Ko e ngaahi kikite ‘oku lave ki ai ‘i he saati ko ení ‘oku fehope‘aki. ‘Oku fakamo‘oni‘i ai ‘oku tau mo‘ui ‘i he “taimi ‘o e ngata‘angá.”—Tan. 12:4.

• Tohi Tapu Fkh. 11:7; 12:13, 17; 13:1-8, 12

  Kikite Kuo ‘alu fano holo ‘a e “manu fekai” ‘i he māmaní ‘i he laui senituli. ‘I he taimi ‘o e ngata‘angá, ‘e lavea e ‘ulu hono fitú. Ki mui ai, ‘e sai hono laveá pea ko e “kotoa ‘o e māmaní” ‘oku nau muimui ki he manú. ‘Oku ngāue‘aki ‘e Sētane ‘a e manú “ke faitau mo e toenga ‘o e hako.”

  Fakahoko Hili ‘a e Lōmakí, na‘e ‘asi hake ‘a e ngaahi pule‘anga fakaetangata ‘oku nau fakafepaki ki he ‘Otuá. ‘I ha laui senituli ki mui ai, ‘i he Tau I ‘a Māmaní, na‘e mātu‘aki vaivai ‘a e ‘Emipaea Pilitāniá. Na‘e toe mālohi ‘i he‘ene kau fakataha mo ‘Ameliká. Tautefito ‘i he taimi ‘o e ngata‘angá, ‘oku ngāue‘aki ‘e Sētane ‘ene fokotu‘utu‘u fakapolitikalé ke fakatanga‘i ‘a e kakai ‘a e ‘Otuá.

• Tohi Tapu Tan. 11:25-45

  Kikite Fe‘au‘auhi ‘a e tu‘i ‘o e tokelaú mo e tu‘i ‘o e tongá lolotonga e taimi ‘o e ngata‘angá.

  Fakahoko Fe‘auhi ‘a Siamane mo Pilitānia-‘Amelika ki he mafaí. ‘I he 1945 na‘e hoko ‘a e Sovieti ‘Iunioní mo ‘ene fa‘ahí ko e tu‘i ‘o e tokelaú. ‘I he 1991, na‘e tō ‘a e Sovieti ‘Iunioní, pea ki mui ai ko Lūsia mo ‘ene fa‘ahí na‘e hoko ko e tu‘i ‘o e tokelaú.

• Tohi Tapu ‘Ai. 61:1; Mal. 3:1; Luke 4:18

  Kikite ‘Oku fekau‘i atu ‘e Sihova ‘ene “talafekaú” ke “faka‘ata‘atā ha hala” ki mu‘a ke fokotu‘u ‘a e Pule‘anga Faka-Mīsaiá. Ko e kulupu ko ení na‘e kamata ke nau “talaki ‘a e ongoongo leleí ki he kau anga-vaivaí.”

  Fakahoko Mei he 1870 tupú ‘o faai mai, ko C. T. Russell mo hono kaungāfeohí na‘a nau faivelenga ‘i he fekumi ki he mo‘oni Fakatohitapú. ‘I he 1880 tupú, na‘e kamata ke nau fakamamafa‘i ‘a e fiema‘u ki he kau sevāniti ‘a e ‘Otuá ke malangá. Na‘a nau pulusi ‘a e kupu hangē ko e “Fiema‘u ‘a e Kau Malanga ‘e 1,000” mo e “Kau Paní ke Malanga.”

• Tohi Tapu Māt. 13:24-30, 36-43

  Kikite ‘Oku tūtuu‘i ‘e ha fili ‘a e tea ‘i ha ngoue uite ‘a ia ‘oku faka‘atā ke na tupu fakataha kae ‘oua ke a‘u ki he utu-ta‘ú; pea ‘e fakamavahe‘i leva ‘a e uité mei he teá.

  Fakahoko Mei he 1800 tupú, na‘e kamata ke fakafaikehekehe‘i ‘a e kau Kalisitiane mo‘oní mei he kau Kalisitiane loí. Lolotonga ‘a e taimi ‘o e ngata‘angá, ‘oku fakatahataha‘i ‘a e kau Kalisitiane mo‘oní pea fakamavahe‘i mei he kau Kalisitiane loí.

• Tohi Tapu Tan. 2:31-33, 41-43

  Kikite Ko e lau‘iva‘e ukamea mo e ‘umea ‘o e ‘īmisí ‘oku fa‘u‘aki ‘a e ngaahi mētale kehekehe.

  Fakahoko Ko e ‘umeá ‘okú ne fakafofonga‘i ‘a e kakai anga-maheni ‘oku ‘i he malumalu ‘o Pilitānia-‘Ameliká ‘a ia ‘oku nau fakafepaki kiate kinaua. ‘Oku fakavaivai‘i ‘e he kakai ko iá ‘a e malava ‘a e hau ‘i māmaní ke ne ngāue hangē ha ukameá.

• Tohi Tapu Māt. 13:30; 24:14, 45; 28:19, 20

  Kikite Tānaki “‘a e uité” ki he “feleokó” pea fakanofo ‘a e “tamaio‘eiki anga-tonu mo potó” ke tokanga‘i “‘a e kau sevāniti ‘i hono falé.” Kamata ke mafola atu hono malanga‘i ‘o e “ongoongo lelei ko ‘eni ‘o e Pule‘angá” ‘i he “kotoa ‘o e māmani kuo nofo‘í.”

  Fakahoko ‘I he 1919 na‘e fakanofo ‘a e tamaio‘eiki anga-tonú ke tokanga‘i ‘a e kakai ‘a e ‘Otuá. Mei ai ‘o faai mai, na‘e laka ki mu‘a ‘a e ngāue fakamalanga ‘a e Kau Ako Tohi Tapú. ‘I he ‘ahó ni, ‘oku malanga ‘a e Kau Fakamo‘oni ‘a Sihová ‘i he fonua ‘e 200 tupu pea pulusi mo e ‘ū tohi Fakatohitapu ‘i he lea ‘e 1,000 tupu.

• Tohi Tapu Tan. 12:11; Fkh. 13:11, 14, 15

  Kikite ‘Oku takimu‘a ‘a e manu fekai ‘ulu ‘e uá ‘i hono ngaohi “ha ‘īmisi ki he manu fekaí” pea ‘oange “ha mānava ki he ‘īmisi.”

  Fakahoko Na‘e takimu‘a ‘a e Pule‘anga Hau ‘i Māmani ko Pilitānia-‘Ameliká ‘i hono fokotu‘u ‘a e Kautaha ‘a e Ngaahi Pule‘angá. ‘Oku poupou‘i ‘a e kautaha ko ení ‘e he ngaahi pule‘anga kehe. Faai atu pē, ko e tu‘i ‘o e tokelaú na‘e kau fakataha mo e Kautaha ‘a e Ngaahi Pule‘angá—ka mei he 1926 pē ki he 1933. Na‘e tui ‘a e kakaí ‘e ‘omai ‘e he Kautahá ‘a e melinó ‘a e me‘a ‘e toki ‘omai pē ‘e he Pule‘anga ‘o e ‘Otuá. Na‘a nau toe tui pehē fekau‘aki mo e UN.

• Tohi Tapu Tan. 8:23, 24

  Kikite Ko ha tu‘i mata‘i-fīta‘a ‘okú ne ‘omi “ha faka‘auha ‘i ha founga anga-kehe.”

  Fakahoko Kuo fakatupunga ‘e he Pule‘anga Hau ‘i Māmani ko Pilitānia-‘Ameliká ha fu‘u faka‘auha. Ko e fakatātaá, ‘i he Tau II ‘a Māmaní, na‘e fakatupunga ‘e ‘Amelika ha faka‘auha fakalilifu ‘i ha tu‘unga ta‘ehanotatau ‘i he‘ene lī ‘a e pomu ‘ātomi ‘e ua ‘i he fili ‘o e hau ‘i māmaní.

• Tohi Tapu Tan. 11:31; Fkh. 17:3, 7-11

  Kikite ‘Oku ‘alu hake mei he luo ta‘ehanotakelé ‘a e “manu fekai lanu kula ‘aho‘aho” mo e me‘atui ‘e hongofulú pea ko e tu‘i hono valú ia. ‘Oku lave ‘a Taniela ki he tu‘i ko ení ko e “me‘a fakalielia ‘okú ne fakatupunga ‘a e ‘auhá.”

  Fakahoko Ko e Kautaha ‘a e Ngaahi Pule‘angá na‘e ngata ia ‘i he Tau II ‘a Māmaní. Hili ‘a e taú, na‘e “fokotu‘u” ‘a e UN. Ko e UN, hangē ko e Kautaha ki mu‘a aí, kuo ‘ave ki ai ‘a e fakalāngilangi ‘a ē ‘oku totonu ke ‘ave ki he Pule‘anga ‘o e ‘Otuá. ‘E ‘ohofi ‘e he UN ‘a e lotú.

• Tohi Tapu 1 Tes. 5:3; Fkh. 17:16

  Kikite ‘E fanongonongo ‘e he ngaahi pule‘angá ‘a e “melino mo malu,” pea ko e “me‘atui ‘e hongofulu” mo e “manu fekaí” te nau ‘ohofi ‘a e “fefine fe‘auakí” pea faka‘auha ia. Hili iá, ‘e faka‘auha ‘a e ngaahi pule‘angá.

  Fakahoko ‘E taku nai ‘e he ngaahi pule‘angá kuo nau ma‘u ‘a e melino mo malu. Ko e ngaahi pule‘angá leva te nau poupou ki he UN ke faka‘auha ‘a e lotu loí. ‘E faka‘ilonga‘i heni ‘a e kamata‘anga ‘o e fu‘u mamahi lahí. ‘E ngata ‘a e mamahi lahi ko iá ‘i hono faka‘auha ‘a e fokotu‘utu‘u kotoa ‘a e māmaní ‘i ‘Āmaketone.

• Tohi Tapu ‘Isi. 38:11, 14-17; Māt. 24:31

  Kikite ‘E ‘ohofi ‘e Koki ‘a e fonua ‘o e kakai ‘a e ‘Otuá. Pea ‘e tānaki fakataha leva ‘e he kau ‘āngeló ‘a e “fa‘ahinga kuo filí.”

  Fakahoko Ko e tu‘i ‘o e tokelaú, fakataha mo e toenga ‘o e ngaahi pule‘anga ‘o e māmaní, te nau ‘ohofi ‘a e kakai ‘a e ‘Otuá. ‘I ha vaha‘a taimi hili ‘a e kamata ‘a e ‘ohofi ko ení, ko e toenga ‘o e kau paní ‘e tānaki fakataha ki hēvani.

• Tohi Tapu ‘Isi. 38:18-23; Tan. 2:34, 35, 44, 45; Fkh. 6:2; 16:14, 16; 17:14; 19:20

  Kikite Ko e “tokotaha na‘e heka” ‘i ha “hoosi hinehina” ‘okú ne fakakakato “‘ene ikuná” ‘aki hono faka‘auha ‘a Koki mo ‘ene kau taú. Ko e “manu fekaí” ‘oku lī “ki he ano afi ‘oku ulo sūlifa,” pea ‘e faka‘auha mo e fu‘u ‘īmisí.

  Fakahoko Ko Sīsū, ‘a e Tu‘i ‘o e Pule‘anga ‘o e ‘Otuá, te ne ha‘u ke fakahaofi ‘a e kakai ‘a e ‘Otuá. Fakataha mo hono kaungāpule ‘e toko 144,000 mo ‘ene kongakau fakae‘āngeló, te ne faka‘auha ‘a e kulupu ‘o e ngaahi pule‘angá, ‘a e fokotu‘utu‘u fakapolitikale kotoa ‘a Sētané.