ‘oku ‘ikai lava ke nau malu‘i kinautolú. (Teu. 10:18) ‘Oku fakahaa‘i ‘i he Lao ko iá ‘a e anga ‘o e tokanga lahi mai ‘a Sihova ki he‘ene kau lotú.

2. Ko e hā ‘a e ngaahi fehu‘i te tau talí?

² Na‘e ngata ‘a e Lao ‘a Mōsesé ‘i he 33 T.S. ‘i he taimi na‘e fokotu‘u ai ‘a e fakataha‘anga Kalisitiané. ‘A ia ‘e ‘ikai ke ma‘u ‘aonga ‘a e kau Kalisitiané ia mei ha lao ‘oku makatu‘unga ‘i he ‘ofá pea pouaki ‘a e fakamaau totonú? ‘Ikai! Na‘e ma‘u ‘e he kau Kalisitiané ha lao fo‘ou. ‘I he kupu ko ení, te tau ‘uluaki lāulea ki he lao ko iá. Pea te tau tali leva ‘a e ngaahi fehu‘i ko ení: Ko e hā ‘e lava ke tau pehē ai ko e lao ko ení ‘oku makatu‘unga ‘i he ‘ofá? Ko e hā ‘oku lava ai ke tau pehē ‘okú ne pouaki ‘a e fakamaau totonú? ‘I he malumalu ‘o e lao ko ení, ‘oku totonu ke fēfē ‘a e fakafeangai ‘a e fa‘ahinga ‘oku ma‘u mafaí ki he ni‘ihi kehé?

3. Ko e hā ‘oku kau ki he “lao ‘a e Kalaisí” hangē ko ia ‘oku lave ki ai ‘i he Kalētia 6:2?

³ Lau ‘a e Kalētia 6:2. Ko e kau Kalisitiané ‘oku nau ‘i he malumalu ‘o e “lao ‘a e Kalaisí.” Na‘e ‘ikai ke hiki ‘e Sīsū ia ha lisi ‘o e ngaahi laó  ki hono kau muimuí, ka na‘á ne ‘oange kiate kinautolu ‘a e ngaahi fakahinohino, fekau mo e tefito‘i mo‘oni ke nau mo‘ui‘aki. Ko e “lao ‘a e Kalaisí” ‘oku kau ai ‘a e me‘a kotoa na‘e ako‘i ‘e Sīsuú. Ke mahino‘i lelei ange ‘a e lao ko iá, te tau lāulea ki ai ‘i he ngaahi palakalafi hokó.

4-5. ‘I he ngaahi founga fē na‘e faiako ai ‘a Sīsuú, pea ko fē taimi na‘á ne faiako aí?

⁴ ‘I he ngaahi founga fē na‘e faiako ai ‘a Sīsuú? ‘Uluakí, na‘á ne ako‘i ‘a e kakaí fakafou ‘i he me‘a na‘á ne lea‘akí. Na‘e ‘i ai ‘a e mālohi ‘i he‘ene ngaahi leá koe‘uhi na‘e fakahaa‘i ai ‘a e mo‘oni fekau‘aki mo e ‘Otuá, ako‘i ai ‘a e taumu‘a mo‘oni ‘o e mo‘uí, pea fakahanga ‘a e tokangá ki he Pule‘anga ‘o e ‘Otuá ko e fakalelei‘anga ia ki he kotoa ‘o e faingata‘a‘ia ‘a e fa‘ahinga ‘o e tangatá. (Luke 24:19) Na‘e toe faiako ‘a Sīsū fakafou ‘i he‘ene fa‘ifa‘itaki‘angá. ‘I he‘ene founga mo‘uí, na‘á ne fakahaa‘i ai ki hono kau muimuí ‘a e founga ‘oku totonu ke nau mo‘ui aí.​—Sione 13:15.

⁵ Ko fē taimi na‘e faiako ai ‘a Sīsuú? Na‘á ne faiako ‘i he lolotonga ‘ene ngāue fakafaifekau ‘i he māmaní. (Māt. 4:23) Na‘á ne toe ako‘i hono kau muimuí hili pē hono fokotu‘u hake iá. Ko e fakatātaá, na‘á ne hā ki ha kulupu ‘o e kau ākongá​—mahalo ko e toko 500 tupu—​pea ‘oange kiate kinautolu ‘a e fekau ke ‘ngaohi ākonga.’ (Māt. 28:19, 20; 1 Kol. 15:6) ‘I he tu‘unga ko e ‘ulu ‘o e fakataha‘angá, na‘e hokohoko atu hono fakahinohino‘i ‘e Sīsū ‘ene kau ākongá hili ‘ene foki ki hēvaní. Ko e fakatātaá, ‘i he 96 T.S. nai, na‘e tataki ‘e Kalaisi ‘a e ‘apositolo ko Sioné ke ne ‘oange ‘a e fakalototo‘a mo e akonaki ki he kau Kalisitiane paní.​—Kol. 1:18; Fkh. 1:1.

6-7. (a) ‘Oku lēkooti ‘i fē ‘a e ngaahi akonaki ‘a Sīsuú? (e) ‘Oku anga-fēfē ‘etau talangofua ki he lao ‘a e Kalaisí?

⁶ ‘Oku lēkooti ‘i fē ‘a e ngaahi akonaki ‘a Sīsuú? Ko e Kōsipeli ‘e faá ‘oku lēkooti ai ‘a e ngaahi me‘a lahi na‘e lea‘aki mo fai ‘e Sīsū ‘i he māmaní. Ko e toenga ‘o e Ngaahi Konga Tohi Tapu Faka-Kalisi Kalisitiané​—‘a ia na‘e hiki ‘e he kau tangata na‘e fakamānava‘i ‘e he laumālie mā‘oni‘oní pea na‘a nau ma‘u “‘a e fakakaukau ‘a Kalaisí”—​‘oku toe tokoni‘i lahi ange ai kitautolu ke mahino‘i ‘a e fakakaukau ‘a Sīsū ‘o fekau‘aki mo e ngaahi me‘á.​—1 Kol. 2:16.

⁷ Lēsoní: Ko e ngaahi akonaki ‘a Sīsuú ‘okú ne kāpui ‘a e ngaahi tafa‘aki kotoa ‘o e mo‘uí. Ko ia ‘oku tataki ‘e he lao ‘a e Kalaisí ‘a e me‘a ‘oku tau fai ‘i ‘apí, ‘i he ngāue‘angá pe ‘apiakó pea ‘i he fakataha‘angá. ‘Oku tau ako ‘a e lao ko ení ‘aki hono lau ‘a e Ngaahi Konga Tohi Tapu Faka-Kalisi Kalisitiané pea fakalaulauloto ki ai. ‘Oku tau talangofua ki he lao ko ení ‘aki ‘etau mo‘ui ‘o fehoanaki mo e  ngaahi fakahinohino, fekau mo e tefito‘i mo‘oni ‘oku ma‘u ‘i he ngaahi tohi ko ia ‘o e Tohi Tapú. ‘I he‘etau talangofua ki he lao ‘a e Kalaisí, ‘oku tau talangofua ai ki hotau ‘Otua ‘ofá, ‘a Sihova, ‘a e Matavai na‘e ha‘u mei ai ‘a e me‘a kotoa na‘e ako‘i ‘e Sīsuú.​—Sione 8:28.

8. Ko e hā ‘a e makatu‘unga ‘o e lao ‘a e Kalaisí?

⁸ Ko ha fale lelei na‘e fakatoka ‘i ha makatu‘unga fefeka ‘oku ‘ai ai ‘a e fa‘ahinga ‘oku nofo aí ke nau ongo‘i malu. ‘I he tu‘unga meimei tatau, ko ha lao lelei na‘e fakatoka ‘i ha makatu‘unga fefeka ‘oku ‘ai ai ‘a e fa‘ahinga ‘oku nau mo‘ui‘aki iá ke nau ongo‘i malu. Ko e lao ‘a e Kalaisí ‘oku fakatoka ia ‘i he makatu‘unga lelei taha ‘oku ala lava ke ma‘ú​—ko e ‘ofá. Ko e hā ‘oku lava ai ke tau lea peheé?

9-10. Ko e hā ‘a e ngaahi fakatātā ‘oku fakahaa‘i ai na‘e ue‘i ‘e he ‘ofá ‘a Sīsū, pea ‘e lava fēfē ke tau fa‘ifa‘itaki kiate ia?

⁹ ‘Uluakí, ko e me‘a kotoa na‘e fai ‘e Sīsuú na‘e ue‘i ‘e he ‘ofá. Ko e ongo‘i faka‘ofa‘iá pe manava‘ofá, ko ha fakahāhā ia ‘o e ‘ofá. ‘I hono ue‘i ‘e he ongo‘i faka‘ofa‘iá, na‘e ako‘i ‘e Sīsū ‘a e fu‘u kakaí, fakamo‘ui ‘a e puké, fafanga ‘a e fiekaiá pea fokotu‘u ‘a e maté. (Māt. 14:14; 15:32-38; Mk. 6:34; Luke 7:11-15) Neongo ko hono fai ‘a e ngaahi me‘a ko iá na‘e fakamoleki ki ai ‘a e lahi hono taimí mo e iví, na‘e loto-lelei ‘a Sīsū ke fakamu‘omu‘a ‘a e fiema‘u ‘a e ni‘ihi kehé ‘i ha‘aná. Mahulu haké, na‘á ne fakahāhā ‘a e ‘ofa lahi ‘aki hono tuku atu ‘ene mo‘uí ma‘á e ni‘ihi kehé.​—Sione 15:13.

¹⁰ Lēsoní: ‘E lava ke tau fa‘ifa‘itaki kia Sīsū ‘aki hono fakamu‘omu‘a ‘a e fiema‘u ‘a e ni‘ihi kehé ‘i ha‘atautolú. ‘E lava ke tau toe fa‘ifa‘itaki kiate ia ‘aki hono fakatupulekina ‘a e manava‘ofa ki he kakai ‘i hotau feitu‘u ngāué. ‘I hono ue‘i kitautolu ‘e he manava‘ofa ko iá ke malanga mo faiako‘aki ‘a e ongoongo leleí, ‘oku tau talangofua ai ki he lao ‘a e Kalaisí.

11-12. (a) ‘Oku fakahaa‘i fēfē ‘e Sihova ‘ene tokanga lahi mai kiate kitautolú? (e) ‘E lava fēfē ke tau fa‘ifa‘itaki ki he ‘ofa ‘a Sihová?

¹¹ Uá, na‘e fakahaa‘i ‘e Sīsū ‘a e ‘ofa ‘a ‘ene Tamaí. Lolotonga ‘ene ngāue fakafaifekaú, na‘e fakahaa‘i ‘e Sīsū ‘a e tokanga lahi mai ‘a Sihova fekau‘aki mo ‘ene kau lotú. Fakataha mo e ngaahi me‘a kehé, na‘e ako‘i ‘e Sīsū ‘a e me‘á ni: Ko kitautolu taki taha ‘oku tau mahu‘inga ki he‘etau Tamai fakahēvaní. (Māt. 10:31) ‘Oku vēkeveke ‘a Sihova ke talitali lelei ha sipi mole ‘okú ne fakatomala pea foki mai ki he fakataha‘angá. (Luke 15:7, 10) Na‘e fakamo‘oni‘i ‘e Sihova ‘ene ‘ofa ‘iate kitautolú ‘aki hono foaki mai hono ‘Aló ko ha huhu‘i ma‘atautolu.​—Sione 3:16.

¹² Lēsoní: ‘E lava fēfē ke tau fa‘ifa‘itaki ki he ‘ofa ‘a Sihová? (‘Ef. 5:1, 2) ‘Oku tau vakai ki hotau fanga tokouá mo e fanga tuofāfiné taki taha ‘oku nau mahu‘inga, pea ‘oku tau talitali lelei fiefia ‘ha sipi mole’ ‘oku foki mai kia Sihova. (Saame 119:176) ‘Oku tau fakamo‘oni‘i ‘etau ‘ofa ‘i hotau fanga tokouá mo e fanga tuofāfiné ‘aki ‘etau foaki atu kitautolu, hangē ko hono fai ha tokoni ‘i he taimi ‘oku nau fiema‘u ai iá. (1 Sio. 3:17) ‘I he‘etau fakafeangai ki he ni‘ihi kehé ‘i he founga anga-‘ofá, ‘oku tau talangofua ai ki he lao ‘a e Kalaisí.

13-14. (a) Hangē ko ia ‘oku hiki ‘i he Sione 13:34, 35, ko e hā na‘e fekau‘i ‘e Sīsū ki hono kau muimuí ke fakahāhaá, pea ko e hā ko ha fekau fo‘ou ai ení? (e) ‘Oku anga-fēfē ‘etau talangofua ki he fekau fo‘oú?

¹³ Tolú, na‘e fekau‘i ‘e Sīsū hono kau muimuí ke nau fakahāhā ‘a e ‘ofa feilaulau‘i-kitá. (Lau ‘a e Sione 13:34, 35.) ‘Oku fo‘ou ‘a e fekau ‘a Sīsuú koe‘uhi ‘oku fiema‘u ai ke tau fakahāhā ‘a e fa‘ahinga ‘ofa na‘e ‘ikai fiema‘u ia ‘i he Lao na‘e ‘oange ‘e he ‘Otuá ki ‘Isilelí: ‘Ofa ‘i ho kaungātuí ‘o hangē ko e ‘ofa ‘a Sīsū ‘iate kimoutolú. ‘Oku fiema‘u ki ai ha ‘ofa feilaulau‘i-kita. * ‘Oku fiema‘u ke tau ‘ofa ‘i hotau fanga tokouá mo e fanga tuofāfiné ‘o laka ange ia ‘i he‘etau ‘ofa ‘iate kitautolú. Kuo pau ke tau ‘ofa ‘iate kinautolu ‘o a‘u ki ha tu‘unga ko ‘etau loto-lelei ke foaki ‘etau mo‘uí koe‘uhi ko kinautolu, hangē ko ia na‘e fai ‘e Sīsū ma‘atautolú.

¹⁴ Lēsoní: ‘Oku anga-fēfē ‘etau talangofua ki he fekau fo‘oú? Ko hono ‘ai mahinó, ‘aki ‘etau fai ‘a e  ngaahi feilaulau ma‘a hotau fanga tokouá mo e fanga tuofāfiné. ‘Oku tau loto-lelei ke ‘ikai ngata pē ‘etau fai ‘a e ngaahi feilaulau lalahí​—ke foaki atu ‘etau mo‘uí—​kae pehē foki ki he fanga ki‘i feilaulau iiki ange. Ko e fakatātaá, ‘i he‘etau fai ha feinga makehe ke ‘ave ha tokoua pe tuofefine ta‘umotu‘a ki he fakatahá, pe ko ‘etau loto-lelei ke tuku ‘etau sai‘ia fakafo‘ituituí kae ‘ai ha taha ‘okú te ‘ofa ai ke fiefia, pe ko ‘etau mālōlō mei he ngāue fakamāmaní ke tokoni ‘i ha fakatamaki, ‘oku tau talangofua ai ki he lao ‘a e Kalaisí. ‘Oku tau toe tokoni ai ke ‘ai ‘etau fakataha‘angá ko ha feitu‘u ‘e lava ke ongo‘i malu ai ‘a e tokotaha taki taha.

15-17. (a) Na‘e anga-fēfē hono fakahaa‘i ‘e he tō‘onga ‘a Sīsuú ‘ene ongo‘i fekau‘aki mo e fakamaau totonú? (e) ‘E lava fēfē ke tau fa‘ifa‘itaki kia Sīsū?

¹⁵ Ko hono ngāue‘aki ‘a e “fakamaau totonú” ‘i he Tohi Tapú, ‘oku ‘uhinga tefitó ke fai ‘a e me‘a ‘oku lau ‘e he ‘Otuá ‘oku totonú pea fai pehē ‘o ‘ikai filifilimānako. Ko e hā ‘oku lava ai ke tau pehē ‘oku pouaki ‘e he lao ‘a e Kalaisí ‘a e fakamaau totonú?

¹⁶ ‘Uluakí, fakakaukau ki he anga hono fakahaa‘i ‘e he tō‘onga ‘a Sīsuú ‘ene ongo‘i fekau‘aki mo e fakamaau totonú. ‘I hono taimí, ko e kau taki lotu Siú na‘a nau fehi‘a ‘i he fa‘ahinga ‘ikai ko ha Siú, fehi‘anekina‘i ‘a e kau Siu lāuvalé, pea ta‘efaka‘apa‘apa‘i ‘a e kakai fefiné. Kae kehe, na‘e fakamaau totonu mo ta‘efilifilimānako ‘a Sīsū ‘i he‘ene fakafeangai ki he tokotaha kotoa. Na‘á ne tali ‘a e fa‘ahinga ‘ikai ko ha Siu na‘a nau fakaofiofi kiate ia ‘i he tuí. (Māt. 8:5-10, 13) Na‘á ne malanga ‘o ‘ikai tomu‘a fehi‘a ki he tokotaha kotoa, ‘a e koloa‘ia mo e masiva. (Māt. 11:5; Luke 19:2, 9) Na‘e ‘ikai ‘aupito te ne anga-fefeka pe anga-fakamamahi ‘i he‘ene fakafeangai ki he kakai fefiné. ‘I hono kehé, na‘á ne anga-faka‘apa‘apa mo anga-lelei ki he kakai fefiné, kau ai mo e fa‘ahinga na‘e vakai ki ai ‘oku nau ta‘etāú.​—Luke 7:37-39, 44-50.

¹⁷ Lēsoní: ‘E lava ke tau fa‘ifa‘itaki kia Sīsū ‘aki ‘etau fakafeangai ta‘efilifilimānako ki he ni‘ihi kehé pea malanga ki he tokotaha kotoa ‘oku nau loto-lelei ke fanongó​—tatau ai pē pe ko e hā honau puipuitu‘a fakasōsiale pe fakalotú. ‘Oku muimui ‘a e kau tangata Kalisitiané ki he‘ene fa‘ifa‘itaki‘angá ‘aki ‘a e fakafeangai anga-faka‘apa‘apa ki he kakai fefiné. ‘I he‘etau fai peheé, ‘oku tau talangofua ai ki he lao ‘a e Kalaisí.

18-19. Ko e hā na‘e ako‘i ‘e Sīsū fekau‘aki mo e fakamaau totonú, pea ko e hā ‘a e lēsoni ‘oku tau ako mei he me‘a na‘á ne ako‘í?

¹⁸ Uá, fakakaukau ki he me‘a na‘e ako‘i ‘e Sīsū fekau‘aki mo e fakamaau totonú. Na‘á ne ako‘i ‘a e ngaahi tefito‘i mo‘oni ‘e tokoni ki hono kau muimuí ke nau fakafeangai totonu ai ki he ni‘ihi kehé. Ko e fakatātaá, fakakaukau fekau‘aki mo e Lao Koulá. (Māt. 7:12) ‘Oku tau loto kotoa ke fai mai ha fakafeangai totonu kiate kitautolu. Ko ia ai, ‘oku totonu ke tau fakafeangai totonu ki he ni‘ihi kehé. Kapau te tau fai pehē, ‘e ue‘i nai ai kinautolu ke nau fakafeangai totonu mai. Kae fēfē kapau kuo fai mai ha fakafeangai ta‘etotonu kiate kitautolu? Na‘e toe ako‘i ‘e Sīsū hono kau muimuí ke nau falala ‘e ‘ai ‘e Sihova “ke fakahoko ‘a e fakamaau totonú ki he fa‘ahinga [ko ia] ‘a ia ‘oku nau tangi kiate ia ‘i he ‘aho mo e pō.” (Luke 18:6, 7) Ko e ngaahi lea ko iá, ko ha tala‘ofa: Ko hotau ‘Otua fakamaau totonú ‘okú ne lāu‘ilo ki he ngaahi ‘ahi‘ahi ‘oku tau fehangahangai mo ia ‘i he ngaahi ‘aho faka‘osi ko ení, pea te ne ‘ai ke fakahoko ‘a e fakamaau totonú kiate kitautolu ‘i he‘ene taimi totonú.​—2 Tes. 1:6.

¹⁹ Lēsoní: ‘I he‘etau muimui ‘i he ngaahi tefito‘i mo‘oni na‘e ako‘i mai ‘e Sīsuú, te tau fakafeangai ai ki he ni‘ihi kehé ‘i ha founga totonu. Pea kapau kuo ma‘ukovia kitautolu ‘i ha fakamaau ta‘etotonu ‘i he māmani ‘o Sētané, ‘e lava ke tau ma‘u ‘a e fiemālie ‘i hono ‘ilo‘i ‘e ‘ai ‘e Sihova ke fakahoko ‘a e fakamaau totonú kiate kitautolu.

20-21. (a) ‘Oku totonu ke fēfē ‘a e fakafeangai ‘a e fa‘ahinga ‘oku ma‘u mafaí ki he ni‘ihi kehé? (e) ‘E lava fēfē ke fakahāhā ‘e ha husepāniti ‘a e ‘ofa feilaulau‘i-kitá, pea ‘oku totonu ke fēfē ‘a e fakafeangai ha tamai ki he‘ene fānaú?

²⁰ ‘I he malumalu ‘o e lao ‘a e Kalaisí, ‘oku totonu ke fēfē ‘a e fakafeangai ‘a e fa‘ahinga ‘oku ma‘u  mafaí ki he ni‘ihi kehé? Koe‘uhi ko e ‘ofá ‘a e makatu‘unga ki he lao ko iá, ko e fa‘ahinga ‘oku ma‘u mafaí kuo pau ke nau fakangeingeia‘i ‘a e fa‘ahinga ‘oku nau tokanga‘í pea fakafeangai kiate kinautolu ‘i ha founga anga-‘ofa. Kuo pau ke nau manatu‘i ‘oku fiema‘u ‘e Kalaisi ke tau fakahāhā ‘a e ‘ofá ‘i he me‘a kotoa ‘oku tau faí.

²¹ ‘I he fāmilí. Ko e husepānití ‘oku fiema‘u ke ne ‘ofa ‘i hono uaifí “‘o hangē tofu pē ko ia ‘oku fai ‘e he Kalaisí ki he fakataha‘angá.” (‘Ef. 5:25, 28, 29) Kuo pau ke fa‘ifa‘itaki ha husepāniti ki he ‘ofa feilaulau‘i-kita ‘a Kalaisí ‘aki hono fakamu‘omu‘a ‘a e fiema‘u mo e lelei ‘a hono uaifí ‘i ha‘aná. ‘E faingata‘a nai ki he kau tangata ‘e ni‘ihi ke fakahāhā ‘a e ‘ofa peheé, koe‘uhí mahalo na‘e ‘ikai ‘ohake kinautolu ‘i ha ‘ātakai na‘e fakamahu‘inga‘i ai ‘a e fakafeangai totonú mo e anga-‘ofá. ‘E faingata‘a nai ke nau fakatonutonu ‘a e ngaahi tō‘onga koví, ka kuo pau ke nau fai ‘a e ngaahi liliu ko ení koe‘uhi ke talangofua ki he lao ‘a e Kalaisí. Ko ha husepāniti ‘okú ne fakahāhā ‘a e ‘ofa feilaulau‘i-kitá ‘okú ne ma‘u ‘a e faka‘apa‘apa ‘a hono uaifí. Ko ha tamai ‘okú ne ‘ofa mo‘oni ‘i he‘ene fānaú he‘ikai ‘aupito te ne ngaohikovi‘i kinautolu ‘aki ‘a e me‘a ‘okú ne lea‘akí pe faí. (‘Ef. 4:31) ‘I hono kehé, ‘okú ne fakahaa‘i ‘ene ‘ofá mo e lelei‘iá ‘i he ngaahi founga ‘e ‘ai ai ‘ene fānaú ke nau ongo‘i malu. Ko ha tamai pehē ‘okú ne ma‘u ‘a e ‘ofa mo e falala ‘ene fānaú.

22. Hangē ko ia ‘oku hā ‘i he 1 Pita 5:1-3, ko e “fanga sipi” ‘a hai, pea ‘oku totonu ke fēfē ‘a e fakafeangai kiate kinautolú?

²² ‘I he fakataha‘angá. Kuo pau ke manatu‘i ‘e he kau mātu‘á ko e “fanga sipi” ‘oku ‘ikai ‘anautolu. (Sione 10:16; lau ‘a e 1 Pita 5:1-3.) Ko e ngaahi kupu‘i lea “tākanga ‘a e ‘Otuá,” “‘i he ‘ao ‘o e ‘Otuá” mo e “tofi‘a ‘o e ‘Otuá” ‘oku fakamanatu ai ki he kau mātu‘á ko e fanga sipí ‘oku ‘a Sihova ia. ‘Okú ne loto ke nau fakafeangai ki he‘ene fanga sipí ‘i he ‘ofa mo e anga-fakaalaala. (1 Tes. 2:7, 8) Ko e kau mātu‘a ‘oku nau fakahoko honau fatongiá ‘i he ‘ofá ‘oku nau ma‘u ‘a e hōifua ‘a Sihová. ‘Oku ma‘u foki ‘e he kau mātu‘a ko iá ‘a e ‘ofa mo e faka‘apa‘apa ‘a honau fanga tokouá mo e fanga tuofāfiné.

23-24. (a) Ko e hā ‘a e fatongia ‘o e kau mātu‘á ‘i he ngāue ki ha faihala mafatukituki? (e) ‘I he ngāue ki he ngaahi faihala peheé, ko e hā ‘oku fiema‘u ke manatu‘i ‘e he kau mātu‘á?

 ²³ Ko e hā ‘a e fatongia ‘o e kau mātu‘á ‘i he ngāue ki ha faihala mafatukituki? Ko honau fatongiá ‘oku kehe ia mei he kau fakamaau mo e kau mātu‘a na‘a nau ‘i he malumalu ‘o e Lao na‘e ‘oange ‘e he ‘Otuá ki ‘Isilelí. ‘I he Lao ko iá, ko e kau tangata ‘osi fakanofó na‘e ‘ikai ke ngata pē ‘enau ngāue ki he ngaahi me‘a fakalaumālié kae toe pehē ki he ngaahi hopo sivile mo e hopo hiá. Ka ‘i he malumalu ‘o e lao ‘a e Kalaisí, ko e fatongia ‘o e kau mātu‘á ko hono tokanga‘i pē ‘a e ngaahi tafa‘aki fakalaumālie ‘o e faihalá. ‘Oku nau lāu‘ilo ko e kau ma‘u mafai fakamāmaní ‘oku nau ma‘u ‘a e fatongia kuo ‘oange ‘e he ‘Otuá ke nau ngāue ki he ngaahi hopo sivilé mo e hopo hiá. ‘Oku kau ki ai hono hilifaki ‘e he kau ma‘u mafaí ‘a e tautea pa‘anga pe tuku pilīsone.​—Loma 13:1-4.

²⁴ Ko e hā ‘a e fatongia ‘o e kau mātu‘á ‘i hono fakahoko ‘e ha taha ‘i he fakataha‘angá ha angahala mamafa? ‘Oku nau ngāue‘aki ‘a e Folofolá ke sivisivi‘i ‘aki ‘a e ngaahi me‘á pea fai ‘a e filí. ‘Oku nau manatu‘i ko e ‘ofá ‘a e makatu‘unga ki he lao ‘a e Kalaisí. ‘Oku ue‘i ‘e he ‘ofá ‘a e kau mātu‘á ke nau fakakaukau: Ko e hā ‘oku fiema‘u ke fai ke tokoni ai ki ha taha ‘i he fakataha‘angá kuo ma‘ukovia ‘i ha faihala? ‘I he fekau‘aki mo e tokotaha faihalá, ko e ‘ofá ‘okú ne ue‘i ‘a e kau mātu‘á ke nau fakakaukau: ‘Okú ne fakatomala? ‘E lava ke tau tokoni kiate ia ke fakalelei‘i hono vaha‘angatae mo Sihová?

25. Ko e hā ‘e lāulea ki ai ‘a e kupu hoko maí?

²⁵ He hounga‘ia ē ko kitautolu ‘i he‘etau ‘i he malumalu ‘o e lao ‘a e Kalaisí! ‘I he‘etau ngāue mālohi kotoa ke talangofua ki aí, ‘oku tau tokoni ai ke ‘ai ‘etau fakataha‘angá ko ha feitu‘u ‘a ia ‘e lava ke ongo‘i ai ‘e he tokotaha taki taha ‘oku ‘ofa‘i mo fakamahu‘inga‘i kinautolu pea malu ai. Neongo ia, ‘oku tau mo‘ui ‘i ha māmani ‘a ia ko e “kau tangata fulikivanú” kuo nau ‘alu “mei he kovi ki he kovi ange.” (2 Tīm. 3:13) Kuo pau ke tau hanganaki ‘ā‘ā. ‘E lava fēfē ke tapua atu ‘e he fakataha‘anga Kalisitiané ‘a e fakamaau totonu ‘a e ‘Otuá ‘i he fekuki mo e ngaohikovia fakaefehokotaki fakasino ‘o e fānaú? Ko e kupu hoko maí ‘e tali ai ‘a e fehu‘i ko iá.